ᔂᓬᐊᒪᓐ ᐅᓂᑲᒧᓇᓐ 1 - ᐅᒋᐺ ᑭᒋᒪᓯᓇᐃᑲᓐ1 ᒦᐗᓐ ᐅᓄ ᒫᐗᒡ ᒣᓄᑖᑾᓂᓂᑭᓐ ᔂᓬᐊᒪᓐ Solomon ᐅᓂᑲᒧᓇᓐ᙮ ᓂᑕᒻ ᓂᑲᒧᐎᓐ ᐃᑴ ᐁᑭᑐᒡ 2 ᑭᑑᓐ ᐃᓴ ᑭᑖᐸᒋᑑᓐ ᒥᓯᐌ ᐁᔑ ᐅᒌᒥᔭᓐ; ᑭᒥᓉᒋᑫᐎᓐ ᐃᓴ ᒌᑫᑖᑾᓐ ᐊᐲᒡ ᐐᓐ ᔔᒥᓈᐳ᙮ 3 ᐐᑫ ᓴ ᑭᒥᓄᒫᑯᔅ, ᑭᐐᓱᐎᓐ ᐁᔑᒫᑾᒃ ᑖᐱᔥᑰ ᒥᓈᑯᐅᓂᕽ᙮ ᒦ ᐄᑐᒃ ᐅᔥᑭᓃᑭᑴᐗᒃ ᑳᐅᒋ ᓵᑭᐃᒀ᙮ 4 ᑕᑲ ᒫᒌᔑᔑᓐ, ᐌᔩᑉ ᒫᒑᑖ᙮ ᐃᔑᐎᔑᔑᓐ ᑭᐸᑫᒋᑲᓂᒃ ᓂᑭᒋᐅᑭᒫᒻ᙮ ᓇᐗᒡ ᐃᓴ ᑭᑲ ᑭᒋ ᒥᓉᓂᑎᒥᓐ ᐊᐲᒡ ᐐᓐ ᒋᑮ ᒌᑫᑕᒪᑭᐸᓐ ᔔᒥᓈᐳ᙮ ᑳᐐᓐ ᐃᑕᔥ ᑭᑲ ᑭᑫᑕᓰᒥᓐ ᐁᔑᒋᑫᔭᕽ ᑫᐊᐲᒋ ᒥᓉᓂᑎᔭᕽ᙮ ᒦᑕᔥ ᐄᓴᓐ ᑲᑭᓇ ᐃᑴᐗᒃ ᑳᐅᒋ ᓵᑭᐃᒀ! 5 ᐃᑴᐗᒃ ᐁᔮᔦᒃ ᑭᒋ ᐆᑌᓈᕽ ᒉᕒᐆᓴᓬᐊᒥᕽ Jerusalem, ᓂᒪᑲᑌᐙᔅ, ᔖᑰᒡ ᐃᑕᔥ ᓂᑑᓂᔑᔅ, ᐁᐃᔑ ᒪᑲᑌᐎᓈᑯᓯᔮᓐ ᑖᐱᔥᑰ ᐸᒀᓀᑲᒥᑰᓐ ᐁᔑᓈᑾᑭᓐ ᐁᔮᑭᓐ ᑮᑕᕒ Kedar ᐊᔮᐎᓂᕽ᙮ ᔖᑰᒡ ᐃᑕᔥ ᓂᑎᔑᒥᓄᓈᑯᔅ ᐁᔑ ᒥᓄᓈᑾᓂᓂᑭᓐ ᔂᓬᐊᒪᓐ Solomon ᐅᑭᐲᑲᐃᑲᓇᓐ ᑭᒋᐅᑭᒫᐎᑲᒥᑯᕽ᙮ 6 ᑫᑯ ᑕᔥ ᐅᒋ ᑭᒋ ᑲᓇᐙᐸᒥᔑᑫᓐ ᐁᒪᑲᑌᐙᓱᔮᓐ, ᑮᓯᔅ ᐄᑐᒃ ᐊᐊ ᑳᑮ ᒪᑲᑌᐙᓱᒡ᙮ ᓂᑕᐌᒫᒃ ᐅᔕ ᓂᑮ ᓂᔥᑭᐋᒃ, ᒦᔥ ᑳᑑᑕᐎᐙᒡ ᒋᐊᓄᑮᐗᒃ ᑳᔑ ᑭᑎᑳᓱᐙᒡ ᔔᒥᓇᒃ, ᑳᐐᓐ ᐃᑕᔥ ᓃᓐ ᓂᑮ ᐃᔑᓭᓰ ᒋ ᓈᑲᒋᐃᑎᓱᔮᓐ᙮ 7 ᑳᒥᓉᓂᒥᓈᓐ, ᐐᑕᒪᐎᔑᓐ ᐋᑎ ᐁᔑᐎᓇᑣ ᑭᒫᓇᒑᓂᔑᒪᒃ ᑫᑕᔑ ᐐᓯᓂᐙᒡ, ᐋᑎ ᑲᔦ ᑫᑕᔑ ᐊᓉᔑᓄᐙᒡ ᐋᐱᑕ ᑮᔑᑲᓂᓂᒃ᙮ ᐌᑯᓀᓐ ᑕᔥ ᑫᐅᒋ ᐸᐹ ᓇᓈᑐᓀᐅᓈᐹᓐ ᐁᔑ ᐊᔭᔮᐙᒡ ᑯᑕᒃ ᑳᓈᓈᑲᒋᐋᐙᒡ ᒫᓇᒑᓂᔕᐞ᙮ ᐃᓂᓂ ᐁᑭᑐᒡ 8 ᑳᒥᓉᓂᒥᓈᓐ, ᒫᐗᒡ ᐌᓂᔑᔑᔭᓐ, ᑮᔥᐱᓐ ᑭᑫᑕᓯᐗᓐ ᐋᑎ ᐁᔑ ᐊᔕᒪᒀ, ᐱᒪᐊᔥ ᐋᑎ ᐁᔑᑲᐌᐙᒡ ᒋᒥᑲᒧᐗᒡ ᐁᑕᔑ ᐐᓯᓂᐙᒡ ᑭᒫᓇᑎᑯᒪᒃ ᒌᑲᔭᐃ ᐁᔑ ᐸᑕᑭᑌᓂᑭᓐ ᐅᐸᒀᓀᑲᒥᑯᐙᓐ ᐃᑭ ᑫᓇᐌᓂᒫᐙᒡ ᒫᓇᑎᑾᐞ᙮ 9 ᑳᒥᓉᓂᒥᓈᓐ, ᑭᒥᓴᐎᓈᑰᒃ ᐃᓴ ᐃᓂᓂᐗᒃ ᑮᐙᐸᒥᒀ, ᑖᐱᔥᑰ ᐋᐯ ᒥᑕᑎᒨᐞ ᑳᑑᑕᐙᐙᒡ ᓅᔐ ᒥᑕᑎᒨᐞ ᐌᑖᐲᓂᒡ ᐯᕒᐆᓐ Pharaoh ᐅᑑᑖᐹᓈᑯᓂ᙮ 10 ᑮᓂᓯᓴᓐ ᐃᓴ ᒥᓄᓈᑾᓅᓐ ᐁᐃᓈᐲᑭᓯᑭᓐ ᑭᐗᓄᐙᕽ, ᐁᐊᓂ ᐃᓈᐲᑭᓯᑭᓐ ᑭᑴᑲᓂᕽ ᐁᔑᓈᑾᑭᓐ ᑖᐱᔥᑰ ᐌᓂᔑᔑᐙᒡ ᑳᓂᐱᑌᐱᓱᐙᒡ ᐊᓯᓃᓴᒃ ᓈᐱᑳᑲᓂᒥᓇᒃ᙮ 11 ᓈᐱᑌᐱᓱᓇᒃ ᓴ ᑭᑲ ᐅᒋ ᐅᔑᑕᒫᑯ ᐅᓵᐎ ᔔᓂᔮ ᐙᐱᑯᕽ, ᐙᐹᐱᑯ ᔔᓂᔮ ᐙᐱᒃ ᒋᐋᐸᑎᓯᒡ ᒋᒪᓯᓂᒋᑳᑲᓂᐎᒡ᙮ ᐃᑴ ᐁᑭᑐᒡ 12 ᓂᑭᒋᐅᑭᒫᒻ ᐃᑕᔥ ᐁᐐᓯᓂᒡ ᑕᐸᓯᑑᐳᐎᓈᑯᕽ, ᓂᒥᓈᑯᐅᓐ ᐃᓴ ᐐᑫ ᒨᔥᑭᓀᒫᑾᓐ ᐁᒥᓄᒫᑾᒃ᙮ 13 ᑳᒥᓉᓂᒪᒃ ᐱᑮᐎᒥᓈᑯᐅᓂᕽ ᐃᔑᒫᑯᓯ ᐁᐱᒥᔑᕽ ᓂᒎᒎᔑᒥᕽ᙮ 14 ᑳᒥᓉᓂᒪᒃ ᐃᓴ ᐃᓀᑖᑯᓯ ᑖᐱᔥᑰ ᐙᐱᑾᓃᓐ ᐁᔮᑭᓐ ᐃᐃᒫ ᐁᔑ ᓂᑖᐎᑭᐙᒡ ᔔᒥᓇᒃ ᐁᑮᑏ Engedi ᐁᒋᑳᑌᒃ᙮ ᐃᓂᓂ ᐁᑭᑐᒡ 15 ᑳᒥᓉᓂᒥᓈᓐ ᐁᑕᑕᐌ ᓴ ᑭᒥᓄᓈᑯᔅ, ᐐᑫ ᑭᑑᓂᔑᔥ᙮ ᑭᔥᑮᔑᑰᓐ ᐃᔑᓈᑾᓅᓐ ᑖᐱᔥᑰ ᐅᒦᒦᐎᔥᑮᔑᑰᓐ᙮ ᐃᑴ ᐁᑭᑐᒡ 16 ᑳᒥᓉᓂᒥᓈᓐ, ᐁᑕᑕᐌ ᑭᒥᓄᓈᑯᔅ, ᐐᑫ ᑭᒥᓉᑕᒥᐃᔥ, ᒪᔥᑯᓰᕽ ᐃᓴ ᑭᑲ ᑕᔑ ᐐᐯᑎᒥᓐ᙮ 17 ᑮᔥᑳᑎᑰᒃ ᐃᓴ ᑭᑲ ᐅᓈᐎᑌᐅᑲᓈᑯᒥᓐ ᑭᐙᑳᐃᑲᓂᓈᓂᕽ, ᓵᐃᐸᕒᐁᔅ Cypress ᑎᓄᐙᑎᑰᒃ ᐃᑕᔥ ᐋᐸᑎᓯᐗᒃ ᐁᐊᐸᒀᓈᑰᐎᐙᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society