ᑲᑮᑖᐎᑮᔗᐎᓇᓐ 8 - ᐅᒋᐺ ᑭᒋᒪᓯᓇᐃᑲᓐᐁᑭᒋ ᐃᓀᒋᑳᑌᒃ ᑲᑮᑖᐌᑕᒧᐎᓐ 1 ᐊᑐᑕᒧᒃ, ᑲᑮᑖᐌᑕᒧᐎᓐ ᐅᔕ ᐊᑐᒥᐌᒪᑲᓐ! ᓂᓯᑐᑕᒧᐎᓐ ᐅᔕ ᑲᔦ ᑮᑭᑑᒪᑲᓐ᙮ 2 ᐃᐃᒫ ᓴ ᐃᔑ ᓃᐸᐎᒪᑲᓐ ᑳᔑ ᐸᐲᑾᑎᓈᒃ ᒐᒌᑭᑲᓈᕽ, ᑳᔑ ᒫᒪᑖᒦᒧᑭᓐ ᒦᑲᓇᐗᓐ ᑲᔦ᙮ 3 ᐃᐃᒫ ᑲᔦ ᑳᔑ ᐃᔥᒀᑌᒥᐗᓂᓂᒃ ᑭᒋ ᐆᑌᓈᕽ ᑳᐅᒋ ᐲᑎᑫᐎᓐᒡ ᐃᔑ ᓃᐸᐎᒪᑲᓐ ᐅᐅ ᐁᐃᑭᑑᒪᑲᒃ, 4 ᑭᑲᓅᓂᓂᓂᒻ ᑮᓇᐙ ᑳᐃᓂᓃᐎᔦᒃ, ᑲᑭᓇ ᓴ ᑯ ᐯᒫᑎᓯᔦᒃ ᑭᓇᑐᒥᓂᓂᒻ᙮ 5 ᑮᓇᐙ ᓴ ᑳᐁᔖᐙᑎᓯᓯᐌᒃ ᑕᑲ ᑲᑴ ᐅᑎᓇᒧᒃ ᑲᑮᑖᐌᑕᒧᐎᓐ, ᑮᓇᐙ ᑲᔦ ᑳᑲᑮᐹᑎᓯᔦᒃ ᑕᑲ ᑲᑴ ᐅᑎᓇᒧᒃ ᓂᓯᑐᑕᒧᐎᓐ᙮ 6 ᐱᓯᑕᐎᔑᒃ, ᑫᑰᓐ ᐋᓃᔥ ᐊᐲᑌᑖᑾᓐ ᑳᐃᓂᓇᑰᒃ, ᑾᔭᑴᑖᑾᓐ ᑲᔦ ᑳᐃᓂᓇᑰᒃ᙮ 7 ᑳᐃᓂᓇᑰᒃ ᐅᔕ ᑌᐺᐎᓂᐗᓐ; ᓂᔒᑫᑖᓇᓐ ᐄᑐᒃ ᐐᓐ ᑮᐗᓂᒧᐎᓇᓐ᙮ 8 ᑲᑭᓇ ᓴ ᑳᐃᓂᓇᑰᒃ ᑌᐺᒪᑲᓅᓐ, ᑳᐐᓐ ᐊᐙᒡ ᐃᑯ ᐗᐙᓀᑖᑾᓯᓅᓇᓐ, ᑳᐐᓐ ᑲᔦ ᐗᓂᐎᔑᐌᒪᑲᓯᓅᓇᓐ᙮ 9 ᐃᑭ ᓴ ᑳᐅᓂᓯᑐᑕᒧᐎᓂᐙᒡ ᐐᑫ ᐅᑾᔭᑴᑖᓈᐙ ᐁᑭᑐᐗᒃ, ᐃᑭ ᓴ ᑳᐅᑭᑫᑕᒫᐎᓂᐙᒡ ᐐᓐ ᐅᐯᑌᑖᓈᐙ᙮ 10 ᐅᑖᐱᓇᓐ ᑳᔑ ᑭᑭᓄᐊᒫᑫᔮᓐ ᐊᐲᒡ ᐐᓐ ᐊᐊ ᐙᐹᐱᑯ ᔔᓂᔮ ᐙᐱᒃ, ᑭᑫᑕᒫᐎᓐ ᑲᔦ ᐅᓀᑕᓐ ᐊᐲᒡ ᐐᓐ ᐊᐊ ᐅᓵᐎ ᔔᓂᔮ ᐙᐱᒃ᙮ 11 ᑲᑮᑖᐌᑕᒧᐎᓐ ᐅᔕ ᓇᐗᒡ ᑭᒋ ᐃᓇᑭᑌ ᐊᐲᒡ ᐐᓐ ᐊᐊ ᒥᔅᒀᐱᑲᓯᓐ ᐅᕒᐆᐱ Ruby ᑳᐃᓂᓐᒡ, ᑳᐐᓐ ᑕᔥ ᑫᑰᓐ ᑳᒥᓴᐌᑕᒪᓐ ᐃᐃ ᐊᐲᑌᑖᑾᓯᓅᓐ᙮ 12 ᓃᓐ ᐅᔕ ᑲᑮᑖᐌᑕᒧᐎᓐ, ᓂᑕᔮᓐ ᓂᓯᑕᐌᑕᒧᐎᓐ, ᓂᑕᔮᓐ ᑲᔦ ᑭᑫᑕᒫᐎᓐ, ᑳᐅᒋ ᓂᓯᑕᐎᓂᑳᑌᒃ ᑫᑰᓐ ᑳᐅᓂᔑᔑᒃ, ᑳᒫᓈᑕᒃ ᑲᔦ᙮ 13 ᑮᑯᑖᓀᓂᒥᓐᒡ ᐅᔕ ᑳᑎᐯᒋᑫᒡ ᒦ ᐃ ᐁᔒᑫᒋᑳᑌᒃ ᒪᒋᑫᑰᓐ; ᒦᐗᓐ ᓴ ᐅᓄ ᑳᔒᑫᑕᒫᓐ: ᐃᔥᐯᓂᑎᓱᐎᓐ, ᑭᒋ ᐃᓀᓂᑎᓱᐎᓐ, ᒪᒋᐃᔑᐌᐱᓯᐎᓐ, ᓅᒋᑯ ᐃᑭᑐᐎᓐ ᑲᔦ᙮ 14 ᓃᓐ ᓴ ᓂᑎᐯᑖᓐ ᐌᐌᓂ ᐊᐎᔭᒃ ᑳᔑ ᑲᓅᓂᑣ ᐋᓃᓐ ᑫᐃᔑᒋᑫᐙᒡ, ᑾᔭᒃ ᑲᔦ ᐃᓈᑯᓂᑫᐎᓐ, ᓂᑕᔮᓐ ᑲᔦ ᓂᓯᑐᑕᒧᐎᓐ, ᒪᔥᑲᐎᓰᐎᓐ ᑲᔦ᙮ 15 ᓃᓐ ᐅᔕ ᑭᒋᐅᑭᒫᒃ ᑳᐅᒋ ᐅᑭᒫᑲᑖᑫᐙᒡ, ᐃᑭ ᑲᔦ ᑌᐯᓂᒥᐌᐙᒡ ᑾᔭᒃ ᑳᐅᒋ ᐃᓇᑑᐙᒡ ᐃᓈᑯᓂᑫᐎᓇᓐ᙮ 16 ᓃᓐ ᑲᔦ ᑳᐅᒋ ᑲᔥᑭᑑᐙᒡ ᒋᑎᐯᒋᑫᐙᒡ ᐅᐅᒫ ᐊᑮᕽ ᐃᑭ ᑳᐅᑭᒫᐎᐙᒡ, ᐃᑭ ᑲᔦ ᑳᓂ ᐋᓂᑫᐎᑭᒫᐎᐙᒡ᙮ 17 ᓂᓵᑭᐋᒃ ᓴ ᐃᑭ ᑳᓵᑭᐃᐙᒡ, ᐃᑭ ᑲᔦ ᐌᓂᓂ ᑳᓇᓈᑐᓀᐅᐙᒡ ᓂᑲ ᒥᑳᑰᒃ᙮ 18 ᓂᑕᔮᓇᓐ ᓴ ᐌᓅᑎᓯᐎᓇᓐ, ᑭᑌᑖᑯᓯᐃᐌᐎᓐ ᑲᔦ ᑫᒦᑭᐌᔮᓐ, ᑳᐴᓂᓭᓯᓄᒃ ᑲᔦ ᐌᓅᑎᓯᐎᓐ, ᐃᐃ ᑲᔦ ᒥᓄᓭᐎᓐ᙮ 19 ᐃᐃ ᓴ ᑫᒦᓂᓈᓐ ᓇᐗᒡ ᐅᓂᔑᔑᓐ ᐊᐲᒡ ᐐᓐ ᐊᐊ ᑳᐅᓂᔑᔑᒡ ᐅᓵᐎ ᔔᓂᔮ ᐙᐱᒃ, ᐊᐊ ᑲᔦ ᑳᒫᐗᒋ ᒥᓄᓈᑯᓯᒡ ᐙᐹᐱᑯ ᔔᓂᔮ ᐙᐱᒃ᙮ 20 ᑾᔭᒀᑎᓯᐎᓂᕽ ᓴ ᓂᑎᔑ ᐱᒫᑎᔅ, ᐌᐌᓂ ᑲᔦ ᓂᐱᒥᓂᔕᐋᓐ ᐃᐃ ᐃᓈᑯᓂᑫᐎᓐ᙮ 21 ᓂᒦᓈᒃ ᑲᔦ ᐃᑭ ᑳᓵᑭᐃᐙᒡ ᒋᐌᓅᑎᓯᐙᒡ, ᐌᓅᒋ ᑫᑰᓇᓐ ᑲᔦ ᓂᑲ ᒪᒨᔥᑭᓇᑖᐙᓇᓐ ᐅᐙᑳᐃᑲᓂᐙᕽ᙮ 22 ᒦᑕᔥ ᐁᓂ ᐃᑭᑑᒪᑲᒃ ᑲᑮᑖᐌᑕᒧᐎᓐ, ᑳᑎᐯᒋᑫᒡ ᐅᔕ ᓃᓐ ᒫᐗᒡ ᓂᑕᒻ ᓂᑮ ᐅᔑᐃᒃ ᒣᐎᔕ ᒋᑆ ᐊᔮᓂᑭᓐ ᐅᑎᔑ ᒫᒌᐎᓇᓐ᙮ 23 ᐌᑎ ᓴ ᓀᐱᒡ ᐅᑖᓈᕽ ᑭᒋ ᒣᐎᔕ ᐋᔕ ᓃᓐ ᓂᑮ ᐅᓇᓯᑰ, ᓃᓐ ᒫᐗᒡ ᐃᑯ ᓂᑕᒻ ᒋᑆ ᐊᔮᒃ ᐊᑭ᙮ 24 ᒋᑆ ᐊᔮᑭᓐ ᑭᒋᑲᒦᓐ, ᒋᑆ ᐱᒥᒋᐗᑭᓐ ᑲᔦ ᒨᑭᒋᐗᓂᐲᓐ ᐋᔕ ᓃᓐ ᓂᑮ ᐊᔮ᙮ 25 ᒋᑆ ᐅᓇᒋᑳᑌᑭᓐ ᑭᒋ ᐗᒌᓐ, ᑳᐸᐲᑾᑎᓈᑭᓐ ᑲᔦ ᐋᔕ ᓃᓐ ᓂᑮ ᐊᔮ᙮ 26 ᑭᔐᒪᓂᑑ ᑲᔦ ᒋᑆ ᐅᔑᑑᒡ ᐊᑮᓂ, ᑳᔑ ᐸᐸᔥᒀᓂᒃ ᑲᔦ, ᒋᑆ ᐊᔮᓂᒃ ᑲᔦ ᑳᐹᔥᑭᓀᑲᒥᑭᓭᓂᒃ, ᐋᔕ ᓃᓐ ᓂᑮ ᐊᔮ᙮ 27 ᐋᔕ ᓃᓐ ᓂᑮ ᐊᔮ ᑮᐅᓇᑑᒡ ᑮᔑᑰᓂ ᐌᑎ ᐃᔥᐱᒥᕽ, ᑮᑭᑭᓇᐙᒋᑑᒡ ᑲᔦ ᑫᐊᑯ ᑌᐱᓈᑾᓂᓂᒃ ᐌᑎ ᓇᑫ ᑭᒋᑲᒦᕽ᙮ 28 ᑮᐅᓇᑰᑑᒡ ᑲᔦ ᐗᑸᓐ ᐃᔥᐱᒥᕽ, ᑮᐅᔑᓯᑑᒡ ᑲᔦ ᑫᐅᒋᒋᐗᓂᓂᒃ ᓂᐲᓂ ᐋᔕ ᓃᓐ ᓂᑮ ᐊᔮ᙮ 29 ᐊᐲ ᓴ ᑲᔦ ᑮᑲᓅᑕᕽ ᑭᒋᑲᒻ ᐋᓃᓐ ᒥᓂᒃ ᑫᐊᑯᓂᐲᑳᓂᒃ, ᑮᐅᓇᑑᒡ ᑲᔦ ᐊᑮᓂ ᑳᔑ ᐊᑌᓂᒃ ᐋᔕ ᓃᓐ ᓂᑮ ᐊᔮ ᐃᐃ ᐊᐲ᙮ 30 ᓃᓐ ᓴ ᑲᔦ ᓂᑮ ᐐᒌᐙ ᐁᑮ ᐐᒋᐊᒃ ᑮᐅᓈᐸᑕᕽ ᑫᐃᔑᑑᒡ ᐊᑮᓂ᙮ ᑮᒥᓉᑕᒻ ᓴ ᐁᑕᓱ ᑮᔑᒃ, ᒨᔕᒃ ᐃᑯ ᐁᑮ ᒌᑫᑕᒧᐗᒃ ᐁᑮ ᐊᔮᐗᒃ ᐁᔑᐊᔮᒡ᙮ 31 ᓂᑮ ᒥᓍᐸᑖᓐ ᐅᐅ ᐊᑭ, ᐁᑮ ᒥᓍᐸᒪᒀ ᑲᔦ ᐯᒫᑎᓯᐙᒡ ᐅᐅᒫ ᐊᑮᕽ᙮ 32 ᓂᑯᓯᓴᒃ, ᑕᑲ ᑕᔥ ᓅᑯᒻ ᐱᓯᑕᐎᔑᒃ; ᐋᐱᒋ ᓴ ᑕᔕᐌᑖᑯᓯᐗᒃ ᐃᑭ ᑳᑑᑕᒧᐙᒡ ᑳᔑ ᐊᑕᐌᑕᒧᐗᒃ᙮ 33 ᐱᓯᑕᒧᒃ ᑳᔑ ᑭᑭᓄᐊᒪᐎᓇᑰᒃ, ᑲᑮᑖᐌᑕᒧᒃ ᑲᔦ, ᑫᑯ ᐋᓇᐌᑕᑫᒃ᙮ 34 ᐋᐱᒋ ᓴ ᑕᔕᐌᑖᑯᓯ ᐊᐊ ᑳᐱᓯᑕᐎᒡ; ᑳᓂᑖ ᐊᔮᒡ ᓂᑎᔥᒀᑌᒥᕽ, ᑳᐲᐅᒡ ᑲᔦ ᐁᓂᔑ ᐲᑎᑫᕽ ᓂᐙᑳᐃᑲᓂᕽ᙮ 35 ᐊᐌᓀᓐ ᓴ ᐱᑯ ᑫᒥᑲᐎᒡ ᐅᒥᑳᓐ ᑫᐅᒋ ᐱᒫᑎᓯᒡ, ᑳᑎᐯᒋᑫᓂᒡ ᓴ ᑲᔦ ᐅᑲ ᒥᓍᐸᒥᑰᓐ᙮ 36 ᐊᐌᓀᓐ ᑕᔥ ᐃᑯ ᑳᒥᑲᐎᓯᒃ, ᒦ ᓴ ᐊᐌ ᑳᐐᓴᑫᑕᒧᐃᑎᓱᒡ; ᐊᐌᓀᓐ ᑕᔥ ᐃᑯ ᑳᔒᑫᓂᒥᒡ, ᒦ ᓴ ᐊᐌ ᑳᓵᑭᑑᒡ ᓂᐳᐎᓐ! ᐃᑭᑑᒪᑲᓐ ᑲᑮᑖᐌᑕᒧᐎᓐ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society