Sehkaraaya 2 - ᐅᒋᐺ ᑭᒋᒪᓯᓇᐃᑲᓐᓭᑲᕒᐋᔭ ᑮᐙᐸᑕᕽ ᑎᐸᐃᑲᓀᔮᑉ 1 ᐃᔥᐱᒥᕽ ᐁᐃᓈᐱᔮᓐ ᓂᑮ ᐙᐸᒫ ᐃᓂᓂ ᐁᑕᑯᓇᕽ ᑎᐸᐃᑲᓀᔮᑉ᙮ 2 ᒦᔥ ᑳᐃᓇᒃ, ᐋᓃᑎ ᐁᔖᔭᓐ? ᐅᐅ ᑕᔥ ᓂᑮᐃᒃ, ᓂᐐ ᑎᐹᐲᑭᓈᓐ ᒉᕒᐆᓴᓬᐊᒻ ᐋᓃᓐ ᐁᒀᒃ, ᐋᓃᓐ ᑲᔦ ᐁᓂᑾᑾᑌᔮᒃ᙮ 3 ᒦᔥ ᑳᐃᔑ ᓇᑲᔑᒡ ᐊᐊ ᐁᒐᓬ, ᑯᑕᒃ ᐁᒐᓬᐊᓐ ᐁᑮ ᐱ ᐊᑕ ᓇᑭᔥᑳᑯᒡ ᐅᐅ ᐁᑮᐃᑯᒡ, 4 ᒫᒌᐸᑑᓐ ᒋᐊᐎ ᐐᑕᒪᐗᒡ ᐊᐊ ᐅᔥᑭᓃᑭ ᑳᑕᑯᓇᕽ ᑎᐸᐃᑲᓀᔮᑉ ᐁᐐ ᑭᒋ ᐹᑏᓄᓂᒡ ᐊᐎᔭᐞ, ᐊᐗᑳᓇᐞ ᑲᔦ ᐃᐃᒫ ᒉᕒᐆᓴᓬᐊᒥᕽ ᐁᐐ ᐊᔮᓯᓄᒃ ᐙᑳᔮᐱᑭᓂᑲᓐ᙮ 5 ᐐᓐ ᐃᓴ ᐱᑯ ᑳᑎᐯᒋᑫᒡ ᐁᐐ ᑎᓄᐎᒡ ᑳᐃᔥᑯᑌᐗᕽ ᐙᑳᔮᐱᑭᓂᑲᓐ ᐁᐐ ᐙᑳᔥᑲᕽ ᐃᐃ ᑭᒋ ᐆᑌᓇ ᐁᐐ ᓈᑕᒪᐙᑕᕽ, ᐐᓐ ᐃᑯ ᑲᔦ ᐃᐃᒫ ᐁᐐ ᐃᔑᑖᒡ ᐁᔑ ᑭᒋ ᐃᓀᑖᑯᓯᒡ, ᐃᑭᑐ ᐁᒐᓬ᙮ ᑳᑮᒫᒌᓂᑣᐸᓐ ᐁᑮᐌᐊᑐᒥᑣ 6 ᐊᐯᔪᒃ, ᒋᐅᒋ ᒫᒌᐸᐃᐌᔦᒃ ᐌᑎ ᑮᐌᑎᓄᕽ ᐊᑮᕽ᙮ ᒥᓯᐌ ᐄᑐᒃ ᑮᔑᑯᕽ ᐌᑖᓂᒪᒃ ᑭᑮ ᐃᔑ ᐅᓶ ᐌᐱᓂᓂᒻ᙮ 7 ᐊᐯᔪᒃ, ᓵᔭᓐ ᐁᓂᓇᑰᒃ, ᑳᐃᔑᑖᔦᒃ ᐌᑎ ᐹᐱᓬᐊᓐ Babylon ᐊᑮᕽ, ᐃᑭᑐ ᑳᑎᐯᒋᑫᒡ᙮ 8 ᒦᑕᔥ ᐅᐅ ᐁᑭᑐᒡ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ, ᐊᐌᓀᓐ ᐃᓴ ᐱᑯ ᑳᐸᑭᑌᐅᓀᒃ, ᒦ ᐃ ᐁᐸᑭᑌᐊᕽ ᒫᐗᒡ ᑳᓵᑭᑖᐗᒃ᙮ ᒦᔥ ᐅᐌᓂ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ ᐁᔑᒡ ᒋᐃᓂᒪᒃ ᑯᑕᒃ ᐸᑳᓐ ᐯᒫᑎᓯᓂᒡ ᑳᓂᔑᐗᓈᒋᐋᓂᒡ ᐅᐱᒫᑎᓰᒪᐞ, 9 ᓃᓐ ᓴ ᐱᑯ ᑳᑎᐯᒋᑫᔮᓐ ᓂᑲ ᒦᑳᓈᒃ ᐃᑭ ᓀᔑᐗᓈᒋᒋᑫᐙᒡ, ᐁᐐ ᑑᑕᐗᒀ ᒋᓂᔑᐗᓈᒋᐃᑯᐙᒡ ᐃᐃ ᑳᑮ ᑭᑎᒫᑭᐋᐙᐸᓐ᙮ ᐊᐲ ᑕᔥ ᐃᐃ ᐃᔑᓭᒃ, ᒦ ᐃ ᒋᑭᑫᑕᒣᒃ ᑳᒫᐗᒋ ᒪᔥᑲᐎᓰᒡ ᑌᐯᒋᑫᒡ ᐁᑮ ᐲᒋᓂᔕᐅᒡ᙮ 10 ᒦᔥ ᐁᑭᑐᒡ ᑳᑎᐯᒋᑫᒡ, ᔖᑯᐌᒃ ᒋᑭᑫᑕᒣᒃ, ᒉᕒᐆᓴᓬᐊᒥᕽ ᐁᔮᔦᒃ᙮ ᓂᐐ ᐱᑕᑯᔑᓐ ᐅᔕ ᐁᐐ ᐱ ᐐᒋᑖᒥᓇᑰᒃ ᐁᔑᐊᔮᔦᒃ᙮ 11 ᑕᐹᑏᓄᐗᒃ ᐃᓴ ᐁᑕᓶᐙᓇᑭᓯᐙᒡ ᐯᒫᑎᓯᐙᒡ ᑫᐱ ᓈᓯᑲᐙᐙᒡ ᑳᑎᐯᒋᑫᓂᒡ ᒋᑎᐯᓂᒥᑯᐙᒡ ᐃᐃ ᐊᐲ᙮ ᒣᑴᔭᐄ ᐁᔑᐊᔮᔦᒃ ᐃᓴ ᑫᐐᓐ ᑕᐃᔑᑖ, ᒦᔥ ᒋᑭᑫᑕᒣᒃ ᐐᓐ ᑳᒫᐗᒋ ᒪᔥᑲᐎᓰᒡ ᑌᐯᒋᑫᒡ ᐁᑮ ᐲᒋᓂᔕᐅᒡ᙮ 12 ᐐᓐ ᓴ ᐃᑯ ᑳᑎᐯᒋᑫᒡ ᐅᑲ ᑎᐯᑖᓐ ᑳᑭᑌᑖᑾᓂᓂᒃ ᐊᑭ ᒣᒥᑕᑫ ᑯ ᐅᑲ ᐅᓈᐸᑖᓐ ᒉᕒᐆᓴᓬᐊᒻ Jerusalem ᑭᒋ ᐆᑌᓇ ᒋᓵᑭᑑᓐ᙮ 13 ᑫᑯ ᑕᔥ ᓅᑖᑎᑫᒃ ᑲᑭᓇ ᐁᑕᔑᔦᒃ ᐁᓈᓴᒦᒡ ᑳᑎᐯᒋᑫᒡ᙮ ᐐᓐ ᐃᓴ ᐱᑯ ᐐᐱᐅᒋ ᑕᑯᔑᓐ ᐁᔑ ᑭᑌᑖᑾᓂᓂᒃ ᐅᑖᐎᓂᕽ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society