Taaniyoo 1 - ᐅᒋᐺ ᑭᒋᒪᓯᓇᐃᑲᓐᑖᓂᔫ, ᐃᐃ ᑲᔦ ᐅᐐᒌᐙᑲᓇᐞ ᐁᑕᔑᓱᐙᒡ 1 ᓂᓱᐊᑭ ᑕᔥ ᒋᐆᔭᑭᒪᓐ Jehoiakim ᑳᑭᒋᐅᑭᒫᐎᓂᒡ ᐃᐃᒫ ᒎᑕ Judah ᐊᑮᕽ, ᓀᐸᑲᓈᓴᕒ Nebuchadnezzar ᐹᐱᓬᐊᓐ Babylon ᐊᑮᕽ ᑳᑮ ᑭᒋᐅᑭᒫᐎᒡ ᑮᐱᑕᑯᔑᓐ ᐐᑫ ᐁᑮ ᐙᑳᔥᑲᒧᐙᒡ ᒉᕒᐆᓴᓬᐊᒻ ᑭᒋ ᐆᑌᓇ᙮ 2 ᑳᑎᐯᒋᑫᓂᒡ ᓴ ᐱᓵᓐ ᐅᑮ ᐸᑭᑎᓂᑰᓐ ᒋᑳᒋᑎᓈᒡ ᐃᓂ ᑭᒋᐅᑭᒫᓐ ᒋᐆᔭᑭᒪᓐ ᒎᑕ ᑭᒋᐅᑭᒫᓐ᙮ ᐅᑮ ᐅᑖᐱᓈᓇᓐ ᑕᔥ ᑲᔦ ᐋᐸᒋᒋᑲᓇᓐ ᑭᔐᒪᓂᑑᓐ ᐅᑭᒋ ᐊᓇᒥᐁᐎᑲᒥᑯᓃᕽ ᑳᑮ ᐅᒋ ᑎᐯᑖᑾᓂᓂᑭᓐ, ᐁᑮ ᐃᔑᐎᑑᒡ ᐌᑎ ᐹᐱᓬᐊᓐ ᐊᑮᕽ᙮ ᒦᐗᓐ ᓴ ᐃᓂ ᑳᐃᔑ ᐊᑑᒡ ᑳᑮ ᐃᔑ ᐊᑌᓂᑭᓐ ᐌᓅᑎᓯᐎᓇᓐ ᐃᐃᒫ ᐅᑭᒋ ᐊᓇᒥᐁᐎᑲᒥᑯᓃᕽ ᐅᒪᓂᑑᒪᐞ ᐁᔑᐊᔮᓂᒡ᙮ 3 ᑭᒋᐅᑭᒫ ᑕᔥ ᐅᑮ ᐊᓅᓈᓐ ᐋᔥᐱᓈᓴᓐ Ashpenaz ᑳᑮ ᐊᔮᓂᑫ ᑎᐯᑕᒥᓂᒡ ᐅᑑᑭᒫᐎᑲᒥᒃ, ᒋᐲᓈᓂᒡ ᐋᓂᑕ ᐅᔥᑭᓃᑭᐗᐞ ᐃᔅᕒᐃᔭᓬᐊᐞ Israel ᑳᑮ ᑳᒋᑎᓂᒥᓐᒡ ᑳᑮ ᐅᒋ ᑎᐯᑖᑯᓯᓂᒡ ᑭᒋᐅᑭᒫᕽ, ᑳᑮ ᑭᑌᑖᑯᓯᓂᒡ ᑲᔦ᙮ 4 ᐅᔥᑭᓃᑭᐗᐞ ᑳᒫᑭᓯᓯᓂᒃ, ᑳᒥᓄᓈᑯᓯᓂᒡ, ᑳᓂᓯᑕᐎᓈᑯᓯᓂᒡ ᐁᑭᑫᑖᓱᓂᒡ, ᑳᓂᓯᑐᑕᒥᓂᒡ, ᑫᑭᑖᑕᐱ ᑭᑫᑖᓱᓂᒡ, ᑫᑌᐊᐲᑌᑖᑯᓯᓂᒡ ᒋᑕᔑ ᐸᒦᑖᑫᓂᒡ ᐃᐃᒫ ᑭᒋᐅᑭᒫᐎᑲᒥᑯᕽ᙮ ᒦᐗᐞ ᐃᓴ ᐅᓄᐌᓂᐗᐞ ᐋᔥᐱᓈᔅ ᑳᑮ ᐊᓅᓂᓐᒡ ᒋᑭᑭᓄᐊᒪᐙᒡ ᐹᐱᓬᐊᓐ ᐃᔑᑮᔗᐎᓐ, ᒋᓂᑖ ᐊᓇᒥᑑᓂᒡ, ᒋᓂᑖᐎᐲᐊᒥᓂᒡ ᑲᔦ᙮ 5 ᑭᒋᐅᑭᒫ ᑕᔥ ᑲᔦ ᑮᐃᔑ ᐊᓅᑮ ᒋᐅᔑ ᐊᔕᒥᒥᓐᒡ ᒦᒋᒻ ᐁᑕᓱ ᑮᔑᒃ, ᐯᔑᑾᓐ ᒋᐃᓇᒋᑫᓂᒡ ᑳᑮ ᓂᑖ ᐃᓇᒋᑫᓂᒡ ᐃᐃ ᑳᑮ ᐐᑑᐸᒥᑯᒡ ᑭᒋᐅᑭᒫ, ᒋᒥᓇᐃᒥᓐᒡ ᑲᔦ ᐅᔔᒥᓈᐴᒻ᙮ ᓂᓱᐊᑭ ᑕᔥ ᒥᓂᒃ ᒋᑭᑭᓄᐊᒪᐎᒥᓐᒡ ᐃᐃ ᐅᔥᑭᓃᑭᐗᐞ, ᑮᐃᔥᒀ ᑭᑭᓄᐊᒪᐎᒥᓐᒡ ᑕᔥ ᒦ ᐃ ᐸᔦᔥ ᒋᐊᓄᑮᑖᑯᒡ᙮ 6 ᒦᐗᒃ ᓴ ᐅᑯ ᒣᑴᔭᐄ ᒎᑕ ᐊᑮᕽ ᑳᑮ ᐅᑎᓂᑣ: ᑖᓂᔫ Daniel, ᐁᓇᓈᔭ Hananiah, ᒥᔐᔭᓬ Mishael, ᐊᐊᔥ ᑲᔦ ᐋᓴᕒᐋᔭ Azariah᙮ 7 ᒦᔥ ᐊᐊ ᑳᐋᓂᑫ ᑎᐯᑕᕽ ᐅᑭᒫᐎᑲᒥᒃ ᑳᑮ ᐋᒋᓂᑳᓈᒡ᙮ ᒦ ᓴ ᐅ ᑳᐃᔑᓂᑳᓈᒡ᙮ ᑖᓂᔫᓐ ᐅᑮ ᐃᔑᓂᑳᓈᓐ ᐯᓬᑎᔖᓴᕒ Belteshazzar, ᐁᓇᓈᔭᐗᓐ ᑕᔥ ᔐᑕᕒᐋᒃ Shadrach, ᒥᔐᔭᓬᐊᓐ ᑕᔥ ᒦᔖᒃ Meshach ᐅᑮ ᐃᔑᓂᑳᓈᓐ, ᐃᓂ ᐋᓴᕒᐋᔭᐗᓐ ᐊᐯᑎᓂᑰ Abednego ᐅᑮ ᐃᔑᓂᑳᓈᓐ᙮ 8 ᑖᓂᔫ ᑕᔥ ᑮᐃᓀᑕᒻ ᐁᐐ ᒦᒋᓯᒃ ᒦᒋᒻ ᑫᐅᒋ ᐐᓀᑖᑯᓯᐸᓐ ᑭᒋᐅᑭᒫᓐ ᑳᑮ ᐅᓀᑕᒥᓂᒡ ᒋᒦᒋᐙᒡ, ᑳᐐᓐ ᑲᔦ ᑮᐃᓀᑕᓰ ᒋᒥᓂᑴᒡ ᔔᒥᓈᐴᓂ ᑫᐅᒋ ᐃᓇᑭᓱᐸᓐ ᒋᐐᓀᑖᑯᓯᒡ᙮ ᒦᔥ ᑳᑮ ᑲᑴᒋᒫᒡ ᒋᐐᒋᐃᑯᒡ ᑳᐋᓂᑫ ᑎᐯᑕᒥᓂᒡ ᐅᑭᒫᐎᑲᒥᒃ ᐅᐅ ᓇᑫ ᒋᔑ ᐐᓂᐃᑎᓱᓯᒃ᙮ 9 ᑭᔐᒪᓂᑑᓐ ᓴ ᐅᑮ ᐃᔑᐋᓂ ᐋᔥᐱᓈᓴᓐ ᒋᒥᓍᐸᒥᑯᒡ, ᒋᑰᐹᑌᓂᒥᑯᒡ ᑲᔦ ᐊᐊ ᑖᓂᔫ᙮ 