1 Corinthians 12 - Luaniua New TestamentNamahi Keanana Kapu 1 Aukaina. Anau ekakaa aku namea nei imea okou imakino laoi nakipukipu Keanana Kapu. 2 Okou emakino pela keualoko okou oinoho pouli, alakama ehakaꞌi sala okou nohamalumalu nahakipua kela ekuu semuu la oia. 3 Ia kena anau hihai okou imakino kemenei. Poi hekama ehakaꞌi lia Keanana Kapu, kama na meselavaa kekakala ma, “Jesus esaꞌino.” Ia poi hekama esehakaꞌi lia Keanana Kapu, kama na selavaa kekakala ma, “Jesus o Kealiꞌi.” 4 Komaꞌi nahoꞌi ekapu emoe, ia Keanana Kapu hokahi eau iho namea la hakoa. 5 Ia komaꞌi naheaꞌu oimoe hoi, ia kakou eheheaꞌu ma Kealiꞌi hokahi la. 6 Kena kakou makonu kepena naheaꞌu eꞌee, ia heAkua hokahi eau iho kakou hakoa keailoa la ipena naheheaꞌu la. 7 Keanana Kapu ehuli mai namahi aia iloko kakou hakoa, ime kakou ilavaa kekonaꞌi alakama. 8 Keanana Kapu la eau aꞌe alakama namahi imakino nakakala eakamai. Ia kama la eau aꞌe alakama namahi kemakino laoi namea hakoa. 9 Ia Keanana Kapu la eau aꞌe alakama namahi ime nakama la ihakina mahi, ia kama la eau aꞌe alakama namahi ikonaꞌi nakama lavea la ikaualeꞌa. 10 Ia kama la eau aꞌe alakama namahi kehuli aꞌe namahi Keakua. Ia kama la eau aꞌe alakama namahi kehakae nakakala Keakua, ia kama la eau aꞌe alakama hoi namahi imakino laoi kelaulahu naꞌanana kaualeꞌa ikaha ma naanana saꞌino. Ia Keanana Kapu la eau aꞌe alakama namahi kekakala nakakala eꞌee, ia kama la eau aꞌe alakama namahi kehuli mai kehakaꞌoko nakakala la. 11 Ia Keanana Kapu la soia ehuli mai namea nei hakoa. Kama la eau mai kakou namahi la, kaukali hea kama la hihai. Kinokama Christ 12 Kinokama hokahi eisi komaꞌi nakamaꞌina. Kena nakamaꞌina la hakoa esusuꞌui aꞌe kinokama hokahi la. Christ eme pela hoi. 13 Keanana Kapu Keakua ehaauꞌau kapu kakou hakoa io mai poi hekinokama hokahi. Niaina kakou na{Jiu} ia ma nakama enoho pouli. Ia niaina kakou nakama hananiu ia ma nakama moulalo. Keakua eau mai kakou hakoa Keanana Kapu hokahi, pela kakou ikaukali kama la. 14 Ia kinokama kekama eisi komaꞌi nakamaꞌina. Ia seai pela kamaꞌina hokahi. 15 Hano kapuae la emea pela, “Anau seai helima, ia kena anau mesesuꞌui ma kinokama.” Niaina kama la ekakala pela, kama la oisuꞌui ma kinokama la oia. 16 Ia hano keakalina emea pela, “Anau seai heꞌalemaka, ia kena anau mesesuꞌui ma kinokama.” Niaina kama la ekakala pela, kama la oisuꞌui ma kinokama la oia. 17 Ia poi kinokama la hakoa niꞌalemaka, kama la meselavaa kelono. Ia poi kinokama la hakoa niakalina, kama la meselavaa kesunu. 18 (Ia Keakua epena kinokama kekama ikaukali kehakaꞌoko aia.) 19 Ia poi nakamaꞌina la hakoa ehau, kinokama la mekipu pehe? 20 Komaꞌi namea la esuꞌui aꞌe kinokama la, ia kela hekinokama hokahi oia. 21 Kena keꞌalemaka la sekau keme aꞌe kelima la, “Anau sehihai aꞌoe.” Ia pohoulu la hoi sekau keme aꞌe sakapuae la, “Anau sehihai olua.” 22 Kakou amehakaꞌoko pela alaꞌina nakinokama kakou la seivi. Ia kakou ekunaꞌi naꞌina la. 23 Ia kakou ehakaꞌoko pela alaꞌina sehananiu, ia kakou ilolosi hakaualeꞌa naꞌina la. Ia alaꞌina eme kakou nonapa, kela hea kakou iꞌuhi hakaualeꞌa naꞌina la. 24 Ia alaꞌina nakinokama kakou seme kakou nonapa. Namela ekaualeꞌa oia. Keakua soia epena naꞌina la hakoa, kena ihamaha naꞌina kela kakou sehakaꞌoko maha la. 25 Ia naꞌina la hakoa ihakaꞌoko maha lia solakou. Aoki naꞌina la amehakauoki solakou. 26 Poi heꞌina hokahi ehalono lihu, naꞌina la hakoa mehalono lihu. Poi heꞌina hokahi ehamaha lia, kena naꞌina la hakoa ame hihia hoi. 27 Okou hakoa nikamaꞌina esusuꞌui aꞌe kinokama Christ. 28 Keakua ehilihili alakama iloko nahakina ana okou la imea mo kama heheaꞌu aia, kena ehilihili alakama ihakae nakakala aia la. Kama la ehilihili hoi alakama iaoaꞌo, kena ehilihili alakama ihuli aꞌe namahi aia la. Kama la ehilihili alakama ikonaꞌi nakama lavea la nokaualeꞌa, ia ehilihili alakama ikonaꞌi nahakina ana la. Kama la ehilihili alakama ilolosi nahakina ana la, ia ehilihili alakama ikakala nakakala eꞌee. 29 Seme pela Keakua ehaunalia okou hakoa iheheaꞌu maia. Ia seme pela okou hakoa ehakae nakakala Keakua, ia eaoaꞌo alakama. Seme pela okou hakoa ehuli aꞌe namahi Keakua, 30 ia ekonaꞌi nakama lavea la nokaualeꞌa. Seme pela okou hakoa elavaa kekakala nakakala eꞌee, ia ehuli aꞌe nahakaꞌoko nakakala la. 31 Ia okou ihai namahi okou noko nahoꞌi hananiu la. Ia anau mehuli aku keala hamaoni keko namea la. |
© 1999, Wycliffe Bible Translators, Inc. All rights reserved.
Wycliffe Bible Translators, Inc.