ᑲᑮᑖᐎᑮᔗᐎᓇᓐ 4 - ᐅᒋᐺ ᑭᒋᒪᓯᓇᐃᑲᓐᐁᔑᐐᒋᐃᐌᒪᑲᒃ ᑲᑮᑖᐌᑕᒧᐎᓐ 1 ᓂᑯᓯᓴᒃ, ᐱᓯᑕᒧᒃ ᐋᓃᓐ ᐁᔑ ᑭᑭᓄᐊᒪᐎᓀᒃ ᑭᑌᑌᐙ᙮ ᐌᐌᓂ ᐱᓯᑕᒧᒃ, ᒦᔥ ᒋᑌᐱᓇᒣᒃ ᓂᓯᑐᑕᒧᐎᓐ᙮ 2 ᐅᓂᔑᔑᓐ ᐅᔕ ᐁᔑ ᑭᑭᓄᐊᒪᐎᓇᑰᒃ, ᑲᓇᐎ ᒫᒥᑲᐎᒃ ᐁᔑ ᑭᑭᓄᐊᒪᐎᓇᑰᒃ᙮ 3 ᒣᒀ ᑕᔥ ᓃᓐ ᐁᑸᐎᓭᓯᐎᔮᓐ ᓂᑌᑌ ᐅᑖᐎᓂᕽ, ᓃᓐ ᐁᑕ ᓂᒫᒫ ᐁᑮ ᐊᔮᐎᒡ, 4 ᓂᑌᑌ ᓴ ᓂᑮ ᑭᑭᓄᐊᒫᒃ ᐁᑮ ᐃᑭᑐᒡ, ᑲᓇᐎ ᒫᒥᑲᐎᓐ ᑲᑭᓇ ᑳᔑ ᑲᑲᓅᓂᓈᓐ, ᑲᓇᐌᑕᓐ ᐁᓂᓈᓐ ᒋᐅᒋ ᐱᒫᑎᓯᔭᓐ᙮ 5 ᑌᐱᓇᓐ ᑲᑮᑖᐌᑕᒧᐎᓐ, ᓂᓯᑐᑕᒧᐎᓐ ᑲᔦ᙮ ᑫᑯ ᓇᑲᑕᑫᓐ ᑳᔑ ᑲᑲᓅᓂᓈᓐ, ᑫᑯ ᑲᔦ ᐸᑫᓄᑕᑫᓐ᙮ 6 ᑫᑯ ᑕᔥ ᓇᑲᑕᑫᓐ ᑲᑮᑖᐌᑕᒧᐎᓐ, ᑭᑲ ᓈᑕᒫᑯᓐ ᐅᔕ᙮ ᓵᑭᑑᓐ, ᐌᐌᓂ ᑕᔥ ᑭᑲ ᓈᓈᑲᒋᐃᑯᓐ᙮ 7 ᑲᑮᑖᐌᑕᒧᐎᓐ ᐅᔕ ᒫᐗᒡ ᑭᒋ ᐃᓀᑖᑾᓐ, ᒦᔥ ᐌᒋ ᐃᓂᓈᓐ ᒋᑌᐱᓇᒪᓐ ᑲᑮᑖᐌᑕᒧᐎᓐ᙮ ᒥᓴᐙ ᑯ ᑲᑭᓇ ᑫᑰᓐ ᐁᑌᐱᓇᒪᓐ, ᔖᑰᒡ ᐃᑕᔥ ᑌᐱᓇᓐ ᑲᑮᑖᐌᑕᒧᐎᓐ᙮ 8 ᑭᒋ ᐃᓀᑕᓐ ᒋᒥᒋᒥᓇᒪᓐ ᑲᑮᑖᐌᑕᒧᐎᓐ, ᒦᑕᔥ ᐃᐃᒫ ᑫᐅᒋ ᑭᑌᑖᑯᓯᔭᓐ᙮ 9 ᒦᑕᔥ ᐃᐃᒫ ᑲᑮᑖᐌᑕᒧᐎᓂᕽ ᑫᐅᒋ ᒥᓄᓈᑯᓯᔭᓐ, ᒋᒦᓂᑰᐎᓯᔭᓐ ᐅᑭᒫᐙᓄᒀᓐ ᑫᒥᓄᓈᑯᔥᑳᑯᔭᓐ᙮ 10 ᓂᑯᓯᔅ, ᐌᐌᓂ ᐱᓯᑕᐎᔑᓐ ᑳᔑ ᑲᑲᓅᓂᓈᓐ, ᑭᓉᔥ ᐃᑕᔥ ᑭᑲ ᐱᒫᑎᔅ᙮ 11 ᑭᑭᑭᓄᐊᒪᐎᓐ ᒋᑲᑮᑖᐌᑕᒪᓐ, ᐁᐃᔑ ᑭᑭᓄᐎᓂᓈᓐ ᑾᔭᒃ ᒋᔑ ᐱᒫᑎᓯᔭᓐ᙮ 12 ᑳᐐᓐ ᐃᑕᔥ ᑫᑰᓐ ᑭᑲ ᑭᐱᔥᑳᑯᓰᓐ ᐱᒧᓭᔭᓐ, ᑳᐐᓐ ᑲᔦ ᑭᑲ ᐱᓱᑫᔑᓰ ᐱᒥᐸᑑᔭᓐ᙮ 13 ᒥᒋᒥᓇᓐ ᐁᔑ ᑭᑭᓄᐊᒫᑰᔭᓐ, ᑫᑯ ᐸᑭᑎᓇᑫᓐ, ᑲᓇᐌᑕᓐ, ᒦ ᐄᑐᒃ ᐃᐃ ᑭᐱᒫᑎᓯᐎᓐ᙮ 14 ᑫᑯ ᐐᓐ ᐃᔖᑫᓐ ᐁᔖᐙᒡ ᐅᒪᒑᑎᓰᒃ, ᑫᑯ ᐃᔑᒋᑫᑫᓐ ᐋᓃᓐ ᐁᔑᒋᑫᐙᒡ᙮ 15 ᑫᑯ ᐃᐃ ᐃᔑᒋᑫᑫᓐ, ᓇᑳᔦᑕᓐ ᒪᒋᑫᑰᓐ, ᑫᑯ ᐃᐃᒫ ᐃᔑ ᐱᒧᓭᑫᓐ᙮ 16 ᑳᐐᓐ ᐅᑲᔥᑭᑑᓰᓈᐙ ᒋᓂᐹᐙᒡ, ᐹᓂᒫ ᑮᐃᔥᒀ ᒪᒋᑑᑕᒧᐙᒡ᙮ ᑳᐐᓐ ᐅᒋᑕ ᓂᐹᓰᐗᒃ ᐁᐊᑲᐙᑑᐙᒡ ᐁᐐ ᒫᔑᑑᑕᐙᐙᒡ ᐊᐎᔭᐞ᙮ 17 ᐸᑴᔑᑲᓂᕽ ᐃᓴ ᐅᑎᓀᑖᓈᐙ ᒪᒋᐃᔑᐌᐱᓯᐎᓐ ᑲᔦ ᒥᓂᑴᐎᓂᕽ ᐅᑎᓀᑖᓈᐙ ᐊᒀᑎᓯᐎᓐ᙮ 18 ᐃᐃ ᓴ ᒦᑲᓇ ᐯᒪᐊᑑᐙᒡ ᐅᑾᔭᒀᑎᓰᒃ ᒦ ᐃ ᐁᔑᓈᑾᓂᓂᒃ ᑖᐱᔥᑰ ᑳᐲᑖᐸᕽ, ᐁᐊᓂ ᐙᓭᔮᒃ, ᐲᓂᔥ ᐁᐊᓂ ᒨᔥᑭᓀ ᑮᔑᑲᒃ᙮ 19 ᐃᐃᐌᓂ ᑕᔥ ᐐᓐ ᒦᑲᓇ ᐯᒪᐊᑑᐙᒡ ᐅᒪᒑᑎᓰᒃ, ᒦ ᐃ ᐁᔑᓈᑾᓂᓂᒃ ᐁᑲᔥᑮᑎᐱᑲᓂᓂᒃ᙮ ᑳᐐᓐ ᐃᑕᔥ ᐅᑭᑫᑕᓰᓈᐙᓐ ᐌᑯᓀᓐ ᐌᒋ ᐱᓱᑫᔑᓄᐙᒡ᙮ 20 ᓂᑯᓯᔅ, ᐱᓯᑕᓐ ᐋᓃᓐ ᐁᔑ ᑲᑲᓅᓂᓈᓐ; ᐌᐌᓂ ᐱᑯ ᓅᑕᓐ ᐁᑭᑐᔮᓐ᙮ 21 ᑫᑯ ᐸᑭᑌᑕᑫᓐ ᑳᐃᓂᓈᓐ, ᑭᑌᐃᕽ ᐃᔑ ᑲᓇᐌᑕᓐ᙮ 22 ᒦ ᓴ ᐃᒫ ᐌᑎᓇᒧᐙᒡ ᐱᒫᑎᓯᐎᓐ ᐃᑭ ᑳᒥᑲᒧᐙᒡ᙮ ᒦ ᑲᔦ ᐃᒫ ᐌᒌᒪᑲᒃ ᒥᓄᐊᔮᐎᓐ᙮ 23 ᒫᐗᒡ ᐃᑕᔥ ᑭᑌᐃᕽ ᐃᔑ ᐊᔮᒀᒥᓯᓐ, ᒦ ᐄᑐᒃ ᐃᐃᒫ ᐌᒌᒃ ᐱᒫᑎᓯᐎᓐ᙮ 24 ᐌᐱᓇᓐ ᓅᒋᑯ ᐃᔑᑮᔗᐎᓇᓐ, ᑫᑯ ᐋᐸᒋᑑᑫᓐ ᑳᑌᐺᒪᑲᓯᓄᑭᓐ᙮ 25 ᓃᑳᓇᔭᐄ ᑾᔭᒃ ᐃᓇᑫ ᐃᓈᐱᓐ, ᑫᑯ ᐊᒋᑕᐎᑴᓂᑫᓐ ᒋᐊᑲᒋᔭᓐ᙮ 26 ᐁᔑ ᑕᑕᒀᒃ ᒦᑲᓈᕽ ᐃᔑ ᐱᒧᓭᓐ, ᐃᓂ ᐁᑕ ᒦᑲᓇᐗᓐ ᑳᐅᓇᒧᑭᓐ ᑭᑲ ᐱᒧᓵᑖᓇᓐ᙮ 27 ᑫᑯ ᐊᐙᒡ ᐸᑮ ᐊᔩᑕᐌᔭᐄ ᐃᔑ ᐸᑫᑫᓐ᙮ ᑫᑯ ᐃᔖᑫᓐ ᐁᔑ ᒪᒋᑑᑕᒧᓈᓂᐗᕽ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society