2 Corinthians 8 - Luaniua New Testament

Nahoꞌi nakama keloku

¹ Aukaina. Maua hihai okou iailoa pela Keakua elolosi laoi nahakina ana iloko Macedonia.

² Komaꞌi nakapahala ekae aꞌe nakama la, pela imea naola nakama la ihainakaa. Ia niaina ma nakama la ekuku haeꞌo, nakama la ehihia lo, kena iaunahie kevavae aꞌe naheheaꞌu lakou la ikonaꞌi alakama.

³ Anau eme aku okou kehamaoni pela nakama la eau aꞌe hakoa nia lakou ehakaꞌoko keau aꞌe. Ia eꞌila pela nakama la eau aꞌe elaꞌa iluna nia lakou ekau keau aꞌe la.

⁴ Nakama la eainoa mai maua pela lakou ilavaa kesuꞌui ma maua nokonaꞌi nakama ekapu Keakua iloko Judea.

⁵ Maua emasalo i namea nakama la eau aꞌe la. Nakama la ehoꞌi aꞌe lakou solakou i Kealiꞌi imua. Ia kena imuli, nakama la ehoꞌi mai maua naola lakou hoi, ikaukali hea Keakua hihai.

⁶ Titus eꞌamaka nololosi hakaualeꞌa nahakina ana la imua. Ia kena maua eme aꞌe kama la ikauhano noheheaꞌu ma okou, pela okou mekonaꞌi nakama haaloha la hakoa.

⁷ Okou ekaukali hamaoni nakipukipu kaualeꞌa hakoa. Okou ehakina hamaoni, ia ekakala hakaualeꞌa. Okou emakonu haeꞌo, ia hihai ikonaꞌi alakama. Ia okou elaoi hamaoni maua. Kena maua hihai okou ikaukali hamaoni nakipukipu kelolosi laoi alakama, kaohi mua nahakina ana i Jerusalem.

⁸ Ia seme pela anau ekuꞌu kuaa kela okou ikaukali. Seai. Anau ekakala aku nakipukipu kaualeꞌa nakama Macedonia la, pela ihahani okou. Anau ehihai imakino laoi pela kelaoi okou na ehamaoni.

⁹ Okou naailoa avale pela kakou Aliꞌi Jesus Christ elolosi laoi kakou. Niaina ma keola aia la uꞌakoa, kama la ekuu aia soia ilalo, nomemo kama haaloha, pela ikonaꞌi naola okou iꞌakoa hoi.

¹⁰ Hakaꞌoko anau eme penei. Okou ehakaꞌoko kekonaꞌi nahakina ana i Jerusalem hekau ulaꞌa la, kena okou ukonaꞌi hamaoni nakama la. Ekaualeꞌa pela okou ikauhano

¹¹ nohaoki hea okou nihoꞌi aꞌe nakama la. Okou eaunahie kehoꞌi aꞌe naheheaꞌu okou la. Kena okou ikauhano nohaoki aꞌe namea la.

¹² Poi hekama eaunahie kehoꞌi aꞌe naheheaꞌu aia la, kena Keakua amehihia i namea kama na eau aꞌe la. Niaina ma namea la emoisi, Keakua amehihia oia.

¹³ Anau semea aku okou ikonaꞌi nakama la pela imea okou ikuku haeꞌo. Seai. Anau hihai okou hakoa ihanakahi oia.

¹⁴ Vahonei, okou ekuku laoi, ia ame kaualeꞌa pela okou ikonaꞌi nakama kela ekuku haeꞌo la. Poi okou ekuku haeꞌo imuli, kena nakama la mekonaꞌi okou hoi. Pela okou meo mai nohanakahi.

¹⁵ Nakakala nei emau iho iloko kelauniu kapu, “Kama kela ekali mai naꞌai komaꞌi, Kama la sehiꞌai ekoe. Ia kama kela ekali mai naꞌai moisi, Eko naꞌai kela ekau maia.”

Titus ia ma nakaina aia keloku

¹⁶ Maua ehamaha i Keakua, maikinimea kama la emea Titus noaloha aku okou poi maua nei hoi.

¹⁷ Titus epena kaukali hea maua eme aꞌe aia. Ia kena kama la soia ehakaꞌoko pela aia ihaele aku i okou.

¹⁸ Ia maua ehaunalia aku kelaa kaina keloku hoi, ikaꞌa ma Titus. Nahale loku hakoa ehamaha kaina kakou la, maikinimea kama la ekaukaꞌu konu kelono kaualeꞌa.

¹⁹ Kelaa mea hoi, nahale loku ekini kama la ikakaꞌa ma maua noꞌave kehoꞌi nei i Jerusalem. Ihuli aꞌe namahi Kealiꞌi, ia ihuli aꞌe hoi pela maua hihai ikonaꞌi nakama haaloha.

²⁰ Keualoko maua mevavae aꞌe nahoꞌi nei, maua melolosi hapulu, aoki keonohenua la amekaumaluu mai maua.

²¹ Maua mevavae halaoi namea la ikonu i namaisu Kealiꞌi. Kena sehikama amehakaꞌoko pela maua ehailavaꞌa namea la.

²² Ia maua ehaunalia aku kela kaina maua ma koꞌolua la. Maua uoki kehaꞌikeꞌike kama la. Ia kena maua emakino pela kama la eaunahie kekonaꞌi hamaoni okou. Kama la ehakina pela nakipukipu okou la ekaualeꞌa, kela hea kama la emakaola kekonaꞌi okou.

²³ Titus hesoa laoi anau. Maua eheheaꞌu hakoa ikonaꞌi okou. Nahale loku ehaunalia aku koꞌolua nakaina maua la hoi ihuli aku namahi Christ.

²⁴ Ia kena okou ilaoi koꞌokolu la imua namaisu nahakina ana la. Ihuli aꞌe pela maua ekau keahu i nakipukipu okou la.