ᑲᑮᑖᐎᑮᔗᐎᓇᓐ 13 - ᐅᒋᐺ ᑭᒋᒪᓯᓇᐃᑲᓐᔂᓬᐊᒪᓐ ᐅᑲᑮᑖᐎᑮᔗᐎᓇᓐ 1 ᑫᑮᑖᐌᑕᕽ ᐅᑯᓯᓯᒫ ᓴ ᐅᐱᓯᑖᓐ ᐁᔑ ᑭᑭᓄᐊᒫᑯᒡ ᐅᑌᑌᓐ᙮ ᐊᐊ ᑕᔥ ᐐᓐ ᑫᑮᐹᑎᓯᒡ ᐅᒥᒋ ᒫᓀᑖᓐ ᑮᐅᒋᐋᑲᓂᐎᒡ᙮ 2 ᑳᓭᑳ ᐱᒫᑎᓯᐙᒡ ᓴ ᑕᔑ ᑎᐸᐊᒪᐙᐗᒃ ᐋᓃᓐ ᐁᑭᑐᐙᒡ, ᐃᑭ ᑕᔥ ᑫᐗᔦᔑᑖᑯᓯᐙᒡ ᐅᒥᓴᐌᑖᓈᐙ ᐲᑾᑲᒥᑭᓯᐎᓐ᙮ 3 ᐊᐎᔭ ᓴ ᑳᒪᓈ ᐃᑭᑐᒡ ᑫᑰᓐ ᐅᑲᓇᐌᑖᓐ ᐅᐱᒫᑎᓯᐎᓐ, ᐊᐎᔭ ᑕᔥ ᐐᓐ ᑫᑰᓐ ᑳᒪᓈᒋ ᐃᑭᑐᓯᒃ ᐅᑲ ᐅᑎᓯᑯᓐ ᑫᓂᔑᐗᓈᒋᐃᑯᒡ᙮ 4 ᑫᑎᒥᔥᑭᒡ ᓴ ᑫᑰᓐ ᐅᒥᓴᐌᑖᓐ, ᑳᐐᓐ ᐃᑕᔥ ᑫᑰᓐ ᐅᑲ ᑌᐱᓇᓰᓐ᙮ ᐊᐊ ᑕᔥ ᐐᓐ ᓀᑖ ᐗᓄᑮᒡ ᐅᑲ ᐌᓅᒋᑑᓐ ᐁᑕᐌᑕᕽ᙮ 5 ᑴᔭᒀᑎᓯᐙᒡ ᓴ ᐅᔒᑫᑖᓈᐙᓐ ᑮᐗᓂᒧᐎᓇᓐ, ᐃᑭ ᑕᔥ ᐐᓐ ᒣᒋᐃᔑᐌᐱᓯᐙᒡ ᐊᑲᑌᑖᑯᓯᐗᒃ, ᓅᒋᑯ ᑲᔦ ᐃᓀᑖᑯᓯᐗᒃ᙮ 6 ᑾᔭᒀᑎᓯᐎᓐ ᓴ ᐅᑲᓇᐌᓂᒥᑯᓐ ᐊᐎᔭ ᑫᑰᓐ ᑳᔑ ᐊᓈᒣᑖᑯᓯᓯᒃ, ᒪᒋᑫᑰᓐ ᐃᑕᔥ ᐐᓐ ᐅᔖᑰᒋᐃᑯᓐ ᐊᐊ ᒣᒑᑎᓯᒡ᙮ 7 ᐯᔑᒃ ᓴ ᐊᐎᔭ ᐌᓅᑎᓰᑳᓱ, ᐋᓇᐐᓐ ᐁᑭᑎᒫᑭᓯᒡ, ᑯᑕᒃ ᐃᑕᔥ ᐊᐎᔭ ᑭᑎᒫᑭᓰᑳᓱ, ᐋᓇᐐᓐ ᐁᐌᓅᑎᓯᒡ᙮ 8 ᑳᐌᓅᑎᓯᒡ ᓴ ᐅᑎᓈᐸᒋᐋᓐ ᐅᔔᓂᔮᒪᓐ ᒋᓈᑕᒫᑯᒡ, ᑫᑎᒫᑭᓯᒡ ᑕᔥ ᐐᓐ ᑳᐐᓐ ᐊᐎᔭᓐ ᐅᐸᐹᒥᒥᑯᓰᓐ᙮ 9 ᑴᔭᒀᑎᓯᐙᒡ ᓴ ᐃᔑᓈᑯᓯᐗᒃ ᑖᐱᔥᑰ ᐙᓴᑯᓀᒋᑲᓐ ᑳᐸᑲᑳᑌᒃ, ᒣᒋᐃᔑᐌᐱᓯᐙᒡ ᐃᑕᔥ ᐐᓐ ᑖᐱᔥᑰ ᐙᓴᑯᓀᒋᑲᓐ ᑳᓂ ᐋᑕᐌᒃ᙮ 10 ᑮᑭᒋ ᐃᓀᓂᑎᓱᓈᓂᐗᕽ ᓴ ᒦ ᐃᒫ ᐌᒌᒃ ᒫᔑ ᐐᒌᑎᐎᓐ, ᐃᑭ ᑕᔥ ᐐᓐ ᑳᓇᐃᑕᒧᐙᒡ ᒦᐗᒃ ᐃᑭ ᐁᔮᐙᒡ ᑲᑮᑖᐌᑕᒧᐎᓐ᙮ 11 ᐗᔦᔑᑖᑯᓯᐎᓂᕽ ᓴ ᐊᐎᔭ ᑳᐅᒋ ᐌᓅᑎᓯᒡ ᐊᒋᓇ ᐁᑕ ᑕᐌᓅᑎᓯ, ᐊᐊ ᑕᔥ ᐐᓐ ᐯᐸᑮ ᑳᑲᔥᑭᒋᑫᒡ ᑕᓂ ᐌᓅᑎᓯ᙮ 12 ᐊᐎᔭ ᓇᓇᔥ ᑳᐊᐯᓂᒧᓯᒃ, ᒦ ᐊᐌ ᑳᐲᑴᑕᒻ, ᐊᐎᔭ ᑕᔥ ᐐᓐ ᐁᔑᓭᓂᒃ ᐁᔑ ᒥᓴᐌᑕᕽ, ᒦ ᓴ ᑳᐃᔑᓈᑯᓯᒡ ᑖᐱᔥᑰ ᒥᑎᒃ ᑳᒥᓄᑭᒡ᙮ 13 ᐊᐎᔭ ᓴ ᑳᒫᓀᑕᕽ ᑭᑭᓄᐃᑫᐎᓐ ᒦ ᓴ ᐊᐌ ᑫᒫᔑᓭᒡ, ᐊᐊ ᑕᔥ ᐐᓐ ᑫᑌᑕᕽ ᒦ ᐊᐌ ᑫᒥᓄ ᑎᐸᐊᒪᐎᓐᒡ᙮ 14 ᐁᔑ ᑭᑭᓄᐃᑫᐙᒡ ᑫᑮᑖᐌᑕᒧᐙᒡ ᓴ ᐃᓀᑖᑾᓂᓂ ᑖᐱᔥᑰ ᐱᒫᑎᓯᐎᓐ ᑳᒨᑭᒋᐗᕽ, ᒦ ᓴ ᐃᒫ ᑫᐅᒋ ᐐᒋᐃᑰᐎᓯᒡ ᒋᑕᐸᓰᓄᑕᕽ ᐁᔑ ᓇᒀᔑᐌᒪᑲᓂᓂᒃ ᓂᐳᐎᓐ᙮ 15 ᐊᐎᔭ ᓴ ᑳᐅᓂᓯᑐᑕᒧᐎᓂᒡ ᐅᑲ ᑲᔥᑭᑑᓐ ᒥᓍᐸᒥᑰᐎᓐ, ᐊᐊ ᑕᔥ ᐐᓐ ᑳᑌᐺᔦᑖᑯᓯᓯᒃ ᓴᓇᑲᓂᓂ ᐅᐱᒫᑎᓯᐎᓐ᙮ 16 ᐁᑕᓱᐯᔑᑯᐙᒡ ᓴ ᑫᑮᑖᐎᓯᐙᒡ ᐅᑭᑫᑖᓈᐙ ᐁᔑᒋᑫᐙᒡ, ᑫᑮᐹᑎᓯᒡ ᐃᑕᔥ ᐐᓐ ᐅᓈᑯᑑᓐ ᐅᑲᑮᐹᑎᓯᐎᓐ᙮ 17 ᓅᒋᑯ ᓴ ᑳᐸᐹ ᐃᓈᒋᒧᒡ ᐅᑑᒻᐺᓈᓐ ᒫᔑᓭᐎᓐ, ᐊᐊ ᑕᔥ ᐐᓐ ᑳᑌᐺᔦᑖᑯᓯᒡ ᐅᑲ ᐲᑑᓐ ᑫᐅᒋ ᒥᓄᓭᕽ᙮ 18 ᐊᐎᔭ ᓴ ᑫᐋᓇᐌᑕᕽ ᐁᔑ ᑭᑭᓄᐊᒪᐎᓐᒡ ᐅᑲ ᐅᑎᓯᑰᓐ ᑭᑎᒫᑭᓭᐎᓐ, ᐊᑲᑌᑖᑯᓯᐎᓐ ᑲᔦ, ᐊᐊ ᑕᔥ ᐐᓐ ᐯᓯᑕᕽ ᐁᔑᑭᑭᓄᐊᒪᐎᓐᒡ ᑕᑭᑌᓂᒫ᙮ 19 ᐋᐱᒋ ᓴ ᐊᐎᔭ ᑕᑌᐱᓇᐌᐗᑫᑕᒻ ᐅᐱᒫᑎᓯᐎᓂᕽ ᑮᑌᐱᓇᕽ ᐁᔑ ᐊᑕᐌᑕᕽ, ᑫᑮᐹᑎᓯᐙᒡ ᐃᑕᔥ ᐐᓐ ᑳᐐᓐ ᐃᓀᑕᓰᐗᒃ ᒋᐴᓂᑑᐙᐸᓐ ᒪᒋᑫᑰᓐ᙮ 20 ᐊᐎᔭ ᓴ ᑫᐐᒌᐙᒡ ᑫᑮᑖᐌᑕᒥᓂᒡ ᑕᓂ ᑲᑮᑖᐌᑕᒻ, ᐊᐎᔭ ᑕᔥ ᑫᐐᒌᐙᒡ ᑫᑮᐹᑎᓯᓂᒡ ᑕᓂᔑᐗᓈᒋᐃᑎᓱ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society