Taaniyoo 2 - ᐅᒋᐺ ᑭᒋᒪᓯᓇᐃᑲᓐᓀᐸᑲᓈᓴᕒ ᐅᐸᐙᒋᑲᓐ ᐁᑕᔑᑌᓂᒃ 1 ᓃᔓᐊᑭ 2 ᓴ ᑳᓂ ᐃᔑᓭᓂᒃ ᓀᐸᑲᓈᓴᕒ Nebuchadnezzar ᑳᑭᒋᐅᑭᒫᐎᒡ, ᑮᐸᐙᒋᑫ᙮ ᐐᑫ ᑕᔥ ᑮᐅᒋ ᑭᒋ ᒥᑯᔥᑳᑌᑕᒻ, ᑳᐐᓐ ᐅᑮ ᑲᔥᑭᑑᓰᓐ ᒋᓂᐹᒡ᙮ 2 ᒦ ᓴ ᐃ ᑭᒋᐅᑭᒫ ᑳᑮ ᐊᑐᒫᒡ ᒣᒫᑖᐎᓯᓂᒡ, ᑳᒪᒫᑖᐎ ᑮᔗᓂᒡ, ᑳᑰᓵᐸᒋᑫᓂᒡ, ᐃᐃ ᑲᔦ ᐗᓇᑯᔑᕽ ᑳᐅᒋ ᑭᑫᒋᑫᓂᒡ, ᒋᐐᑕᒫᑯᒡ ᐋᓃᓐ ᐁᔑᓯᓂᓂᒃ ᐅᐸᐙᒋᑲᓐ᙮ 3 ᒦᑕᔥ ᐅᐅ ᑭᒋᐅᑭᒫ ᑳᐃᓈᒡ, ᐐᑫ ᓴ ᓂᒥᑯᔥᑳᑌᑕᒥᐃᑯᓐ ᐃᐃ ᑳᑮ ᐸᐙᑕᒫᓐ, ᓂᐐ ᑭᑫᑖᓐ ᑕᔥ ᐋᓃᓐ ᐁᔑᓯᕽ ᐃᐃ ᑳᑮ ᐃᓈᐸᑕᒫᓐ, ᐅᑮ ᐃᓈᐞ᙮ 4 ᒦᔥ ᐅᐅ ᑳᐃᔑ ᓇᑴᑖᑯᒡ ᐁᕒᐊᒣᐎ ᑮᔗᐎᓐ Aramaic ᐁᑮ ᐋᐸᒋᑑᓂᒡ, ᑫᒋᐅᑭᒫᐎᔭᓐ, ᑕᑲ ᑭᑲ ᓀᐱᒋ ᐱᒫᑎᔅ! ᐐᑕᒪᐤ ᑭᑕᓄᑮᐋᑲᓇᒃ ᑳᑎᓄᐎᔭᕽ ᐋᓃᓐ ᑳᐃᔑ ᐸᐙᒋᑫᔭᓐ, ᒦᔥ ᒋᐐᑕᒫᑰᔭᓐ ᐋᓃᓐ ᐁᑭᑑᒪᑲᒃ, ᐅᑮᐃᑰᐞ᙮ 5 ᒦᑕᔥ ᐅᐅ ᑭᒋᐅᑭᒫ ᑳᐃᔑ ᓇᑴᑕᐙᒡ, ᐋᔕ ᐅᔕ ᐅᐅ ᓂᑮ ᐅᓀᑖᓐ, ᑮᔥᐱᓐ ᑲᔥᑭᑑᓯᐌᒃ ᒋᐐᑕᒪᐎᔦᒃ ᐋᓃᓐ ᑳᐃᔑ ᐸᐙᒋᑫᔮᓐ, ᐋᓃᓐ ᑲᔦ ᐁᑭᑑᒪᑲᒃ; ᓂᑲ ᐃᓈᑯᓂᑫ ᒋᐲᓯᐱᓂᑰᔦᒃ ᑭᑖᐎᓂᐙᓐ ᑲᔦ ᒋᐲᑯᐱᒋᑳᑌᑭᓐ ᒋᐅᑯᓯᒋᑳᑌᑭᓐ ᑖᐱᔥᑰ ᐌᐱᓂᑲᓐ᙮ 6 ᑮᔥᐱᓐ ᑕᔥ ᐐᓐ ᐐᑕᒪᐎᔦᒃ ᑳᐃᔑ ᐸᐙᒋᑫᔮᓐ, ᐋᓃᓐ ᑲᔦ ᐁᑭᑑᒪᑲᒃ, ᑭᑲ ᒦᓂᓂᓂᒻ ᓴ ᒦᑭᐌᐎᓇᓐ, ᑭᑲ ᐃᔑᐃᓂᓂᒻ ᑲᔦ ᒋᑭᑌᑖᑯᓯᔦᒃ᙮ ᐊᐤ ᓴ ᑕᔥ ᐐᑕᒪᐎᔑᒃ ᐋᓃᓐ ᑳᐃᔑ ᐸᐙᒋᑫᔮᓐ, ᐋᓃᓐ ᑲᔦ ᐁᑭᑑᒪᑲᒃ, ᐅᑮ ᐃᓈᐞ᙮ 7 ᒦᔥ ᐅᐅ ᒦᓇᐙ ᑳᐃᔑ ᓇᑴᑖᑯᒡ, ᑕᑲ ᓴ ᐐᑕᒪᐎᔑᓈᒻ ᐋᓃᓐ ᑳᐃᔑ ᐸᐙᒋᑫᔭᓐ, ᒦᑕᔥ ᒋᐐᑕᒫᑰᔭᓐ ᐋᓃᓐ ᐁᔑᓯᕽ ᑭᐸᐙᒋᑲᓐ, ᑮᐃᑭᑐᐗᐞ᙮ 8 ᒦᑕᔥ ᑭᒋᐅᑭᒫ ᐅᐅ ᑳᐃᓈᒡ, ᑌᐺ ᓴ ᐄᓴᓐ ᑫᔮᐱ ᑭᑲᑴ ᐅᑕᒦᐃᒻ, ᐋᓃᔥ ᐋᔕ ᑭᑭᑫᑖᒻ ᐃᐃ ᑳᑮ ᐅᓀᑕᒫᓐ ᐁᑮ ᐊᔩᑌᑕᒫᓐ᙮ 9 ᑮᔥᐱᓐ ᐐᑕᒪᐎᓯᐌᒃ ᑳᑮ ᐃᔑ ᐸᐙᒋᑫᔮᓐ, ᐯᔑᑾᔦᒃ ᐃᓴ ᐁᑕ ᑲᑭᓇ ᑭᐐ ᐃᔑ ᓇᓇᐊᓯᓂᓂᒻ᙮ ᑮᓇᐙ ᓴ ᑳᑕᔑᔦᒃ ᑭᑮ ᐅᓀᑖᒻ ᐁᐐ ᑮᐗᓂᒧᑕᐎᔦᒃ ᐁᒥᒋ ᒥᓴᐌᑕᒣᒃ ᑫᑰᓐ ᒋᓂ ᐋᒋᓭᒃ᙮ ᑕᑲ ᓴ ᑕᔥ ᓅᑯᒻ ᐐᑕᒪᐎᔑᒃ ᑳᑮ ᐃᔑ ᐸᐙᒋᑫᔮᓐ, ᒦᑕᔥ ᒋᑭᑫᑕᒫᓐ ᑕᑲ ᒋᑲᔥᑭᑑᐌᑴᓐ ᒋᓂᓯᑐᑕᒣᒃ ᐁᔑᓯᕽ ᓂᐸᐙᒋᑲᓐ, ᐅᑮ ᐃᓈᐞ᙮ 10 ᒦᑕᔥ ᐅᐅ ᑳᐃᔑ ᓇᑴᑖᑯᒡ ᐗᓇᑯᔑᕽ ᑳᐅᒋ ᑭᑫᒋᑫᓂᒡ, ᑳᐐᓐ ᓴ ᐊᐎᔭ ᐊᐊ ᑎᓄ ᐃᓂᓂ ᐊᔮᓰ ᐅᐅᒫ ᐊᑮᕽ ᑫᑲᔥᑭᑑᐸᓐ ᐃᐃ ᑳᔑ ᐊᓅᑮᔭᓐ! ᑳᐐᓐ ᓴ ᐐᑳ ᑭᒋᐅᑭᒫ ᒥᓴᐙ ᑯ ᒫᐗᒡ ᑫᒋ ᐃᓀᑖᑯᓯᒡ, ᒣᔥᑲᐌᑖᑯᓯᒡ ᑲᔦ ᐅᑎᔑ ᐊᓅᓈᓰᐞ ᒋᐃᔑᒋᑫᓂᒡ ᐃᐃ ᒣᒫᑖᐎᓯᓂᒡ, ᑳᒪᒫᑖᐎ ᑮᔗᓂᒡ ᐃᐃ ᑲᔦ ᐗᓇᑯᔑᕽ ᑳᐅᒋ ᑭᑫᒋᑫᓂᒡ᙮ 11 ᐃᐃᐌ ᓴ ᑮᓐ ᑭᒋᐅᑭᒫ ᑳᔑ ᐊᑕᐌᑕᒪᓐ ᒫᐗᒡ ᐃᑯ ᓴᓇᑲᓐ᙮ ᑳᐐᓐ ᐊᐎᔭ ᐅᑖ ᑲᔥᑭᑑᓰᓐ ᑮᓐ ᑳᑭᒋᐅᑭᒫᐎᔭᓐ ᒋᑭᑫᑕᒧᐃᑭᐸᓐ ᐃᐃ ᑳᐊᑕᐌᑕᒧᐗᒡ, ᒪᓂᑑᒃ ᐁᑕ ᐅᑖ ᑲᔥᑭᑑᓈᐙ᙮ ᑳᐐᓐ ᑕᔥ ᐃᑭ ᒪᓂᑑᒃ ᐊᔮᓰᐗᒃ ᒣᑴ ᐃᓂᓃᑳᕽ, ᐅᑮᐃᑰᐞ᙮ 12 ᑭᒋᐅᑭᒫ ᑕᔥ ᐁᓅᑕᕽ ᐃᐃ ᐁᐃᒋᑲᓂᐎᒡ, ᐐᑫ ᑮᑭᒋ ᐋᑯᑭᑖᓱ, ᒦᔥ ᑳᐃᔑ ᐊᓅᑮᒡ ᒋᓂᓯᒥᓐᒡ ᑲᑭᓇ ᑳᑮ ᑲᑮᑖᐗᑭᒥᒥᓐᒡ ᐃᓂᓂᐗᐞ ᐃᐃᒫ ᐹᐱᓬᐊᓐ Babylon ᐊᑮᕽ᙮ 13 ᒦ ᓴ ᑕᔥ ᑳᐃᓈᑯᓂᑫᓈᓂᐗᓂᓂᒃ ᒋᓂᓯᒥᓐᒡ ᑳᑮ ᑲᑮᑖᐗᑭᒥᒥᓐᒡ ᐃᓂᓂᐗᐞ᙮ ᒦᑕᔥ ᑲᔦ ᑳᑮ ᐊᑐᓀᐅᒥᓐᒡ ᑖᓂᔫᓐ Daniel, ᐅᐐᒌᐙᑲᓂᓂ ᑲᔦ ᒋᑕᑯ ᓂᓯᒥᓐᒡ᙮ ᑭᔐᒪᓂᑑᓐ ᑮᑭᑫᑕᒧᐃᑯᒡ ᑖᓂᔫ ᐋᓃᓐ ᐁᔑᓯᓂᓂᒃ ᑭᒋᐅᑭᒫᓐ ᐅᐸᐙᒋᑲᓂᓂ 14 ᒦᑕᔥ ᑖᓂᔫ ᑳᑮ ᐊᑕ ᐙᐸᒫᒡ ᐁᕒᐃᔮᑰᓐ Arioch ᒦᐗᓐ ᐃᓂ ᑳᑮ ᐅᑭᒫᑲᑕᐙᓂᒡ ᑭᒋᐅᑭᒫᓐ ᑫᓇᐌᓂᒥᑯᓂᒡ᙮ ᒦᐗᓐ ᐄᑐᒃ ᐃᓂ ᑳᑮ ᐊᓅᓂᒥᓐᒡ ᒋᓂᓵᓂᒡ ᑫᑮᑖᐌᑕᒥᓂᒡ ᐃᓂᓂᐗᐞ ᐃᐃᒫ ᐹᐱᓬᐊᓐ ᐊᑮᕽ᙮ ᒦᔥ ᐌᐌᓂ ᑳᑮ ᐊᔨᑎᒡ ᑖᓂᔫ ᒋᑲᑮᑖᐎᑮᔗᒡ, ᒋᓂᓯᑕᐌᑕᕽ ᑲᔦ᙮ 15 ᒦᔥ ᐅᐅ ᑳᐃᓈᒡ, ᐌᑯᓀᓂᓂ ᑕᔥ ᐌᒋ ᐊᐲᒋ ᑯᑖᓈᑯᓂᑫᒡ ᐊᐊ ᑭᒋᐅᑭᒫ? ᒦᔥ ᐁᕒᐃᔮᑰᓐ ᑳᑮ ᐐᑕᒫᑯᒡ ᒪᔮ ᐌᑯᓀᓂᓂ ᑳᑮ ᐅᒋ ᐃᓈᑯᓂᑫᓂᒡ ᑭᒋᐅᑭᒫᓐ᙮ 16 ᒦᑕᔥ ᑖᓂᔫ ᔐᒫᒃ ᑳᑮ ᐃᔖᒡ ᐁᑮ ᐊᑕ ᐙᐸᒫᒡ ᑭᒋᐅᑭᒫᓐ ᐁᑲᑴᒋᒫᒡ, ᑕᑲ ᑫᔮᐱ ᐊᒋᓇ ᑕᐎᓇᒪᐎᔑᓐ, ᒦᔥ ᒋᐐᑕᒪᐎᓈᓐ ᐋᓃᓐ ᑳᐃᔑ ᐸᐙᒋᑫᔭᓐ, ᒦᔥ ᑲᔦ ᒋᐐᑕᒪᐎᓈᓐ ᐁᑭᑑᒪᑲᒃ, ᐅᑮᐃᓈᓐ᙮ 17 ᒦᔥ ᑳᐃᔑ ᑮᐌᒡ ᐅᑖᐎᓂᕽ ᐁᑮ ᐊᐎ ᐐᑕᒪᐙᒡ ᐅᐐᒌᐙᑲᓇᐞ ᐁᓇᓈᔭᐗᓐ Hananiah, ᒥᔐᔭᓬᐊᓐ Mishael, ᐃᓂ ᑲᔦ ᐋᓴᕒᐋᔭᐗᓐ Azariah᙮ 18 ᒦᔥ ᑳᔑ ᐊᓅᓈᒡ ᒋᑲᑴᒋᒫᓂᒡ ᒋᑰᐹᑌᓂᒥᑯᐙᒡ ᑭᔐᒪᓂᑑᓐ ᑭᒋᑮᔑᑯᕽ ᐁᔮᓂᒡ ᐃᐃ ᐅᒋ ᑳᑮ ᑭᑫᒋᑳᑌᓯᓂᓂᒃ, ᒋᑕᑯ ᓂᓵᓯᐎᑣ, ᐊᐲ ᓂᓯᒥᓐᒡ ᑫᑮᑖᐌᑕᒥᓂᒡ ᐃᓂᓂᐗᐞ ᐃᐃᒫ ᐹᐱᓬᐊᓐ ᐊᑮᕽ᙮ 19 ᐃᐃ ᑕᔥ ᐁᑎᐱᑲᓂᓂᒃ ᑖᓂᔫ ᑮᑭᑫᑕᒧᐋ ᐃᐃ ᐸᐙᒋᑲᓐ ᑫᑫᒋᑳᑌᓯᓂᓂᒃ᙮ ᒦᑕᔥ ᑖᓂᔫ ᑳᑮ ᓇᓈᑯᒫᒡ ᑭᔐᒪᓂᑑᓐ ᑭᒋᑮᔑᑯᕽ ᐁᔮᓂᒡ᙮ 20 ᒦᔥ ᐅᐅ ᑳᐃᑭᑐᒡ, ᑕᑲ ᓀᐱᒡ ᐃᑯ ᑕᒦᑴᒋᐌᑖᑯᓯ ᑭᔐᒪᓂᑑ, ᑫᒋ ᐃᓀᑖᑾᓂᓂᒃ ᐅᐐᓱᐎᓐ᙮ ᐐᓐ ᐅᔕ ᑫᑮᑖᐌᑕᕽ, ᐐᓐ ᑲᔦ ᒣᔥᑲᐌᑖᑯᓯᒡ᙮ 21 ᐐᓐ ᑲᔦ ᑳᑎᐯᑕᕽ ᐯᐸᑳᓐ ᐁᔑ ᐋᔮᒋᓭᓂᒃ, ᐯᐸᑳᓐ ᑲᔦ ᒋᐊᓂ ᐊᔨᔑᐌᐸᓂᓂᒃ; ᐐᓐ ᑲᔦ ᑳᐅᔑ ᐸᑭᑎᓈᒡ ᑭᒋᐅᑭᒫᐞ, ᐅᑑᑕᐙᐞ ᑲᔦ ᒋᐴᓂᑭᒫᐎᓂᒡ; ᐐᓐ ᑲᔦ ᑳᒦᓈᒡ ᑲᑮᑖᐌᑕᒧᐎᓐ ᐃᐃ ᑫᑮᑖᐌᑕᒥᓂᒡ, ᐐᓐ ᑲᔦ ᑳᒦᓈᒡ ᑭᑫᑕᒫᐎᓐ ᐃᐃ ᑳᓂᓯᑐᑕᒥᓂᒡ᙮ 22 ᐐᓐ ᑳᓈᑯᑑᒡ ᑫᑰᓇᓐ ᑳᑭᑫᒋᑳᑌᓯᓂᓂᑭᓐ, ᑳᒐᔭᐄᕽ ᑲᔦ ᑳᐊᔮᓂᑭᓐ; ᐅᑭᑫᑖᓇᓐ ᑲᔦ ᑲᔥᑮᑎᐱᑲᓄᕽ ᑳᐊᔮᓂᑭᓐ, ᐐᓐ ᑲᔦ ᐙᓭᔮᓯᐎᓐ ᒥᓯᐌ ᐊᔮᓂ ᐁᔑᐊᔮᒡ᙮ 23 ᑭᓇᓈᑯᒥᓐ, ᒦᑴᒡ ᑲᔦ ᑭᑎᓂᓐ, ᑳᐅᑭᔐᒪᓂᑑᒥᒥᒀ ᓂᑫᑌᔭᐋᒥᐸᓃᒃ, ᑮᓐ ᑳᒦᔑᔭᓐ ᑲᑮᑖᐌᑕᒧᐎᓐ, ᒪᔥᑲᐎᓰᐎᓐ ᑲᔦ᙮ ᑮᓐ ᑲᔦ ᑳᑭᑫᑕᒨᔑᔭᓐ ᑳᐃᔑ ᑲᑴᒋᒥᑰᔭᓐ, ᑮᓐ ᑲᔦ ᑳᑭᑫᑕᒨᔑᔮᕽ ᐃᐃ ᑭᒋᐅᑭᒫ ᐅᐸᐙᒋᑲᓐ, ᑖᓂᔫ ᑮᐃᑭᑐ᙮ ᑖᓂᔫ ᑮᐐᑕᒪᐙᒡ ᑭᒋᐅᑭᒫᓐ ᐋᓃᓐ ᑳᐃᔑᐸᐙᒋᑫᓂᒡ, ᐋᓃᓐ ᑲᔦ ᐁᑭᑑᒪᑲᓂᓂᒃ 24 ᑖᓂᔫ ᑕᔥ ᐅᑮ ᐊᑕ ᐙᐸᒫᓐ ᐁᕒᐃᔮᑰᓐ Arioch ᑳᑮ ᐊᓅᓂᒥᑎᐸᓐ ᒋᓂᓵᓂᒡ ᑫᑮᑖᐌᑕᒥᓂᒡ ᐃᓂᓂᐗᐞ ᐃᐃᒫ ᐹᐱᓬᐊᓐ Babylon ᐊᑮᕽ᙮ ᒦᔥ ᑳᐃᓈᒡ, ᑫᑯ ᓂᓵᑫᓐ ᐃᑭ ᑫᑮᑖᐌᑕᒧᐙᒡ ᐃᓂᓂᐗᒃ ᐅᐅᒫ ᐹᐱᓬᐊᓐ ᐊᑮᕽ ᐁᔮᐙᒡ᙮ ᑕᑲ ᓃᓐ ᐃᔑᐎᔑᔑᓐ ᐁᔑᐊᔮᒡ ᑭᒋᐅᑭᒫ, ᓃᓐ ᓂᑲ ᐐᑕᒪᐙ ᐁᑭᑑᒪᑲᒃ ᑳᑮ ᐃᔑ ᐸᐙᒋᑫᒡ, ᐅᑮᐃᓈᓐ᙮ 25 ᒦᑕᔥ ᔐᒫᒃ ᐁᕒᐃᔮᑰᓐ Arioch ᑳᑮ ᐃᔑᐎᓂᑯᒡ ᐁᔑᐊᔮᓂᒡ ᑭᒋᐅᑭᒫᓐ, ᐅᐅ ᐁᑮᐃᓈᓂᒡ, ᓂᑮ ᒥᑲᐙ ᓴ ᐗᐊ ᐃᓂᓂ ᐁᐊᔮᒡ ᒣᑴᔭᐄ ᐁᔑᐊᔮᓂᒡ ᒎᑕ Judah ᐊᑮᕽ ᑳᑮ ᐅᒋ ᐲᓂᒥᓐᒡ, ᑫᑲᔥᑭᑑᒡ ᒋᐐᑕᒪᐎᒃ ᐁᑭᑑᒪᑲᓂᓂᒃ ᑭᐸᐙᒋᑲᓐ, ᐁᑮᐃᓈᓂᒡ᙮ 26 ᒦᑕᔥ ᑖᓂᔫ ᑳᐃᑯᒡ ᑭᒋᐅᑭᒫᓐ, ᑭᑲ ᑲᔥᑭᑑᓐ ᐃᓇ ᒋᐐᑕᒪᐎᔭᓐ ᐋᓃᓐ ᑳᐃᔑ ᐸᐙᒋᑫᔮᓐ, ᐋᓃᓐ ᑲᔦ ᐁᑭᑑᒪᑲᒃ? ᐅᑮᐃᑰᓐ᙮ ᑖᓂᔫ ᐄᑐᒃ ᐯᓬᑎᔖᓴᕒ ᑮᑕᑯ ᐃᔑᓂᑳᓱ᙮ 27 ᒦᔥ ᐅᐅ ᑖᓂᔫ ᑳᐃᔑ ᓇᑴᑕᐙᒡ, ᑳᐐᓐ ᐅᔕ ᑳᑲᑮᑖᐗᑭᒥᑣ, ᑳᒪᒫᑖᐎ ᑮᔗᐙᒡ ᑲᔦ, ᒣᒫᑖᐎᓯᐙᒡ ᑲᔦ, ᑳᒪᒫᑖᐎ ᑭᑫᒋᑫᐙᒡ ᑲᔦ ᐅᑖ ᑲᔥᑭᑑᓰᓈᐙ ᒋᐐᑕᒪᐎᒀᐸᓐ ᑳᑭᑫᒋᑳᑌᓯᓂᓂᒃ ᑳᑲᑴᑗᔭᓐ᙮ 28 ᐊᔮ ᐅᔕ ᑭᔐᒪᓂᑑ ᑭᒋᑮᔑᑯᕽ ᑳᑭᑫᑕᒧᐃᐌᒡ ᑫᑰᓐ ᑫᑫᒋᑳᑌᓯᓂᓂᑭᓐ᙮ ᑮᓐ ᑳᑭᒋᐅᑭᒫᐎᔭᓐ ᓀᐸᑲᓈᓴᕒ Nebuchadnezzar, ᑭᔐᒪᓂᑑ ᑭᑮ ᐙᐸᑕᐃᒃ ᐋᓃᓐ ᐙᐊᓂ ᐃᔑᐌᐸᓂᓂᒃ ᐌᑎ ᓃᑳᓇᔭᐄ ᓇᑫ᙮ ᒦ ᓴ ᐅᐅᐌ ᑳᐃᔑ ᐸᐙᒋᑫᔭᓐ, ᑳᐃᔑᓇᒪᓐ ᑲᔦ ᑭᓈᓈᑲᑕᐌᑕᒧᐎᓂᕽ ᐁᐱᒥᔑᓇᓐ ᑭᓂᐯᐎᓂᕽ᙮ 29 ᑫᒋᐅᑭᒫᐎᔭᓐ, ᐁᓂᐹᔭᓐ ᓴ ᑭᑮ ᐃᔑ ᐸᐙᒋᑫ ᐋᓃᓐ ᑫᓂ ᐃᔑᐌᐸᒃ ᐌᑎ ᓃᑳᓇᔭᐄ᙮ ᑭᔐᒪᓂᑑ ᐅᔕ ᑳᑭᑫᑕᒨᔑᐌᒡ ᑫᑫᒋᑳᑌᓯᓂᓂᑭᓐ ᑭᑮ ᐙᐸᑕᐃᒃ ᐋᓃᓐ ᑫᓂ ᐃᔑᐌᐸᓂᓂᒃ᙮ 30 ᓃᓐ ᑕᔥ ᓅᑯᒻ ᐅᐅ ᑳᑭᑫᒋᑳᑌᓯᓄᒃ ᓂᑮ ᐙᐸᑕᐃᑰᐎᔅ ᒋᓂᓯᑐᑕᒫᓐ᙮ ᑳᐐᓐ ᓃᓐ ᐊᐗᔑᒣ ᓂᑲᑮᑖᐌᑕᓰ ᐊᐲᒡ ᐐᓐ ᐃᑭ ᑯᑕᒃ ᐃᓂᓂᐗᒃ ᑳᐱᒫᑎᓯᐙᒡ᙮ ᑮᓐ ᐅᔕ ᑭᒋᐅᑭᒫ ᒋᑭᑫᑕᒪᓐ ᑳᑮ ᐃᔑ ᐸᐙᒋᑫᔭᓐ, ᒋᓂᓯᑐᑕᒪᓐ ᑲᔦ ᐃᐃ ᑳᑮ ᐃᔑ ᓈᓈᑲᑕᐌᑕᒪᓐ ᑳᑮ ᐅᒋ ᑭᑫᑕᒧᐃᑰᔭᓐ᙮ 31 ᑫᒋᐅᑭᒫᐎᔭᓐ, ᒦ ᓴ ᑳᐃᔑᓇᒪᓐ ᐁᐃᓈᐱᔭᓐ᙮ ᑭᑮ ᐙᐸᒫ ᓴ ᐅᔑᒋᑲᓐ ᐁᓃᐸᐎᒡ, ᐋᐱᒋ ᐁᑮ ᒥᑎᑐᒡ, ᐁᐸᑲᑭᐙᓭᓈᑯᓯᒡ, ᐐᑫ ᑲᔦ ᐁᑯᑖᓯᓈᑯᓯᒡ᙮ 32 ᐊᐊ ᑕᔥ ᐅᔑᒋᑲᓐ ᑳᑮ ᐙᐸᒪᒡ ᐐᑫ ᓴ ᐱᑯ ᐅᓵᐎ ᔔᓂᔮ ᐙᐱᑯᕽ ᑮᐃᔑᑎᒀᓀ, ᐙᐹᐱᑯ ᔔᓂᔮ ᐙᐱᑯᕽ ᑮᐃᓈᑭᑲᓀ, ᒦ ᑲᔦ ᑳᐃᔑᓂᑫᒡ᙮ ᐅᓵᐙᐱᑯᕽ ᑕᔥ ᑮᐃᔑᒥᓴᑌ, ᒦ ᑲᔦ ᐃ ᑳᐃᔑᑆᒣᒡ᙮ 33 ᐲᐙᐱᑯᕽ ᑕᔥ ᑮᐃᔑᑳᑌ, ᐙᐱᑲᓐ ᑳᑭᓂᑲᐎᓯᕽ ᐲᐙᐱᑯᕽ ᓴ ᑮᐃᔑᓯᑌ᙮ 34 ᒣᒀ ᑕᔥ ᐁᑲᓇᐙᐸᒪᒡ, ᐊᓯᓐ ᑳᑮ ᐸᑴᐅᓐᒡ ᐯᒫᑎᓯᒡ ᐁᑮ ᑑᑕᓯᒃ᙮ ᒪᔮ ᐃᐃᒫ ᐅᓯᑎᓃᕽ ᐃᓂ ᐅᔑᒋᑲᓇᓐ ᐁᑮ ᐃᔑ ᐸᑭᔑᕽ ᐊᐊ ᐊᓯᓐ ᑳᑮ ᐃᔑ ᐙᐱᑲᓂ ᐲᐙᐱᑯᓯᑌᓂᒡ᙮ ᒦᑕᔥ ᑳᑮ ᔑᑯᓯᑌᔥᑰᓱᒡ ᐊᐊ ᐅᔑᒋᑲᓐ᙮ 35 ᒦᑕᔥ ᐊᐊ ᐙᐱᑲᓐ, ᐲᐙᐱᒃ, ᐅᓵᐙᐱᒃ, ᐙᐹᐱᑯ ᔔᓂᔮ ᐙᐱᒃ, ᑳᐃᔑ ᐲᓯᓭᑭᓐ᙮ ᐊᐊ ᑲᔦ ᐅᓵᐎ ᔔᓂᔮ ᐙᐱᒃ ᐃᐃᒫ ᑮᐃᔑ ᑕᑯ ᐲᓯᓭ, ᒫᒪᐤ ᐃᓂ ᑳᑮ ᐲᑯᓭᑭᓐ ᐁᑮ ᐊᓂ ᐃᔑᓈᑾᑭᓐ ᑖᐱᔥᑰ ᑳᐹᔥᑭᓀᓭᒃ ᑳᐊᔮᒃ ᑳᑕᔑ ᐸᐎᑲᓈᒋᑫᕽ ᑮᓃᐱᕽ᙮ ᑮᐲᑖᓂᒪᒃ ᑕᔥ ᑳᐐᓐ ᑫᑰᓐ ᐃᔥᑯ ᐌᐹᓯᓯᓅᓐ᙮ ᐊᐊ ᑕᔥ ᐐᓐ ᐊᓯᓐ ᑳᑮ ᔑᑯᔥᑭᑫᒡ ᑮᐊᓂ ᑭᒋ ᐗᒌᐎ, ᐁᑮ ᐊᓂ ᒨᔥᑭᓀᔥᑲᕽ ᒥᓯᐌ ᐊᑮᓂ᙮ 36 ᑭᒋᐅᑭᒫ, ᒦ ᓴ ᐅᐌ ᑳᐃᔑ ᐸᐙᒋᑫᔭᓐ, ᓅᑯᒻ ᑕᔥ ᑭᑲ ᐐᑕᒪᐎᓐ ᐋᓃᓐ ᐁᑭᑑᒪᑲᒃ ᐃᐃ ᑭᐸᐙᒋᑲᓐ᙮ 37 ᑮᓐ ᑳᑭᒋᐅᑭᒫᐎᔭᓐ ᐃᓴ ᑭᑑᑭᒫᑲᑕᐙᒃ ᑭᒋᐅᑭᒫᒃ᙮ ᑭᔐᒪᓂᑑ ᑭᒋᑮᔑᑯᕽ ᐁᔮᒡ ᐅᔕ ᑭᒦᓂᒃ ᒋᑎᐯᒋᑫᐗᒡ, ᒋᒪᔥᑲᐎᓰᐗᒡ, ᒋᒪᔥᑲᐌᑖᑯᓯᐗᒡ, ᒋᑭᒋ ᐃᓀᑖᑯᓯᐗᒡ ᑲᔦ᙮ 38 ᑭᑮ ᐸᑭᑎᓇᒫᒃ ᑲᔦ ᒋᑎᐯᓂᒥᒪᒡ ᐯᒫᑎᓯᓂᒡ, ᐊᔭᐋᐎᔕᐞ ᒨᔐᑲᒥᒃ ᐁᔮᓂᒡ, ᐱᓀᔒᔕᐞ ᑲᔦ ᑳᐸᐹᒥᓭᓂᒡ ᐃᔥᐱᒥᕽ᙮ ᐋᑎ ᓴ ᐱᑯ ᐁᑕᔒᑫᓂᒡ ᑭᑮ ᐃᔑ ᒦᓂᒃ ᑲᑭᓇ ᒋᑎᐯᓂᒥᒪᒡ᙮ ᐊᐊ ᓴ ᐅᔑᒋᑲᓐ ᑳᔑ ᐅᓵᐎ ᔔᓂᔮ ᐙᐱᑯᑎᒀᓀᒡ, ᒦ ᓴ ᐃᐌ ᑮᓐ᙮ 39 ᑮᐃᔥᒀ ᐊᔮᔭᓐ ᑕᔥ, ᑯᑕᒃ ᓴ ᑭᒋᐅᑭᒫ ᑎᐯᒋᑫᐎᓐ ᑕᓂ ᐊᔮ, ᓅᑕᐞ ᑫᐃᓀᑖᑾᒃ᙮ ᒦᓇᐙ ᑕᔥ ᑯᑕᒃ ᑭᒋᐅᑭᒫᐎᐎᓐ ᑕᓂ ᐊᔮ ᐅᓵᐙᐱᑯᕽ ᑫᑎᓄᐌᑖᑾᒃ, ᒦ ᓴ ᐃ ᒥᓯᐌ ᑫᑎᐯᑕᒨᒪᑲᒃ ᐊᑭ᙮ ᒦ ᐅᐌ ᓂᓯᓐ 3 ᑭᒋᐅᑭᒫᐎᐎᓐ ᑳᐱ ᐊᔮᒪᑲᒃ᙮ 40 ᐃᐃᐌ ᑕᔥ ᑫᓃᐎᕽ ᑭᒋᐅᑭᒫᐎᐎᓐ ᐃᔥᒀᒡ ᑫᐊᔮᒃ, ᐲᐙᐱᑯᕽ ᑕᐊᐲᒋ ᓲᑫᑖᑾᓐ᙮ ᐃᓇᔥᑫ ᐲᐙᐱᒃ ᐅᐲᑯᔥᑳᓐ, ᐅᔕᒪᑭᔥᑳᓐ ᑲᔦ ᑲᑭᓇ ᑫᑰᓂᓂ᙮ ᐲᐙᐱᒃ ᑕᔥ ᐃᐃ ᐁᐃᔑᒋᑫᒪᑲᒃ, ᒦ ᓴ ᐃᐃᒫ ᑲᑭᓇ ᑫᑰᓇᓐ ᑫᔑ ᐲᑯᔥᑳᒪᑲᑭᓐ, ᑫᔑ ᔑᑯᔥᑳᑭᓐ ᑲᔦ ᐃᓂ ᐅᑖᓈᕽ ᐅᑭᒫᐎᐎᓇᓐ ᑳᑮ ᐱ ᐊᔮᑭᓐ᙮ 41 ᑭᑮ ᐙᐸᒫ ᑕᔥ ᑲᔦ ᐊᐊ ᐅᔑᒋᑲᓐ ᐁᐃᔑᓯᑌᒡ, ᐅᓃᓰᑭᓯᑖᓇᓐ ᑲᔦ ᐁᑮ ᐙᐱᑲᓂᐗᓂᓂᑭᓐ ᐁᑭᓂᑲᐎᓯᓂᓂᒃ ᐲᐙᐱᒃ᙮ ᒦ ᓴ ᐃ ᑫᐃᓀᑖᑾᒃ ᐃᐃ ᑭᒋᐅᑭᒫᐎᐎᓐ ᒋᓃᔗᑖᑾᒃ᙮ ᐲᐙᐱᒃ ᐄᑐᒃ ᐋᐱᒋ ᒪᔥᑲᐌᑖᑾᓐ ᐋᓇ ᑳᑭᓂᑲᐎᓯᕽ ᐃᐃᒫ ᐙᐱᑲᓂᕽ᙮ ᐃᐃ ᑕᔥ ᑭᒋᐅᑭᒫᐎᐎᓐ ᐁᓂᐌᒃ ᑫᔮᐱ ᐸᑮ ᑕᒪᔥᑲᐌᑖᑾᓐ᙮ 42 ᐃᓂ ᑕᔥ ᓃᓰᑭᓯᑖᓇᓐ ᐁᐙᐱᑲᓂᐗᑭᓐ ᐁᑭᓂᑲᐎᐲᐙᐱᑯᐗᑭᓐ ᐃᑕᔥ, ᒦ ᓴ ᐃ ᑭᒋᐅᑭᒫᐎᐎᓐ ᑫᐅᒋ ᒪᔥᑲᐌᑖᑾᒃ, ᔖᑰᒡ ᐃᑕᔥ ᑲᔦ ᑕᐗᑫᐗᓐ᙮ 43 ᐃᐃ ᑕᔥ ᑳᑮ ᐃᔑ ᐙᐸᑕᒪᓐ ᐙᐱᑲᓐ ᐁᑭᓂᑲᐎᓯᕽ ᐲᐙᐱᑯᕽ, ᒦ ᓴ ᐃ ᐯᒫᑎᓯᐙᒡ ᐁᔑ ᑲᑴ ᐐᒌᑎᐙᒡ ᐁᑭᓂᑲᐎ ᐐᑎᑫᑎᐃᑯᐙᒡ ᑌᐯᓂᒥᑯᐙᒡ᙮ ᑳᐐᓐ ᑕᔥ ᐅᑲ ᑲᔥᑭᑑᓰᓈᐙ ᐌᐌᓂ ᒋᑮ ᐐᒌᑎᐙᐸᓐ ᑖᐱᔥᑰ ᐙᐱᑲᓐ, ᐲᐙᐱᒃ ᑲᔦ ᐌᐌᓂ ᑳᑲᔥᑭᒋᑳᑌᓯᓄᒃ ᒋᑭᓂᑲᐎᓂᑳᑌᑭᓐ᙮ 44 ᐊᐲ ᑕᔥ ᐃᐃ ᐅᑭᒫᐞ ᐊᔮᓂᒡ, ᑭᔐᒪᓂᑑ ᓴ ᑭᒋᑮᔑᑯᕽ ᐁᔮᒡ ᐅᑲ ᐅᔑᓯᑑᓐ ᑯᑕᒃ ᑭᒋᐅᑭᒫᐎᐎᓐ ᐐᑳ ᑫᓂᔑᐗᓈᒋᒋᑳᑌᓯᓂᓂᒃ, ᐐᑳ ᑲᔦ ᑫᔖᑰᒋᒋᑳᑌᓯᓂᓂᒃ᙮ ᒦᑕᔥ ᐐᓐ ᐃᐃᒫ ᐃᓂ ᑯᑕᒃ ᑭᒋᐅᑭᒫᐎᐎᓇᓐ ᑫᐅᒋ ᔑᑰᒌᔥᑭᑳᑌᑭᓐ᙮ ᐃᐃ ᑕᔥ ᐐᓐ ᑭᒋᐅᑭᒫᐎᐎᓐ ᑭᔐᒪᓂᑑ ᑫᐅᔑᓯᑑᒡ ᑳᐐᓐ ᐐᑳ ᑕᐴᓂᓭᓯᓂᓂ᙮ 45 ᒦ ᓴ ᑕᔥ ᐁᔑᓯᕽ ᑭᐸᐙᒋᑲᓐ, ᑳᑮ ᐙᐸᒪᒡ ᐊᓯᓐ ᑳᑮ ᐅᒋ ᐸᑴᐅᓐᒡ ᐗᒌᕽ ᐯᒫᑎᓯᒡ ᐁᑮ ᑑᑕᓯᒃ᙮ ᐊᐊ ᐊᓯᓐ ᐁᑮ ᐲᑯᔥᑲᕽ ᐲᐙᐱᑯᓂ, ᐅᓵᐙᐱᑯᓂ, ᐙᐱᑲᓂ ᐙᐹᐱᑯ ᔔᓂᔮ ᐙᐱᑯᓂ, ᐅᓵᐎ ᔔᓂᔮ ᐙᐱᑯᓂ ᑲᔦ ᐐᑫ ᐁᑮ ᐲᓯᔥᑲᐙᒡ᙮ ᑫᒋᐅᑭᒫᐎᔭᓐ, ᑭᔐᒪᓂᑑ ᑫᒋ ᐃᓀᑖᑯᓯᒡ ᓴ ᑭᑮ ᐙᐸᑕᐃᒃ ᐋᓃᓐ ᑫᓂ ᐃᔑᐌᐸᓂᓂᒃ ᐌᑎ ᓃᑳᓇᔭᐄ᙮ ᑌᐺ ᓴ ᐃ ᑳᑮ ᐃᔑ ᐸᐙᒋᑫᔭᓐ, ᐃᐃ ᑲᔦ ᐁᑭᑑᒪᑲᒃ ᑭᐸᐙᒋᑲᓐ ᑫᒋᓈᒡ ᐃᑯ ᑌᐺ ᑕᐃᔑᐌᐸᓐ, ᐅᑮᐃᓈᓐ ᑖᓂᔫ ᑭᒋᐅᑭᒫᓐ᙮ ᑖᓂᔫ ᑮᐃᔥᐸᑭᒥᓐᒡ 46 ᒦᑕᔥ ᑭᒋᐅᑭᒫᓐ ᓀᐸᑲᓈᓴᕒᐊᓐ ᑳᑮ ᐊᓂᒥᑯᑖᓂᒡ ᐁᔑᐊᔮᒡ ᑖᓂᔫ ᐁᑮ ᑭᑌᓂᒥᑯᒡ᙮ ᒦᔥ ᑳᑮ ᐊᓅᑮᓂᒡ ᒋᐲᑕᒪᐎᓐᒡ ᒦᑭᐙᓇᓐ, ᒥᓈᑯᐅᓇᓐ ᑲᔦ, ᒋᐸᑭᑎᓈᓲᑕᒪᐎᓐᒡ᙮ 47 ᒦᔥ ᐅᐅ ᑭᒋᐅᑭᒫᓐ ᑳᐃᑯᒡ, ᑌᐺ ᐄᓴᓐ ᑭᑭᔐᒪᓂᑑᒻ, ᒫᐗᒡ ᐅᑎᐯᓂᒫᐞ ᑯᑕᒃ ᒪᓂᑑᐞ, ᐅᑎᐯᓂᒫᐞ ᑲᔦ ᑭᒋᐅᑭᒫᐞ᙮ ᐐᓐ ᑲᔦ ᑳᑭᑫᑕᒧᐃᐌᒡ ᑫᑰᓇᓐ ᑫᑫᒋᑳᑌᓯᓂᓂᑭᓐ, ᑮᓐ ᐋᓃᔥ ᑭᑮ ᑲᔥᑭᑑᓐ ᒋᐐᑕᒪᓐ ᐅᐅ ᑳᑮ ᑭᑫᒋᑳᑌᓯᓄᑭᐸᓐ, ᐅᑮᐃᑰᓐ᙮ 48 ᒦᔥ ᑲᔦ ᑳᑮ ᐃᔥᐸᑭᒥᑯᒡ, ᐁᑮ ᒦᓂᑯᒡ ᑲᔦ ᓃᐱᐗᐞ ᐌᓂᔑᔑᓂᓂᑭᓐ ᒦᑭᐌᐎᓇᓐ᙮ ᐅᑮ ᐃᔑᐃᑰᓐ ᑲᔦ ᒋᑎᐯᑕᕽ ᑳᑮ ᐃᓂᑯᑯ ᑎᐸᐊᑳᑌᓂᒃ ᐹᐱᓬᐊᓐ Babylon ᐊᑭ, ᐁᑮ ᐃᓇᑭᒥᑯᒡ ᑲᔦ ᒋᑎᐯᓂᒫᒡ ᑲᑭᓇ ᑫᑮᑖᐗᑭᒥᒥᓐᒡ ᐃᓂᓂᐗᐞ᙮ 49 ᑖᓂᔫ ᓴ ᑕᔥ ᐅᑮ ᐃᔑ ᑲᑴᒋᒫᓐ ᑭᒋᐅᑭᒫᓐ ᒋᐃᓇᑭᒫᓂᒡ ᔐᑕᕒᐋᑰᓐ Shadrach, ᒦᔖᑰᓐ Meshach, ᐊᐯᑎᓂᑰᓐ Abednego ᑲᔦ ᒋᓈᓈᑲᒋᑑᓂᒡ ᐋᓃᓐ ᐁᓇᑲᒥᑲᓂᓂᒃ ᐃᐃᒫ ᐹᐱᓬᐊᓐ ᐊᑮᕽ᙮ ᑖᓂᔫ ᓴ ᐐᓐ ᑭᒋᐅᑭᒫᐎᑲᒥᑯᕽ ᑮᐃᔑᐊᔮ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society