1 Timothy 4 - Luaniua New Testament

Naaoaꞌo kela sehamaoni

¹ Keanana Kapu la ekakala hamakahua pela i naaho haoki la, alakama meikiaꞌi nahakina lakou la. Kena nakama na meikaukali naanana kela ehailavaꞌa lakou la, ia meihalono naaoaꞌo nakipua saꞌino la.

² Nakama nukulaoi la ekakala uhiuhi oia. Ia semakino pela lakou esala.

³ Nakama la epui keonohenua la iseꞌavana, ia ime aꞌe hoi nakama la pela iseꞌai alaꞌai. Ia nakama ehakina i Keakua la emakino kehamaoni. Pela Keakua epena naꞌai la hakoa. Kena nakama la ekau kehamaha aꞌe Keakua namela, kena uꞌai.

⁴ Namea kela Keakua epena la ekaualeꞌa hakoa. Poi kakou ehamaha kama la i namea aia eau mai la, kena kakou sekau kepesia namela.

⁵ Maikinimea kakou eloku aꞌe Keakua i nakakala aia, pela ihakapu namela.

Heheaꞌu hakaualeꞌa ma Jesus Christ

⁶ Aꞌoe ekaukali naaoaꞌo kaualeꞌa. Apoi aꞌoe eme aku keaoaꞌo nei i nahakina ana la, kena aꞌoe eheheaꞌu hamaoni ma Jesus Christ. Kena nakakala kehakina la mehapulupulu aku aꞌoe.

⁷ Ia sehalono nakakala kela esekonu i namaisu Keakua, ia sehalono hoi naꞌai nukulaoi nakama panimu. Hai namahi aꞌoe kekaukali nakipukipu Keakua.

⁸ Nakipukipu kenasolo la ekaualeꞌa hamalie oia. Ia nakipukipu kekaukali Keakua ekaualeꞌa hakoa, kekonaꞌi keola nei ma keola imuli.

⁹ Nakakala nei ehamaoni, kena kakou ekau kekaukali namenei.

¹⁰ Kakou ihai namahi kakou ihakina i Keakua kela eola kahi. Kama la ekonaꞌi nakama hakoa, kaohi mua nahakina ana la.

¹¹ Polopolo aku nahakina ana la i naaoaꞌo nei.

¹² Nakama la esekau kehakaꞌoko pela aꞌoe esoliliꞌi i lakou. Huli aku nakipukipu kaualeꞌa, pela ikakala hakaualeꞌa, ipenapena name kaualeꞌa, ilaoi alakama, ihakina Keakua, ia ihakea naola lakou. Pela nakama la meikaukali nakipukipu aꞌoe.

¹³ Anau mehaele aku. Kena aꞌoe kauhano kepau kelauniu kapu iaoaꞌo keonohenua la, kena kaukaꞌu aku nakama la.

¹⁴ Manaku kehoꞌi kela Keakua niau aku la. Aꞌoe uko kehoꞌi la keualoko nakama hamakua keloku la nihapili nalima lakou iluna aꞌoe, kena ihakae aku nakakala Keakua.

¹⁵ Kauhano kekaukali naaoaꞌo nei. Kena nakama hakoa meiꞌike pela aꞌoe emakino laoi.

¹⁶ Lolosi hapulu keola aꞌoe, ikauhano kekaukali keaoaꞌo ekonu. Kena aꞌoe meikonaꞌi soꞌoe iola, kena meikonaꞌi hoi nakama kela halono aꞌoe la.