ᑲᑮᑖᐎᑮᔗᐎᓇᓐ 2 - ᐅᒋᐺ ᑭᒋᒪᓯᓇᐃᑲᓐᐁᔑᑎᐸᐃᑫᒪᑲᒃ ᑲᑮᑖᐌᑕᒧᐎᓐ 1 ᓂᑯᓯᔅ, ᑕᑲ ᑭᑫᑕᓐ ᐋᓃᓐ ᐁᔑ ᑭᑭᓄᐊᒪᐎᓈᓐ, ᒋᒫᐗᒋᑑᔭᓐ ᑲᔦ ᓂᑎᓈᑯᓂᑫᐎᓇᓐ ᑭᐱᒫᑎᓯᐎᓂᕽ᙮ 2 ᒋᐱᓯᑕᒪᓐ ᑲᔦ ᐁᔑᓯᕽ ᑲᑮᑖᐌᑕᒧᐎᓐ, ᑭᑌᐃᕽ ᐃᑕᔥ ᑲᔦ ᐅᒋ ᑲᑴ ᓂᓯᑐᑕᓐ᙮ 3 ᑲᑴᑗᓐ ᒋᒦᓂᑰᐎᓯᔭᓐ ᓂᓯᑐᑕᒧᐎᓐ, ᐃᐃ ᑲᔦ ᒋᒦᓂᑰᐎᓯᔭᓐ ᓂᓯᑕᐌᑕᒫᐎᓐ᙮ 4 ᐐᑫ ᓴ ᑯ ᑲᑴ ᒥᑲᓐ, ᑖᐱᔥᑰ ᑫᔑ ᑲᑴ ᒥᑲᐗᑎᐸᓐ ᐙᐹᐱᑯ ᔔᓂᔮ, ᑖᐱᔥᑰ ᑲᔦ ᑳᔑ ᓇᓈᑐᓀᐃᑳᑌᒃ ᑳᑳᒋᑳᑌᒃ ᐌᓅᑎᓯᐎᓐ᙮ 5 ᑮᔥᐱᓐ ᐃᑕᔥ ᐃᐃ ᐃᔑᒋᑫᔭᓐ, ᒦᔥ ᒋᑭᑫᑕᒪᓐ ᐌᑯᓀᓐ ᐃᐃ ᑳᐃᒋᑳᑌᒃ ᒋᑯᑖᓀᓂᒥᑎᐸᓐ ᑳᑎᐯᒋᑫᒡ᙮ ᒦᔥ ᑲᔦ ᒋᑭᑫᓂᒪᒡ ᑭᔐᒪᓂᑑ᙮ 6 ᑳᑎᐯᒋᑫᒡ ᐅᔕ ᑳᒦᑭᐌᒡ ᑲᑮᑖᐌᑕᒧᐎᓐ, ᐅᑎᑭᑐᐎᓂᕽ ᓴ ᐅᒌᓂ ᑭᑫᑕᒫᐎᓐ, ᓂᓯᑐᑕᒧᐎᓐ ᑲᔦ᙮ 7 ᐐᓐ ᐅᔕ ᑳᒫᐗᒋᑕᒪᐙᒡ ᒥᓄ ᑲᑮᑖᐌᑕᒧᐎᓐ ᑴᔭᒀᑎᓯᓂᒡ, ᐐᓐ ᑲᔦ ᑳᓈᑕᒪᐙᒡ ᐃᐃ ᐯᒫᑎᓯᓂᒡ ᑫᑰᓐ ᐁᔑ ᐊᓈᒣᑖᑯᓯᓯᓂᒃ᙮ 8 ᐅᑲᓇᐌᓂᒫᐞ ᑲᔦ ᐃᓇᑫ ᐁᔖᓂᒡ ᑴᔭᒀᑎᓯᓂᒡ, ᐅᓈᑕᒪᐙᐞ ᑲᔦ ᐃᓇᑫ ᐁᔖᓂᒡ ᐃᐃ ᐯᒫᑎᓯᓂᒡ ᐌᐌᓂ ᑳᑑᑖᑯᒡ᙮ 9 ᒦᑕᔥ ᐃᐃ ᒋᑭᑫᑕᒪᓐ ᑴᔭᑴᑖᑾᒃ, ᐌᐌᓂ ᑲᔦ ᐃᓈᑯᓂᑫᐎᓐ, ᐌᐌᓂ ᑲᔦ ᑑᑖᑎᐎᓐ, ᐁᑕᓯᕽ ᑲᔦ ᐋᓃᓐ ᑫᔑ ᒥᓄᒋᑫᔭᐸᓐ᙮ 10 ᒦᑕᔥ ᒋᐅᑎᓯᑯᔭᓐ ᑲᑮᑖᐌᑕᒧᐎᓐ ᑭᑌᐃᕽ, ᒦᔥ ᑲᔦ ᑭᑫᑕᒫᐎᓐ ᒋᒥᓄᔥᑳᑯᔭᓐ ᑭᐱᒫᑎᓯᐎᓂᕽ᙮ 11 ᓂᓯᑕᐌᑕᒧᐎᓐ ᓴ ᑭᑲ ᓈᑕᒫᑯᓐ, ᓂᓯᑐᑕᒧᐎᓐ ᑲᔦ ᑭᑲ ᑲᓇᐌᓂᒥᑯᓐ᙮ 12 ᒦᐗᓐ ᐃᓴ ᐃᓂ ᑫᑭᐱᔥᑳᑯᔭᓐ ᒋᐃᔑᒋᑫᐙᓯᐗᒡ ᓀᑖ ᐃᔑᒋᑫᐙᒡ ᐅᒪᒑᑎᓰᒃ, ᐃᑭ ᑲᔦ ᐯᒫᑎᓯᐙᒡ ᓅᒋᑯ ᑳᐃᔑᑮᔗᐙᒡ᙮ 13 ᒦᐗᒃ ᐄᑐᒃ ᐃᑭ ᑳᑮ ᓇᑲᑕᒧᐙᒡ ᑾᔭᒃ ᐱᒫᑎᓯᐎᓐ ᐁᐐ ᐃᔑ ᐱᒫᑎᓯᐙᒡ ᐃᓇᑫ ᑲᔥᑮᑎᐱᑲᓄᕽ᙮ 14 ᐅᓵᑭᑑᓈᐙ ᑲᔦ ᓅᒋ ᐁᐃᔑᒋᑫᐙᒡ, ᐅᒥᓉᑖᓈᐙ ᑲᔦ ᐁᒪᒋᒋᑫᐙᒡ᙮ 15 ᒦᐗᒃ ᓴ ᐅᑯ ᑎᓄ ᓅᒋᑯ ᑳᐃᔑᒋᑫᐙᒡ, ᐋᐱᒋ ᑲᔦ ᓂᑖ ᐗᔦᔑᒋᑫᐗᒃ᙮ 16 ᑮᓐ ᐃᑕᔥ ᑭᑲ ᐅᒋ ᑲᔥᑭᑑᓐ ᒋᑌᐺᑕᐙᓰᐗᒡ ᐊᐊ ᑎᓄ ᑳᐱᔑᒀᑎᓯᒡ ᐃᑴ ᑳᐃᔑ ᒥᓄᑖᑯᓯᒡ ᑮᐗᔦᔑᒥᐌᒡ᙮ 17 ᐊᐊ ᐃᑴ ᑳ ᓇᑲᓈᒡ ᐅᑑᔥᑭ ᐅᓈᐯᒪᓐ ᐁᑮ ᐗᓃᑫᒡ ᑳᑮ ᐃᔑ ᐊᔓᑕᒪᐙᐸᓐ ᐁᓈᓴᒦᓂᒡ ᐅᑭᔐᒪᓂᑑᒪᓐ᙮ 18 ᑮᔥᐱᓐ ᐃᔖᐗᒡ ᐅᐙᑳᐃᑲᓂᕽ ᑭᐱᒪᐊᑑ ᒦᑲᓇ ᑳᐃᓇᒧᕽ ᓂᐳᐎᓂᕽ᙮ ᐁᐃᔖᔭᓐ ᐃᐃᒫ ᐁᐊᓂ ᓈᓯᑲᒪᓐ ᑳᐃᔑᐊᔮᐙᒡ ᑳᓂᐳᐙᒡ᙮ 19 ᐊᐎᔭ ᑳᒪᐗᑎᓵᒡ ᑳᐐᓐ ᐐᑳ ᐱᑮᐌᓰ, ᑳᐐᓐ ᑲᔦ ᐐᑳ ᐱᑮᐌᔥᑳᓰ ᐃᐃᒫ ᐱᒫᑎᓰᐎᒦᑲᓇᕽ᙮ 20 ᒦᑕᔥ ᒋᐱᒧᓵᑕᒪᓐ ᑳᐃᔑ ᒥᓄᑑᑕᒧᐙᒡ ᒣᓍᑎᓯᐙᒡ ᐃᓂᓂᐗᒃ ᒦᔥ ᑾᔭᒃ ᒋᔑ ᐱᒫᑎᓯᔭᓐ᙮ 21 ᑳᑾᔭᒀᑎᓯᐙᒡ ᐃᓂᓂᐗᒃ ᑳᑫᒋᓇᐁᑖᑯᓯᐙᒡ ᐅᐅᒫ ᑕᐃᔑᑖᐗᒃ ᑭᑕᑮᒥᓈᓂᕽ᙮ 22 ᑭᔐᒪᓂᑑ ᓂᑯᒋ ᐅᑲ ᐃᔑᓂᔕᐙᓐ ᑳᑲᒀᓂᓴᑭᓯᓂᒡ ᐃᓂᓂᐗᓐᐞ, ᐅᑲ ᐅᒋ ᒪᓂᐱᓈᐞ ᑳᒪᒋᑑᑕᒥᓂᒡ ᐅᒫ ᑭᑕᑮᒥᓈᓂᕽ ᑖᐱᔥᑰ ᑫᑰᓐ ᑳᐸᑾᑕᑭᐱᒋᑳᑌᒃ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society