1 Peter 4 - Luaniua New Testament

Naola nahakina ana

¹ Keualoko Christ ninoho iloko kemaalama nei, kama la ehalono lihu. Kena okou ikanakana okou soꞌokou ihalono lihu pela hoi. Maikinimea nakama kela ehalono lihu selavaa kekauhano kepena namea esala.

² Ia kena kulana okou oinoho iloko kemaalama nei, okou amesekaukali namea saꞌino kela naonohenua la ehihai. Okou amekaukali hea Keakua ehihai la avale.

³ Imua, okou ekaukali nakipukipu saꞌino kela nakama enoho pouli hihai la. Nakama la ehai huli, ia emanaꞌo haeꞌo namea saꞌino. Nakama la hiunu kahi namevale, kena iulu i hale nokahao sala. Ia nakama la ehihai ihamalumalu nahakipua saꞌino haeꞌo. Ia vahonei okou ukau.

⁴ Ia kena nakama enoho pouli la emasalo haeꞌo pela okou usesuꞌui ma lakou nokaukali nakipukipu saꞌino la. Kela hea nakama la ekakala lihu aku i okou.

⁵ Ia i keaho haoki la, nakama la mehaꞌali aꞌe Keakua nakipukipu naola lakou. Ia Keakua nakanakana avale kehakonukonu nakama hakoa, nakama eola, ia ma nakama umake.

⁶ Nakama imua la unalono avale kelono kaualeꞌa Keakua. Keualoko nakama la niola, nakama la ehalono lihu, ehau poi nakama hakoa. Ia keualoko nakama la umake, Keakua ehaola muli nakama la i namahi Keanana Kapu.

Lolosi nahoꞌi Keakua

⁷ Kakou ukapili kae keualoko namea hakoa meioki. Ia kena okou ikuꞌu konu naola okou, kena noho havalekoa noloku.

⁸ Hakaꞌoko hamakua eme penei. Okou ilaoi hamaoni kekama ma kekama, ia kena okou mesili hia nahaisala nakama la.

⁹ Okou iaumalie kekonaꞌi kekama ma kekama, ia sekamumu.

¹⁰ Keakua nahoꞌi aꞌe avale kama ma kekama namahi Keanana Kapu. Ia kena okou ikauhano kehuli aꞌe namahi aia la ikonaꞌi alakama, ikau ma hea Keakua ehoꞌi aku i okou.

¹¹ Ame hekama okou ekakala aꞌe alakama, kama la ikau kekakala ehau poi Keakua ekakala la. Ia ame hekama okou ekonaꞌi alakama, kama la ipena kaukali namahi kela Keakua niau aꞌe i aia. Ia kena kakou hakoa mehamaha kahi Keakua, ia ehamalumalu kama hananiu la i namahi Jesus Christ naualoko hamau. Amen.

Nakama keloku mehalono lihu

¹² Ausoa. Keualoko okou mehalono lihu, okou isemasalo. Okou isehakaꞌoko pela ala nikapahala. Seai. Namea la meio mai nohaꞌike nahakina okou.

¹³ Emeia okou ekau kehihia. Maikinimea okou ehalono lihu poi Christ la hoi. Kena okou mehihia lo keualoko Christ meivaꞌai mai muli i namahi aia.

¹⁴ Ia poi alakama esalu haeꞌo okou, maikinimea okou nikama Christ, okou mehakapu lia Keakua. Maikinimea namahi Keanana Kapu Keakua la menoho ma okou.

¹⁵ Alakama ekaa kama, ia alakama eailalao. Alakama esaꞌino, ia alakama ekusoni. Nakama la ekau kehalono lihu. Ia okou sekau kehalono lihu i nakipukipu saꞌino la.

¹⁶ Ame okou ehalono lihu, maikinimea okou nikama Christ, kena okou isenapa. Keualoko alakama ekapa okou ma “nikama Christ,” okou ihamaha i Keakua oia.

¹⁷ Vahonei, Keakua eꞌamaka nohakonukonu nakama hakoa. Kama la mehakonukonu nakama haleaina aia la imua. Kena imuli, kama la mehakonukonu nakama kela sehakina kelono kaualeꞌa aia la nohalono lihu haeꞌo.

¹⁸ Eme pela, “Keakua ekonaꞌi nakama ekonu kahi la iola, Ia naola lakou ehainakaa oia. Nakama haisala sekaukali nakipukipu Keakua, Ia kena nakama la meihalono lihu haeꞌo.”

¹⁹ Keakua epena nakama hakoa. Ia niaina ma kama la ehihai alakama ihalono lihu, nakama la ikau kehakina pela kama la melolosi hakaualeꞌa lakou. Ia kena nakama la ikauhano kepena namea kaualeꞌa.