Sehkaraaya 1 - ᐅᒋᐺ ᑭᒋᒪᓯᓇᐃᑲᓐ

ᑳᑎᐯᒋᑫᒡ ᐁᑮᐌᐊᑐᒫᒡ ᐅᐱᒫᑎᓰᒪᐞ

¹ ᓃᔓᐱᐴᓐ ᑳᑭᒋᐅᑭᒫᐎᒡ ᑕᕒᐋᔭᔅ Darius ᐃᐃᒫ ᐯᕒᔕ Persia ᐊᑮᕽ, ᓂᔣᓱᑮᓯᓲᓐ 8 ᐁᐱᒪᑭᓱᓂᒡ, ᒦ ᓴ ᐃ ᐊᐲ ᓭᑲᕒᐋᔭ Zechariah ᑫᓅᑕᒪᐙᒡ ᑭᔐᒪᓂᑑᓐ ᑳᑮ ᑲᓅᓂᑯᒡ ᑳᑎᐯᒋᑫᓂᒡ᙮ ᐅᑌᑌᓐ ᓴ ᐯᕒᐊᑳᔭ Berechiah ᑮᐃᔑᓂᑳᓱᐗᓐ, ᐅᒥᔔᒥᓴᓐ ᐃᑕᔥ ᐃᑑ Iddo ᑮᐃᔑᓂᑳᓱᐗᓐ᙮

² ᒦᑕᔥ ᐅᐅ ᑳᐃᑯᒡ ᑳᒫᐗᒋ ᒪᔥᑲᐎᓰᓂᒡ ᑳᑎᐯᒋᑫᓂᒡ ᓭᑲᕒᐋᔭ ᒋᐃᑭᑐᒡ, ᓃᓐ ᑌᐯᒋᑫᔮᓐ ᓴ ᓂᑮ ᓂᔥᑭᐃᑰᒃ ᑭᑫᑌᔭᐋᒥᐙᒃ᙮

³ ᒦᑕᔥ ᓅᑯᒻ ᐁᓂᓇᑰᒃ, ᐱᑮᐌ ᓈᓯᑲᐎᔑᒃ, ᑫᓃᓐ ᐃᑕᔥ ᑭᑲ ᑮᐌ ᓈᓯᑲᐎᓂᓂᒻ᙮

⁴ ᑫᑯ ᐐᓐ ᐃᔑᒋᑫᑫᒃ ᑭᑫᑕᔭᐋᒥᐙᒃ ᒣᐎᔕ ᑳᑮ ᐃᔑᒋᑫᐙᒡ ᐁᑮ ᔕᔒᐱᑕᒧᐙᒡ ᐁᑮ ᐱᓯᑕᓯᒀ᙮ ᑫᓅᑕᒪᐎᐙᒡ ᓂᑮ ᐋᐸᒋᐋᒃ ᐋᓇᑮ ᑲᓅᓇᒀ ᒋᓅᒋᑑᓯᒀ ᒪᒋᑫᑰᓐ, ᒋᐴᓂᑑᐙᒡ ᑲᔦ ᐅᒪᒋᐃᔑᒋᑫᐎᓂᐙᓐ᙮

⁵ ᐃᑭ ᓴ ᑭᑫᑌᔭᐋᒥᐙᐸᓃᒃ, ᑳᑮ ᑲᓅᑕᒫᑫᐙᒡ ᑲᔦ ᑳᐐᓐ ᑫᔮᐱ ᐱᒫᑎᓯᓰᐗᒃ᙮

⁶ ᓂᑕᓄᑮᐋᑲᓇᒃ ᑫᓅᑕᒪᐎᐙᒡ ᓴ ᓂᑮ ᑮᑭᑑᑕᒫᑰᒃ ᐁᑮ ᑲᓅᓇᒀᐸᓐ ᑭᑫᑌᔭᐋᒥᐙᒃ ᒋᐊᔮᒀᒥᓯᐙᒡ, ᑳᐐᓐ ᑮᐱᓯᑕᓰᐗᒃ ᒦᔥ ᑳᑮ ᐅᒋ ᒫᔑᓭᐙᒡ᙮ ᒦᔥ ᑫᑲᐲ ᑳᑮ ᑴᑭᐱᒫᑎᓯᐙᒡ ᐁᑮ ᑭᑫᑕᒧᐙᒡ ᓃᓐ ᑳᒫᐗᒋ ᒪᔥᑲᐎᓰᐗᒃ ᑌᐯᒋᑫᔮᓐ ᐁᑮ ᐅᓀᑕᒧᐗᒃ ᐋᓃᓐ ᑳᑮ ᐃᔑ ᑲᔥᑭᑕᒫᓱᐙᒡ ᑮᓇᓇᐊᓴᒀᐸᓐ᙮

⁷ ᓃᔓᐱᐴᓐ ᑳᑭᒋᐅᑭᒫᐎᒡ ᑕᕒᐋᔭᔅ Darius ᓃᔥᑕᓇᔑᓃᐎᓐ 24 ᐁᐃᓇᑭᓱᒡ ᒥᑖᔑᐯᔑᑯᑮᓯᓲᓐ 11 ᓰᐸᑦ Shebat ᐁᔑᓂᑳᓱᓂᒡ, ᒦ ᓴ ᐃ ᐊᐲ ᓃᓐ ᓭᑲᕒᐋᔭ ᐌᑌᑌᔮᓐ ᐯᕒᐊᑳᔭᐗᓐ Berechiah, ᐌᒥᔔᒥᓯᔮᓐ ᐃᑑ Iddo ᑳᑮ ᑲᓅᔑᒡ ᑳᑎᐯᒋᑫᒡ ᐁᑎᐱᑲᓂᓂᒃ᙮

⁸ ᒦᔥ ᑳᑮ ᐃᔑᓇᒫᓐ ᐁᑮ ᐙᐸᒪᒃ ᐁᒐᓬ ᒥᔅᑯ ᒥᑕᑎᒨᓐ ᐁᐱᒥᐗᓈᓱᒡ᙮ ᐁᔑ ᐸᓴᑎᓈᓂᒃ ᐁᑮ ᐃᔑ ᑭᐱᒌᒡ ᐁᔑ ᐸᑕᑭᓱᓂᒡ ᒬᑕᓬ myrtle ᑎᓄᐙᑎᑰᐞ᙮ ᐅᑖᓈᕽ ᐃᑕᔥ ᑯᑕᒃ ᒥᑕᑎᒨᐞ ᑮᐱ ᐊᔮᐗᐞ ᐁᑮ ᒥᔅᑯᓯᓂᒡ, ᐋᓂᑕ ᐁᑮ ᐅᓵᐎᓈᑯᓯᓂᒡ, ᐋᓂᑕ ᑲᔦ ᐁᑮ ᐙᐱᔥᑭᓯᓂᒡ᙮

⁹ ᒦᔥ ᑳᐃᓇᒃ, ᓂᑑᑭᒫᒻ, ᐋᓃᓐ ᐃᑕᔥ ᐅᑯ ᒥᑕᑎᒨᒃ ᐁᓍᓱᐙᒡ? ᒦᑕᔥ ᐅᐅ ᑳᐃᔑ ᓇᑴᑕᐎᒡ, ᑭᑲ ᐐᑕᒪᐎᓐ ᐃᓴ ᐋᓃᓐ ᐁᓍᓱᐙᒡ, ᓂᑮᐃᒃ᙮

¹⁰ ᒦᔥ ᐊᐊᐌ ᐃᓂᓂ ᑳᑮ ᓃᐸᐎᒡ ᒣᑴᔭᐄ ᑳᐃᔑ ᐸᐹᑕᑭᓱᓂᒡ ᒬᑕᓬ ᑎᓄᐙᑎᑰᐞ ᓂᑮ ᐃᔑ ᐐᑕᒫᒃ, ᑳᑎᐯᒋᑫᒡ ᐄᑐᒃ ᐅᐅ ᐅᑮ ᐲᒋᓂᔕᐙᐞ ᒋᐱ ᐊᑕ ᑭᑫᑕᒥᓂᒡ ᐊᑭ᙮

¹¹ ᒦᑕᔥ ᑳᐃᔑ ᐐᑕᒪᐙᐙᒡ ᐃᓂ ᑳᑎᐯᒋᑫᓂᒡ ᐅᑌᒐᓬᐃᒥᓂ ᑳᓃᐸᐎᓂᒡ ᒣᑴᔭᐄ ᒬᑕᓬ myrtle ᑎᓄᐙᑎᑰᕽ ᐁᑮᐃᓈᐙᒡ, ᒥᓯᐌ ᓴ ᐊᑮᕽ ᓂᑮ ᐃᔖᒥᓐ᙮ ᒦᔥ ᐁᔑ ᒥᑲᒫᕽ ᐅᐅ ᒥᓯᐌ ᐊᑭ ᐱᓵᓐ ᐁᐊᔮᒪᑲᒃ, ᐁᐱᓵᓀᑖᑾᒃ ᑲᔦ᙮

¹² ᐊᐊ ᑕᔥ ᑳᑎᐯᒋᑫᒡ ᐅᑌᒐᓬᐃᒪᓐ ᑮᐃᑭᑐᐗᓐ, ᑳᒫᐗᒋ ᒪᔥᑲᐎᓰᔭᓐ ᑌᐯᒋᑫᔭᓐ, ᐋᔕ ᐄᑐᒃ ᓃᔣᓯᒥᑕᓇ 70 ᑕᓱᐱᐴᓐ ᑭᐱ ᓂᔥᑭᐃᑰᓐ ᑭᒋ ᐆᑌᓇ ᒉᕒᐆᓴᓬᐊᒻ Jerusalem, ᐃᓂ ᑲᔦ ᑯᑕᒃ ᐆᑌᓇᐗᓐ ᐁᔮᑭᓐ ᐃᐃᒫ ᒎᑕ ᐊᑮᕽ᙮ ᐋᓃᓐ ᐃᑕᔥ ᐊᐲ ᐙᑰᐹᓯᓇᒪᓐ?

¹³ ᑳᑎᐯᒋᑫᒡ ᐃᑕᔥ ᐌᐌᓂ ᐅᑮ ᓇᑴᑕᐙᓐ ᐃᓂ ᐁᒐᓬᐊᓐ ᐁᑮ ᒥᓄ ᓇᑴᑕᐙᒡ᙮

¹⁴ ᒦᑕᔥ ᐊᐊ ᐁᒐᓬ ᐅᐅ ᑳᐃᔑᒡ ᒋᐐᑕᒫᑫᐗᒃ ᐁᑭᑐᓂᒡ ᑳᒫᐗᒋ ᒪᔥᑲᐎᓰᓂᒡ ᑳᑎᐯᒋᑫᓂᒡ, ᐐᑫ ᓴ ᑯ ᓂᓵᑭᑑᓐ ᐁᑭᒋ ᓈᓈᑲᑕᐌᑕᒫᓐ ᑭᒋ ᐆᑌᓇ ᒉᕒᐆᓴᓬᐊᒻ ᑳᑎᐱᓇᐌᐎᓯᔮᓐ᙮

¹⁵ ᐐᑫ ᑕᔥ ᐐᓐ ᓂᓂᔥᑭᐃᑰᒃ ᐃᑭ ᑯᑕᒃ ᐁᑕᓶᐙᓇᑭᓯᐙᒡ ᐯᒫᑎᓯᐙᒡ ᐱᓵᓐ ᑳᑲᐯᔑᐙᒡ᙮ ᐊᒋᓇ ᓴ ᑕᔥ ᓂᑮ ᑆᑕᐎᑭᑖᔅ ᓂᐱᒫᑎᓰᒪᒃ ᐅᒋ, ᐃᑭ ᐄᑐᒃ ᑯᑕᒃ ᐸᑳᓐ ᐯᒫᑎᓯᐙᒡ ᐅᑎᔑᒋᑫᐎᓂᐙ ᓂᐱᒫᑎᓰᒪᒃ ᐌᒋ ᑲᒀᑕᑭᑑᐙᒡ᙮