10 ᒦᑕᔥ ᐅᐅ ᑳᐃᑯᒡ ᑳᐋᓂᑫ ᑎᐯᑕᒥᓂᒡ ᐅᑭᒫᐎᑲᒥᒃ, ᓂᑯᓵ ᐅᔕ ᓂᑑᑭᒫᒻ, ᑭᒋᐅᑭᒫ, ᑳᑮ ᐅᓂᓇᕽ ᑫᒦᒋᐌᒃ, ᑫᒥᓂᑴᐌᒃ ᑲᔦ᙮ ᑮᔥᐱᓐ ᓴ ᓅᑕᐞ ᐃᔑᓈᐎᓀᒃ ᐁᔑᓈᑯᓯᓂᒡ ᑯᑕᒃ ᐅᔥᑭᓃᑭᐗᐞ, ᑫᒋᓈᒡ ᒫᐐᓐ ᓃᓐ ᓂᑲ ᑮᔥᑭᑴᑲᐅᒃ, ᐅᑮᐃᑰᓐ᙮ 11 ᐋᔥᐱᓈᔅ ᓴ ᑮᐊᓅᓈᑯᐸᓐ ᐅᑲᓇᐌᒋᑫᓐ ᒋᑲᓇᐌᓂᒫᓂᒡ ᑖᓂᔫᓐ, ᐁᓇᓈᔭᐗᓐ, ᒥᔐᔭᓬᐊᓐ, ᐃᓂ ᑲᔦ ᐋᓴᕒᐋᔭᐗᓐ᙮ ᒦᐗᓐ ᑕᔥ ᐃᓂ ᑫᓇᐌᓂᒥᑯᐙᒡ ᑖᓂᔫ ᑳᑮᐃᓈᒡ, 12 ᑕᑲ ᐊᑕ ᑭᑫᓂᒥᔑᓈᒻ ᒥᑖᓱᑮᔑᒃ ᒥᓂᒃ, ᑳᑭᑎᑳᑌᒃ ᑎᓄᐎ ᒦᒋᒻ ᐁᑕ ᑕᑲ ᐊᔕᒥᔑᓈᒻ᙮ ᓂᐱ ᑲᔦ ᐁᑕ ᒥᓇᐃᔑᓈᒻ ᒋᒥᓂᑴᔮᕽ᙮ 13 ᓈᓈᑲᓵᐸᒥᔑᓈᑳᕽ ᐃᑕᔥ ᑕᑲ ᑫᐃᔑᓈᑯᓯᐙᑴᓐ ᐃᑭ ᐅᔥᑭᓃᑭᐗᒃ ᑳᒦᒋᐙᒡ ᒦᒋᒻ ᑭᒋᐅᑭᒫᕽ ᑳᐅᒌᓂᒃ᙮ ᐙᑑᑕᐎᔮᕽ ᐃᑕᔥ ᐃᑯ ᐱᓵᓐ ᑑᑕᐎᔑᓈᑳᕽ ᑮᐃᔥᒀ ᐙᐸᒥᔮᕽ, ᐅᑮᐃᓈᓐ᙮ 14 ᒦᑕᔥ ᑳᑮ ᐃᓀᑕᒥᓂᒡ ᐃᓂ ᑫᓇᐌᓂᒥᑯᐙᒡ ᐅᐅ ᒋᐃᔑᒋᑫᐙᒡ, ᐁᑮ ᐊᑕ ᑭᑫᓂᒥᑯᐙᒡ ᒥᑖᓱᑮᔑᒃ᙮ 15 ᒥᑖᓱᑮᔑᒃ ᓴ ᑕᔥ ᑳᐃᔥᒀ ᐃᔑᓭᓂᒃ, ᓇᐗᒡ ᓴ ᐐᓇᐙ ᑮᒥᓄᐊᔮᐎᓈᑯᓯᐗᒃ, ᓇᐗᒡ ᑲᔦ ᐐᓇᐙ ᑮᒪᔥᑲᐎᓈᑯᓯᐗᒃ ᐊᐲᒡ ᐐᓐ ᐃᐃ ᑯᑕᒃ ᐅᔥᑭᓃᑭᐗᐞ ᑳᑮ ᒦᒋᓂᒡ ᒦᒋᒻ ᑭᒋᐅᑭᒫᕽ ᐌᒌᓂᒃ᙮ 16 ᒦᑕᔥ ᐃᓂ ᑫᓇᐌᓂᒥᑯᐙᒡ ᑳᐐᓐ ᐊᐗᔑᒣ ᐅᑮ ᐃᓇᒋᑫᐃᑯᓰᐙᓐ, ᑳᐐᓐ ᑲᔦ ᐅᑮ ᐃᔑ ᒥᓇᐃᑯᓰᐙᓐ ᐋᓃᓐ ᑳᑮ ᐃᔑ ᐊᑕᐌᓂᒥᑣᐸᓐ᙮ ᑳᑭᑎᑳᑌᓂᒃ ᒦᒋᒻ ᐁᑕ ᐅᑮ ᐊᔕᒥᑯᐙᓐ᙮ 17 ᑭᔐᒪᓂᑑ ᓴ ᑕᔥ ᐅᑮ ᐃᔑ ᔕᐌᓂᒫᐞ ᐅᐅ ᓃᐎᓐ ᐅᔥᑭᓃᑭᐗᐞ ᒋᐅᑭᑫᑕᒫᐎᓂᓂᒡ, ᒋᓇᑲᒋ ᓂᓯᑐᑕᒥᓂᒡ ᑲᔦ ᑲᑭᓇ ᑫᑰᓐ, ᒋᑲᑮᑖᐌᑕᒥᓂᒡ ᑲᔦ᙮ ᐅᑮ ᐃᔑ ᔕᐌᓂᒫᓐ ᑕᔥ ᑖᓂᔫᓐ ᒋᓂᓯᑐᑕᒥᓂᒡ ᑲᑭᓇ ᐃᔑᓇᒧᐎᓇᓐ, ᑲᑭᓇ ᑲᔦ ᐸᐙᒋᑲᓇᓐ᙮ 18 ᓂᓱᐊᑭ ᑕᔥ ᑳᑎᐱᓭᓂᒃ ᑳᑮ ᐃᔑ ᐅᓇᑑᓂᐸᓐ ᑭᒋᐅᑭᒫᓐ, ᐋᔥᐱᓈᓴᓐ ᐅᑮ ᐃᔑᐎᓂᑯᐙᓐ ᐁᔑᐊᔮᓂᒡ ᑭᒋᐅᑭᒫᓐ ᓀᐸᑲᓈᓴᕒᐊᓐ Nebuchadnezzar᙮ 19 ᑭᒋᐅᑭᒫᓐ ᐃᑕᔥ ᐅᑮ ᑲᑲᓅᓂᑯᐙᓐ, ᑳᐐᓐ ᑕᔥ ᐊᐎᔭᓐ ᐋᐲᓐᒡ ᑮᒥᑭᑲᓂᐎᓰᐗᓐ ᐃᐃ ᒋᐊᐲᒋ ᑭᑫᑖᓱᓂᒡ ᑳᑮ ᐃᔑ ᑭᑫᑖᓱᐙᒡ ᐐᓇᐙ ᐃᑭ ᑖᓂᔫ, ᐁᓇᓈᔭ, ᒥᔐᔭᓬ, ᐊᐊᔥ ᑲᔦ ᐋᓴᕒᐋᔭ᙮ ᒦᑕᔥ ᑳᑮ ᒫᑕᓄᑮᑕᐙᐙᒡ ᑭᒋᐅᑭᒫᓐ ᐁᔑᐊᔮᓂᒡ᙮ 20 ᐋᓃᓐ ᓴ ᑯ ᑳᐃᔑ ᑲᑴᒋᒥᑯᐙᒡ ᑭᒋᐅᑭᒫᓐ, ᐋᓃᓐ ᐃᑯ ᑲᔦ ᑳᐃᔑ ᐊᑕ ᑭᑫᒋᑫᓂᒡ, ᓇᐗᒡ ᓴ ᐐᓇᐙ ᑮᑭᑫᑖᓱᐗᒃ᙮ ᒥᑖᒌᕽ ᒥᓂᒃ ᐁᑮ ᐊᐲᒋ ᑭᑫᑖᓱᐙᒡ ᑳᑮ ᐊᐲᒋ ᑭᑫᑖᓱᓂᒡ ᐃᐃ ᑳᒪᒫᑖᐎ ᑮᔗᓂᒡ, ᐃᐃ ᑲᔦ ᒣᒫᑖᐎᓯᓂᒡ ᐃᐃᒫ ᐁᔮᓂᒡ ᓀᐸᑲᓈᓴᕒᐊᓐ ᑳᑮ ᐊᑯ ᑎᐯᒋᑫᓂᒡ᙮ 21 ᒦᑕᔥ ᐐᓐ ᑖᓂᔫ ᐃᐃᒫ ᑳᐊᔮᒡ ᐲᓂᔥ ᑮᐊᓂ ᑭᒋᐅᑭᒫᐎᓂᒡ ᓵᐃᕒᐊᓲᓐ Cyrus᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society