Taaniyoo 4 - ᐅᒋᐺ ᑭᒋᒪᓯᓇᐃᑲᓐᓀᐸᑲᓈᓴᕒ ᒦᓇᐙ ᑮᐸᐙᒋᑫᒡ 1 ᒦᑕᔥ ᐅᐅ ᑭᒋᐅᑭᒫ ᓀᐸᑲᓈᓴᕒ ᑳᐃᔑᐲᐊᒪᐙᒡ ᑲᑭᓇ ᐯᒫᑎᓯᓂᒡ, ᑳᐯᐸᑳᓉᐙᓇᑭᓯᓂᒡ ᑲᔦ, ᐁᑕᓱ ᐯᐸᑳᓂ ᑮᔗᓂᒡ ᑲᔦ: ᑕᑲ ᑭᑲ ᐌᓅᒋᓭᒻ ᐱᓵᓂᓯᐎᓐ! 2 ᐁᑕᑕᐌ ᓴ ᓂᒥᓉᑕᒻ ᒋᐐᑕᒪᐎᓇᑰᒃ ᐋᓃᓐ ᑳᐱ ᑑᑕᐎᒡ ᒫᐗᒡ ᐁᔥᐯᑖᑯᓯᒡ ᑭᔐᒪᓂᑑ ᐁᑮ ᓈᑯᑕᒪᐎᒡ ᐅᒫᒪᑳᓯᓈᑯᒋᑫᐎᓇᓐ, ᐅᒪᒫᑖᐎᒋᑫᐎᓇᓐ ᑲᔦ᙮ 3 ᐁᑕᑕᐌ ᓴ ᒫᒪᑳᑌᑖᑾᓂᓂᐗᓐ ᐅᑭᑭᓇᐙᒋᒋᑫᐎᓇᓐ, ᐁᑕᑕᐌ ᑲᔦ ᒪᔥᑲᐌᑖᑾᓂᓂᐗᓐ ᐅᒪᒫᑖᐎᒋᑫᐎᓇᓐ! ᐅᑑᑭᒫᐎᐎᓐ ᓴ ᑕᓀᐱᒋ ᐊᔮᓂ, ᐁᔑ ᑎᐯᒋᑫᒡ ᑲᔦ ᑕᓂ ᐊᔮᓂ ᒥᓂᒃ ᐃᑯ ᑫᓂ ᐊᔮᓂᑫ ᓂᑖᐎᑭᐃᑎᕽ᙮ 4 ᓃᓐ ᓴ ᐁᐊᔭᐱᔮᓐ ᓂᑖᐎᓂᕽ ᓂᑑᑭᒫᐎᑲᒥᑯᕽ, ᐁᓇᐁᑕᒫᓐ ᐐᑫ ᐁᒥᓄᓭᔮᓐ᙮ 5 ᒦᑕᔥ ᐁᓂᐹᔮᓐ ᑫᑰᓇᓐ ᐯᐙᑕᒫᓐ ᑳᑮ ᓭᑭᐃᑯᔮᓐ᙮ ᒦᔥ ᑲᔦ ᓂᑎᔑᓇᒧᐎᓇᓐ ᑳᑮ ᒥᑯᔥᑳᒋᐃᑯᔮᓐ᙮ 6 ᒦᑕᔥ ᑳᑮ ᐊᓅᑮᔮᓐ ᒋᐲᓂᑣ ᐁᔑᐊᔮᐗᒃ ᑲᑭᓇ ᑫᑮᑖᐗᑭᓱᐙᒡ ᐃᓂᓂᐗᒃ ᐁᔮᐙᒡ ᐹᐱᓬᐊᓐ Babylon ᐊᑮᕽ ᒋᑭᑫᑕᒧᐃᐙᒡ ᐁᔑᓯᓂᓂᒃ ᑳᑮ ᐃᔑ ᐸᐙᒋᑫᐗᒃ᙮ 7 ᒦᔥ ᑳᑮ ᐲᔖᐙᒡ ᒣᒫᑖᐎᓯᐙᒡ, ᑳᒪᒫᑖᐎ ᑮᔗᐙᒡ, ᐗᓇᑯᔑᕽ ᐌᒋ ᑭᑫᒋᑫᐙᒡ, ᑳᒪᒫᑖᐎ ᐊᑕ ᑭᑫᒋᑫᐙᒡ ᑲᔦ ᐁᑮ ᐐᑕᒪᐗᒀ ᐋᓃᓐ ᑳᐃᔑ ᐸᐙᒋᑫᐗᒃ᙮ ᑳᐐᓐ ᐃᑕᔥ ᐅᑮ ᑲᔥᑭᑑᓰᓈᐙ ᒋᐐᑕᒪᐎᐙᒡ ᐁᔑᓯᓂᓂᒃ ᓂᐸᐙᒋᑲᓐ᙮ 8 ᑖᓂᔫ ᑕᔥ ᐃᔥᒀᒡ ᑮᐲᑎᑫ ᐁᔑᐊᔮᐗᒃ᙮ ᒦ ᐄᑐᒃ ᐊᐊ ᐯᓬᑎᔖᓴᕒ Belteshazzar ᑳᐃᓂᓐᒡ ᐁᐱᓂᑳᓱᒡ ᓂᒪᓂᑑᒪᓐ, ᑫᑭᔥᑲᐙᒡ ᑲᔦ ᒪᓂᑑᐎ ᐊᒑᑾᓐ; ᒦᔥ ᑳᑮ ᐐᑕᒪᐗᒃ ᓂᐸᐙᒋᑲᓐ ᐅᐅ ᐁᑮᐃᓇᒃ, 9 ᑮᓐ ᐯᓬᑎᔖᓴᕒ, ᑳᓃᑳᓂᔥᑲᐗᑣ ᒣᒫᑖᐎᓯᐙᒡ, ᓂᑭᑫᑖᓐ ᓴ ᐁᑭᑭᔥᑲᐗᒡ ᒪᓂᑑᐎ ᐊᒑᒃ, ᐁᓴᓇᑫᑕᓯᐗᓐ ᑲᔦ ᑫᑰᓐ ᑳᑭᑫᒋᑳᑌᓯᓄᒃ᙮ ᒦ ᓴ ᐅᐌ ᑳᐃᔑ ᐸᐙᒋᑫᔮᓐ, ᑕᑲ ᓴ ᐐᑕᒪᐎᔑᓐ ᐋᓃᓐ ᐁᔑᓯᕽ᙮ 10 ᒦᑕᔥ ᐅᐅ ᑳᐃᔑ ᐸᐙᒋᑫᔮᓐ ᐁᓂᐹᔮᓐ, ᑳᑮ ᐃᔑᓇᒫᓐ ᓂᑮ ᐙᐸᒫ ᑭᒋ ᒥᑎᒃ ᐁᑭᓍᑯᓯᒡ ᐁᐸᑕᑭᓱᒡ ᓈᐗᔭᐄ ᐅᐅᒫ ᐊᑮᕽ᙮ 11 ᐊᐊ ᓴ ᒥᑎᒃ ᑮᐊᓂ ᒥᒑᑯᓯ, ᐁᑮ ᐊᓂ ᒪᔥᑲᐎᑭᒡ, ᐲᓂᔥ ᑮᔑᑯᕽ ᑮᐅᒋᒋᑭ ᑳᐊᐲᒋ ᑭᓍᑯᓯᒡ᙮ ᒥᓯᐌ ᓴ ᐁᑯ ᑭᔑᐹᓂᒃ ᐊᑭ ᑮᐅᒋ ᑌᐱᓈᑯᓯ᙮ 12 ᐁᔑ ᐊᓃᐲᔑᐎᒡ ᓴ ᐐᑫ ᑮᒥᓄᓈᑯᓯ, ᓃᐱᐗᐞ ᑲᔦ ᔒᐎᒦᒋᒻ ᐃᐃᒫ ᑮᑕᔑ ᓂᑖᐎᑭᓐ᙮ ᒦᔥ ᐃᐃᒫ ᑲᑭᓇ ᐊᐎᔭᒃ ᑳᐅᒋ ᑌᐱᓭᐙᒡ ᒦᒋᒻ᙮ ᐊᔭᐋᐎᔕᒃ ᐱᑾᒐᔭᐄ ᐁᔮᐙᒡ ᒦ ᐃᒫ ᑳᐃᔑ ᒥᑲᒧᐙᒡ ᑫᔑ ᑕᐱᓇᐎᔑᒨᓄᐙᒡ᙮ ᐱᓀᔒᔕᒃ ᑲᔦ ᐃᐃᒫ ᐁᔑ ᐗᑎᑾᓂᐎᓂᒡ ᑮᐃᔑᑖᐗᒃ᙮ ᑲᑭᓇ ᓴ ᑯ ᐊᐎᔭᒃ ᐯᒫᑎᓯᐙᒡ ᐃᐃᒫ ᑮᐅᒋ ᐐᓯᓂᐗᒃ᙮ 