1 Corinthians 9 - Luaniua New Testament

Nakama heheaꞌu

¹ Okou makino pela anau ekana. Ia okou makino hoi pela anau eꞌike Jesus Kealiꞌi kakou, kena kama la ehaunalia anau iheheaꞌu maia. Kela hea okou uꞌamaka nohakina kama la.

² Niaina alakama semakino manau hekama heheaꞌu Kealiꞌi, ia okou emakino laoi oia. Maikinimea kehakina okou ehuli aꞌe pela anau hekama heheaꞌu hamaoni Kealiꞌi.

³ Ia poi hekama ekaumaluu, anau meihakonukonu nakakala aia la penei.

⁴ Anau eisi namahi keme aꞌe nahakina ana la iau mai niꞌai ia ma nivai.*f5*

⁵ Peter ma nakaina Kealiꞌi, ia ma alakama heheaꞌu la, elavaa keko naꞌavana lakou la nokaꞌa ma lakou. Kena anau hoi elavaa keꞌavana hekama keloku, kena uko kama la nokaꞌa maua.

⁶ Ea? Okou ehakaꞌoko pela maua ma Barnabas somaua iheheaꞌu noko naꞌai maua?

⁷ Napulepule kela eo novuhu kaua sesui namea lakou eko la. Ia kekama kela esasaꞌa kalina elavaa keꞌai naꞌai aia ekoli la. Ia kekama kela elolosi na{sipisipi} hoi elavaa keunu na{meleke} na{sipisipi} la.

⁸ Keualoko anau ekakala penei, anau sekaukali hakaꞌoko kekama oia. Maikinimea nakuaa kakou la ekakala mai namea nei hoi.

⁹ Nakakala nei emau iho iloko nakuaa Moses, “Keualoko na{bulumakau} okou la ekakaꞌa valuna nahua nosopo nahua ikaha ma kepenu la, okou isesaisai napuꞌua namanu la ipui lakou iseꞌai.” Ea? Keakua ehakaꞌoko mahi namanu elahi la oia?

¹⁰ Seai. Keualoko kama la ekakala penei, kama la ekakala mai kakou hoi. Nakama kela ekuei la, ia ma nakama kela ekoli naꞌai la ehakina pela lakou ameko naꞌai i naheheaꞌu lakou epena la.

¹¹ Maua eme pela hoi. Maua ekaukaꞌu aku okou i namahi Keanana Kapu, ehau poi alakama ekoli naꞌai lakou la. Kena ekau pela okou iau mai nimea ikonaꞌi maua.

¹² Alakama eisi namahi keko nakuhana lakou. Ia maua eisi namahi la hoi. Ia maua seainoa aku okou iau mai nikuhana ma maua. Maua enoho havalekoa ma okou, pela okou amelavaa kehakina kelono kaualeꞌa Christ.

¹³ Okou eailoa pela nakama eheheaꞌu iloko hale kapu la eꞌai naꞌai ekapu la. Ia nakama kela ekuni namanu iluna ke{olta} eko nakuhana lakou i naponohi la hoi.

¹⁴ Nakama kela ekaukaꞌu kelono kaualeꞌa eme pela hoi. Kealiꞌi ehihai nakama la iko nasui lakou i naheheaꞌu lakou epena la.

¹⁵ Ia anau seainoa aku okou kuhana anau la. Ia anau sekakaa aku nakakala la imea okou iau mai nimea manau. Seai. Ame kaualeꞌa oia pela anau ehiꞌai nomake, aoki okou ukaumaluu manau emanaꞌo naꞌai okou la.

¹⁶ Anau sekau keahu ikekaukaꞌu kelono kaualeꞌa, maikinimea Kealiꞌi eme mai anau ikaꞌu. Ia kena ame saꞌino pela anau isekaukaꞌu kelono kaualeꞌa la.

¹⁷ Ia poi anau sonau ekini keheaꞌu nei, kena anau ekau keko kesui. Ia anau sonau sekini heaꞌu nei, anau epena hea Keakua ehihai anau ipena.

¹⁸ Kena kesui anau eme penei. Anau ikauhano nokaukaꞌu maluu kelono kaualeꞌa i nakama hakoa, ia isehuli aꞌe namahi anau ma iko nimea.

¹⁹ Sehikama elolosi anau. Ia niaina anau ekana, anau eheheaꞌu ma nakama hakoa, ikonaꞌi komaꞌi nakama ihakina.

²⁰ Keualoko anau ninoho ma na{Jiu}, anau eme poi he{Jiu} la hoi, ikonaꞌi nakama la ihakina. Keualoko anau enoho ma nakama kela kaukali nakuaa la, anau ekaukali nakuaa la hoi, ikonaꞌi nakama la ihakina. (Ia nakuaa la sehamakua iluna anau.)

²¹ Ia keualoko anau enoho ma nakama sekaukali nakuaa, anau sekaukali nakuaa la hoi, imea anau ilavaa kekonaꞌi nakama la ihakina. (Ia seme pela anau ekiaꞌi nakuaa Keakua, emeia anau ekaukali kuaa Christ.)

²² Ia keualoko anau enoho ma nakama nahakina lakou seivi, anau emea poi nakama la la hoi, imea anau ilavaa kekonaꞌi nakama la ihakina. Kena anau ekaukali nakipukipu nakama hakoa, imea anau ilavaa kekonaꞌi alakama iko keola hamaoni.

²³ Anau eme penei, pela komaꞌi nakama amehakina kelono kaualeꞌa la. Ia kena kelono kaualeꞌa la mekonaꞌi anau hoi.

²⁴ Ia okou emakino pela nakama elipo la ehulo haiva. Ia hekama hokahi oia meikae keꞌaha imua. Kena okou ihulo namahi okou ikae okou i keꞌaha.

²⁵ Nakama ehulo haiva la eꞌauꞌau kemahi iko kehau. Ia kehau la mepala vave oia. Ia kakou ihai namahi kakou iko kehau kela ekaualeꞌa naualoko hamau.

²⁶ Kela hea anau ekele kahi ikae anau i keꞌaha. Keola anau ehau poi kama evuhu la, ia anau sevuvuhu huli.

²⁷ Anau ehakonukonu kahi keola anau, kena inoho havalekoa. Aoki alakama mehakina kekaꞌu anau la, ia anau sonau meilano.