1 Corinthians 6 - Luaniua New Testament

Kipukipu kehakonukonu

¹ Ia poi hekama okou ehakauoki ma kelaa kama keloku, kama la sekau keꞌave kesala la i hakonukonu lia nakama enoho pouli la. Emeia nakama ekapu Keakua la ekau kehakonukonu kemea la.

² Okou namakino avale pela nakama la mehakonukonu naonohenua kemaalama nei la hakoa. Ia poi okou selavaa kehakonukonu nakamaasala ilakonu okou, ia okou mehakonukonu nakama kemaalama nei la pehe?

³ Okou makino pela kakou mehakonukonu na{enselo} la hoi. Kena kakou ihamakaola nohakonukonu nakamaasala soliꞌi la.

⁴ Ia keualoko nasala la meiapihi mai, ea, okou meau aꞌe namea la ihakonukonu namanapuhi la oia?

⁵ Anau ekakala penei ihanapa okou. Ea? Sehikama iloko nahakina ana okou la emakonu kelaulahu okou?

⁶ Ia vahonei, hekama iloko keukulana okou na eko kaina aia la noꞌave imua namaisu nakama sehakina keloku la nohakonukonu lia.

⁷ Keualoko okou ehakauoki soꞌokou, okou esala hakoa. Ame kaualeꞌa pela kelaa kama ipena hasaꞌino i aꞌoe. Ia ame kaualeꞌa hoi pela kelaa kama iko naheheaꞌu aꞌoe la maia.

⁸ Ia okou epena hasaꞌino nakaina okou la, kena iko naheheaꞌu lakou la.

⁹ Okou namakino avale pela kenoholana Keakua la sehiꞌina nakama kela epena namea saꞌino. Okou ilolosi hamakonu. Nakama saꞌino la ehai huli, kena ehamalumalu nahakipua. Nakama la eseu kuaa keꞌavana, kena kanaka ehaisaꞌino kela kanaka.

¹⁰ Nakama la ailalao, ia manaꞌo naheheaꞌu alakama. Nakama la hiunu mevale, ia kakala somei alakama. Ia nakama la ehamakaꞌu alakama noko naheheaꞌu lakou la. Ia okou ihamakonu pela sehikama ihailavaꞌa okou. Maikinimea kenoholana Keakua sehiꞌina nakama la.

¹¹ Ia imua, alakama okou eme pela hoi. Ia Keakua esolo nahaisala okou la ikaha i kemale Kealiꞌi Jesus Christ, pela ihakea naola okou i namahi Keanana Kapu, imea okou nokonu i namaisu aia.

Hale kapu Keanana Kapu

¹² Alakama eme aꞌe, “Makou elavaa kepena nia makou ehakaꞌoko.” Ia alamea amesekau naola lakou. Anau hoi ekau kepena nia anau ehakaꞌoko. Ia anau sehihai kinokama anau ihamakua iluna hakaꞌoko anau.

¹³ Ia alakama hoi ekakala haiauna aꞌe, “Naꞌai ekau kinokama, kena kinokama ekau naꞌai.” Ia namea la ameseua lia Keakua. Kama la sepena iho nakinokama kakou ihai huli. Kama la epena nakinokama kakou iheheaꞌu maia. Ia kama la soia elolosi nakinokama kakou.

¹⁴ Kama la ehamasiꞌe Jesus ikaha ma kemake, kena mehamasiꞌe kakou ikaha ma kemake la hoi.

¹⁵ Nakinokama okou usuꞌui hakoa ma Christ. Ea? Amekonu pela hekama kekiaꞌi kinokama Christ nosuꞌui ma kinokama kekama ehai huli? Seai.

¹⁶ Okou namakino avale, poi hekama esuꞌui ma kekama ehai huli, naola sakoꞌolua la mehamai nohokahi. Ehau poi nikakaa iho iloko kelauniu kapu, “Koꞌolua na meo mai poi hekama hokahi.”

¹⁷ Ia poi hekama esuꞌui ma Kealiꞌi naanana sakoꞌolua la meo nohokahi hoi.

¹⁸ Haluu ikaha ma nakipukipu kehai huli. Kamaꞌi nahaisala semoe iloko kinokama kekama. Ia kekama ehai huli la ehaisala iloko kinokama aia.

¹⁹ Okou namakino avale pela Keakua eau aku Keanana Kapu inoho iloko okou, kena nakinokama okou o nahale kapu Keanana Kapu la. Ia seai pela nikinokama okou soꞌokou.

²⁰ Keakua ehaunalia iho Christ nomake isui kakou, kena kakou ikau kehamaha Keakua ma nakinokama kakou.