13 ᐁᓈᓈᑲᑕᐌᑕᒫᓐ ᐃᑕᔥ ᐃᓂ ᓂᑎᔑᓇᒧᐎᓇᓐ ᐁᐱᒥᔑᓈᓐ ᓂᓂᐯᐎᓂᕽ, ᒦ ᓴ ᐃ ᑳᑮ ᐙᐸᒪᒃ ᐁᒐᓬ ᑳᓈᑲᒋᐃᐌᒡ ᑳᑭᑌᑖᑯᓯᒡ ᑭᒋᑮᔑᑯᕽ ᐁᑮ ᐱ ᐅᒌᒡ᙮ 14 ᒦᑕᔥ ᐅᐅ ᐁᓂᑯᒃ ᑳᐃᑭᑐᒡ ᐁᑭᔒᐌᒡ, ᑲᐗᐅᒃ ᐊᐊ ᒥᑎᒃ ᒋᒌᔖᑕᐌᐌᒃ ᑲᔦ ᐗᑎᑾᓇᓐ᙮ ᒌᔑᐱᑑᒃ ᑲᔦ ᐊᓃᐲᔕᓐ, ᒥᓯᑌᐌᐱᓇᒧᒃ ᑲᔦ ᐃᐃ ᔒᐎᒦᒋᒻ ᐃᐃᒫ ᑳᐅᒋ ᓂᑖᐎᑭᕽ᙮ ᑕᑲ ᐊᔭᐋᐎᔕᒃ ᐃᐃᒫ ᐁᔮᐙᒡ ᔒᐹᔭᐄ ᑕᐅᔑᒧᐗᒃ, ᐱᓀᔒᔕᒃ ᑲᔦ ᐗᑎᑾᓂᑳᕽ ᑕᐅᒋ ᐅᔑᒧᐗᒃ᙮ 15 ᐃᐃ ᑕᔥ ᐐᓐ ᑮᔥᑲᑕᐃᑲᓐ ᑭᑭᒌᐱᒃ ᐃᑯ ᐱᓵᓐ ᐃᐃᒫ ᑕᐊᔮ ᒥᑕᑲᒥᒃ᙮ ᐲᐙᐱᑴᔮᑉ, ᐅᓵᐙᐱᑴᔮᑉ ᓴ ᐋᐸᑕᓐ ᐁᑭᑭᑕᐱᑌᒃ ᐃᐃ ᑮᔥᑲᑕᐃᑲᓐ ᐃᐃᒫ ᒥᔕᐗᑲᒥᒃ ᐁᔑ ᒪᔥᑯᓰᑳᒃ᙮ ᑕᑲ ᓴ ᐗᐊ ᐃᓂᓂ ᐅᑲ ᔒᒀᐹᐗᓂᑯᓐ ᑳᔕᑭᐊᔮᓂᒃ ᑮᔑᑯᕽ, ᑕᑲ ᑲᔦ ᐅᑲ ᐐᒋᐊᔮᒫᐞ ᐊᔭᐋᐎᔕᐞ ᐁᔮᓂᒡ ᐁᔑ ᒪᔥᑯᓰᑳᓂᒃ ᐊᑮᕽ᙮ 16 ᑕᑲ ᓴ ᐅᑎᓀᑕᒧᐎᓐ ᐃᓂᓃᕽ ᐁᔑᐊᔮᓂᒃ ᑕᐋᒋ ᐊᔮᓂ ᐊᔭᐋᐎᔑᕽ ᒋᐃᔑᐊᔮᓂᒃ᙮ ᓃᔣᓱ 7 ᐱᐴᓐ ᓴ ᐃ ᒥᓂᒃ ᑕᐃᔑᐊᔮ᙮ 17 ᒦ ᓴ ᐅᐌᓂ ᑳᐃᓈᑯᓂᑫᐙᒡ ᐃᑭ ᐁᒐᓬᐊᒃ ᑳᓈᑲᒋᐃᐌᐙᒡ, ᑫᑌᑖᑯᓯᐙᒡ, ᒋᑭᑫᒋᑲᓂᐎᒡ ᐊᐊ ᒫᐗᒡ ᐁᔥᐯᑖᑯᓯᒡ ᐁᑎᐯᑕᕽ ᐁᔑ ᑎᐯᒋᑫᓂᒡ ᐃᓂᓂᐗᐞ, ᐐᓐ ᑲᔦ ᐊᐌᓀᓇᓐ ᐃᑯ ᐁᐅᓈᐸᒫᒡ ᐁᑕᐌᓂᒫᒡ ᒋᐅᑭᒫᐎᓂᒡ, ᐃᐃ ᑲᔦ ᒫᐗᒡ ᑌᐸᓭᑖᑯᓯᓂᒡ ᐃᓂᓂᐗᐞ, ᑮᐃᑭᑐ ᐊᐊ ᐁᒐᓬ᙮ 18 ᒦ ᓴ ᐅᐌ ᓃᓐ ᓀᐸᑲᓈᓴᕒ ᑫᒋᐅᑭᒫᐎᔮᓐ ᑳᐃᔑ ᐸᐙᒋᑫᔮᓐ᙮ ᓅᑯᒻ ᐃᑕᔥ ᑮᓐ ᐯᓬᑎᔖᓴᕒ, ᑕᑲ ᐐᑕᒪᐎᔑᓐ ᐋᓃᓐ ᐁᔑᓯᕽ᙮ ᑳᐐᓐ ᐅᔕ ᑲᓇᑫ ᐯᔑᒃ ᑫᑮᑖᐗᑭᓱᐙᒡ ᐃᓂᓂᐗᒃ ᐁᔮᐙᒡ ᓂᑑᑭᒫᐎᐎᓂᕽ ᐅᑲᔥᑭᑑᓰᓈᐙ ᒋᐐᑕᒧᐙᒡ ᐋᓃᓐ ᐁᔑᓯᓂᓂᒃ᙮ ᑮᓐ ᐃᑕᔥ ᐐᓐ ᑭᑲ ᑲᔥᑭᑑᓐ ᐋᓃᔥ ᑭᑭᑭᔥᑳᒃ ᒪᓂᑑᐎ ᐊᒑᒃ, ᐅᑮᐃᑰᓐ ᑭᒋᐅᑭᒫᓐ᙮ ᑖᓂᔫ ᑮᐐᑕᕽ ᐋᓃᓐ ᐁᔑᓯᓂᓂᒃ ᐸᐙᒋᑲᓐ 19 ᒦᑕᔥ ᑖᓂᔫ, ᐯᓬᑎᔖᓴᕒ ᑳᐃᓂᓐᒡ ᑮᑭᒋ ᑯᔥᒀᐙᑌᑕᒻ ᐁᑮ ᒥᑯᔥᑳᑌᑕᕽ᙮ ᒦᔥ ᑳᐃᑯᒡ ᑭᒋᐅᑭᒫᓐ, ᐯᓬᑎᔖᓴᕒ, ᑕᑲ ᑫᑯ ᓂᐸᐙᒋᑲᓐ, ᐁᔑᓯᕽ ᑲᔦ ᑭᑲ ᒥᑯᔥᑳᑌᑕᒥᐃᑯᓰᓐ, ᐅᑮᐃᑰᓐ᙮ ᒦᔥ ᐅᐅ ᐯᓬᑎᔖᓴᕒ ᑳᐃᔑ ᓇᑴᑕᐙᒡ, ᓂᑑᑭᒫᒻ, ᐊᐯᔥ ᐃᓈ ᐃᑭ ᐃᓈᐸᒪᑣᐸᓐ ᐃᔑᓭᐙᐸᓐ ᐃᑭ ᑳᔒᑫᓂᒥᒀ, ᐃᐃ ᐁᔑᓯᕽ ᑭᐸᐙᒋᑲᓐ ᐊᐯᔥ ᐃᓈ ᐃᐃ ᐃᔑᓭᐙᐸᓐ ᐃᑭ ᑳᓇᑳᔥᑲᐎᒀ᙮ 20 ᐊᐊ ᓴ ᒥᑎᒃ ᑳᑮ ᐙᐸᒪᒡ ᑮᐊᓂ ᒥᒑᑯᓯ, ᑮᐊᓂ ᒪᔥᑲᐎᑭ ᑲᔦ ᐁᑮ ᐅᑎᑕᑭᓱᒡ ᑮᔑᑯᕽ ᒥᓯᐌ ᐊᑮᕽ ᑮᐅᒋ ᑌᐱᓈᑯᓯ᙮ 21 ᐁᔑ ᐊᓃᐲᔑᐎᒡ ᓴ ᐐᑫ ᑮᒥᓄᓈᑯᓯ, ᓃᐱᐗᐞ ᑲᔦ ᔒᐎᒦᒋᒻ ᐃᐃᒫ ᑮᑕᔑ ᓂᑖᐎᑭᓐ᙮ ᒦᔥ ᐃᐃᒫ ᑲᑭᓇ ᐊᐎᔭᒃ ᑳᐅᒋ ᑌᐱᓭᐙᒡ ᒦᒋᒻ᙮ ᐊᔭᐋᐎᔕᒃ ᐱᑾᒐᔭᐄ ᐁᔮᐙᒡ ᒦ ᐃᒫ ᑳᐃᔑ ᒥᑲᒧᐙᒡ ᑫᔑ ᑕᐱᓇᐎᔑᒨᓄᐙᒡ᙮ ᐱᓀᔒᔕᒃ ᑲᔦ ᐃᐃᒫ ᐁᔑ ᐗᑎᑾᓂᐎᓂᒡ ᑮᐃᔑᑖᐗᒃ᙮ 22 ᑮᓐ ᑫᒋᐅᑭᒫᐎᔭᓐ, ᑮᓐ ᓴ ᐊ ᒥᑎᒃ; ᐁᑮ ᐊᓂ ᐃᔥᐯᑖᑯᓯᔭᓐ, ᐐᑫ ᑲᔦ ᐁᑮ ᐊᓂ ᓲᑫᑖᑯᓯᔭᓐ᙮ ᐁᐲᒋ ᑭᒋ ᐃᓀᑖᑯᓯᔭᓐ ᑖᐱᔥᑰ ᐁᑮ ᐅᒋᒋᐊᔮᒃ ᑮᔑᑯᕽ, ᑭᑑᑭᒫᐎᐎᓐ ᑲᔦ ᒥᓯᐌ ᐊᑮᕽ ᐁᐃᔑ ᒥᓯᑌᔥᑳᒃ᙮ 23 ᒦᑕᔥ ᑮᓐ ᑫᒋᐅᑭᒫᐎᔭᓐ ᑳᑮ ᐙᐸᒪᒡ ᑫᑌᑖᑯᓯᒡ ᑳᓈᑲᒋᐃᐌᒡ ᐁᒐᓬ ᑭᒋᑮᔑᑯᕽ ᐁᐱᐅᒋ ᓈᔑᒡ ᐅᐅ ᐁᐃᑭᑐᒡ, ᑲᐗᐅᒃ ᐊᐊ ᒥᑎᒃ ᐐᑫ ᒋᓂᔑᐗᓈᒋᐃᓐᒡ᙮ ᐃᐃ ᑕᔥ ᐐᓐ ᑮᔥᑲᑕᐃᑲᓐ ᑭᑭᒌᐱᒃ ᐃᑯ ᐱᓵᓐ ᐃᐃᒫ ᑕᐊᔮ ᒥᑕᑲᒥᒃ᙮ ᐲᐙᐱᑴᔮᑉ, ᐅᓵᐙᐱᑴᔮᑉ ᑲᔦ ᓴ ᑕᐋᐸᑕᓐ ᒋᑭᑭᑕᐱᑌᒃ ᐃᐃ ᑮᔥᑲᑕᐃᑲᓐ ᐃᐃᒫ ᒥᔕᐗᑲᒥᒃ ᐁᔑ ᒪᔥᑯᓰᑳᒃ᙮ ᐱᓵᓐ ᓴ ᐗᐊ ᐃᓂᓂ ᐅᑲ ᔒᒀᐹᐗᓂᑯᓐ ᑳᔕᑭᐊᔮᓂᒃ, ᒋᐐᒋᐊᔮᒫᒡ ᐊᔭᐋᐎᔕᐞ ᐁᔮᓂᒡ ᐁᔑ ᒪᔥᑯᓰᑳᓂᒃ ᐊᑮᕽ ᓃᔣᓱ ᐱᐴᓐ ᓴ ᐃ ᒥᓂᒃ ᑕᐃᔑᐊᔮ᙮ 24 ᑮᓐ ᑫᒋᐅᑭᒫᐎᔭᓐ, ᒦ ᓴ ᐅᐌ ᐁᔑᓯᕽ ᐅᐅ ᑭᐸᐙᒋᑲᓐ᙮ ᒦ ᓴ ᐅᐅᐌᓂ ᐁᓈᑯᓂᒃ ᒫᐗᒡ ᐁᔥᐯᑖᑯᓯᒡ ᒋᐃᔑᓭᐗᒡ᙮ 25 ᓂᑯᒋ ᓴ ᑭᑲ ᐅᒋ ᐃᓈᒶᐅᑰ ᐁᔑᐊᔮᐙᒡ ᐯᒫᑎᓯᐙᒡ, ᐊᔭᐋᐎᔕᒃ ᓴ ᑕᔥ ᒥᔕᐗᑲᒥᒃ ᐁᔮᐙᒡ ᑭᑲ ᐐᒋᐊᔮᒫᒃ᙮ ᒪᔥᑯᓯᐗᓐ ᒋᒦᒋᔭᓐ ᑖᐱᔥᑰ ᑳᐃᓇᒋᑫᐙᒡ ᐱᔑᑭᐗᒃ, ᐐᑫ ᑲᔦ ᑭᑲ ᔒᒀᐹᐗᓂᑯᓐ ᑮᔑᑯᕽ ᑳᐅᒋ ᔕᑭᐊᔮᒃ᙮ ᓃᔣᓱ 7 ᐱᐴᓐ ᓴ ᐃ ᒥᓂᒃ ᑭᑲ ᐃᔑᐊᔮ, ᐹᓂᒫ ᑕᔥ ᐅᐅ ᑮᑭᑫᑕᒪᓐ ᒫᐗᒡ ᐁᔥᐯᑖᑯᓯᒡ ᑭᔐᒪᓂᑑ ᐁᑎᐯᑕᕽ ᐁᔑ ᑎᐯᒋᑫᓂᒡ ᐃᓂᓂᐗᓐ, ᐊᐌᓀᓇᓐ ᐁᑕᐌᓂᒫᒡ ᐃᑯ ᑲᔦ ᐅᐅ ᐁᐃᔑ ᒦᓈᒡ, ᒦ ᓴ ᐃ ᐸᔦᔥ ᒋᐴᓂ ᐃᔑᐊᔮᔭᓐ᙮ 26 ᐃᐃ ᓴ ᑕᔥ ᑳᑮ ᐊᓅᑮᓈᓂᐗᕽ ᑮᔥᑲᑕᐃᑲᓐ ᑭᑭᒌᐱᒃ ᐃᐃᒫ ᒋᐊᔮᒃ, ᒦ ᓴ ᐃ ᐁᑭᑭᓇᐙᒋᒋᑳᑌᒃ ᑭᑑᑭᒫᐎᐎᓐ ᑫᒋᓈᒡ ᒋᑮᐌ ᒦᓂᑰᔭᓐ ᐊᐲ ᑭᑫᑕᒪᓐ ᑭᔐᒪᓂᑑ ᑭᒋᑮᔑᑯᕽ ᑳᐊᔮᒡ ᐁᑎᐯᒋᑫᒡ᙮ 27 ᑫᒋᐅᑭᒫᐎᔭᓐ, ᑕᑲ ᓴ ᐌᐌᓂ ᐱᓯᑕᓐ ᐅᐅ ᑳᐃᓂᓈᓐ, ᐴᓂᑑᓐ ᑭᒪᒋᑑᑕᒧᐎᓇᓐ, ᑾᔭᒃ ᐃᑕᔥ ᒋᐃᔑᒋᑫᔭᓐ, ᓇᑲᑕᓐ ᑲᔦ ᑭᒪᒋᐃᔑᐌᐱᓯᐎᓇᓐ ᒋᒥᓄᑑᑕᐗᑣ ᑫᑎᒫᑭᓯᐙᒡ᙮ ᒦᔥ ᐃᐃ ᒌᐊᓂᔑ ᒥᓄᓭᔭᓐ, ᐅᑮᐃᓈᓐ ᑭᒋᐅᑭᒫᓐ᙮ 28 ᒦᑕᔥ ᐅᐅ ᑲᑭᓇ ᑳᐃᔑᓭᒡ ᑭᒋᐅᑭᒫ ᓀᐸᑲᓈᓴᕒ᙮ 29 ᒥᑖᔑᓃᔓᑮᓯᓲᓐ ᐃᑕᔥ ᐁᐱᒪᑭᓱᓂᒡ ᑭᒋᐅᑭᒫ ᑮᐸᐹᒧᓭ ᐗᑭᑕᐸᒃ ᐅᑑᑭᒫᐎᑲᒥᑯᕽ ᐃᐃᒫ ᐹᐱᓬᐊᓐ ᐊᑮᕽ᙮ 30 ᒦᑕᔥ ᐅᐅ ᑳᐃᑭᑐᒡ, ᒦᐄᑐᒃ ᐅᐅ ᑭᒋ ᐹᐱᓬᐊᓐ ᑳᑮ ᐅᔑᑑᔮᓐ ᑫᔑᐊᔮᒃ ᓂᑑᑭᒫᐎᑲᒥᒃ᙮ ᓂᒪᔥᑲᐎᓰᐎᓂᕽ ᐁᑮ ᐅᒋ ᐅᔑᑑᔮᓐ ᑫᑕᔑ ᑭᒋ ᐃᓀᑖᑾᒃ ᓂᑑᑭᒫᐌᑖᑯᓯᐎᓐ᙮ 31 