2 Corinthians 7 - Luaniua New Testament

¹ Aukaina. Ala nikakala hamaoni kela Keakua nime mai kakou. Kela hea kakou ekau kehakea naola kakou. Kakou ihaluu ikaha ma namea hakoa kela emea nakinokama kakou ia ma nahakaꞌoko kakou la nosaꞌino. Ia kena kakou ihamaha Keakua, kena ikaukali nakipukipu aia ekapu la.

Paul ehihia lo

² Okou ekau kekolia halaoi maua. Maikinimea maua sehimea epena esala i alakama. Maua seusuusu alakama, ia sehailavaꞌa alakama hoi.

³ Ia anau seme aku nakakala la pela ihai aku okou. Seai. Anau name aku avale pela maua ehihai ikolia halaoi okou. Poi okou oiola, maua hihai iola ma okou. Ia niaina ma okou amemake, kena maua hihai imake ma okou hoi.

⁴ Anau emakino laoi pela nakipukipu okou la ekaualeꞌa. Ia kena anau ekakala aꞌe alakama nakipukipu okou la. Okou ehapoꞌi halaoi anau. Niaina ma naola maua ehainakaa, anau ehihia lo.

⁵ Keualoko maua nikae Macedonia, maua sehamalolo. Vahola, naola maua ehainakaa haeꞌo. Komaꞌi kekama ehakaukau ma maua, kena maua emakaꞌu haeꞌo.

⁶ Ia kena Keakua ehaunalia mai Titus nohapoꞌi halaoi maua. Maikinimea Keakua ehihai ihapoꞌi halaoi nakama kipuaina.

⁷ Vahola, maua ehihia, maikinimea Titus ehamai. Ia maua ehihia hoi, maikinimea okou ehapoꞌi halaoi Titus. Kama la eme mai pela okou ealoha anau, ia ekipuaina i nahaisala okou, kena ehihai ikonaꞌi hamaoni anau. Ia kena anau ehihia lo.

⁸ Alohai. Keualoko anau nikakaa aku kelauniu imua la, anau emea okou nokipuaina. Ia okou ekipuaina kamaualoko oia. Kena anau sealoha haeꞌo.

⁹ Emeia anau hihia avale. Anau sehihia keualoko okou ekipuaina. Seai. Vahola, okou ekipuaina ikau ma kehakaꞌoko Keakua nokiꞌe ikaha ma nahaisala okou. Kena eꞌila pela kelauniu anau la semea naola okou la nosaꞌino.

¹⁰ Keualoko okou ekipuaina i nahaisala okou ikau ma kehakaꞌoko Keakua, kena okou mekiꞌe ikaha ma nahaisala okou la. Kena Keakua mekonaꞌi okou iola. Ia okou mesenapa i naola okou vahonei la. Ia poi okou ekipuaina kaukali nahakaꞌoko okou soꞌokou, kena okou meseko keola la. Okou memake oia.

¹¹ Ila aꞌe. Vahonei okou ekipuaina ikau ma kehakaꞌoko Keakua. Kela hea okou ehapulupulu kehuli aꞌe pela okou ukiꞌe ikaha ma nahaisala okou la. Okou emasalo haeꞌo i nakama haisala, ia okou ehamaha Keakua. Kena okou ehihai pela Keakua mehakonukonu nakama haisala la. Okou ealoha anau, kena ehihai ikonaꞌi hamaoni anau. Ia kena okou ehuli aꞌe pela okou sehimesala.

¹² Keualoko anau ekakaa aku kelauniu la, anau sehakaꞌoko i kekama kela epena namea esala la. Ia anau sehakaꞌoko hoi i kekama kela ehalono lihu i namea esala la. Seai. Anau ekakaa aku kelauniu la imakino okou pela okou ekonaꞌi hamaoni maua imua namaisu Keakua.

¹³ Ia kena okou ehapulupulu hamaoni maua. Okou ehapulupulu maua. Ia maua ehihia hoi, maikinimea Titus ehihia keualoko okou hakoa ekonaꞌi aia isekipuaina.

¹⁴ Anau ekakala aꞌe Titus pela nakipukipu okou la ekaualeꞌa. Ia anau senapa i nakakala anau la. Maikinimea namea hakoa maua nikakala aku i okou la ehamaoni. Ia nakakala maua eme aꞌe Titus la uo mai nohamaoni hoi.

¹⁵ Titus elaoi mahi okou. Maikinimea kama la emanaku pela okou ehalono nakakala aia, kena ehamaha aia keualoko okou ekolia halaoi aia.

¹⁶ Anau ehihia, maikinimea anau elavaa kekunaꞌi hamaoni okou.