2 Corinthians 10 - Luaniua New Testament

Paul eheheaꞌu hamaoni ma Keakua

¹ Keualoko anau emao ikaha ma okou, anau semakaꞌu kehuli aku nahakaꞌoko anau nei hakoa. Ia keualoko anau enoho ma okou, anau enoho semuu oia. Ia anau ehihai ipasemuu hamaoni, poi Christ la hoi. Ia kena anau eme aku okou penei.

² Alakama okou emea ma maua ekaukali nahakaꞌoko maua somaua. Ia keualoko anau mekae aku okou, anau mekakala hamakaꞌu aꞌe nakama la. Ia anau sehihai ikakala aku okou pela hoi.

³ Hamaoni. Maua nikama oia. Ia keualoko maua evuhu ma namea saꞌino, maua sekaukali nahakaꞌoko maua somaua.

⁴ Nahana maua evuhu kaua la seai nimea maua somaua. Emeia maua eko nahana kela ehuli aꞌe namahi Keakua, kena ilavaa keseu namahi namea saꞌino la. Ia kena maua ehuli aꞌe pela nahakaꞌoko nakama saꞌino la esala.

⁵ Pela nakama eahu la meselavaa kepui alakama iseailoa Keakua. Ia maua emea nahakaꞌoko nakama hakoa ikaukali kehakaꞌoko Christ.

⁶ Ia keualoko okou ehalono hamaoni Christ, kena maua mehakonukonu nakama kela sehalono la.

⁷ Okou ikau kemakino laoi hea okou eꞌike la. Poi hekama ehaiꞌahi maia hekama hamaoni Christ, kena kama la ekau kemakino laoi pela maua nikama hamaoni Christ hoi.

⁸ Kealiꞌi ekini maua ihapulupulu okou ihakina, ia seai pela iseu nahakina okou. Ia niaina anau ekakala ahu aku i namahi la, anau meselavaa inapa.

⁹ Ia seme pela anau ekakaa aku nalauniu la pela ihamakaꞌu aku okou. Seai.

¹⁰ Alakama mekakala ma, “Nalauniu Paul la ehuli aꞌe nakakala haimahi haeꞌo. Ia keualoko kama la enoho ma kakou, kama la emakananae, ia nakakala aia la nimea vale oia.”

¹¹ Ia nakama kela ekakala la ikau kemakino laoi kemenei. Keualoko maua enoho emao ikaha ma okou, maua ekakaa aku nalauniu oia. Ia keualoko maua menoho ma okou, maua mehuli aku namahi, ehau poi maua nihuli aku i nalauniu maua.

¹² Alakama ehakaꞌoko ma lakou ehananiu. Ia maua seme pela maua ehau ma nakama la. Seai. Nakama la eꞌilaꞌila solakou pela ma lakou ekaualeꞌa. Kela hea nakama la evale oia, semakino.

¹³ Ia poi maua amekakala ahu, maua mehaniki oia. Maua meahu i naheheaꞌu kela Keakua niau mai ma maua. Ala niheaꞌu maua epena ikonaꞌi okou.

¹⁴ Ia poi maua sekae aku okou, kena maua amesekau keahu. Ia maua nakae aku okou avale, nokaukaꞌu aku kelono kaualeꞌa Christ. Kela hea maua ekau keahu pela maua ekonaꞌi okou.

¹⁵ Alakama ekonaꞌi okou hoi. Ia maua seahu i naheheaꞌu lakou. Emeia maua ehihai pela nahakina okou la mesomo nolahi, ilavaa maua kekonaꞌi alakama kemakaꞌina okou la ihakina hoi.

¹⁶ Kena maua melavaa keo nokaukaꞌu kelono kaualeꞌa Keakua i nahenua kela ekuu hakiꞌe okou la. Ia maua sehihai iahu i naheheaꞌu kela alakama napena mai avale i naꞌina lakou la.

¹⁷ Nakakala nei emau iho iloko kelauniu kapu, “Poi hekama ehihai iahu, Kama na ekau keahu i namea Kealiꞌi epena la.”

¹⁸ Ame hekama eahu pela aia soia ehananiu, Keakua mesehamaha kama la. Ia poi Kealiꞌi emea ma kama la ehananiu, kena Keakua mehamaha kama la hoi.