Taaniyoo 3 - ᐅᒋᐺ ᑭᒋᒪᓯᓇᐃᑲᓐᓀᐸᑲᓈᓴᕒ ᑮᐅᔑᐋᒡ ᑭᒋᐅᔑᒋᑲᓇᓐ ᑫᐊᓇᒥᐁᑕᐎᒥᓐᒡ 1 ᑭᒋᐅᑭᒫ ᓀᐸᑲᓈᓴᕒ Nebuchadnezzar ᓴ ᐅᑮ ᐅᔑᐋᓐ ᑭᒋ ᐅᔑᒋᑲᓇᓐ ᐅᓵᐎ ᔔᓂᔮ ᐙᐱᑰᓐ ᐁᑮ ᐋᐸᒋᐋᒡ᙮ ᔖᑲᓯᒥᑕᓇ 90 ᑕᓱ ᒥᓯᑦ ᐁᑮ ᐊᐲᒋ ᑳᐸᐎᓂᒡ, ᔖᑲᓱᒥᓯᑦ ᑕᔥ ᐁᑮ ᐃᓂᑯᑾᑌᓯᓂᒡ᙮ ᐌᑎ ᑕᔥ ᐁᔑ ᐸᔥᒀᓂᒃ ᑑᕒᐊ Dura ᐁᒋᑳᑌᓂᒃ ᐹᐱᓬᐊᓐ Babylon ᐊᑮᕽ ᐅᑮ ᐃᔑ ᐅᓇᓵᓐ᙮ 2 ᒦᑕᔥ ᑳᑮ ᐊᑐᒫᒡ ᐊᓂᑫᐎᑭᒫᐞ, ᐯᐸᑳᓐ ᑳᑮ ᑕᔑ ᐅᑭᒫᑲᑖᑫᓂᒡ, ᑳᑮ ᐐᑕᒫᑫᓂᒡ ᑲᔦ ᑫᐃᔑᒋᑫᕽ, ᔔᓂᔮᓐ ᑳᓈᓈᑲᒋᐋᓂᒡ, ᐅᑎᐹᑯᓂᐌᐞ, ᑎᐹᑯᓂᑫᐎᑭᒫᐞ ᑲᔦ, ᑲᑭᓇ ᑲᔦ ᑳᑮ ᓈᓈᑲᒋᑑᓂᒡ ᐯᐸᑳᓐ ᐹᐱᓬᐊᓐ ᐊᑮᕽ᙮ ᒦᔥ ᑳᑮ ᐊᑐᒫᒡ ᒋᐲᔖᓂᒡ ᐁᐎ ᐅᓍᓈᒡ ᑳᑮ ᓃᐸᐎᐋᒡ ᐃᓂ ᐅᑑᔑᒋᑲᓇᓐ᙮ 3 ᐃᑭ ᑕᔥ ᑲᑭᓇ ᑫᒋ ᐃᓀᑖᑯᓯᐙᒡ ᑳᑮ ᐊᑐᒥᑣ ᑮᐲᔖᐗᒃ ᐁᑮ ᒫᒪᐎᐃᑎᐙᒡ ᐁᐐ ᐸᑳᓀᓂᒫᐙᒡ ᒋᑭᑌᓂᒥᒥᓐᒡ ᐃᓂ ᐅᔑᒋᑲᓇᓐ ᑭᒋᐅᑭᒫᓐ ᑳᑮ ᐅᔑᐋᓂᒡ ᐁᑮ ᐃᓈᓴᒥᑳᐸᐎᑕᐙᐙᒡ᙮ 4 ᐋᐱᒋ ᑕᔥ ᑮᑭᔒᐌᓈᓂᐗᓐ ᐅᐅ ᐁᑮ ᐃᑭᑐᕽ, ᑮᓇᐙ ᓴ ᑭᑎᓈᑯᓂᑰᒻ ᐯᒫᑎᓯᔦᒃ ᑳᐯᐸᑳᓉᐙᓇᑭᓯᔦᒃ, ᐯᐸᑳᓐ ᑲᔦ ᑳᐃᔑᑮᔗᔦᒃ, 5 ᔐᒫᒃ ᓴ ᑯ ᓅᑕᒣᒃ, ᐴᑖᒋᑲᓐ, ᐴᑖᒋᑲᓀᔅ, ᒪᑗᔮᐲᑭᐌᐸᐃᑲᓐ, ᓂᓱ ᑮᑫᔮ ᒪᑗᔮᐲᑭᐱᒋᑲᓐ, ᐅᒌᑾᓂ ᒪᑗᔮᐲᑭᐱᒋᑲᓐ, ᑭᒋ ᒪᑗᔮᐲᑭᐱᒋᑲᓐ, ᑲᑭᓇ ᓴ ᑯ ᑭᑐᒋᑲᓇᓐ, ᒦ ᓴ ᐃ ᐁᔑᓈᑾᒃ ᒋᐊᓂᒥᑯᑖᔦᒃ, ᒋᐊᓇᒥᐁᑕᐎᒣᒃ ᐅᓵᐎ ᔔᓂᔮ ᐙᐱᑯᐎ ᐅᔑᒋᑲᓇᓐ ᑭᒋᐅᑭᒫ ᓀᐸᑲᓈᓴᕒ ᑳᑮ ᐅᔑᑳᐸᐎᐋᒡ᙮ 6 ᐊᐌᓀᓐ ᑕᔥ ᐃᑯ ᑫᐊᓂᒥᑯᑖᓯᒃ ᒋᐊᓇᒥᐁᑕᐙᓯᒃ, ᔐᒫᒃ ᓴ ᐊᐊ ᑕᐃᔑᐌᐱᓂᑲᓂᐎ ᑳᔑ ᐱᔅᑲᓀᓂᒃ ᑭᒋ ᐴᑕᐙᓈᐱᑯᕽ, ᑮᐃᑭᑐᒻ᙮ 7 ᒦᑕᔥ ᑲᑭᓇ ᐯᒫᑎᓯᐙᒡ ᑳᐯᐸᑳᓉᐙᓇᑭᓯᐙᒡ, ᐯᐸᑳᓐ ᑲᔦ ᑳᑮ ᑕᓱ ᐃᔑᑮᔗᐙᒡ ᐁᓅᑕᒧᐙᒡ ᐃᓂ ᑲᑭᓇ ᑭᑐᒋᑲᓇᓐ ᐁᓅᑖᑾᓂᓂᑭᓐ, ᒦ ᓴ ᐃ ᑳᑮ ᐊᓂᒥᑯᑖᐙᒡ ᐁᑮ ᐊᓇᒥᐁᑕᐙᐙᒡ ᐅᓵᐎ ᔔᓂᔮ ᐙᐱᑯᐎ ᐅᔑᒋᑲᓇᓐ ᑭᒋᐅᑭᒫᓐ ᓀᐸᑲᓈᓴᕒᐊᓐ ᑳᑮ ᐅᔑᑳᐸᐎᐋᓂᒡ᙮ ᑖᓂᔫ ᓂᓯᓐ ᐅᐐᒌᐙᑲᓇᐞ ᑮᐊᓈᒣᓂᒥᒥᓐᒡ 8 ᒦᑕᔥ ᐃᐃ ᐊᐲ ᑳᑮ ᒪᑌᔩᐙᒡ ᐗᓇᑯᔑᕽ ᐌᒋ ᑭᑫᒋᑫᐙᒡ ᐁᑮ ᒪᒥᔑᒫᐙᒡ ᒎᐗᐞ Jews᙮ 9 ᐅᐅ ᓴ ᐅᑮᐃᓈᐙᓐ ᑭᒋᐅᑭᒫᓐ, ᑕᑲ ᑭᒋᐅᑭᒫ ᑭᑲ ᓀᐱᒋ ᐱᒫᑎᔅ! 10 ᑮᓐ ᑫᒋᐅᑭᒫᐎᔭᓐ ᐄᑐᒃ ᑭᑮ ᐃᓈᑯᓂᑫ ᑲᑭᓇ ᐊᐎᔭ ᓅᑕᕽ ᑲᑭᓇ ᑭᑐᒋᑲᓇᓐ ᓅᑖᑾᓂᓂᑭᓐ ᒋᐊᓂᒥᑯᑖᒡ ᒋᐊᓇᒥᐁᑕᐙᒡ ᐃᓂ ᐅᓵᐎ ᔔᓂᔮ ᐙᐱᑯᐎ ᐅᔑᒋᑲᓇᓐ᙮ 11 ᐊᐌᓀᓐ ᑕᔥ ᐃᑯ ᑫᐊᓂᒥᑯᑖᓯᒃ ᒋᐊᓇᒥᐁᑕᐙᓯᒃ, ᒦ ᓴ ᐃ ᑫᑑᒋᑲᓂᐎᒡ ᒋᐃᔑ ᐌᐱᓂᑲᓂᐎᒡ ᑳᔑ ᐱᔅᑲᓀᓂᒃ ᑭᒋ ᐴᑕᐙᓈᐱᑯᕽ᙮ 12 ᐊᔮᐗᒃ ᐅᔕ ᐋᓂᑕ ᒎᐗᒃ ᑳᑮ ᐃᓇᑭᒪᑣ ᒋᓈᓈᑲᒋᑑᐙᒡ ᐁᔑᓭᓂᒃ ᐹᐱᓬᐊᓐ Babylon ᐊᑭ᙮ ᔐᑕᕒᐋᒃ Shadrach, ᒦᔖᒃ Meshach, ᐊᐊ ᑲᔦ ᐊᐯᑎᓂᑰ Abednego ᓴ ᑳᐐᓐ ᑭᐸᐹᒥᑖᑯᓰᒃ᙮ ᑳᐐᓐ ᑲᔦ ᐅᑕᓄᑮᑕᐙᓯᐙᐙᐞ ᑭᒪᓂᑑᒪᐞ, ᐃᓂ ᑲᔦ ᐅᓵᐎ ᔔᓂᔮ ᐙᐱᑯᐎ ᐅᔑᒋᑲᓇᓐ ᑳᑮ ᐅᔑᑳᐸᐎᐃᒪᒡ, ᐅᑮᐃᓈᐙᓐ᙮ 13 ᐐᑫ ᑕᔥ ᑭᒋᐅᑭᒫ ᑮᑭᒋ ᐋᑯᑭᑖᓱ ᐁᑮ ᐊᓅᑮᒡ ᒋᐲᓂᒥᓐᒡ ᔐᑕᕒᐋᑰᓐ, ᒦᔖᑰᓐ ᐃᓂ ᑲᔦ ᐊᐯᑎᓂᑰᓐ ᐃᐃᒫ ᐁᔑᐊᔮᒡ᙮ 14 ᒦᑕᔥ ᓀᐸᑲᓈᓴᕒ Nebuchadnezzar ᑭᒋᐅᑭᒫ ᑳᐃᑭᑐᒡ, ᔐᑕᕒᐋᒃ, ᒦᔖᒃ, ᐊᐯᑎᓂᑰ ᑌᐺ ᓇ ᐃ ᑳᐃᑰᔦᒃ, ᐁᐊᓄᑮᑕᐙᓯᐌᒀ ᓂᒪᓂᑑᒪᒃ, ᐁᐊᓇᒥᐁᑕᐙᓯᐌᒃ ᑲᔦ ᐊᐊ ᐅᓵᐎ ᔔᓂᔮ ᐙᐱᑯᐎ ᐅᔑᒋᑲᓐ ᑳᑮ ᐅᔑᑳᐸᐎᐊᒃ? 