ᑲᑮᑖᐎᑮᔗᐎᓇᓐ 11 - ᐅᒋᐺ ᑭᒋᒪᓯᓇᐃᑲᓐ1 ᑳᑎᐯᒋᑫᒡ ᐃᓴ ᐅᔒᑫᑖᓇᓐ ᑳᐗᔦᔑᒥᐌᒪᑲᓂᓂᑭᓐ ᑎᐹᐲᔥᑰᒋᑲᓇᓐ᙮ ᐅᒥᓍᐸᑖᓇᓐ ᐃᑕᔥ ᑾᔭᒃ ᑎᓄ ᑎᐹᐲᔥᑰᒋᑲᓇᓐ᙮ 2 ᐯᒫᑎᓯᐙᒡ ᑳᑭᒋ ᐃᓀᓂᑎᓱᐙᒡ ᑕᐊᑲᒋᐋᐗᒃ᙮ ᐃᑭ ᑕᔥ ᑫᑮᑖᐌᑕᒧᐙᒡ ᑕᐸᓭᓂᑎᓱᐗᒃ᙮ 3 ᑮᔥᐱᓐ ᑾᔭᒀᑎᓯᔭᓐ, ᑳᐐᓐ ᑭᑲ ᐗᔦᔑᒋᑫᓰ᙮ ᐯᒫᑎᓯᐙᒡ ᑳᑌᐺᔦᑖᑯᓯᓯᒀ ᑕᐅᒋ ᓂᔑᐗᓈᑎᓯᐗᒃ ᐁᔑ ᓂᑖ ᐗᔦᔑᑫᐙᒡ᙮ 4 ᑭᐌᓅᑎᓯᐎᓐ ᐃᓴ ᑳᐐᓐ ᑫᑰᓐ ᑭᑲ ᐃᔑ ᓈᑕᒫᑯᓰᓐ ᐊᐲ ᓇᑭᔥᑲᒪᓐ ᓂᐳᐎᓐ, ᑾᔭᒀᑎᓯᐎᓂᕽ ᐃᑕᔥ ᑭᑲ ᐅᒋ ᐱᒫᒋᐃᑰᐎᔅ᙮ 5 ᐊᐊᐌ ᓴ ᑴᔭᒀᑎᓯᒡ ᑕᐌᑌᑖᑾᓂᓂ ᐅᐱᒫᑎᓯᐎᓐ, ᐊᐊ ᑕᔥ ᒣᒑᑎᓯᒡ ᑕᑲᔅᑭᑕᒫᓱ ᑫᐅᒋ ᐸᑭᔑᕽ᙮ 6 ᐁᔑ ᑾᔭᒀᑎᓯᒡ ᓴ ᑕᐅᒋ ᐱᒫᒋᐃᑰᐎᓯ, ᐃᑭ ᑕᔥ ᒣᒑᑎᓯᐙᒡ ᐁᔑ ᑲᑲᔦᓂᓯᐙᒡ ᑕᐅᒋ ᑲᔥᑭᑕᒫᓱᐗᒃ ᑫᐅᒋ ᐸᑭᔑᓄᐙᒡ᙮ 7 ᐅᒪᒑᑎᔅ ᐃᓴ ᑮᓂᐳᒡ, ᒦ ᐃ ᑳᐐᓐ ᐅᑕᔮᓰᓐ ᐊᐯᓂᒧᐎᓐ, ᑲᑭᓇ ᑳᑮ ᐊᐯᓂᒧᐸᓐ ᐅᒪᔥᑲᐎᓰᐎᓐ ᑳᐐᓐ ᐅᑲ ᐐᒋᐃᑯᓰᓐ᙮ 8 ᐅᑾᔭᒀᑎᔅ ᐃᓴ ᑲᓇᐌᑖᑯᓯ ᒋᓈᓯᑳᑯᓯᒃ ᐗᓯᑖᐎᓭᐎᓐ, ᑌᑾᒡ ᐃᑕᔥ ᒣᒑᑎᓯᐙᒡ ᐅᑲ ᓈᓯᑳᑯᓈᐙ᙮ 9 ᑭᑲ ᐅᒋ ᓂᔑᐗᓈᒋᐃᑰ ᓴ ᐋᓃᓐ ᐁᑭᑐᐙᒡ ᑫᑫᓂᒫᓯᒀ ᑭᔐᒪᓂᑑᓐ᙮ ᐃᐃ ᑕᔥ ᐐᓐ ᐁᔑ ᐅᑭᑫᑕᒫᐎᓂᐙᒡ ᑴᔭᒀᑎᓯᐙᒡ ᑭᑲ ᓈᑕᒫᑯᓐ᙮ 10 ᐊᐲ ᓴ ᐅᑾᔭᒀᑎᓰᒃ ᑮᒥᓄᓭᐙᒡ, ᑭᒋ ᐆᑌᓈᕽ ᐁᔮᐙᒡ ᒥᓉᑕᒨᒃ᙮ ᐊᐲ ᑕᔥ ᐐᓐ ᐅᒪᒑᑎᓰᒃ ᑮᓂᔑᐗᓈᑎᓯᐙᒡ, ᑕᓅᑖᑾᓐ ᒋᒥᓉᑕᒧᓈᓂᐗᕽ᙮ 11 ᐊᐲ ᓴ ᐅᑾᔭᒀᑎᔅ ᑮᐃᓀᑕᕽ ᒋᒥᓄᓭᓂᒃ, ᒦ ᓴ ᐃ ᐁᔑ ᑭᒋ ᐃᓀᑖᑾᓂᓂᒃ ᑭᒋ ᐆᑌᓇ᙮ ᐃᐃ ᑕᔥ ᐐᓐ ᐁᑭᑐᐙᒡ ᐅᒪᒑᑎᓰᒃ, ᒦ ᐃᒫ ᑫᐅᒋ ᓂᔑᐗᓈᑕᒃ ᑭᒋ ᐆᑌᓇ᙮ 12 ᐊᐎᔭ ᓴ ᑲᑮᐹᑎᓯ ᑮᒪᒋ ᑕᔑᒫᒡ ᐐᒋᐱᒫᑎᓰᓐ᙮ ᐊᐎᔭ ᑕᔥ ᐐᓐ ᑮᐊᔮᒡ ᓂᓯᑐᑕᒧᐎᓐ ᑳᐐᓐ ᓅᑖᑎᓰ᙮ 13 ᐊᐎᔭ ᓴ ᑳᓂᑖ ᐸᐹᒫᒋᒧᒡ ᑳᐐᓐ ᑮᑫᒋᓈᐁᓂᒫᓰ ᒋᑲᓇᐌᑕᕽ ᑮᒨᑖᒋᒧᐎᓇᓐ᙮ ᐊᐎᔭ ᑕᔥ ᑳᑌᐺᔦᑖᑯᓯᒡ ᑳᐐᓐ ᑫᑰᓐ ᐅᐸᐹᑕᔑᑕᓰᓐ᙮ 14 ᑮᔥᐱᓐ ᐯᒫᑎᓯᐙᒡ ᑮᑭᑭᓄᐊᒪᐎᑣᓯᐎᑣ, ᒦ ᐃ ᑫᔑ ᐸᑭᔑᓄᓈᓂᐗᕽ᙮ ᑮᔥᐱᓐ ᑮᐹᑏᓄᐙᒡ ᐅᒫᒦᓄᒥᐌᒃ, ᑫᒋᓈᒡ ᐌᐌᓂ ᑕᐊᔮᓂᐗᓐ᙮ 15 ᐊᐎᔭ ᓴ ᑮᐃᑭᑐᒡ ