ᑲᑮᑖᐎᑮᔗᐎᓇᓐ 12 - ᐅᒋᐺ ᑭᒋᒪᓯᓇᐃᑲᓐ1 ᐊᐌᓀᓐ ᐃᓴ ᑯ ᑳᓵᑭᑑᒡ ᑭᑫᑕᒫᐎᓐ ᐅᓇᑕᐌᑖᓐ ᒋᐐᑕᒪᐎᓐᒡ ᑮᒪᒫᔒᒡ᙮ ᑲᑮᐹᑌᑖᑾᓐ ᐄᑐᒃ ᐊᐎᔭ ᑮᐊᑕᐌᑕᓯᒃ ᒋᐐᑕᒪᐎᓐᒡ ᑮᒪᒫᔒᒡ᙮ 2 ᑳᑎᐯᒋᑫᒡ ᐃᓴ ᐅᒥᓍᐸᒫᐞ ᑾᔭᒃ ᐯᒫᑎᓯᓂᒡ, ᐃᐃ ᑕᔥ ᐐᓐ ᓅᒋᑯ ᐗᐃᔑᒋᑫᒡ ᐅᑎᓇᑭᒫᐞ ᒋᓂᐳᓂᒡ᙮ 3 ᐃᓂᓂ ᓴ ᑳᐐᓐ ᑕᐅᒋ ᑮᔑᑳᐸᐎᓰ ᒪᒋᐃᔑᐌᐱᓯᐎᓂᕽ, ᐊᐊ ᑕᔥ ᑾᔭᒃ ᐁᔑ ᐱᒫᑎᓯᒡ ᑕᒪᔥᑲᐎᑳᐸᐎ᙮ 4 ᑾᔭᒃ ᐁᓈᑎᓯᒡ ᐐᐎᒫ ᓴ ᑎᓄᐎ ᑖᐱᔥᑰ ᑭᒋᐅᑭᒫᐙᓄᒀᓂᕽ ᐌᒋ ᒥᓉᑕᒥᓂᒡ ᐅᓈᐯᒪᓐ᙮ ᐊᐊ ᑕᔥ ᐐᐎᒫ ᑳᐊᑲᒋᐋᒡ ᐅᓈᐯᒪᓐ ᒦ ᐃ ᐁᓀᑖᑯᓯᒡ ᑖᐱᔥᑰ ᐅᑲᓂ ᐋᑯᓯᐎᓐ᙮ 5 ᐁᓀᑕᒧᐙᒡ ᐃᓴ ᑴᔭᒀᑎᓯᐙᒡ ᑫᑰᓐ ᑕᐅᒋ ᒥᓄᓭᓂ, ᐃᑭ ᑕᔥ ᒣᒑᑎᓯᐙᒡ ᐁᔑ ᐐᑕᒫᑫᐙᒡ ᐐᐅᒋ ᐗᔦᔑᑖᑯᓯᐗᒃ᙮ 6 ᐁᑭᑐᐙᒡ ᐅᒪᒑᑎᓰᒃ ᐃᓴ ᐃᓀᑖᑾᓂᓂ ᑖᐱᔥᑰ ᐁᓂᔑᐌᐙᒡ, ᐃᐃ ᑕᔥ ᐐᓐ ᐁᑭᑐᐙᒡ ᐅᑾᔭᒀᑎᓰᒃ ᓈᑕᒫᑫᒪᑲᓂᓂ᙮ 7 ᒣᒑᑎᓯᐙᒡ ᓴ ᐅᓇᑭᔥᑳᓈᐙ ᑫᐅᒋ ᐸᑭᔑᓄᐙᒡ, ᑳᐐᓐ ᑲᔦ ᑕᓂ ᐊᔮᓰᐗᐞ ᐅᐲᐌᓰᒥᐗᐞ᙮ ᐃᑭ ᑕᔥ ᑴᔭᒀᑎᓯᐙᒡ ᑕᓂ ᐹᑏᓄᐗᐞ ᐅᐲᐌᓰᒥᐗᐞ᙮ 8 ᐅᑲᑮᑖᐌᑕᒧᐎᓂᕽ ᓴ ᑕᐅᒋ ᑭᒋ ᒥᓄ ᑕᔑᒫ᙮ ᐊᐊ ᑕᔥ ᐊᓅᒋᑯ ᑳᐃᓀᑕᕽ ᑕᐋᓇᐌᒋᑲᓂᐎ᙮ 9 ᓇᐗᒡ ᐄᑐᒃ ᑕᐅᓂᔑᔑᓐ ᒋᒥᒋ ᐊᔨᓂᓃᐎᒡ ᐊᐎᔭ ᒋᒥᑕᓄᑮᒡ, ᐊᐲᒡ ᐐᓐ ᐊᐎᔭ ᑳᑭᒋ ᐃᓍᓂᑎᓱᒡ ᐁᐊᔮᓯᒃ ᐃᑕᔥ ᒦᒋᒻ᙮ 