1 Peter 3 - Luaniua New Testament

Nakipukipu kaualeꞌa keꞌavana

¹ Okou nahine kela haiꞌavana, okou ihalono naꞌavana okou pela hoi. Niaina naꞌavana okou la seihakina i nakakala Keakua, okou ikauhano kehalono nakama la. Niaina okou sekakala aꞌe nakama la, nakama la meꞌike nakipukipu kaualeꞌa naola okou na. Kena nakama la mehakina hoi.

² Maikinimea nakama la meꞌike pela okou ehakea naola okou, ia ehamalumalu Keakua.

³ Okou nahine isekikilo nakinokama okou. Okou isehilihili nalaulu okou, ia sekalo namoni pahaku mea, ia seleleu napamalo suinaka. Seai.

⁴ Namela amehamanaꞌo kamasaika oia. Emeia okou inoho semuu, imeme halaoi ma alakama. Nakipukipu la ekaꞌoko kahi. Ala nimea kaualeꞌa i namaisu Keakua.

⁵ Nakipukipu nahine ekapu imua ekaualeꞌa pela hoi. Nakama la enoho kali Keakua, ia ehalono naꞌavana lakou la.

⁶ Sarah eme pela hoi. Kama la ehalono keꞌavana aia la Abraham, kena ikapa kama la ma kama hamakua aia. Ia poi okou semakaꞌu kekauhano kepena namea kaualeꞌa, kena okou meme poi nikamaliꞌi hine hamaoni Sarah.

⁷ Ia okou nakanaka kela haiꞌavana, okou imeme halaoi ma nahine okou la. Maikinimea nakama la seivi, poi okou eivi na. Ia okou ihamaha nakama la hoi. Maikinimea Keakua elolosi laoi okou hakoa, kena eau aku okou keola hamaoni. Poi okou ekaukali nakipukipu nei, kena sehimea mepui naloku okou la.

Noho laoi ma nakama hakoa

⁸ Anei nikakala haoki anau. Okou ihaio hakaꞌoko hokahi, imeme halaoi ma alakama. Okou ihaikaina laoi ma alakama, kena haialoha nakama la. Ia okou hakoa inoho pasemuu.

⁹ Keualoko alakama ehai saꞌino okou, okou isesui muli. Ia keualoko alakama esalu haeꞌo okou, okou isesui muli nakakala saꞌino lakou la. Seai. Okou ikakala hakaualeꞌa avale. Maikinimea Keakua nianaa okou pela aia mehakapu okou hakoa.

¹⁰ Emea penei. “Poi hekama hihai keola aia ikaualeꞌa, Imea aia ihihia kahi keaho ma keaho, Kena kama la isekakala saꞌino, Ia sekakala usuusu alakama.

¹¹ Kama la ikiaꞌi nakipukipu saꞌino, Kena ikaukali nakipukipu kaualeꞌa. Ia kena kama la ihai namahi aia, Pela inoho laoi ma alakama.

¹² Maikinimea Kealiꞌi elolosi laoi nakama ekonu, Ia ehalono naloku nakama la. Ia Kealiꞌi mehuli anakua aꞌe I nakama kela ekauhano kepena namea saꞌino.”

¹³ Poi okou ehai namahi okou kepena namea kaualeꞌa, kena oai kekama memea okou nosaꞌino? Sehikama.

¹⁴ Keualoko okou epena namea ekonu, alakama amehai haeꞌo kia okou. Ia okou isemakaꞌu i nakakala hamakaꞌu nakama la, ia okou isekipuaina. Maikinimea okou mehakapu lia Keakua.

¹⁵ Okou imanaku kahi Christ, Kealiꞌi ekapu okou. Alakama amevasili aku okou ma, “Aiea okou ehakina Christ naea?” Kena okou ikanakana kahi nosui aꞌe navasili lakou la.

¹⁶ Ia keualoko okou esui aꞌe navasili la, okou ipasemuu, ia hamaha nakama kela evasisili la. Nakama la amesalu haeꞌo okou. Ia nakama la menapa solakou i nakakala saꞌino lakou la. Maikinimea okou esuꞌui ma Christ, kena emakino pela naola okou la ekaualeꞌa oia.

¹⁷ Ia poi Keakua hihai okou ihalono lihu i namea kaualeꞌa okou epena la, ame kaualeꞌa oia. Ia amesala pela kakou ipena namea saꞌino nohalono lihu.

¹⁸ Christ ekonu i naꞌalemaka Keakua. Kela hea kemake aia la elavaa kesolo nahaisala nakama sekonu la ikaha. Pela imea okou ivaꞌai muli i Keakua. Kinokama aia la umake heualoko hokahi oia. Ia kena Keakua ehaola muli kama la i namahi Keanana Kapu.

¹⁹ Vahola, Christ ehaele i namahi Keanana Kapu la nokaukaꞌu aꞌe nakama kela oipono kia iloko keꞌina kemake la.

²⁰ Ala nikama kela enoho imua lo, kulana Noah nipenapena kevaꞌa aia la. Saika la, Keakua ehakali ma nakama la ikiꞌe ikaha ma nahaisala lakou la, ia nakama la sehihai ihalono Keakua. Vahola, koavalu nakama eꞌae kevaꞌa la oia, isemake lakou i kekaiu la.

²¹ Ia kevai la ehuli aku kipukipu kehaauꞌau kapu hoi. Vahonei kehaauꞌau kapu la ekonaꞌi okou. Ia seme pela kevai la esolo naꞌele nakinokama okou ikaha. Seai. Keualoko okou ehaauꞌau kapu, okou eainoa aꞌe Keakua pela okou ikaualeꞌa i namaisu aia iola muli, ehau poi Christ uola muli la hoi.

²² Kama la ehaele iluna i kevaelani nonoho i kelima laua Keakua. Ia kena Keakua ekuꞌu na{enselo}, namahunani, ia ma nakama haimahi hakoa ilalo namahi Christ.