1 Corinthians 11 - Luaniua New Testament

¹ Ia okou ikaukali nakipukipu anau, ehau poi anau ekaukali nakipukipu Christ.

Kipukipu nahine keloku

² Anau ehamaha i okou, maikinimea okou emanaku kahi i anau. Ia okou hoi ekaohi mau namakeala Keakua kela anau eaoaꞌo aku i okou la.

³ Ia anau hihai okou imakino laoi pela Keakua ehananiu iluna Christ. Ia Christ ehananiu iluna nakanaka hakoa, ia nakanaka hakoa ehananiu iluna nahine lakou la.

⁴ Poi hekanaka eꞌuhi pohoulu aia keualoko aia eloku, ia ehakae nakakala Keakua, kama la ehanapa Christ.

⁵ Ia poi hehine seꞌuhi pohoulu aia keualoko aia eloku, ia ehakae nakakala Keakua, kama la ehanapa kanaka aia pela hoi. Ehau poi hehine esepe keloulu aia nomole.

⁶ Poi hehine seꞌuhi pohoulu aia, kena okou ekau kevalu keloulu aia imole. Ia poi kama la amenapa keualoko okou evalu pohoulu aia nomole, kena kaualeꞌa pela kama la iꞌahu pohoulu aia.

⁷ Nakanaka sekau keꞌuhi napohoulu lakou, maikinimea nakama la ekipu poi Keakua, kena ehuli aꞌe namahi Keakua. Ia kehine ehuli aꞌe namahi kanaka aia la.

⁸ Maikinimea Keakua sepena kanaka ikaha ma kehine. Keakua epena kehine ikaha ma kanaka la avale.

⁹ Keakua sepena kanaka ikonaꞌi kehine. Ia Keakua epena kehine ikonaꞌi kanaka la avale.

¹⁰ Ia kena kehine ekau keꞌuhi pohoulu aia ihuli aꞌe pela aia emoulalo keꞌavana aia la. Maikinimea na{enselo} la eꞌike nahine la.

¹¹ Ia keualoko kelukanaka la esuꞌui ma Kealiꞌi, kehine la ekunaꞌi kanaka aia la, ia kanaka la ekunaꞌi kehine aia la.

¹² Maikinimea Keakua nipena iho kehine amaka la ikaha ma kinokama kanaka. Kena imuli nakanaka amehanau iho iloko nahine. Ia Keakua soia epena namea nei hakoa.

¹³ Okou soꞌokou ihakaꞌoko halaoi. Ea? Keualoko nahine okou la eloku aꞌe i Keakua, ame kaualeꞌa pela nakama la seꞌuhi napohoulu lakou?

¹⁴ Keualoko kakou eꞌike namea hakoa Keakua epena la, kakou emakino kemenei. Poi keloulu kanaka eloa, kama la ekau kenapa oia.

¹⁵ Naloulu nahine la ehamanaꞌo keloa. Keakua eau aꞌe lakou naloulu eloa la iꞌuhi napohoulu lakou.

¹⁶ Poi hekama hihai hakauꞌaa manau i keme nei, anau meme aku penei, makou nahakina ana Keakua hakoa sekaukali kipukipu kehakauꞌaa la.

Kipukipu keꞌai Kealiꞌi

¹⁷ Anau hihai ikakala aku okou kelaa mea hoi. Ia anau mesekakala hamaha aku i okou. Maikinimea keualoko okou eꞌuku nolokuloku la, naola okou la seo mai nokaualeꞌa. Seai. Naola okou uo mai nosaꞌino avale.

¹⁸ Kemea amaka anau elono. Pela keualoko okou eꞌuku hakoa noloku, okou ehavavaꞌee soꞌokou iloko naukulana. Ia anau ehakina pela kelono nei ehamaoni.

¹⁹ Ia alaualoko okou meihavaꞌee naukulana, imakino okou pela nikama pehe ekonu.

²⁰ Keualoko okou eꞌuku hakoa iꞌai keꞌai ekapu Kealiꞌi, okou seꞌai nohamaha hamaoni kama la.

²¹ Kama ma kekama eꞌai naꞌai aia soia. Kena alakama okou uunu novale, ia alakama uhiꞌai.

²² Ea? Okou sehihale kenoho noꞌai ia nounu? Okou ehanaꞌino nahakina ana Keakua la, ia okou hanapa nakama haaloha la. Anau mekakala aku okou pehe? Ea? Anau meihamaha i okou? Seai. Hainakaa haeꞌo.

²³ Anau naaoaꞌo aku okou avale keaoaꞌo kela Kealiꞌi nime mai anau la. Ia keaoaꞌo la eme penei. I kepo kela Judas niau aꞌe Kealiꞌi Jesus i nakama hamakua la, Jesus eko halaoa,

²⁴ nohamaha aꞌe i Keakua. Kena ikohi halaoa la, kena ime aꞌe, “Kenei o kaukinokama kela anau eau aku ikonaꞌi okou. Ia okou iꞌai halaoa nei ime okou imanaku kahi anau.”

²⁵ Ia kena kulana nakama la niꞌai nooki, kama la uko ke{kapu}, kena ime aꞌe, “Ke{kapu} nei o kaukoko kela ehuli aꞌe kehamaoni nakakala eivi Keakua vahonei. Ia keualoko okou eunu ke{kapu} nei, okou imanaku kahi anau.”

²⁶ Kehakaꞌoko keme nei eme pela, keualoko okou eꞌai halaoa la, ia eunu ke{kapu} la, okou ehuli aꞌe kemake Kealiꞌi, nokae keualoko kama la meivaꞌai mai muli.

²⁷ Poi hekama eꞌai halaoa la, ia eunu ke{kapu} la, ia nakipukipu aia sekonu, kena kama la ehaisaꞌino kinokama ia ma kekoko kela Kealiꞌi.

²⁸ Kela hea kakou hakoa ikau kekilo halaoi naola kakou imua kakou eꞌai halaoa la ia eunu ke{kapu} la.

²⁹ Maikinimea ame hekama eꞌai halaoa la ia eunu ke{kapu} la ia esemakino ma kela o kinokama Kealiꞌi, kena Keakua mehakonukonu kama na.

³⁰ Kela hea komaꞌi kekama okou elavea, ia ekaia kino kahi. Ia alakama namake avale hoi.

³¹ Ia poi kakou ekilo halaoi naola kakou imua, kena Keakua mesehakonukonu kakou.

³² Ia Kealiꞌi ehakonukonu kakou vahonei ipolo polo kakou ikonu. Aoki kama la meihai mai kakou keualoko aia mehakonukonu nakama i kemaalama nei la.

³³ Ia aukaina. Keualoko okou meiꞌuku hakoa iꞌai keꞌai Kealiꞌi, okou ekali iꞌakoa okou hakoa.

³⁴ Ia poi hekama ehiꞌai, kama la ekau keꞌai mai i hale oia. Aoki Keakua mehakonukonu okou i nakipukipu saꞌino okou la, keualoko okou eꞌuku noꞌai hakoa. Ia anau mehakonu aku alamea hoi keualoko anau ekae aku i okou.