10 ᑾᔭᒃ ᐃᓂᓂ ᓴ ᐌᐌᓂ ᐅᑲᓇᐌᓂᒫᐞ ᐅᑕᔭᐋᐎᔑᒪᐞ, ᐊᐊ ᑕᔥ ᒣᒑᑎᓯᒡ ᐋᓇᑮ ᒥᓍᑎᓯᒡ ᔖᑰᒡ ᑳᐐᓐ ᐌᐌᓂ ᐅᑲᓇᐌᓂᒫᓰᐞ ᐅᑕᔭᐋᐎᔑᒪᐞ᙮ 11 ᐊᐊ ᓴ ᑭᑎᑫᐎᓂᓂ ᑳᑕᓇᓄᑮᒡ ᐅᑕᑮᒥᕽ ᐅᐹᑏᓇᑑᓐ ᒦᒋᒻ, ᐊᐊ ᑕᔥ ᑳᓅᒋᑑᒡ ᓅᒋ ᑫᑰᓇᓐ ᑳᐐᓐ ᐄᓴᓐ ᑫᑰᓐ ᐅᑭᑫᑕᓰᓐ᙮ 12 ᐃᑭ ᓴ ᒣᒑᑎᓯᐙᒡ ᒦ ᐁᑕ ᑯ ᐙᐃᔑᒋᑫᐙᒡ ᐁᑲᑴ ᒥᑲᒧᐙᒡ ᒪᒋᑫᑰᓐ ᐙᓅᒋᑑᐙᒡ᙮ ᐊᐊ ᑕᔥ ᐐᓐ ᑴᔭᒀᑎᓯᒡ ᑕᐊᔩᒋᑳᐸᐎ᙮ 13 ᒣᒑᑎᓯᒡ ᐃᓴ ᐁᑭᑐᒡ ᑕᐅᒋ ᐅᒑᓂᒣᑕᒻ, ᐊᐊ ᑕᔥ ᑴᔭᒀᑎᓯᒡ ᐅᑲ ᑲᔥᑭᑑᓐ ᒋᔖᐾᒡ᙮ 14 ᐋᓃᓐ ᐃᓴ ᐱᑯ ᐁᑭᑐᔭᓐ, ᑯᒫ ᑲᔦ ᐁᔑᒋᑫᔭᓐ, ᒦ ᐃᒫ ᑫᐅᒋ ᑎᐸᐊᒫᑰᐎᓯᔭᓐ, ᐋᓃᓐ ᐃᓴ ᐱᑯ ᐁᔑ ᑲᔥᑭᑕᒫᓱᔭᓐ ᑭᑲ ᓈᓯᑳᑯᓐ᙮ 15 ᑫᑮᐹᑎᓯᐙᒡ ᒨᔕᒃ ᐄᓴᓐ ᐃᓀᑕᒨᒃ ᑾᔭᒃ ᐁᐃᔑᒋᑫᐙᒡ, ᐃᑭ ᑕᔥ ᐐᓐ ᑫᑮᑖᐌᑕᒧᐙᒡ ᓂᑖ ᐱᓯᑕᒨᒃ᙮ 16 ᐊᐲ ᓴ ᐅᑲᑮᐹᑎᔅ ᑮᓂᔥᑫᑕᕽ, ᔐᒫᒃ ᐃᑯ ᐅᑭᑫᑖᑯᑑᓐ᙮ ᑳᐅᑭᑫᑕᒫᐎᓂᒡ ᐃᑕᔥ ᐐᓐ ᑳᐐᓐ ᐅᐸᐹᐱᓯᔅᑫᑕᓰᓐ ᐋᓃᓐ ᐁᓂᓐᒡ᙮ 17 ᐊᐊ ᓴ ᑳᑌᐺᒡ ᑾᔭᒃ ᐃᔑᒋᑫ, ᐊᐊ ᑕᔥ ᐐᓐ ᑳᑮᐗᓂᒧᒡ ᑳᐐᓐ ᑾᔭᒃ ᐃᔑᒋᑫᓰ᙮ 18 ᐊᐎᔭ ᓴ ᑮᓈᓈᑲᑕᐌᑕᓯᒃ ᐋᓃᓐ ᐁᑭᑐᒡ ᒦ ᐃ ᐁᔑᓈᑾᓂᓂᒃ ᑖᐱᔥᑰ ᐁᐸᔑᐸᐅᐙᑫᒡ ᑭᒋ ᒨᑯᒫᓐ᙮ ᐊᐎᔭ ᑕᔥ ᐐᓐ ᐅᑲᑮᑖᐎᑮᔗᐎᓂᕽ ᒦ ᐃᒫ ᐌᒌᒃ ᐊᑕᐎᐃᑰᐎᓐ᙮ 19 ᑮᐗᓂᒧᐎᓐ ᐃᓴ ᐊᒋᓇ ᐁᑕ ᑕᐊᔮᒪᑲᓐ, ᑌᐺᐎᓐ ᐃᑕᔥ ᓀᐱᒡ ᑕᐊᔮᒪᑲᓐ᙮ 20 ᐗᔦᔑᑖᑯᓯᐎᓐ ᐃᓴ ᐅᑭᑭᔥᑳᑯᓈᐙ ᐃᑭ ᓅᒋᑯ ᑳᐐ ᐃᔑᒋᑫᐙᒡ, ᒌᑫᑕᒧᐎᓐ ᐃᑕᔥ ᐐᓐ ᐅᑭᑭᔥᑳᑯᓈᐙ ᐃᑭ ᑳᓅᒋᑑᐙᒡ ᐱᓵᓀᑕᒧᐎᓐ᙮ 21 ᑳᐐᓐ ᒫᔑᓭᐎᓐ ᐅᑲ ᓈᓯᑳᑯᓰᓈᐙ ᑴᔭᒀᑎᓯᐙᒡ, ᐃᑭ ᑕᔥ ᒣᒑᑎᓯᐙᒡ ᒨᔕᒃ ᐅᑲ ᐊᔮᓈᐙ ᒫᔑᓭᐎᓐ᙮ 22 ᑳᑎᐯᒋᑫᒡ ᐅᔒᑫᓂᒫᐞ ᑳᑲᑮᓇᐎᔥᑮᓂᒡ, ᐅᒥᓍᐸᒫᐞ ᐃᑕᔥ ᐐᓐ ᑳᓂᑖ ᑌᐺᓂᒡ᙮ 23 ᐊᐎᔭ ᑳᑭᑫᑖᓱᒡ ᑳᐐᓐ ᐅᐸᐹ ᑕᔑᑕᓰᓐ ᑫᑰᓐ ᑫᑫᑕᕽ, ᐊᐊ ᑕᔥ ᐐᓐ ᐅᑲᑮᐹᑎᔅ ᐅᓈᑯᑑᓐ ᐋᓃᓐ ᐁᐲᒋ ᑲᑮᐹᑎᓯᒡ᙮ 24 ᐊᐊ ᓴ ᑳᓂᑖ ᑭᒋ ᐊᓄᑮᒡ ᑕᓂ ᒪᔥᑲᐌᑖᑯᓯ, ᐊᐊ ᑕᔥ ᑳᓂᑖ ᑭᑎᒥᒡ ᑕᓂ ᑎᓄᐎ ᑳᒥᒋ ᐸᒦᑖᑫᒡ᙮ 25 ᐅᒑᓂᒣᑕᒧᐎᓂᕽ ᐃᓴ ᐊᐎᔭ ᑳᐅᒋ ᒥᓉᑕᓯᒃ ᐅᑌᐃᕽ, ᒥᓄᑮᔗᐎᓂᕽ ᐃᓴ ᑕᐅᒋ ᒌᑫᑕᒻ᙮ 26 ᐊᐊ ᓴ ᑴᔭᒀᑎᓯᒡ ᐌᐌᓂ ᐅᑭᑭᓄᐎᓈᓐ ᐅᐐᒋᑖᒫᑲᓇᓐ, ᐊᐊ ᑕᔥ ᐐᓐ ᐃᓇᑫ ᐁᔖᒡ ᐅᒪᒑᑎᔅ ᐗᓂᐎᔑᐌᒪᑲᓂᓂ᙮ 27 ᑮᔥᐱᓐ ᑭᑎᒥᔭᓐ, ᑳᐐᓐ ᐐᑳ ᑭᑲ ᐊᔮᓰᓐ ᑳᑲᑴ ᑲᔥᑭᑕᒫᓱᔭᓐ, ᑮᔥᐱᓐ ᐃᑕᔥ ᐐᓐ ᑭᒋ ᐊᓄᑮᔭᓐ ᑭᑲ ᑭᒋ ᐃᓀᑖᓐ ᑳᐊᔮᔭᓐ᙮ 28 ᑾᔭᒀᑎᓯᐎᓂᕽ ᐃᓇᑫ ᓴ ᐅᒌᒪᑲᓐ ᐱᒫᑎᓯᐎᓐ, ᒪᒋᐃᔑᒋᑫᐎᓂᕽ ᐃᓇᑫ ᑕᔥ ᐐᓐ ᐅᒌᒪᑲᓐ ᓂᐳᐎᓐ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society