1 Corinthians 7 - Luaniua New Testament

Kipukipu keꞌavana

¹ Ia vahonei, anau ekakaa aku kelauniu nei isui aku navasili kela okou nikakaa mai la. Ame kaualeꞌa pela nakaupeala isehakili nakaupu.

² Ia komaꞌi nakama emanaꞌo huli. Kela hea nakaupeala ma nakaupu la ikau kekino niꞌavana ma lakou.

³ Kanaka haiꞌavana ekau kehoꞌi aꞌe kinokama aia i kehine aia la. Ia kehine haiꞌavana ekau kehoꞌi aꞌe kinokama aia i kanaka aia la.

⁴ Maikinimea kehine haiꞌavana la sehamakua kinokama aia soia, kela kanaka aia la avale ehamakua. Kena kanaka haiꞌavana la sehamakua kinokama aia soia, kela kehine aia la avale ehamakua.

⁵ Ia poi sakoꞌolua la ehakaꞌoko pela laua isemoe hakoa kamaualoko noloku aꞌe Keakua, ame kaualeꞌa oia. Kena imuli, sakoꞌolua la ivaꞌai muli nonoho hakoa. Ia sakoꞌolua la ikuꞌu konu naola laua, aoki hekama laua ukaoleole hia Satan nopaa ma kelaa kama.

⁶ Anau ekakala aku penei ihainahie okou, ia kenei seai hekuaa okou meikaukali.

⁷ Anau ehihai okou hakoa inoho seꞌavana poi anau. Ia Keakua eau iho kamaꞌi nahoꞌi eꞌee. Alakama kehoꞌi nei, ia alakama kelaa hoꞌi.

⁸ Kena anau eme aku okou nakama oikipu aꞌe, ia okou nakaukuaha. Ame kaualeꞌa pela okou enoho seꞌavana poi anau.

⁹ Ia amea okou ehainakaa kenoho seꞌavana, kena okou uꞌavana oia. Saꞌino pela okou emanaꞌo huli.

¹⁰ Anau eme aku okou nakama haiꞌavana. Ia kenei sehikakala anau, ia hekakala hamaoni Kealiꞌi, pela kehine sekau kekiaꞌi keꞌavana aia la.

¹¹ Ia poi hehine nakiaꞌi avale keꞌavana aia la, kehine la ame selavaa keꞌavana hoi, ia enoho pela oia. Ia kama la elavaa kevaꞌai muli nonoho ma keꞌavana aia la. Kanaka hoi sekau kekiaꞌi kehine aia la.

¹² Ia anau hihai ime aku okou hakaꞌoko anau sonau hoi. (Ia namenei senikakala Kealiꞌi.) Poi hekanaka ehakina, ia kehine aia la sehakina, ia kehine la eaunahie kenoho laua, kena kanaka la esekau kekiaꞌi kehine aia la.

¹³ Poi hehine keloku eꞌavana kanaka kela sehakina keloku, ia kanaka la eaunahie kenoho laua, kena kehine la sekau kekiaꞌi kama la.

¹⁴ Kanaka sehakina la ame hakapu lia Keakua, maikinimea kehine aia la hekama keloku. Kena kehine sehakina la ame hakapu lia Keakua hoi, maikinimea kanaka aia la hekama keloku. Ia poi Keakua esehakapu nakama la, kena nakamaliꞌi lakou la ame sekonu. Ia hamaoni, Keakua ehakapu nakamaliꞌi la hoi.

¹⁵ Ia poi kama sehakina la hihai kiaꞌi keꞌavana aia la, kena hevahi aia. Keꞌavana aia la ukana oia. Maikinimea Keakua ehihai okou inoho laoi.

¹⁶ Okou nahine keloku amelavaa kekonaꞌi naꞌavana okou la ihakina. Ia okou nakanaka keloku amelavaa kekonaꞌi naꞌavana okou la ihakina hoi.

Nakipukipu naola kakou

¹⁷ Anau eaoaꞌo aꞌe nakipukipu nei i nahakina ana la hakoa. Keakua ekini kakou ikauhano kekaukali nakipukipu keola kela Kealiꞌi niau mai kakou.

¹⁸ Poi Keakua ekini he{Jiu}, kama la sekau keme poi hekama enoho pouli. Ia poi Keakua ekini hekama enoho pouli, kama la sekau keme poi he{Jiu}.

¹⁹ Niaina hekama ha{Jiu}, ia kelaa kama enoho pouli, sakoꞌolua la ehau i naꞌalemaka Keakua. Ia kama la ehihai kakou hakoa ihalono nakakala aia.

²⁰ Okou ikauhano kekaukali nakipukipu keola kela Keakua eau aku maꞌokou la.

