2 Corinthians 12 - Luaniua New Testament

¹ Niaina ma nakakala ahu nei mesekonaꞌi kakou, anau mekauhano kekakala aku i okou. Anau mekakala aku namea hananiu kela Kealiꞌi ehuli mai anau.

² Anau emakino hekama kela ehakina Christ. Sehui ma haa nahekau kela ulaꞌa la, Keakua niko lia kama la noꞌave i kevaelani hakoukolu ialuna. Ia anau semakino laoi pela kinokama kama la la ehaele iluna. Poi seai, kama la eꞌike hakaꞌoko aia i keꞌina la oia. Keakua soia eailoa.

^3-4 Ia Keakua eko kama la noꞌave i keꞌina nakama ekonu la enoho. Kena kama la elono namea kela sehikama ekau kekakala. Ia anau semakino laoi pela kinokama kama la la ehaele iluna. Poi seai, kama la eꞌike hakaꞌoko aia la i keꞌina la oia. Keakua soia eailoa.

⁵ Kena anau mekakala ahu aku i okou i nakipukipu kama la, ia mesekakala ahu i nakipukipu anau sonau. Anau mekakala oia pela anau selavaa kehai namahi anau.

⁶ Niaina anau ekakala ahu i namea la, anau sekakala vale. Maikinimea anau ekakala aku okou i namea hamaoni. Ia anau ame sekakala ahu, maikinimea anau sehihai alakama ihakaꞌoko maha i anau. Ia okou ekau kehakaꞌoko maha i anau i namea kela okou elono anau ekakala la, ia ma namea okou eꞌike anau epena la.

⁷ Ia anau selavaa keahu i namea hananiu kela Kealiꞌi ehuli mai anau. Maikinimea kamaꞌina kinokama anau ehalono lihu. Ia kelihu la ehau poi hekama kela Satan ehaunalia iho novuhu manau.

⁸ Koukolu naualoko anau eloku aꞌe Kealiꞌi iko kelihu nei ikaha manau.

⁹ Ia kama la eme mai pela, “Anau elolosi hakaualeꞌa aꞌoe. Ia kipukipu anau nei ekau maꞌoe. Poi aꞌoe sehai namahi aꞌoe, kena anau mehuli aꞌe namahi anau iloko keola aꞌoe.” Ia kena anau ehihia pela anau selavaa kehai namahi anau, imea namahi Christ la inoho iloko keola anau.

¹⁰ Kela hea anau enoho hihia oia. Kulana anau ekaukali Christ, anau ekino kahi. Alakama ehai haeꞌo mai anau, kena keola anau ehainakaa. Alakama ememe haeꞌo kia anau, ia nakapahala la ekae mai anau hoi. Ia keualoko anau selavaa kehai namahi anau, Christ ehuli aꞌe namahi aia iloko keola anau.

Paul elaoi hamaoni nahakina ana

¹¹ Anau ekakala vale, maikinimea okou eusu mai anau. Nakama eahu la ehakaꞌoko ma lakou ehananiu i nakama heheaꞌu Keakua. Ia niaina ma anau hekama moulalo, anau semoulalo ilalo nakama la. Kela hea okou ekau kehamaha anau hoi.

¹² Kulana anau ninoho ma okou, anau emaka ola kehuli aku nahaꞌaku ia ma namea kaualeꞌa i namahi Keakua, imakino okou pela anau hekama heheaꞌu Keakua hamaoni.

¹³ Anau ekonaꞌi okou ehau poi anau ekonaꞌi nahale loku emao la hoi. Ia anau seme aku okou ikonaꞌi anau. Poi okou ehakaꞌoko pela anau esala kehuli aku namahi Keakua, kena haialoha mai anau.

¹⁴ Anau ukanakana ihaele aku nomaka okou keualoko hakoukolu. Ia anau meseainoa aku nimea okou. Maikinimea anau semanaꞌo naheheaꞌu okou la, anau hihai okou avale. Semea pela nakamaliꞌi soliliꞌi ehakau namea kaualeꞌa iau aꞌe ma namakua lakou la. Emeia namakua lakou la ekau kehakau namea kaualeꞌa iau aꞌe ma nakamaliꞌi la.

¹⁵ Anau eaunahie kehoꞌi aku naheheaꞌu anau la hakoa, ia ma keola anau hoi, ma ikonaꞌi okou. Ia poi anau elaoi hamaoni okou, ea, okou amelaoi hamalie anau oia?

¹⁶ Okou emakino pela anau seainoa aku okou ikonaꞌi anau. Ea? Okou ehakaꞌoko pela anau ehailavaꞌa okou?

¹⁷ Okou ehakaꞌoko manau ehaunalia aku alakama nohailavaꞌa okou? Seai.

¹⁸ Anau eme aꞌe Titus laua ma kelaa kaina kakou la io aku i okou. Ia Titus sehailavaꞌa okou. Okou iailoa pela maua ma Titus eisi hakaꞌoko hokahi, kena ikaukali kipukipu hokahi hoi.

¹⁹ Ausoa. Okou ehakaꞌoko ma maua ekakaa aku namea nei ihuli aku pela maua ekonu? Seai. Maua esuꞌui ma Christ, kena ime aku okou imua namaisu Keakua pela maua ekakaa aku namenei nohapulupulu okou ihakina.

²⁰ Anau mekae aku nomaka okou. Ia anau enalolo haeꞌo pela anau amesehihai nakipukipu okou la. Ia kena okou amesehihai nakipukipu anau nei hoi. Ia anau ekipuaina, aoki okou hakaukau, ia manava sano. Ia anau ehakekele pela okou amelokoloko nahie, kena ihakaꞌoko i kevahi okou soꞌokou. Anau ekipuaina hoi, aoki okou mekamoa haeꞌo, ia veuveꞌu alakama, kena iahu nomea okou inonoho haeꞌo.

²¹ Anau ekipuaina, aoki Keakua amemea anau nonapa imua namaisu okou. Maikinimea nakama kela ekaukali nakipukipu esala la ehainakaa kesui naola saꞌino lakou la nokaualeꞌa. Nakama la epaa huli, ia ehai huli hoi.