2 Corinthians 6 - Luaniua New Testament

¹ Maua eheheaꞌu ma Keakua. Kena maua eme aku okou iko kama la ilolosi laoi okou. Ia okou isehakaꞌoko pela kelaoi Keakua la hemevale oia.

² Kama la eme ma, “Keualoko anau ehihai isapai okou, Anau ehalono nakakala okou. Ia keualoko anau mekonaꞌi okou, Anau mekonaꞌi okou noola.” Halono mai. Keakua ehihai ikonaꞌi okou iola vahonei oia.

³ Maua semea nahakaꞌoko alakama isaꞌino, aoki nakama la amesalu haeꞌo i naheaꞌu maua nei.

⁴ Emeia maua ehuli aꞌe pela maua eheheaꞌu ma Keakua. Ia kena maua enoho havalekoa keualoko maua ekili nakapahala, naluꞌuna, ia ma namea hainakaa hakoa.

⁵ Alakama eliliꞌi maua, nopono lia maua i kelokapu. Ia alakama ehakui maua ikaha. Nakinokama maua ekahi keheheaꞌu mahi. Ia maua semoe kepo, kena hiꞌai hoi.

⁶ Ia niaina, nakipukipu naola maua la emakahua. Maua eailoa laoi Keakua, kena enoho havalekoa. Maua ememe halaoi alakama, ia ehakea naola maua. Kena maua elaoi hamaoni nakama hakoa.

⁷ Maua ekakala aku kehamaoni, ia ehuli aku namahi Keakua. Maua ehuli aꞌe nakipukipu ekonu la hakoa, pela ivuhu ma namea saꞌino.

⁸ Alakama ehamaha maua, ia alakama ehanapa maua. Alakama ekakala hakaualeꞌa maua, ia alakama ehai mai maua. Niaina ma maua nikama hamaoni, alakama eme ma maua usuusu alakama.

⁹ Niaina ma komaꞌi kekama emakino laoi maua, alakama eme ma lakou semakino maua. Maua kapili make, ia maua oiola oia. Alakama ekaa maua, ia maua semake.

¹⁰ Niaina maua ealoloha, maua ehihia kahi oia. Niaina maua ekuku haeꞌo, maua evavae aꞌe alakama komaꞌi namea. Maua sehimea, ia maua eisi namea hakoa.

¹¹ Keualoko maua ekakala aku okou nakama Corinth, maua sehikakala ehuu. Maua ehuli aku pela maua elaoi hamaoni okou.

¹² Maua ekauhano nolaoi okou. Ia okou sekauhano nolaoi maua.

¹³ Anau ekakala aku i okou poi okou nikamaliꞌi anau. Okou ihuli mai nakipukipu kaualeꞌa kela maua nihuli aku i okou la. Okou ilaoi hamaoni maua.

Nakipukipu nakama enoho pouli

¹⁴ Okou sekau kesuꞌui ma nakama sehakina la. Maikinimea nakama ekonu eꞌee ikaha ma nakama esala. Kemasina selavaa kehapaa ma kepouli.

¹⁵ Kehakaꞌoko Christ eꞌee ikaha ma kehakaꞌoko Satan. Ia nahakina ana sekau kehapaa ma nakama sehakina.

¹⁶ Nahakipua sekau kekuu iloko hale kehale kapu Keakua. Ia kakou kehale kapu Keakua eola kahi. Ia kama la nime mai kakou ma, “Anau menoho ma nakama la, Ia anau mekaꞌa ma lakou. Ia anau meme mo Akua lakou, Ia nakama la meme mo onohenua anau.”

¹⁷ Ia kena Kealiꞌi emea ma, “Okou ikiaꞌi nakama la, Ia okou ihavaꞌee soꞌokou ikaha ma nakama la. Ia okou iseapaꞌe namea saꞌino. Kena anau meko lia halaoi okou.

¹⁸ Ia anau meme mo kamana okou, Ia okou meme mo kamaliꞌi kanaka anau, Ia ma kamaliꞌi hine anau. Anau Kealiꞌi hananiu eme aku nakakala nei.”