¹⁶ ᒦᑕᔥ ᒋᐱᑮᐌᓄᑕᒫᓐ ᐃᐃ ᑭᒋ ᐆᑌᓇ ᒉᕒᐆᓴᓬᐊᒻ ᒋᐱ ᑰᐹᓯᓇᒫᓐ᙮ ᓂᑭᒋ ᐊᓇᒥᐁᐎᑲᒥᑯᒻ ᑲᔦ ᑕᑮᐌ ᐅᔑᒋᑳᑌ, ᐃᐃ ᑲᔦ ᑭᒋ ᐆᑌᓇ ᑕᐗᐌᔑᒋᑳᑌ, ᐃᑭᑐ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ᙮

¹⁷ ᒦᑕᔥ ᐅᐅ ᑳᐊᓂᐃᔑᒡ ᐊᐊ ᐁᒐᓬ ᐊᐗᔑᒣ ᒋᐊᓂ ᐃᑭᑐᐗᒃ, ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ ᐃᑭᑐ ᑲᑭᓇ ᓴ ᐅᑑᑌᓈᒪᓐ ᒋᑮᐌ ᒥᓄᓭᓂᑭᓐ, ᐁᐐ ᑮᐌ ᐐᒋᑑᒡ ᒉᕒᐆᓴᓬᐊᒻ, ᑲᔦ ᑕᔥ ᐁᐐᐃᑕᕽ ᐁᑎᐱᓇᐌᐎᓯᒡ᙮

ᐁᔥᑲᓇᐞ ᓭᑲᕒᐋᔭ ᑮᐙᐸᒫᒡ

¹⁸ ᐃᔥᐱᒥᕽ ᐃᑕᔥ ᐁᐃᓈᐱᔮᓐ, ᓃᐎᓐ ᐱᔑᑮᐎ ᐁᔥᑲᓇᒃ ᓂᑮ ᐙᐸᒫᒃ᙮

¹⁹ ᒦᔥ ᑳᐃᔑ ᑲᑴᒋᒪᒃ ᐁᒐᓬ ᑳᑲᑲᓅᔑᒡ, ᐋᓃᓐ ᐃᑕᔥ ᐅᑯ ᐁᓍᓱᐙᒡ? ᐅᐅ ᑕᔥ ᓂᑮ ᐃᔑ ᓇᑴᑖᒃ, ᒦ ᓴ ᐃ ᐁᓍᓱᐙᒡ ᐅᑯ ᐁᔥᑲᓇᒃ ᒦ ᐃᒫ ᑳᑮ ᐅᒋ ᒥᓯᑌᔥᑳᐙᒡ ᐯᒫᑎᓯᐙᒡ ᒎᑕ ᐊᑮᕽ ᐌᒌᐙᒡ, ᐌᒌᐙᒡ ᑲᔦ ᐃᔅᕒᐃᔭᓬ ᐊᑮᕽ, ᐃᐃᒫ ᑲᔦ ᒉᕒᐆᓴᓬᐊᒻ ᑭᒋ ᐆᑌᓈᕽ᙮

²⁰ ᑳᑎᐯᒋᑫᒡ ᐃᑕᔥ ᓂᑮ ᐙᐸᑕᐃᒃ ᓃᐎᓐ ᐊᓄᑮᐎᓂᓂᐗᐞ ᐁᑕᑯᓇᒥᓂᒡ ᐸᑭᑌᐃᑲᓀᓴᓐ᙮

²¹ ᒦᑕᔥ ᑳᐃᓇᒃ, ᐋᓃᓐ ᐃᑕᔥ ᐐᓇᐙ ᐗᐃᔑᒋᑫᐙᒡ? ᒦᔥ ᑳᐃᔑ ᓇᑴᑕᐎᒡ, ᒦ ᓴ ᐃ ᐌᒋ ᐲᔖᐙᒡ ᐁᐐ ᓭᑭᐋᐙᒡ, ᐁᐐ ᔖᑰᒋᐋᐙᒡ ᑲᔦ ᐁᑕᓶᐙᓇᑭᓯᓂᒡ ᐊᐎᔭᐞ ᑳᑮᐅᒋ ᒫᔑᓭᓂᒃ ᒎᑕ ᐊᑭ, ᑳᒥᓯᑌᔮᒧᑮᓂᒡ ᑲᔦ ᐯᒫᑎᓯᓂᒡ ᐃᐃᒫ ᐌᒌᓂᒡ᙮