2 Corinthians 3 - Luaniua New Testament

Kakala hamaoni Keakua vahonei

¹ Maua ma Timothy seahu pela nakipukipu maua ekonu. Alakama ameau aku nilauniu, imea ma nakipukipu lakou ekonu. Ia maua sehihai iau aku nilauniu pela. Ia maua sehihai okou iau mai nilauniu pela hoi.

² Okou soꞌokou ehau poi helauniu kela ehuli aꞌe nakipukipu maua. Ia kelauniu la emau iho iloko naola maua hoi. Pela nakama hakoa elavaa keꞌike, ia emakino laoi maua.

³ Nakama la eꞌike pela okou helauniu kela Christ ekakaa, kulana maua eheheaꞌu ma kama la. Ia seme pela kama la ekakaa kelauniu la iluna nahaku paa. Seai. Kama la ehamau iho kelauniu la iloko nahakumanava okou i namahi Keanana Kapu Keakua kela eola kahi.

⁴ Maua emakino laoi pela maua ekaukali hamaoni Christ imua namaisu Keakua.

⁵ Ia maua sekau keme aku pela nakipukipu maua ekonu. Emeia Keakua soia ekonaꞌi maua.

⁶ Kama la soia emea maua ikau kekaukaꞌu nakakala hamaoni vahonei la. Ia seme pela maua ekaukaꞌu nakuaa. Seai. Nakama kela ekaukali nakuaa memake oia. Emeia maua ekaukaꞌu nakipukipu Keanana Kapu. Ia Keanana Kapu ehaola kakou.

⁷ Keakua ekakaa nakuaa aia la iluna nahaku paa. Namea la ehuli aꞌe namahi aia, kena emea namaisu Moses la nomasina. Ia niaina kemasina namaisu kama la la uhaele nolano, keonohenua Israel la selavaa keꞌila aꞌe i namaisu kama la. Ia niaina ma nakuaa la ehuli aꞌe namahi Keakua, namela ehuli aꞌe hoi pela nakama hakoa memake.

⁸ Ia namahi Keanana Kapu la elaꞌa iluna ma namahi nakuaa la.

⁹ Niaina ma nakuaa la ehuli aꞌe namahi Keakua, namela ehuli aꞌe hoi pela nakama hakoa ehaisala oia. Ia Keanana Kapu soia memea komaꞌi nakama nokonu i namaisu Keakua, kena ehuli aꞌe namahi Keakua elahi lo.

¹⁰ Namahi nakuaa la uhaele noseai, maikinimea namahi vahonei Keakua la uo mai nolaꞌa iluna.

¹¹ Nakuaa la ehuli aꞌe namahi Keakua imua, ia vahonei namahi nakuaa la uhaele nolano. Ia namahi Keanana Kapu amekaꞌoko kahi, kena namahi aia la elaꞌa iluna ma namahi nakuaa la.

¹² Maua ehakina pela Keakua mehuli mai namahi aia. Ia kena maua semakaꞌu.

¹³ Maua sehau poi Moses. Kama la eꞌuhi pamalo iluna namaisu aia, imea keonohenua Israel la iseꞌike pela namahi Keakua la elano ikaha maia.

¹⁴ Ia niaina vahonei, keualoko nakama la epau kelauniu nakuaa imua la, eme pela pamalo eꞌuhi iluna namaisu lakou. Ia kena nahakaꞌoko lakou upuia lia. Ia poi hekama esuꞌui ma Christ, kena Christ eui pamalo la ikaha.

¹⁵ Ia kena vahonei, keualoko nakama la epau nakuaa Moses la, nahakumanava lakou oipouli oia.

¹⁶ Ia poi hekama esui hakaꞌoko aia nokaukali Kealiꞌi, kena Kealiꞌi meui pamalo la ikaha ma namaisu kama na.

¹⁷ Ia “Kealiꞌi” la, kela Keanana Kapu. Ia keualoko Keanana Kapu Kealiꞌi enoho ma kakou, kena kakou mekana hamaoni.

¹⁸ Kakou hakoa sehimea eꞌuhi namaisu kakou. Kena kakou ehuli aꞌe namahi Keanana Kapu Kealiꞌi. Ia kama la ehuli aꞌe namahi hananiu aia la iloko naola kakou, imea kakou ikipu poi aia la hoi.