1 Peter 2 - Luaniua New Testament

Nakama hamaoni Keakua

¹ Ia kena okou ikiaꞌi nakipukipu saꞌino hakoa. Okou iseusuusu alakama, ia sekakala uhiuhi. Okou isemanava sano, ia sesalu haeꞌo alakama.

² Ia okou ihalono kahi nakakala hamaoni Keakua. Ihau poi namemea kela ehiuu kahi. Ia kena okou mehakina hamaoni, ia Keakua mekonaꞌi okou iola.

³ Vahonei, okou eꞌamaka nokaukali Kealiꞌi. Kena okou emakino pela nakipukipu aia la ekaualeꞌa lo.

⁴ Okou io mai Kealiꞌi, maikinimea kama la o kehaku eola. Niaina ma alakama sehihai Kealiꞌi, Keakua ekini kama la. Ia kena kama la ehananiu i naꞌalemaka aia.

⁵ Okou ehau poi nihaku eola hoi. Keakua mehakuu okou ime mo hale Keanana Kapu. Kelaa mea hoi. Okou meme poi nimaakua ekapu Keakua, kena ilavaa kehoꞌi aꞌe Keakua i namahi Keanana Kapu. Ia Keakua ehihai nahoꞌi okou la, maikinimea okou esuꞌui ma Jesus Christ.

⁶ Nakakala nei emau iho iloko kelauniu kapu, “Ila aꞌe. Anau nahilihili avale kehaku hananiu la, Ia kemela ekaualeꞌa i namaisu anau. Anau ehakuu kehaku la iluna Zion. Ia nakama kela ehakina i kama la, Meselavaa kenapa.”

⁷ Kehaku la hemea kaualeꞌa i namaisu okou nahakina ana. Ia nakama sehakina la seme pela. Nakakala kelauniu kapu ehuli aꞌe nakipukipu lakou penei, “Nakama ehakuu kehale sehihai kehaku la, Ia kehaku la ehananiu ialuna.

⁸ Komaꞌi kekama ekuꞌi kehaku la nokekeleina solakou, Ia komaꞌi kekama hoi emaoha nopoꞌu ilalo.” Nakama la sehihai ihalono nakakala Keakua. Kela hea Keakua emea nakama la nokekeleina.

⁹ Ia Keakua nahilihili avale okou imemo onohenua aia. Okou nimaakua iloko kenoholana aia la. Ia okou ememo onohenua ekapu aia. Okou nikama hamaoni Keakua. Kela hea okou ehamaha kahi aꞌe kama la. Keakua eanaa aku okou io iho ikaha ma keꞌina pouli, kena ihanoho okou iloko kemasina kaualeꞌa aia la.

¹⁰ Imua, okou emaseuseu, kena sehikama ealoha okou. Ia vahonei, okou nikama hamaoni Keakua, kena kama la ealoha okou.

Halono nakama hamakua

¹¹ Ausoa. Okou ehau poi nimanu sili, maikinimea okou sehiꞌina ekino iloko kemaalama nei. Ia kena anau eme aku okou isemanaꞌo namea naonohenua la ehihai. Maikinimea namela emea naola okou nosaꞌino.

¹² Nakama enoho pouli eveuveꞌu okou. Ia kena okou ihuli aꞌe naola okou ikaualeꞌa imua namaisu nakama la. Pela nakama la meꞌike nakipukipu kaualeꞌa okou la. Kena i keaho Christ mevaꞌai mai muli, nakama la mehamaha aꞌe i Keakua.

¹³ Okou ihalono Kealiꞌi. Ia kena okou ihalono hoi nakama hamakua kemaalama nei la. Okou ihalono kekuꞌu, maikinimea kama la ehananiu iluna keonohenua.

¹⁴ Ia okou ihalono napalekuꞌu hoi. Maikinimea kekuꞌu la ehaunalia nakama la ihakonukonu nakama saꞌino, ia ihamaha nakama kela ekaukali nakipukipu kaualeꞌa.

¹⁵ Maikinimea Keakua ehihai okou ikaukali nakipukipu kaualeꞌa la, ipui nakama evale isekamoa haeꞌo okou.

¹⁶ Ia niaina okou ekana kekaukali nakipukipu okou hihai la, ia okou isemea pela okou elavaa kepena namea saꞌino. Emeia okou ikaukali kahi namea kela Keakua ehihai la.

¹⁷ Okou ihakaꞌoko maha i nakama hakoa, ia laoi hoi alakaina okou keloku. Okou ihamalumalu Keakua, ia hamaha kekuꞌu.

Kipukipu kehalono lihu

¹⁸ Okou nakama heheaꞌu, okou ihalono nakama hamakua okou. Ia okou ihakaꞌoko maha i nakama la hoi. Ekaualeꞌa pela okou ihakaꞌoko maha i nakama hamakua kaualeꞌa kela ememe halaoi okou la. Ia okou ihakaꞌoko maha hoi i nakama hamakua kela esau lakou mahi.

¹⁹ Niaina okou sehimea esala, alakama ame meme haeꞌo kia okou nohalono lihu. Ia poi okou emakino laoi nakipukipu Keakua, kena inoho havalekoa, kena Keakua mehihia i nakipukipu okou la.

²⁰ Ia poi okou epena namea esala, okou amelili kia. Ia niaina okou enoho havalekoa, sehikama mehamaha okou. Ia poi okou ehalono lihu i namea okou epena kaualeꞌa, ia enoho havalekoa. Kena Keakua mehihia i nakipukipu okou la.

²¹ Kama la eanaa okou ikaukali Christ, kena ihalono lihu ehau poi Christ la hoi. Christ unahalono lihu avale nokonaꞌi okou iola, pela ihuli aku nakipukipu kela okou ikau kekaukali. Emea penei.

²² Kama la sehimea esala epena, Ia sehiualoko aia Ekakala nousuusu alakama.

²³ Keualoko keonohenua la esalu haeꞌo Christ, kama la sesui muli nakakala lakou la. Niaina ma kama la ehalono lihu, kama la sekakala hamakaꞌu aꞌe nakama la. Emeia Christ ehakaꞌoko pela Keakua soia elavaa kekonaꞌi aia. Maikinimea Keakua mehakonukonu nakama hakoa ikaukali kehakaꞌoko ekonu aia la.

²⁴ Keualoko Christ umake iluna {kolosi}, Kama la eamo nahaisala kakou hakoa. Pela nasanuꞌu kinokama aia la Amekonaꞌi kakou nomakala muli. Imea kakou ikiaꞌi nahaisala kakou la, ia ikaukali kahi nakipukipu ekonu.

²⁵ Imua, okou ehau ma na{sipisipi} ulano. Ia vahonei, okou uvaꞌai mai nokaukali kama kela elolosi na{sipisipi} la. Ia kena kama la melolosi hamaoni naola okou.