15 ᑕᑲ ᓅᑯᒻ ᐊᐲ ᓅᑕᒣᒃ ᐃᓂ ᑲᑭᓇ ᑭᑐᒋᑲᓇᓐ ᓅᑖᑾᑭᓐ, ᐊᔛᑫᒃ ᒋᐊᓂᒥᑯᑖᔦᒃ ᒋᐊᓇᒥᐁᑕᐌᒃ ᑳᑮ ᐅᔑᐊᒃ, ᒦᑕᔥ ᐃᐃ ᒋᒥᓄᒋᑫᔦᒃ᙮ ᑮᔥᐱᓐ ᐃᑕᔥ ᐐᓐ ᐊᓇᒥᐁᑕᐙᓯᐌᒃ, ᒦ ᓴ ᐃ ᔐᒫᒃ ᒋᐃᔑ ᐌᐱᓂᑰᔦᒃ ᐃᐃᒫ ᑳᔑ ᐱᔅᑲᓀᒃ ᑭᒋ ᐴᑕᐙᓈᐱᑯᕽ᙮ ᐊᐌᓀᓐ ᑕᔥ ᑎᓄ ᒪᓂᑑ ᐁᔮᑴᓐ ᑫᔖᐾᐃᓀᑭᐸᓐ ᐋᓃᓐ ᑳᐐ ᑑᑕᐎᓇᑰᒃ? ᑮᐃᑭᑐ᙮ 16 ᒦᑕᔥ ᐅᐅ ᔐᑕᕒᐋᒃ, ᒦᔖᒃ ᐊᐯᑎᓂᑰ ᑲᔦ ᑳᐃᔑ ᓇᑴᑕᐙᐙᒡ ᑭᒋᐅᑭᒫᓐ, ᑳᐐᓐ ᓴ ᒣᒬᒡ ᓂᐐ ᑲᑴ ᓈᑕᒫᑎᓱᓰᒥᓐ ᐅᐅ ᑳᐃᔑᔮᕽ᙮ 17 ᑮᔥᐱᓐ ᓴ ᐃᓀᑕᕽ ᓂᑭᔐᒪᓂᑑᒥᓈᓐ ᑳᐊᓄᑮᑕᐗᑭᒡ, ᐐᓐ ᐃᓴ ᐅᑲ ᑲᔥᑭᑑᓐ ᒋᐅᒋ ᔖᐾᐃᓇᑭᒡ ᐃᐃᒫ ᑳᔑ ᐱᔅᑲᓀᓂᒃ ᑭᒋ ᐴᑕᐙᓈᐱᑯᕽ, ᓂᑲ ᓈᑕᒫᑯᓈᓐ ᑲᔦ ᑮᓐ ᐅᒋ᙮ 18 ᑮᔥᐱᓐ ᑕᔥ ᐃᐃ ᐐᐃᔑᒋᑫᓯᒃ, ᑭᓇᑕᐌᓂᒥᑰ ᒋᑭᑫᑕᒪᓐ, ᑳᐐᓐ ᔖᑰᒡ ᓂᐐ ᐊᓄᑮᑕᐙᓯᐙᓈᓂᒃ ᑭᒪᓂᑑᒪᒃ, ᑳᐐᓐ ᑲᔦ ᓂᐐ ᐊᓇᒥᐁᑕᐙᓯᐙᓈᓐ ᐊᐊ ᐅᓵᐎ ᔔᓂᔮ ᐙᐱᑯᐎ ᐅᔑᒋᑲᓐ ᑳᑮ ᐅᔑᑳᐸᐎᐊᒡ, ᒦ ᐃᐌ ᐁᑰᔭᓐ ᑳᑭᒋᐅᑭᒫᐎᔭᓐ, ᐅᑮᐃᓈᐙᓐ᙮ ᑖᓂᔫ ᐅᐐᒌᐙᑲᓇᐞ ᑮᒪᒍᑌᐌᐱᓂᒥᓐᒡ 19 ᐐᑫ ᑕᔥ ᓀᐸᑲᓈᓴᕒ ᑮᑭᒋ ᐋᑯᑭᑖᓱ ᐸᑳᓐ ᐁᑮ ᐃᓀᓂᒫᒡ ᔐᑕᕒᐋᑰᓐ Shadrach, ᒦᔖᑰᓐ Meshach, ᐃᓂ ᑲᔦ ᐊᐯᑎᓂᑰᓐ Abednego᙮ ᒦᔥ ᑳᐃᔑ ᐊᓅᑮᒡ ᓃᔣᒋᕽ 7 ᒋᐊᐲᒋ ᑭᔕᑯᓀᒋᑳᑌᓂᒃ, ᐊᐲᒡ ᐐᓐ ᑳᑮ ᓂᑖ ᐊᐲᒋ ᑭᔕᑯᓀᓂᒃ᙮ 20 ᒫᐗᒡ ᑕᔥ ᒣᔥᑲᐌᑖᑯᓯᓂᒡ ᔑᒫᑲᓂᔕᐞ ᐅᑮ ᐊᓅᓈᐞ ᒋᒪᒫᒋᑾᐱᓈᓂᒡ ᔐᑕᕒᐋᑰᓐ ᒦᔖᑰᓐ ᐃᓂ ᑲᔦ ᐊᐯᑎᓂᑰᓐ, ᒋᒪᒍᑌ ᐌᐱᓈᓂᒡ ᐃᑕᔥ ᐃᐃᒫ ᑭᒋ ᐴᑕᐙᓈᐱᑯᕽ᙮ 21 ᒦᑕᔥ ᐃᑯ ᑭᑭᑯᓇᔾ, ᑭᑭᑖᔅ, ᑭᑭᐲᓯᑲᐙᑲᓐ, ᑭᑭᐋᓄᒀᓐ ᑲᔦ ᑲᑭᓇ ᑯ ᑳᑮ ᑭᑭᔥᑲᒥᓂᒡ ᑳᐃᔑ ᒪᒫᒋᑾᐱᓈᓂᒡ, ᐁᑮ ᒪᒍᑌ ᐌᐱᓈᓂᒡ᙮ 22 ᑳᐊᐲᒋ ᐋᑴᑖᑾᓂᓂᒃ ᐃᑕᔥ ᑭᒋᐅᑭᒫ ᐅᑎᓈᑯᓂᑫᐎᓐ, ᐐᑫ ᑲᔦ ᑳᐊᐲᒋ ᑭᔕᑯᓀᓂᒃ ᑭᒋ ᐴᑕᐙᓈᐱᒃ, ᒦ ᓴ ᐃᐌ ᐃᐃ ᔑᒫᑲᓂᔕᐞ ᑳᐅᒋ ᑭᑄᓈᒧᓱᓂᒡ ᑳᑮ ᐃᔑᐎᓈᓂᒡ ᔐᑕᕒᐋᑰᓐ, ᒦᔖᑰᓐ, ᐊᐯᑎᓂᑰᓐ ᑲᔦ᙮ 23 ᐅᑯᐌᓂᐗᒃ ᑕᔥ ᐐᓐ ᓂᓯᓐ ᐃᓂᓂᐗᒃ ᑮᐊᔩᑕᐱᓈᐗᒃ ᑮᒪᒍᑌ ᐌᐱᓂᑣ᙮ 24 ᑭᒋᐅᑭᒫ ᓀᐸᑲᓈᓴᕒ Nebuchadnezzar ᑕᔥ ᑮᐸᓯᑶᒋᓭ ᐁᑮ ᑭᒋ ᒫᒪᑳᑌᑕᕽ ᐁᑮ ᐃᔑ ᑲᑴᒋᒫᒡ ᐅᑖᓂᑫᐎᑭᒫᒪᐞ, ᓂᓯᓐ 3 ᐃᓇ ᐃᓂᓂᐗᒃ ᑭᑮ ᒪᒫᒋᑾᐱᓈᓈᓂᒃ ᑭᑮ ᒪᒍᑌ ᐌᐱᓈᓈᓂᒃ? ᒦᔥ ᑳᐃᑯᒡ, ᐁᔭᐞ, ᑌᐺ ᑫᒋᐅᑭᒫᐎᔭᓐ, ᐅᑮᐃᑰᐞ᙮ 25 ᒦᔥ ᐅᐅ ᑳᐃᑭᑐᒡ, ᐃᓇᔥᑫ ᐃᓈᐱᒃ! ᓃᐎᓐ ᐅᔕ ᐃᓂᓂᐗᒃ ᓂᐙᐸᒫᒃ ᐱᓂᔅᑴ ᐁᐸᐹᒧᓭᐙᒡ ᐃᔥᑯᑌᕽ, ᑳᐐᓐ ᒋᐐᓴᑫᑕᒧᐙᒡ! ᐊᐊ ᑕᔥ ᑯᑕᒃ ᐃᓂᓂ ᐃᔑᓈᑯᓯ ᑖᐱᔥᑰ ᑭᔐᒪᓂᑑ ᐅᑯᓯᓴᓐ! ᑮᐃᑭᑐ᙮ ᓂᓯᓐ ᐃᓂᓂᐗᒃ ᑮᐅᑭᒫᐎᐃᑣ 26 ᒦᑕᔥ ᓀᐸᑲᓈᓴᕒ ᑳᑮ ᐃᔖᒡ ᐁᔑ ᐃᔥᒀᑌᒥᐗᓂᓂᒃ ᑭᒋ ᐴᑕᐙᓈᐱᒃ ᐁᑮ ᐃᔑ ᔖᑯᐌᒡ, ᔐᑕᕒᐋᒃ Shadrach, ᒦᔖᒃ Meshach, ᐊᐯᑎᓂᑰ Abednego, ᑳᐊᓄᑮᑕᐌᒃ ᒫᐗᒡ ᐁᔥᐯᑖᑯᓯᒡ ᑭᔐᒪᓂᑑ! ᐱᓵᑲᐊᒧᒃ, ᐊᐯᔪᒃ ᐅᐅᒫ, ᐅᑮ ᐃᓈᐞ᙮ ᒦᑕᔥ ᔐᒫᒃ ᑳᐱ ᐃᔑ ᓵᑲᐊᒥᓂᒡ ᐃᐃᒫ ᐃᔥᑯᑌᕽ᙮ 27 ᐃᑭ ᑕᔥ ᐋᓂᑫᐎᑭᒫᒃ, ᐯᐸᑳᓐ ᑳᑕᔑ ᐅᑭᒫᑲᑖᑫᐙᒡ, ᑳᐐᑕᓄᑮᒫᐙᒡ ᑭᒋᐅᑭᒫᓐ, ᐃᑭ ᑲᔦ ᑲᑭᓇ ᑳᑮ ᐅᑭᒫᐎᐙᒡ, ᐅᑮ ᐙᑳᔥᑲᐙᐙᐞ ᐁᑮ ᐊᑕ ᑭᑫᓂᒫᐙᒡ᙮ ᑳᐐᓐ ᑕᔥ ᐃᔥᑯᑌᓂ ᐊᐙᒡ ᐅᑮ ᐐᓴᑳᑭᓱᑯᓰᓂ, ᐐᓂᓯᓯᓂ ᑲᔦ ᑳᐐᓐ ᐊᐙᒡ ᒋᑮ ᐅᑖᐱᑌᓂᑭᓐ᙮ ᐅᑭᑭᔥᑭᑲᓂᓂ ᑲᔦ ᑳᐐᓐ ᑮᒑᑭᑌᓯᓂᓂᐗᓐ, ᑳᐐᓐ ᑲᔦ ᐊᐙᒡ ᒋᑮ ᐃᔥᑯᑌᐎᒫᑯᓯᓂᒡ᙮ 28 