2 Corinthians 4 - Luaniua New Testament

Kelono kaualeꞌa Keakua

¹ Keakua ealoha maua, ia kena iau mai maua keheaꞌu nei. Kela hea maua sekiaꞌi keheaꞌu la.

² Emeia maua ukiaꞌi nakipukipu ehunaa kela elavaa kemea maua inapa. Kena maua sehailavaꞌa alakama, ia sehakiꞌe sala nakakala Keakua. Emeia maua ehaꞌali aku nakakala hamaoni imua namaisu Keakua, pela alakama memakino laoi nakipukipu maua la ekaualeꞌa.

³ Kelono kaualeꞌa kela maua ekaukaꞌu nei amehunaa lia. Ia kelono kaualeꞌa na ehunaa lia i nakama kela elano ikaha ma Keakua la oia.

⁴ Nakama la sehakina Keakua. Ia kena kipua kemaalama nei la emea nahakaꞌoko nakama la nopouli. Kela hea nakama la selavaa keꞌike kemasina kelono kaualeꞌa la. Kela namahi Christ. Ia Christ ekipu poi Keakua.

⁵ Maua ekaukaꞌu aku pela Jesus Christ o Kealiꞌi. Ia maua sekaukaꞌu aku nakipukipu maua somaua. Maua heheaꞌu ma okou avale, maikinimea maua ekaukali Jesus.

⁶ Keakua nime maia “ehamasina aꞌe iloko keꞌina pouli.” Ia kama la ehamasina nahakaꞌoko maua hoi. Ime maua nomakino laoi namahi Keakua kela emasina iho ikaha ma namaisu Christ.

⁷ Ia maua ehau poi niloo kela Keakua euku mai nakipukipu kaualeꞌa aia. Kemea nei ehuli aꞌe pela ala senimahi maua. Ala nimahi hananiu Keakua avale.

⁸ Naola maua ehainakaa haeꞌo, ia maua sehamaluu. Maua ehakekele mahi, ia maua sekipuaina.

⁹ Komaꞌi nakama ememe haeꞌo kia maua, ia Keakua sekiaꞌi maua. Niaina ma nakama la ekaa maua, maua semake.

¹⁰ Maua ehuli kahi aꞌe kemake Jesus iloko nakinokama maua. Pela nakama hakoa meꞌike keola kama la iloko maua hoi.

¹¹ Nakama la ehai ma ikaa maua imake, maikinimea maua ekaukali Jesus. Ia kena kama la ehuli aꞌe keola aia iloko maua.

¹² Kehakaꞌoko keme nei eme pela, maua amemake, pela ikonaꞌi okou iola.

¹³ Nakakala nei emau iloko kelauniu kapu, “Anau ehakina, ia kena anau ekakala.” Ia maua ehakina pela hoi. Maua ehakina, ia kena maua ekakala.

¹⁴ Keakua ehamasiꞌe Jesus Christ ikaha ma kemake. Ia kena maua emakino pela kama la mehamasiꞌe maua ikaha ma kemake poi Jesus la hoi. Kena Keakua meiko kakou hakoa nohakuu imua namaisu aia.

¹⁵ Namea nei hakoa meikonaꞌi okou. Keakua melolosi laoi nakama komaꞌi lo. Ia kena nakama la mehamaha kama la, ia ehamalumalu kahi aia.

Kipukipu kehakina

¹⁶ Kela hea maua sekiaꞌi heaꞌu nei. Niaina ma nakinokama maua uo mai nolaumaa, naola hamaoni maua oimaka ola keaho ma keaho.

¹⁷ Maua ehalono lihu hamalie vahonei. Ia kena maua meihuli aꞌe namahi hananiu Keakua naualoko hamau.

¹⁸ Kena maua sehakaꞌoko maha i namea maua eꞌike. Emeia maua ehakaꞌoko maha i namea maua seꞌike. Namea kakou eꞌike la mekaꞌoko kamasaika oia. Ia namea kakou seꞌike la mekaꞌoko naualoko hamau.