Taaniyoo 7 - ᐅᒋᐺ ᑭᒋᒪᓯᓇᐃᑲᓐᑖᓂᔫ ᑮᑕᔑᑕᕽ ᐅᑎᔑᓇᒧᐎᓐ 1 ᓂᑕᒻ ᐁᐱᐴᓂᓂᒃ ᐃᑕᔥ ᐯᓬᔖᓴᕒᐊᓐ Belshazzar ᑮᑭᒋᐅᑭᒫᐎᓂᒡ ᐹᐱᓬᐊᓐ Babylon ᐊᑮᕽ, ᓃᓐ ᑖᓂᔫ Daniel ᓂᑮ ᐸᐙᒋᑫ ᐁᓂᐹᔮᓐ, ᑫᑰᓐ ᐁᑮ ᐃᔑᓇᒫᓐ ᓂᑎᓀᑕᒧᐎᓂᕽ᙮ ᒦᑕᔥ ᑳᐃᔑ ᐅᔑᐲᐊᒫᓐ ᐃᐃ ᓂᑎᔑᓇᒧᐎᓐ ᒋᐊᓂ ᑭᑫᒋᑳᑌᒃ᙮ 2 ᓂᑮ ᐃᔑ ᐸᐙᒋᑫ ᓴ ᐁᑎᐱᑲᒃ, ᐁᑮ ᐙᐸᑕᒫᓐ ᓃᐎᕽ ᐃᓇᑫ ᑳᐅᑖᓂᒪᒃ ᐁᑮ ᐃᔑ ᒥᑯᔥᑳᒋᒋᑫᒪᑲᑭᓐ ᐃᐃᒫ ᑭᒋᑲᒦᕽ᙮ 3 ᒦᑕᔥ ᓃᐎᓐ ᑭᒋ ᐊᔭᐋᐎᔕᒃ ᐁᐯᐸᑳᓂᓈᑯᓯᐙᒡ ᑮᐅᒋ ᐊᒀᓰᐗᒃ ᑭᒋᑲᒦᕽ᙮ 4 ᐊᐊ ᓴ ᓂᑕᒻ ᑳᑮ ᐊᒀᓰᒡ ᒥᔑᐱᔒᕽ ᑮᐃᔑᓈᑯᓯ, ᐁᑮ ᐃᔑ ᓂᑸᑲᓀᒡ ᒥᑭᓰᕽ᙮ ᒣᒀ ᑕᔥ ᐁᑲᓇᐙᐸᒪᒃ ᑮᒪᓂᐱᒋᑳᑌᓂᐗᓐ ᐅᓂᑸᑲᓇᓐ, ᒦᔥ ᑳᐃᔑ ᒪᔮᐎᓂᑲᓂᐎᒡ ᒋᓃᔓᐅᓯᑌᑳᐸᐎᒡ ᑖᐱᔥᑰ ᐃᓂᓂ᙮ ᐃᓂᓃᕽ ᒋᔑ ᓈᑲᑕᐌᑕᕽ ᑮᐃᔑ ᒦᓂᑰᐎᓯ᙮ 5 ᒦᓇᐙ ᑕᔥ ᑯᑕᒃ ᐊᔭᐋᐎᔥ ᓂᑮ ᐙᐸᒫ ᐁᐊᒀᓰᒡ, ᒪᑯᕽ ᐁᑮ ᐃᔑᓈᑯᓯᒡ, ᒦ ᐃ ᓃᔑᓐ ᐊᔭᐋᐎᔕᒃ ᐁᑮ ᐙᐸᒪᒀ᙮ ᐃᓂᓃᕽ ᑕᔥ ᑮᐃᔑ ᐅᐱᑳᐸᐎ, ᓂᓯᓐ ᐅᐱᑲᔨᒫᐞ ᐁᑮ ᑭᒋᐗᒫᒡ ᐐᐱᑎᕽ᙮ ᐊᐎᔭᓐ ᑕᔥ ᐅᑮᐃᑰᓐ, ᐊᐤ, ᑌᒦᒋᓐ ᐃᐃ ᐐᔮᔅ᙮ 6 ᒣᒀ ᓴ ᐁᑲᓇᐙᐸᒪᒀ, ᒦᓇᐙ ᓴ ᑯᑕᒃ ᐊᔭᐋᐎᔥ ᓂᑮ ᐙᐸᒫ ᐁᐊᒀᓰᒡ, ᐹᐹᑌ ᑭᒋ ᐴᔒᓯᕽ ᐁᑮ ᐃᔑᓈᑯᓯᒡ᙮ ᑮᓃᐎᓂᓂᐗᓐ ᑕᔥ ᐅᓂᑸᑲᓇᓐ ᐅᐱᑾᓂᕽ ᐱᓀᔒᔑᕽ ᐁᑮ ᐃᔑ ᓂᑸᑲᓀᒡ, ᑮᓃᐎᑎᒀᓀ ᑕᔥ ᑲᔦ᙮ ᑮᐃᔑ ᒦᓂᑰᐎᓯ ᑕᔥ ᒋᑲᔥᑭᑑᒡ ᒋᑎᐯᒋᑫᒡ᙮ 7 ᒣᒀ ᓴ ᐁᑲᓇᐙᐸᒪᒀ ᒦᓇᐙ ᓂᑮ ᐙᐸᒫ ᑯᑕᒃ ᐊᔭᐋᐎᔥ ᐁᐊᒀᓰᒡ ᐐᑫ ᐁᑯᑖᓯᓈᑯᓯᒡ, ᒋᑯᓯᓐᒡ ᐁᑮ ᐃᔑᓈᑯᓯᒡ, ᐐᑫ ᐁᑮ ᒪᔥᑲᐌᑖᑯᓯᒡ᙮ ᒦ ᓴ ᐃ ᓃᐎᓐ ᐊᔭᐋᐎᔕᒃ ᐁᑮ ᐙᐸᒪᒀ᙮ ᐊᐊ ᑕᔥ ᐊᔭᐋᐎᔥ ᐁᑮ ᐸᐲᐙᐱᒀᐱᑌᒡ ᐁᑮ ᒪᒫᑳᐱᑌᒡ; ᐁᑮ ᔑᑾᒫᒡ, ᐁᑮ ᑭᑖᐸᓂᐋᒡ ᑲᔦ ᑳᒦᑳᓈᒡ᙮ ᐁᑮ ᔑᑯᔥᑲᕽ ᑲᔦ ᑳᑮ ᐃᔥᑾᑕᕽ᙮ ᐐᑫ ᑮᑭᒋ ᐸᑳᓂᓈᑯᓯ ᐃᐃ ᑳᑮ ᐃᔑᓈᑯᓯᓂᒡ ᑯᑕᒃ ᑲᑭᓇ ᐊᔭᐋᐎᔕᐞ᙮ ᒥᑖᓱ 10 ᑲᔦ ᑮᑕᔑᐗᐞ ᐅᑌᔥᑲᓇᐞ᙮ 8 ᒣᒀ ᑕᔥ ᐁᑲᓇᐙᐸᒥᒪᒃ ᐅᑌᔥᑲᓇᐞ, ᓂᑮ ᐅᒋ ᐙᐸᒫ ᓴ ᐯᔑᒃ ᐁᔥᑲᓀᔅ ᐁᐱ ᓵᑭᑭᒡ ᒣᑴᔭᐄ ᑳᑮ ᐃᔑᐊᔮᓂᒡ ᐁᔥᑲᓇᐞ᙮ ᓂᓯᓐ ᑕᔥ ᐁᔥᑲᓇᐞ ᐅᑮ ᐸᑾᒋᔥᑲᐙᐞ᙮ ᐊᐊ ᑕᔥ ᐁᔥᑲᓀᔅ ᑮᐅᔥᑮᔑᑯ ᐃᓂᓃᕽ ᐁᑮ ᐃᔑᔥᑮᔑᑴᒡ, ᑮᐅᑑᓂ ᑲᔦ ᑳᑮ ᐅᒋ ᒫᒦᒀᓂᑎᓱᒡ᙮ ᑖᓂᔫ ᑮᐸᐙᓈᒡ ᐃᓂ ᓀᐱᒡ ᑳᐱᐱᒫᑎᓯᓂᒡ 9 ᐁᐃᓈᐱᔭᓐ ᐃᑕᔥ, ᓂᑮ ᐙᐸᑫ ᓴ ᑭᒋᐅᑭᒫᐗᐱᐎᓇᓐ ᐁᐅᓇᒋᑳᑌᑭᓐ᙮ ᐊᐊ ᓴ ᑕᔥ ᑳᑭᑫ ᑳᐱ ᐱᒫᑎᓯᒡ ᑮᐅᓇᐱ ᐃᐃᒫ ᑭᒋᐅᑭᒫᐗᐱᐎᓂᕽ᙮ ᐅᑭᑭᔥᑭᑲᓇᓐ ᓴ ᑰᓂᕽ ᑮᐊᐲᒋ ᐙᐱᔥᑳᓂᐗᓐ; ᐐᓂᓯᓴᓐ ᑲᔦ ᐐᑫ ᑮᐙᐱᔥᑳᓂᐗᓐ ᑖᐱᔥᑰ ᒫᓇᒑᓂᔑᐗᔮᓐ ᑳᔑ ᐙᐱᔥᑭᓯᒡ᙮ ᒦᔥ ᑳᐃᔑᓈᑾᓂᓂᒃ ᐅᑭᒋᐅᑭᒫᐗᐱᐎᓐ ᑖᐱᔥᑰ ᐁᐱᔅᑲᓀᓂᒃ ᐁᐊᐲᑕᕽ, ᑳᑮ ᐃᔑ ᑎᑎᐱᓭᑲᑌᓂᒃ ᑲᔦ ᐁᑮ ᑭᔑᐸᑯᓀᓭᓂᒃ᙮ 10 ᒦᑕᔥ ᐃᐃᒫ ᑳᐅᒋᒋᐗᓂᓂᒃ ᐃᔥᑯᑌ ᓰᐲᓂ ᑳᑮ ᐃᔑᐊᔮᒡ᙮ ᓃᐱᐗᐞ ᑭᒋᒥᑖᔂᒃ ᐊᐎᔭᐞ ᐅᑮ ᐱ ᐊᑕ ᐊᓄᑮᑖᑰᐞ; ᑳᐊᐲᒋ ᐹᑏᓄᓂᒡ ᑳᐐᓐ ᑕᑮ ᑌᐸᑭᒫᓰᐗᐞ ᐁᓃᐸᐎᓂᒡ ᐁᓈᓴᒦᒡ᙮ ᒦᑕᔥ ᑳᐃᔑ ᐅᓇᐱᓈᓂᐗᕽ ᐁᐐ ᑎᐹᑯᓂᑎᕽ, ᒪᓯᓇᐃᑲᓇᓐ ᑕᔥ ᑮᐹᑮᑭᓂᑳᑌᐗᓐ᙮ 11 ᒣᒀ ᑕᔥ ᐁᑲᓇᐙᐱᔮᓐ, ᓂᑮ ᓅᑕᐙ ᓴ ᐊᐊ ᐁᔥᑲᓀᔅ ᐁᑭᒋ ᒫᒦᒀᓂᑎᓱᒡ, ᐁᑲᑭᒋᒧᒡ ᑲᔦ᙮ ᓂᑮ ᑲᓇᐙᑉ ᐃᑕᔥ ᐁᓂᒋᑲᓂᐎᒡ ᐊᐊ ᐊᔭᐋᐎᔥ ᑳᑯᑖᓯᓈᑯᓯᒡ᙮ ᐅᐐᔭᐤ ᑕᔥ ᑮᒪᒍᑌ ᐌᐱᓂᑳᑌᓂ, ᒦᔥ ᑳᐃᔑ ᓂᔑᐗᓈᒋᒋᑳᑌᓂᒃ᙮ 12 ᐃᑭ ᑕᔥ ᐐᓐ ᑯᑕᒃ ᐊᔭᐋᐎᔕᒃ ᑮᐅᑖᐱᓇᒪᐙᐗᒃ ᐅᒪᔥᑲᐎᓰᐎᓂᐙᓐ; ᔖᑰᒡ ᑕᔥ ᑮᓇᑭᓇᒪᐙᐗᒃ ᑫᔮᐱ ᐊᒋᓇ ᒋᐱᒫᑎᓯᐙᒡ᙮ 13 ᒦᑕᔥ ᐅᐅ ᑳᐃᔑᓇᒫᓐ ᐁᑎᐱᑲᒃ, ᐁᑮ ᐙᐸᒪᒃ ᐊᐎᔭ ᐃᓂᓂᐗᓐ ᐌᑯᓯᓯᒥᑯᒡ ᐁᐃᔑᓈᑯᓯᒡ, ᐁᑮ ᐱ ᓈᓯᑲᐙᒡ ᒣᑴᐗᑸᕽ ᐁᐱ ᐊᔮᒡ᙮ ᐃᓂᐌᓂᐗᓐ ᑕᔥ ᑳᑭᑫ ᑳᐱ ᐱᒫᑎᓯᓂᒡ ᐅᑮ ᐱᐊᑕ ᐙᐸᒫᓐ᙮ ᒦᔥ ᐌᑎ ᑳᐃᔑᐎᓂᓐᒡ ᐁᔑᐊᔮᓂᒡ᙮ 14 ᒦᑕᔥ ᑳᑮ ᒦᓂᓐᒡ ᑲᔥᑭᐁᐎᓯᐎᓐ, ᑭᒋ ᐃᓀᑖᑯᓯᐎᓐ, ᑭᒋᐅᑭᒫᐎ ᒪᔥᑲᐎᓰᐎᓐ ᑲᔦ, ᑲᑭᓇ ᑕᔥ ᐯᒫᑎᓯᓂᒡ, ᑳᐯᐸᑳᓉᐙᓇᑭᓯᓂᒡ ᑲᔦ, ᐋᓃᓐ ᓴ ᑯ ᑳᑕᓱ ᐃᔑᑮᔗᓂᒡ ᐯᒫᑎᓯᓂᒡ ᐅᑮ ᐊᓇᒥᐁᑖᑰᐞ᙮ ᐃᐃᐌᓂ ᑕᔥ ᑳᔑ ᑎᐯᒋᑫᒡ ᑕᓀᐱᒋ ᐊᔮᓂ, ᑳᐐᓐ ᑲᔦ ᐐᑳ ᑕᐴᓂᓭᓯᓂᓂ᙮ ᑳᔑ ᑭᒋᐅᑭᒫᐎᒡ ᓴ ᑳᐐᓐ ᐐᑳ ᑕᓂᔑᐗᓈᒋᒋᑳᑌᓯᓂᓂ᙮ ᐅᑎᔑᓇᒧᐎᓐ ᐁᑮᐐᑌᓂᒃ ᐁᔑᓯᓂᓂᒃ 15 ᐐᑫ ᑕᔥ ᓂᑮ ᐗᐙᓀᑕᒥᐃᑰᓐ ᓂᑎᔑᓇᒧᐎᓐ, ᐐᑫ ᑲᔦ ᓂᑮ ᐅᒋ ᒥᑯᔥᑳᑌᑕᒻ᙮ 16 ᒦᑕᔥ ᑳᐃᔑ ᐊᑕ ᐙᐸᒪᒃ ᐊᐊ ᐯᔑᒃ ᐯᔓ ᑳᑮ ᓃᐸᐎᒡ ᐃᐃᒫ, ᐁᑮ ᑲᑴᒋᒪᒃ ᑌᐺ ᒋᐐᑕᒪᐎᒡ ᐋᓃᓐ ᐁᔑᓯᓂᓂᒃ ᑲᑭᓇ ᐅᓄᐌᓂᐗᓐ ᑳᑮ ᐃᔑᓇᒧᐗᒃ᙮ ᒦᑕᔥ ᑳᐃᔑ ᐐᑕᒪᐎᒡ ᐋᓃᓐ ᐁᔑᓯᓂᓂᑭᓐ᙮ 17 ᒦᑕᔥ ᐅᐅ ᑳᐃᑭᑐᒡ, ᐃᑭ ᓴ ᓃᐎᓐ ᑭᒋ ᐊᔭᐋᐎᔕᒃ ᑳᑮ ᐙᐸᒪᑣ, ᒦᐗᓐ ᓴ ᐃᑭ ᓃᐎᓐ ᑭᒋᐅᑭᒫᐎᐎᓇᓐ ᐅᐅᒫ ᐊᑮᕽ ᑫᓂ ᐊᔮᑭᓐ᙮ 18 ᐃᑭ ᑕᔥ ᐯᒫᑎᓯᐙᒡ ᑫᑎᐯᓂᒥᑯᐙᒡ ᒫᐗᒡ ᐁᔥᐯᑖᑯᓯᓂᒡ ᐅᑲ ᑌᐱᓈᓈᐙ ᐃᐃ ᑎᐯᒋᑫᐎᓐ, ᐐᓇᐙ ᑕᔥ ᐃᑯ ᓀᐱᒡ ᑕᑎᐱᓇᐌᐎᓯᐗᒃ, ᑌᐺ ᓴ ᐃ ᓀᐱᒡ ᑕᐃᔑᓭᐗᒃ! 19 ᔖᑰᒡ ᑕᔥ ᑌᐺ ᓂᑮᐐ ᑲᑴ ᑭᑫᓂᒫ ᐁᒋᑲᓂᐎᑴᓐ ᐊᐊ ᐃᔥᒀᒡ ᓃᐎᓐ ᐊᔭᐋᐎᔥ ᒫᐗᒡ ᐃᑯ ᑭᒋ ᐸᑳᓐ ᑳᑮ ᐃᔑᓈᑯᓯᒡ ᑲᑭᓇ ᑯᑕᒃ ᐊᔭᐋᐎᔕᐞ᙮ ᐐᓐ ᓴ ᒫᐗᒡ ᐁᑮ ᑯᑖᓯᓈᑯᓯᒡ, ᐁᑮ ᐲᐙᐱᒀᐱᑌᒡ, ᐅᔥᑲᔒᐞ ᑲᔦ ᐅᓵᐙᐱᑯᕽ ᐁᑮ ᑎᓄᐎᓂᒡ᙮ ᐊᐊ ᐊᔭᐋᐎᔥ ᑳᑮ ᔑᑾᒫᒡ, ᑳᑮ ᑭᑖᐸᓂᐋᒡ ᑲᔦ ᑳᒦᑳᓈᒡ, ᑳᑮ ᔑᑯᔥᑲᕽ ᑲᔦ ᐃᐃ ᑳᑮ ᐃᔥᑾᑕᕽ᙮ 20 ᓂᑮᐐ ᑲᑴ ᑭᑫᓂᒥᒫᐞ ᑕᔥ ᑳᑮ ᒥᑖᒋᓂᒡ ᐅᑌᔥᑲᓇᐞ ᐊᐊ ᐊᔭᐋᐎᔥ, ᐊᐊ ᑕᔥ ᑲᔦ ᑯᑕᒃ ᐁᔥᑲᓀᔅ ᑳᑮ ᒨᑮᔥᑳᒡ ᐃᐃᒫ ᒣᑴᔭᐄ, ᓂᓯᓐ ᑕᔥ ᐁᔥᑲᓇᐞ ᓂᑯᒋ ᑳᑮ ᐃᔑ ᐌᐱᔥᑲᐙᒡ᙮ ᒦ ᐄᑐᒃ ᐊᐊ ᐁᔥᑲᓀᔅ ᑳᑮ ᐅᔥᑮᔑᑯᒡ, ᑳᑮ ᐅᑑᓂᒡ ᑲᔦ, ᐐᑫ ᑳᑮ ᑭᒋ ᑲᑭᒋᒧᒡ, ᐐᑫ ᑲᔦ ᓇᐗᒡ ᑳᑮ ᑭᒋ ᐃᔑᓈᑯᓯᒡ ᐊᐲᒡ ᐐᓐ ᐃᐃ ᑯᑕᒃ᙮ 21 ᒦᑕᔥ ᐁᑲᓇᐙᐱᔭᓐ ᐊᐊ ᐁᔥᑲᓀᔅ ᑳᑮ ᒦᑳᓈᒡ ᐯᒫᑎᓯᓂᒡ ᑭᔐᒪᓂᑑᓐ ᑌᐯᓂᒥᑯᓂᒡ ᒦᔥ ᑳᑮ ᔖᑰᒋᐋᒡ᙮ 22 ᐹᓂᒫ ᑕᔥ ᑮᐴᓂᒋᑫ ᑮᐱ ᑕᑯᔑᓂᓂᒡ ᐃᓂ ᑳᑭᑫ ᑳᐱ ᐱᒫᑎᓯᓂᒡ ᑮᐅᓈᑯᓂᑫᓂᒡ ᑮᐐᒋᐋᓂᒡ ᒫᐗᒡ ᐁᔥᐯᑖᑯᓯᓂᒡ ᐅᐱᒫᑎᓰᒥᓂ᙮ ᒦᑕᔥ ᐃᐃ ᐊᐲ ᑳᑮ ᐅᒋᒋᓭᓂᒃ ᐃᑭ ᑫᑎᐯᓂᒥᑯᐙᒡ ᒫᐗᒡ ᐁᔥᐯᑖᑯᓯᓂᒡ ᒋᑎᐱᓇᐌᐎᓯᐙᒡ ᐃᐃ ᑎᐯᒋᑫᐎᓐ᙮ 23 ᒦᑕᔥ ᐅᐅ ᑳᐃᔑ ᐐᑕᒪᐎᒡ, ᐊᐊ ᓴ ᓃᐎᐊᔭᐋᐎᔥ, ᒦ ᓴ ᐃᐌ ᑫᓂ ᓃᐗᕽ ᑭᒋᐅᑭᒫᐎᐎᓇᓐ ᑫᓂ ᐊᔮᒃ ᐅᐅᒫ ᐊᑮᕽ᙮ ᐸᑳᓐ ᓴ ᐃᐃᐌ ᑭᒋᐅᑭᒫᐎᐎᓐ ᑕᐃᓀᑖᑾᓐ ᐊᐲᒡ ᐐᓐ ᐃᓂ ᑯᑕᒃ ᑭᒋᐅᑭᒫᐎᐎᓐ᙮ ᑕᓂᔑᐗᓈᒋᒋᑫᒪᑲᓐ ᓴ ᐅᐅᒫ ᐊᑮᕽ, ᑕᔑᑯᔥᑭᑫᒪᑲᓐ ᑲᔦ᙮ 24 ᐃᑭ ᓴ ᒥᑖᓱ ᐁᔥᑲᓇᒃ ᒦᐗᒃ ᓴ ᐃᑭ ᑫᒥᑖᒋᐙᒡ ᑭᒋᐅᑭᒫᒃ ᑫᓂ ᐅᒌᐙᒡ ᐅᐅᒫ ᑎᐯᒋᑫᐎᓂᕽ᙮ ᑮᐃᔥᒀ ᐊᔮᐙᒡ ᑕᔥ ᐃᑭ, ᐯᑳᓂᓯᒡ ᓴ ᑕᓂ ᐊᔮ ᑭᒋᐅᑭᒫ ᑫᑭᒋ ᐸᑳᓐ ᐃᔑᐊᔮᒡ, ᓂᓯᓐ ᑕᔥ ᑭᒋᐅᑭᒫᐞ ᐅᑲ ᐸᑕᐱᓈᐞ᙮ 25 ᐐᑫ ᓴ ᐅᑲ ᑭᒋ ᐃᓈᐱᓀᒫᓐ ᐃᓂ ᒫᐗᒡ ᐁᔥᐯᑖᑯᓯᓂᒡ, ᐅᑲ ᑲᒀᑕᑭᐃᒫᐞ ᑲᔦ ᐅᐱᒫᑎᓰᒥᓂ᙮ ᐅᑲ ᑲᑴ ᐋᒋᑑᓐ ᑲᔦ ᐸᑳᓐ ᑫᑰᓂᓂ ᒋᐃᔑᓭᓂᒃ, ᐃᓈᑯᓂᑫᐎᓇᓐ ᑲᔦ᙮ ᒦᑕᔥ ᒋᒦᓂᓐᒡ ᒋᑎᐯᓂᒫᒡ ᐙᑑᑕᐙᒡ ᐃᐃ ᐯᒫᑎᓯᓂᒡ ᓂᓱᐱᐴᓐ ᐋᐱᑕ ᒥᓂᒃ ᒋᑎᐯᓂᒫᒡ᙮ 26 ᑕᐅᓇᐱᓈᓂᐗᓐ ᑕᔥ ᒋᑎᐹᑯᓂᑎᕽ, ᒦᑕᔥ ᐃᐃ ᑳᔑ ᒪᔥᑲᐎᓰᒡ ᒋᐅᑖᐱᓂᑳᑌᓂᒃ, ᒦ ᑲᔦ ᐃ ᐐᑫ ᒋᑌᑕᑯ ᓀᐱᒋ ᓂᔑᐗᓈᒋᒋᑲᓂᐎᒡ᙮ 27 ᐃᐃᐌᓂ ᑕᔥ ᑳᔑ ᐅᑭᒫᐌᑖᑾᓂᓂᑭᓐ, ᑳᔑ ᒪᔥᑲᐌᑖᑾᓂᓂᑭᓐ, ᑳᔑ ᑭᒋ ᐃᓀᑖᑾᓂᓂᑭᓐ ᑲᔦ ᑲᑭᓇ ᐃᓂ ᐊᑮᐎ ᑎᐯᒋᑫᐎᓇᓐ ᑕᒦᓈᐗᒃ ᐃᑭ ᐯᒫᑎᓯᐙᒡ ᑌᐯᓂᒥᑯᐙᒡ ᒫᐗᒡ ᐁᔥᐯᑖᑯᓯᓂᒡ᙮ ᐃᐃᐌᓂ ᑕᔥ ᑭᔐᒪᓂᑑ ᑳᔑ ᑎᐯᒋᑫᒡ ᑕᓀᐱᒋ ᐊᔮᓂ, ᑳᐐᓐ ᑲᔦ ᐐᑳ ᑕᐴᓂᓭᓯᓂᓂ᙮ ᑲᑭᓇ ᑕᔥ ᑫᐅᑭᒫᐎᓂᒡ ᐅᑲ ᐊᓇᒥᐁᑖᑰᐞ, ᐅᑲ ᓇᐃᑖᑰᐞ ᑲᔦ, ᒦ ᐅᐌ ᑳᐃᔑ ᐐᑕᒫᑰᔮᓐ᙮ 28 ᒦ ᓴ ᐃ ᒥᓂᒃ ᑳᐃᔑᓇᒫᓐ᙮ ᐐᑫ ᑕᔥ ᓂᑮ ᒥᑯᔥᑳᑌᑕᒥᐃᑯᓐ ᐅᐅ ᓇᑫ ᐁᑮ ᐃᔑ ᓈᑲᑕᐌᑕᒫᓐ, ᒦᔥ ᑳᑮ ᐅᒋ ᐙᐱᓀᐎᓯᔮᓐ᙮ ᑲᑭᓇ ᓴ ᐅᓄ ᑳᑮ ᐃᔑᓇᒫᓐ ᓂᑮ ᑲᓇᐌᑖᓇᓐ ᓂᑌᐃᕽ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society