²¹ Poi okou heheaꞌu ma kelaa kama keualoko Keakua nikini okou, okou sehakekele mahi. Ia poi okou niala elave kehasao, kena uhasao.

²² Niaina hekama heheaꞌu ma kelaa kama keualoko Keakua nikini aia, kama na ekana kekaukali Christ. Ia Keakua ekini nakama ekana la ime mo kama heheaꞌu Christ.

²³ Keakua ehaunalia iho Christ nomake isui naola kakou, kena kakou sekau keme mo kama heheaꞌu nakama kemaalama nei.

²⁴ Okou nahakina ana hakoa ikauhano kekaukali nakipukipu keola kela Keakua eau aku maꞌokou la.

Nakama oikipu aꞌe

²⁵ Anau eme aku okou nakama kela oikipu aꞌe. Kenei seai hekuaa Kealiꞌi. Ia anau ekau keme aku hakaꞌoko anau sonau, maikinimea Kealiꞌi ekonaꞌi mai anau ikaukali kehakaꞌoko aia.

²⁶ Anau eailoa pela nasala elahi la uapihi mai. Ia kena anau ehakaꞌoko pela ame kaualeꞌa okou inoho poi okou enoho vahonei na.

²⁷ Poi hekanaka naꞌavana avale, kama la amesekau kekiaꞌi kehine aia la. Ia poi hekama seiꞌavana, kama na ame sekau kehai namahi aia noꞌavana.

²⁸ Ia poi kaupeala eꞌavana, kela sehimea esala. Ia poi hekaupu eꞌavana, kela sehimea esala hoi. Ia nakama haiꞌavana la ekili komaꞌi naluꞌuna iloko kemaalama nei, ia anau sehihai namea la ikae aku okou hoi.

²⁹ Aukaina, hea anau ehakaꞌoko emea penei. Kakou menoho iloko kemaalama nei kamasaika oia. Kena okou nakanaka haiꞌavana, vahonei okou ekau kenoho poi nikama seiꞌavana.

³⁰ Ia nakama oikanikani ame noho poi nikama sealoha. Nakama oihihia ame enoho poi nikama sehihia. Ia nakama kela esui naheheaꞌu, ame sekaohi mau naheheaꞌu la.

³¹ Ia nakama haiheheaꞌu kemaalama nei, inoho kalavale oia. Maikinimea namea hakoa kemaalama nei la eo nooki.

³² Anau hihai okou isehakekele mahi namea kemaalama nei. Nakama oikaupeala ihakekele maha iheheaꞌu ma Christ, imea Christ ihihia.

³³ Ia kanaka haiꞌavana ehakekele mahi namea kemaalama nei, maikinimea kama la ehihai imea keꞌavana aia la ihihia.

³⁴ Ia hakaꞌoko kama la meseꞌakoa. Nakaupu ia ma nakaukuaha hine ihakekele maha iheheaꞌu ma Christ, imea naola ia ma nakinokama lakou iakea ikaha ma namea esala. Ia nahine haiꞌavana ehakekele mahi namea kemaalama nei, imea naꞌavana lakou la ihihia.

³⁵ Anau eme aku namea nei, maikinimea anau hihai konaꞌi okou. Seme pela okou amelepokia namea nei. Anau hihai okou ihakea naola okou, ikaukali Christ soia.

³⁶ Alaualoko kaupeala emanaꞌo haimahi kaupu, kena ehihai iꞌavana kaupu la. Ia poi kaupu la emakua laoi, kama la ekau keꞌavana, kena ekaualeꞌa pela koꞌolua la iꞌavana oia. Hea kaupeala la emea la esesala.

³⁷ Hano sehikama eusu aꞌe sakoꞌolua la iꞌavana, ia kaupeala la evalekoa kekuꞌu konu keola aia, kena kehakaꞌoko aia la emoe kahi pela aia iseꞌavana kaupu la, ame kaualeꞌa pela sakoꞌolua la meseꞌavana.

³⁸ Ame kaualeꞌa pela kaupeala eꞌavana kaupu. Ia kaualeꞌa hoi pela kaupeala seꞌavana kaupu la.

³⁹ Kehine haiꞌavana ekau kenoho ma keꞌavana aia la. Ia poi keꞌavana aia la umake, kena kehine la elavaa keꞌavana kelaa kanaka, poi kama la hekama ehakina Kealiꞌi.

⁴⁰ Ia poi kehine la oinoho pela seꞌavana, kama la ame hihia. Kenei kehakaꞌoko anau. Ia anau ehakina pela kemenei hehakaꞌoko Keanana Kapu hoi.