1 John 4 - Luaniua New Testament

Laulahu naanana nuku laoi

¹ Ausoa. Komaꞌi nakama emea pela lakou ehakae nakakala Keakua. Ia alakama iloko nakama la enuku laoi oia. Ia kena okou isehakina nakakala nakama la hakoa. Ia laulahu naanana lakou la imakino pela nakama la eo mai Keakua.

² Okou memakino keanana kela ehamai Keakua penei. Poi hekama emea pela Jesus Christ ehaele iho kemaalama nei nokipu kama, kena heanana kela ehamai Keakua.

³ Ia poi heanana eꞌole pela Jesus seai Kealiꞌi aia, keanana na esehamai Keakua. Kena hekama ehakauꞌaa ma Kealiꞌi. Okou ulono pela kama saꞌino la mehamai. Ia kama la nanoho mai avale iloko kemaalama nei.

⁴ Aukamaliꞌi. Okou nikama Keakua, kena okou elaꞌa iluna nakama nuku laoi la. Maikinimea kekama kela enoho iloko okou ehananiu iluna kekama saꞌino kela enoho iloko kemaalama nei la.

⁵ Nakama nuku laoi la eo mai kemaalama nei, kena ikakala kaukali nakipukipu kemalama nei. Kena nakama kemaalama nei ehalono nakama la.

⁶ Ia kakou nikama Keakua. Kena nakama kela eailoa Keakua, ehalono kakou. Kena kakou emakino pela nakama la ehalono keanana hamaoni hoi. Ia nakama kela seo mai Keakua, sehalono kakou, ia ehalono keanana nuku laoi oia.

Kelaoi Keakua

⁷ Ausoa. Kakou ilaoi alakama. Maikinimea kipukipu kelaoi la ehamai Keakua. Poi hekama elaoi alakama, kama na ehamai Keakua, ia emakino laoi Keakua.

⁸ Keakua elaoi hamaoni. Ia kena poi hekama eselaoi hamaoni alakama, kama na seailoa Keakua.

⁹ Keakua ehuli mai kakou kelaoi aia penei. Kama la ehaunalia iho kanakama hokahi iloko kemaalama nei, pela ihoꞌi mai keola hamaoni.

¹⁰ Ia seme pela kakou elaoi Keakua imua. Kipukipu kelaoi eme penei. Keakua elaoi kakou, kena ihaunalia iho kanakama nomake, pela isolo nahaisala kakou la ikaha.

¹¹ Ausoa. Keakua elaoi kakou. Ia kena kakou ilaoi alakama.

¹² Sehikama eꞌike Keakua. Ia ame kakou elaoi alakama, kena Keakua menoho iloko kakou. Ia naola kakou mehuli aꞌe kelaoi hamaoni aia la.

¹³ Keakua eau mai Keanana Kapu aia. Kela hea kakou emakino pela kakou esuꞌui ma Keakua, ia Keakua esuꞌui ma kakou.

¹⁴ Kakou eꞌike pela Kamana ehaunalia iho kanakama nokonaꞌi nakama kemaalama nei, kena ikaukaꞌu hea kakou eꞌike la.

¹⁵ Poi hekama ekakala maia ehakina pela Jesus o kekama Keakua, kena Keakua esuꞌui ma kama na, ia kama na esuꞌui ma Keakua.

¹⁶ Kena kakou ehakina pela Keakua elaoi kakou, ia kakou emakino kelaoi aia la. Keakua elaoi hamaoni. Kena poi hekama elaoi Keakua, kama na esuꞌui ma Keakua, ia Keakua esuꞌui ma kama na.

¹⁷ Naola kakou ehuli aꞌe kelaoi hamaoni Keakua. Kena kakou ehau poi kama la, keualoko kakou oinoho iloko kemaalama nei. Kela hea kakou mesemakaꞌu i keaho Keakua meihakonukonu naonohenua.

¹⁸ Nakama kela elaoi hamaoni mesemakaꞌu Keakua. Maikinimea nakama kela elaoi hamaoni la eselavaa kemakaꞌu. Ia alakama emakaꞌu pela Keakua mehakonukonu lakou nohalono lihu. Kena nakama la selavaa kelaoi hamaoni Keakua.

¹⁹ Kakou ilaoi Keakua, maikinimea Keakua elaoi kakou imua.

²⁰ Ia poi hekama emea maia elaoi Keakua, ia eliloko kaina aia la, kama na enuku laoi oia. Kama na eliloko kanakaina kela aia eꞌike la. Ia kena kama na selavaa kelaoi Keakua, kama kela aia seꞌike.

²¹ Keakua ekakala mai pela, kekama kela elaoi Keakua, ikau kelaoi kanakaina la hoi.