ᒣᒀ ᑕᔥ ᐅᐅ ᐁᐃᑭᑐᒡ, ᒦ ᐃ ᐊᐎᔭᓐ ᑳᑮ ᐅᒋ ᑮᑭᑐᓂᒡ ᑭᒋᑮᔑᑯᕽ ᐅᐅ ᐁᑮ ᐃᑭᑐᓂᒡ, ᓀᐸᑲᓈᓴᕒ ᑫᒋᐅᑭᒫᐎᔭᓐ, ᒦ ᓴ ᐅᐌ ᐁᓈᑯᓂᑰᔭᓐ, ᑭᑑᑭᒫ ᑲᔥᑭᐁᐎᓯᐎᓐ ᓴ ᑭᑑᑖᐱᓇᒫᑰ᙮ 32 ᓂᑯᒋ ᓴ ᑭᑲ ᐅᒋ ᐃᓈᒶᐅᑰ ᐁᔑᐊᔮᐙᒡ ᐯᒫᑎᓯᐙᒡ, ᐊᔭᐋᐎᔕᒃ ᓴ ᑕᔥ ᒥᔕᐗᑲᒥᒃ ᐁᔮᐙᒡ ᑭᑲ ᐐᒋᐊᔮᒫᒃ᙮ ᒪᔥᑯᓯᐗᓐ ᓴ ᑭᑲ ᒦᒋᓇᓐ ᑖᐱᔥᑰ ᑳᐃᓇᒋᑫᐙᒡ ᐱᔑᑭᐗᒃ᙮ ᓃᔣᓱ 7 ᐱᐴᓐ ᓴ ᐃ ᒥᓂᒃ ᑭᑲ ᐃᔑᐊᔮ᙮ ᐹᓂᒫ ᓴ ᑕᔥ ᐅᐅ ᑮᑭᑫᑕᒪᓐ ᒫᐗᒡ ᐁᔥᐯᑖᑯᓯᒡ ᐁᑎᐯᑕᕽ ᐁᔑ ᑎᐯᒋᑫᓂᒡ ᐃᓂᓂᐗᓐ, ᐊᐌᓀᓇᓐ ᐁᑕᐌᓂᒫᒡ ᐃᑯ ᑲᔦ ᐅᐅ ᐁᐃᔑ ᒦᓈᒡ, ᒦ ᓴ ᐃ ᐸᔦᔥ ᒋᐴᓂ ᐃᔑᐊᔮᔭᓐ, ᐁᑮᐃᓂᓐᒡ᙮ 33 ᒦᑕᔥ ᔐᒫᒃ ᑳᑮ ᐃᔑᓭᒡ, ᑳᑮ ᐃᒋᑲᓂᐎᒡ ᓀᐸᑲᓈᓴᕒ, ᓂᑯᒋ ᑮᐃᓈᒶᐙ ᐁᔑᐊᔮᓂᒡ ᐯᒫᑎᓯᓂᒡ, ᒪᔥᑯᓯᐗᓐ ᐁᑮ ᒦᒋᒡ ᑖᐱᔥᑰ ᐱᔑᑭ᙮ ᐐᑫ ᑲᔦ ᑳᔕᑭᐊᔮᓂᒃ ᐅᑮ ᔒᒀᐹᐗᓂᑯᓐ ᐲᓂᔥ ᑳᐃᔑ ᒦᑾᓀᓂᒡ ᒥᑭᓯᐗᓐ ᐁᑮ ᐃᓈᓂᑴᒡ, ᐱᓀᔒᔑᕽ ᑲᔦ ᐲᓂᔥ ᐁᑮ ᐊᓂ ᐃᔑᑲᔒᒡ᙮ 34 ᓃᔣᓱ 7 ᐱᐴᓐ ᐃᑕᔥ ᑳᐃᔥᒀᓭᒃ, ᒦ ᐃ ᓃᓐ ᓀᐸᑲᓈᓴᕒ ᐃᔥᐱᒥᕽ ᑭᒋᑮᔑᑯᕽ ᐃᓇᑫ ᑳᑮ ᐃᓈᐱᔮᓐ, ᒦᔥ ᓂᓈᓈᑲᑕᐌᑕᒧᐎᓐ ᑳᑮ ᑮᐌ ᐅᑎᓯᑯᔮᓐ᙮ ᒦᑕᔥ ᑳᑮ ᓇᓈᑯᒪᒃ ᒫᐗᒡ ᐁᔥᐯᑖᑯᓯᒡ, ᐁᑮ ᒦᑴᒋᐌᓂᒪᒃ ᑲᔦ, ᐁᑮ ᑭᑌᓂᒪᒃ ᑲᔦ ᑳᓀᐱᒋ ᐱᒫᑎᓯᒡ᙮ ᒦᔥ ᐅᐅ ᑳᐃᑭᑐᔮᓐ, ᐐᓐ ᓴ ᑕᓀᐱᒋ ᑎᐯᒋᑫ, ᐅᑑᑭᒫᐎᐎᓐ ᑲᔦ ᑕᓀᐱᒋ ᐊᔮᓂ ᒥᓂᒃ ᐃᑯ ᑫᓂ ᐊᔮᓂᑫ ᓂᑖᐎᑭᐃᑎᕽ᙮ 35 ᑳᐐᓐ ᓴ ᑫᑰᓐ ᐅᑎᓀᓂᒫᓰᐞ ᑲᑭᓇ ᐯᒫᑎᓯᓂᒡ ᐅᐅᒫ ᐊᑮᕽ᙮ ᐙᑑᑕᐙᒡ ᓴ ᑯ ᐅᑑᑕᐙᐞ ᐁᔮᓂᒡ ᑭᒋᑮᔑᑯᕽ, ᐯᒫᑎᓯᓂᒡ ᑲᔦ ᐅᐅᒫ ᐊᑮᕽ ᐁᔮᓂᒡ᙮ ᑳᐐᓐ ᓴ ᐊᐎᔭᓐ ᐅᑖ ᑲᔥᑭᑑᓰᓂ ᒋᓇᑳᔅᑲᒥᓂᒡ ᐁᓀᑕᕽ, ᑳᐐᓐ ᑲᔦ ᐊᐎᔭᓐ ᐅᑖᐃᑯᓰᓐ, ᐋᓃᓐ ᐃᑕᔥ ᐃᓈ ᑳᐃᔑᒋᑫᔭᓐ? 36 ᒦᑕᔥ ᐃᐃ ᐊᐲ ᓂᓈᓈᑲᑕᐌᑕᒧᐎᓐ ᑳᑮ ᑮᐌ ᓈᐸᒋᑳᑌᒃ᙮ ᓂᑭᒋᐅᑭᒫᐌᑖᑯᓯᐎᓐ, ᓂᑭᑌᑖᑯᓯᐎᓐ ᑲᔦ ᓂᑮ ᑮᐌ ᒦᓂᑰᐎᔅ ᒋᑭᒋ ᐃᓀᑖᑾᒃ ᓂᑑᑭᒫᐎᐎᓐ᙮ ᑳᑮ ᒫᒦᓄᒥᐙᐸᓐ ᓴ, ᑳᓃᑳᓀᑖᑯᓯᐙᒡ ᑲᔦ ᓂᑮ ᓇᓈᑐᓀᐅᑰᒃ᙮ ᒦᑕᔥ ᑳᑮ ᑮᐌ ᓈᐸᓯᑰᔮᓐ ᓂᑑᑭᒫᐗᐱᐎᓂᕽ, ᓇᐗᒡ ᓅᑯᒻ ᐁᑮ ᑭᒋ ᐃᓀᑖᑯᓯᔮᓐ ᐊᐲᒡ ᐐᓐ ᐅᑖᓈᕽ᙮ 37 ᓅᑯᒻ ᐃᑕᔥ ᓃᓐ ᓀᐸᑲᓈᓴᕒ ᓂᒦᑴᒋᐌᓂᒫ, ᓂᑭᒋ ᐃᓀᓂᒫ ᑲᔦ, ᓂᑭᑌᓂᒫ ᑲᔦ ᑭᒋᐅᑭᒫ ᐁᔮᒡ ᑭᒋᑮᔑᑯᕽ, ᐋᓃᔥ ᑲᑭᓇ ᐅᓂᔑᔑᓂᓂ ᐁᔑᒋᑫᒡ, ᑾᔭᑴᑖᑾᓂᓂ ᑲᔦ᙮ ᐐᓐ ᑲᔦ ᐅᑲᔥᑭᑑᓐ ᒋᑕᐸᓭᑖᑯᓯᐋᒡ ᐃᐃ ᐁᔥᐯᓂᑎᓱᓂᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society