2 Corinthians 9 - Luaniua New Testament

Kipukipu kekonaꞌi alakama keloku

¹ Okou naailoa avale nakipukipu kekonaꞌi nakama ekapu Keakua. Kela hea anau mesekakaa aku nakipukipu la.

² Anau emakino pela okou eaunahie kekonaꞌi nahakina ana iloko Judea. Ia kena anau ekakala ahu aꞌe nakipukipu okou i nakama i Macedonia penei, “Nahakina ana iloko Greece nakanakana mai avale hekau ulaꞌa la ma ikonaꞌi nahakina ana iloko Judea.” Okou emakaola kekonaꞌi nahakina ana la, ia kena komaꞌi kekama iloko Macedonia hihai ikonaꞌi nakama la hoi.

³ Ia anau sehihai pela nakakala ahu anau la melano vale. Ia kena anau mehaunalia aku koꞌokolu nakaina maua la. Pela okou mekanakana nahoꞌi okou la, ehau poi anau nime aꞌe nakama la.

⁴ Aoki alakama i Macedonia meo aku ma maua imuli, kena nakama la amelave pela okou seikanakana oia. Kena maua menapa lo, maikinimea maua usala kekakala. Ia kena okou menapa hoi.

⁵ Okou nime aꞌe imua pela okou meau aꞌe nahoꞌi la. Kela hea anau eme aꞌe koꞌokolu nakaina maua la meo aku nomaka okou imua, pela iko nahoꞌi okou la. Ihuli aꞌe pela okou eaunahie keau aꞌe nahoꞌi la, ia seai pela okou ikaohi muli namela.

⁶ Okou imanaku nakakala nei. Poi hekama ekoli nahua emoisi, kena kama na meko naꞌai moisi. Ia poi hekama ekoli nahua komaꞌi, kena kama na meko naꞌai komaꞌi hoi.

⁷ Kakou hakoa ekau kehoꞌi aꞌe alakama kaukali nahakaꞌoko kakou sokakou. Kakou isekali pela nakama la iainoa mai nimea ma lakou. Ia kakou isekaohi muli namela. Maikinimea Keakua ehihai nakama kela eaumalie.

⁸ Ia Keakua elolosi laoi okou i namahi aia. Pela okou mekuku laoi naualoko hakoa. Ia kena okou melavaa kepena kahi naheheaꞌu kaualeꞌa.

⁹ Nakakala nei emau iho iloko kelauniu kapu, “Kama la evavae aꞌe nahoꞌi aia i nakama haaloha. Ia nakipukipu ekonu aia la selavaa keoki.”

¹⁰ Keakua eau mai nahua kakou ikoli. Ia kama la eau mai naꞌai kakou iꞌai hoi. Ia kena kama la meau aku okou nahoꞌi aia, pela okou amelavaa kepena kahi namea konu.

¹¹ Kena Keakua memea okou nokuku laoi, pela okou melavaa kehoꞌi aꞌe komaꞌi namea. Ia keualoko maua evavae aꞌe nahoꞌi okou la, komaꞌi kekama mehamaha i Keakua.

¹² Keualoko okou eau aꞌe nahoꞌi la, okou ekonaꞌi nakama ekapu Keakua la nokuku laoi. Ia kena imea nakama la ihamaha kahi aꞌe Keakua.

¹³ Okou emea pela okou ehakina kelono kaualeꞌa Christ. Ia keualoko okou ehoꞌi aꞌe namea i alakama, okou ehuli aꞌe pela okou ehalono hamaoni Christ. Ia kena komaꞌi nakama mehamaha i Keakua i namea okou evavae aꞌe la.

¹⁴ Ia nakama la meloku manaku okou hoi. Maikinimea Keakua elolosi laoi okou hakoa, pela imea okou ikonaꞌi alakama.

¹⁵ Kakou ihamaha i Keakua, maikinimea kama la niau iho kakou kehoꞌi kaualeꞌa aia la. Kela elaꞌa iluna namea kakou ehakaꞌoko la.