1 Peter 5 - Luaniua New Testament

Nahakina ana Keakua

¹ Anau hihai ikakala aku okou nakama hamakua keloku. Anau hoi hekama hamakua keloku. Ia anau eꞌike Christ keualoko kama la nihalono lihu. Ia keualoko Christ meivaꞌai mai muli, kakou mesuꞌui ma kama la i namahi aia. Ia kena anau ehihai ime aku okou pela,

² okou ilolosi hakaualeꞌa naonohenua Keakua kela enoho ma okou. Sehikama eme aku okou ilolosi nakama la. Emeia okou soꞌokou iaunahie kelolosi nakama la. Ia okou ilolosi nakama la kaukali hea Keakua ehihai. Okou isemanaꞌo nasileni nakama la. Okou ihai namahi okou ikonaꞌi nakama la avale.

³ Keakua eau aku keonohenua la pela okou ilolosi. Kena okou ihuli aꞌe nakama la nakipukipu kaualeꞌa. Ia okou isesau namahi okou, pela okou ihananiu iluna nakama la.

⁴ Ia kena keualoko kama hamakua kakou la meivaꞌai mai muli, kama la meau aku nahau hananiu kela selavaa kemae.

⁵ Okou nakama oikipu aꞌe ihalono nakama hamakua pela hoi. Ia okou inoho pasemuu ma alakama, maikinimea Keakua ehakauoki ma nakama eahu. Ia kama la elolosi laoi nakama pasemuu.

⁶ Ia kena okou ikuꞌu okou soꞌokou ilalo namahi Keakua. Ia kena kama la soia mesau okou iluna keualoko aia hihai.

⁷ Kama la ealoha okou. Ia kena okou ikiaꞌi namea hainakaa okou la, iamo kama la.

⁸ Okou ikuꞌu konu naola okou, ia lolosi hamakonu. Maikinimea Satan emokimoki navahi okou poi salau leikama, kela esesee naꞌai aia.

⁹ Ia okou ikuu mau i nahakina okou, ilavaa okou kevuhu ma kama la. Maikinimea okou emakino pela nakaina okou iloko kemaalama nei hakoa ehalono lihu poi okou na hoi.

¹⁰ Keakua elolosi laoi okou hakoa. Kama la eanaa okou isuꞌui ma Christ, kena inoho i namahi aia naualoko hamau. Vahonei okou ehalono lihu kama saika oia. Ia Keakua mekonaꞌi okou nokaualeꞌa muli, ia memea nahakina okou iivi. Ia kama la meau aku namahi i okou, kena imea okou ikuu mau.

¹¹ Kama la ehananiu naualoko hamau. Amen.

Nakakala haoki

¹² Kaukaina Silas ekonaꞌi anau ikakaa aku kelauniu popoko nei i okou. Ia anau emakino pela kama la ehakina hamaoni. Anau ekakaa aku nakakala nei ma ihapulupulu okou, ia ime aku hoi pela Keakua melolosi hamaoni okou. Kena okou ikuu mau.

¹³ Nahakina ana i kemakaꞌina Babylon eau aku nakakala hihia i okou. Keakua ehilihili nakama la poi aia ehilihili okou la. Ia Mark eau aku nakakala hihia i okou hoi. Kama la ehau poi hekama hamaoni anau.

¹⁴ Okou ivaisoni nakaina okou keloku la, ihuli aꞌe pela okou elaoi hamaoni nakama la. Okou nakama kela esuꞌui ma Christ la inoho laoi hakoa.