1 Timothy 5 - Luaniua New Testament

Nakipukipu kaualeꞌa nakama hakoa

¹ Aꞌoe isehai aꞌe nakanaka umakua la. Emeia aꞌoe ikakala halaoi aꞌe nakama na, poi nikamana aꞌoe, ia me aꞌe nakanaka oikipu aꞌe la poi nikaina aꞌoe.

² Kena kakala halaoi aꞌe nahine umakua la poi nikina aꞌoe, ia me aꞌe nahine oikipu aꞌe la poi niꞌave aꞌoe, ia hakea nakakala aꞌoe la.

³ Lolosi hakaualeꞌa nakaukuaha hine kela ehaaloha hamaoni.

⁴ Ia poi nakamaliꞌi ma nahaimopuna lakou la enoho, nakama la ekau kemakino laoi kelolosi namakua lakou la. Ihuli aꞌe pela lakou ekaukali nakipukipu Keakua, ia isui muli namakua lakou la. Kenei nakipukipu kela Keakua ehihai.

⁵ Nakaukuaha hamaoni la enoho pela oia. Nakama la enoho kali Keakua ikonaꞌi lakou. Ia kena keaho ma kepo, nakama la eainoa aꞌe Keakua nia lakou hihai.

⁶ Ia alakaukuaha ehaihai huli. Niaina nakama la oiola vahonei, nakama la meio i keꞌina kemake.

⁷ Polopolo aꞌe keonohenua la keaoaꞌo nei, pela lakou selavaa kepena namea esala.

⁸ Poi hekama keloku selolosi halaoi haleaina aia la, ia kaohi mua haimakua aia la, kama na ukiaꞌi kehakina aia la. Kena nahaisala kama na elaꞌa iluna ma nahaisala nakama enoho pouli la.

⁹ Apoi hekaukuaha hine ukae kipuono nahekau kemakua aia, ia kaukuaha la niꞌavana kanaka hokahi oia, kena okou elavaa kekakaa kemale aia i kelauniu nakaukuaha hamaoni la.

¹⁰ Ana nikama kela epena namea ekaualeꞌa. Nakama la eaumalie, kena ilolosi hakaualeꞌa nakamaliꞌi lakou la. Nakama la sosolo nakapuae nakama ekapu Keakua la, ia ikonaꞌi nakama ekipuaina. Nakama la ehai namahi lakou ipena namea kaualeꞌa hakoa.

¹¹ Ia poi hekaukuaha hine oikipu aꞌe, kena aꞌoe isehapaa kemale kama na iloko kelauniu nakaukuaha hine la. Maikinimea nahine oikipu aꞌe na ame alemaka kanaka, ia kena ehakaꞌokoꞌoko keꞌavana oia, kena ukiꞌe ikaha ma Christ.

¹² Keakua meihakonukonu nahine na, maikinimea nakama na ukiaꞌi nahakina lakou imua la.

¹³ Ia nakama na ame makananae, kena meio hakiꞌe nahale. Ia kela mea hoi, nakama la mehahaele lalakeni, kena ikamoa haeꞌo alakama, ia ivasili aꞌe namea lakou sekau kevasili. Kena ime aꞌe namea lakou sekau kekakala.

¹⁴ Ia kena anau hihai nakaukuaha hine oikipu aꞌe la iꞌavana, iisi nakamaliꞌi, ilolosi hakaualeꞌa nahale lakou la. Kena nakama kela sehakina Keakua la meiselavaa kekakala somei nahine la.

¹⁵ Ia alakama nakaukuaha hine oikipu aꞌe la uoki kehulo ikaha ma Christ nokaukali vamuli Satan.

¹⁶ Apoi hehine keloku eisi nakaukuaha hine iloko hale aia la, kama la ekau kelolosi nahine la soia. Hale loku sekau kelolosi nahine la. Hale loku ekau kelolosi nakaukuaha ehaaloha hamaoni la oia.

¹⁷ Nahakina ana ekau kehamaha nakama hamakua keloku, kaohi mua nakama kaukaꞌu ia ma nakama aoaꞌo la.

¹⁸ Maikinimea nakakala nei emau iloko kelauniu kapu, “Keualoko na{bulumakau} okou la ekakaꞌa valuna nahua nosopo nahua ikaha ma napenu la, okou isesaisai napuꞌua namanu la ipui lakou iseꞌai.” Kela mea hoi, “Kama heheaꞌu ekau keko kesui aia la.”

¹⁹ Okou isehalono kekama kela esalu haeꞌo kekama hamakua keloku la. Ia poi koꞌolua ma koꞌokolu nakama eꞌike kama hamakua la epena kemea esala, kena okou ihalono nakama kela eꞌike la.

²⁰ Polopolo aꞌe nakama haisala la imua namaisu nahakina ana la hakoa, pela alakama meimakaꞌu kepena namesala hoi.

²¹ Anau eme aku aꞌoe imua namaisu Keakua ia ma Jesus Christ, ia imua na{enselo} kela Keakua nikini iheheaꞌu maia. Kaukali naaoaꞌo nei hakoa. Aꞌoe isevave kehakonukonu alakama, ia sesapai nakama kela aꞌoe hihai la oia.

²² Aꞌoe isevave kehapili nalima aꞌoe iluna alakama ihakapu lakou. Aꞌoe sesuꞌui ma nahaisala alakama, ia lolosi hamakonu nohakea keola aꞌoe.

²³ Aꞌoe iseunu kevai kea oia, ia miki hamalie kealeve hoi, ikonaꞌi kemanava aꞌoe ikaualeꞌa, ia ikonaꞌi aꞌoe iselavea kahi.

²⁴ Nahaisala alakama ehainahie keꞌike, kena Keakua mevave kehakonukonu nakama la. Ia nahaisala alakama ehunaa, meiꞌikeaa imuli.

²⁵ Ehau pela hoi, kakou hakoa eꞌike nakama kela epena namea kaualeꞌa. Namela selavaa kehunaa lia.