ᒦᑕᔥ ᓀᐸᑲᓈᓴᕒ ᑳᐃᑭᑐᒡ, ᑕᑲ ᑕᒦᑴᒋᐌᑖᑯᓯᐗᓐ ᐅᑭᔐᒪᓂᑑᒥᐙᓐ ᔐᑕᕒᐋᒃ, ᒦᔖᒃ, ᐊᐯᑎᓂᑰ᙮ ᐅᑮ ᐲᒋᓂᔕᐙᓂ ᐄᑐᒃ ᐅᑌᒐᓬᐃᒥᓂ angels ᒋᐱᒫᒋᐃᑯᐙᒡ ᐁᓄᑮᑕᐙᐙᒡ! ᐐᓇᐙ ᓴ ᐅᑮ ᑌᐺᔦᓂᒫᐙᓐ, ᑳᐐᓐ ᑕᔥ ᐐᓐ ᑮᐃᔑᒋᑫᓰᐗᒃ ᑭᒋᐅᑭᒫᓐ ᑳᑮ ᐃᓈᑯᓂᑫᓂᒡ᙮ ᑮᐃᓀᑕᒨᒃ ᐱᓵᓐ ᐁᐐ ᐸᑭᑎᓇᒧᐙᒡ ᐅᐱᒫᑎᓯᐎᓂᐙᓐ ᐊᐲᒡ ᐐᓐ ᒋᐊᓇᒥᐁᑕᐙᐙᐸᓐ ᐸᑳᓐ ᒪᓂᑑᐞ᙮ ᒦ ᓴ ᐁᑕ ᑯ ᐅᑭᔐᒪᓂᑑᒥᐙᓐ ᐁᓇᒥᐁᑕᐙᐙᒡ᙮ 29 ᒦᑕᔥ ᐁᓈᑯᓂᑫᔮᓐ, ᐊᐌᓀᓇᒃ ᓴ ᑳᑕᓶᐙᓇᑭᓯᐙᒡ ᐯᒫᑎᓯᐙᒡ, ᐋᓃᓐ ᐃᑯ ᑲᔦ ᐁᔑᑮᔗᐙᑴᓐ ᑮᔥᐱᓐ ᑕᔥ ᒪᒋᐃᓈᐙᒡ ᐃᓂ ᐅᑭᔐᒪᓂᑑᒥᓂ ᔐᑕᕒᐋᑰᓐ, ᒦᔖᑰᓐ, ᐊᐯᑎᓂᑰᓐ ᑲᔦ ᒦᐗᒃ ᓴ ᐃᑭ ᑫᐲᓯᐱᓂᑣ᙮ ᐅᐙᑳᐃᑲᓂᐙᓐ ᑲᔦ ᑕᐲᑯᐱᒋᑳᑌᓂᐗᓐ ᐌᐱᓂᑲᓃᕽ ᒋᔑ ᐅᑯᓯᒋᑳᑌᓂᑭᓐ᙮ ᑳᐐᓐ ᐋᓃᔥ ᐸᑳᓐ ᒪᓂᑑ ᑖᔑ ᐱᒫᒋᐃᐌᓰ ᐅᐅᐌ ᓇᑫ, ᑮᐃᑭᑐ᙮ 30 ᒦᑕᔥ ᑭᒋᐅᑭᒫ ᑳᑮ ᐃᔥᐸᑭᒫᒡ ᔐᑕᕒᐋᑰᓐ, ᒦᔖᑰᓐ, ᐊᐯᑎᓂᑰᓐ ᑲᔦ ᐃᐃᒫ ᐹᐱᓬᐊᓐ Babylon ᐊᑮᕽ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society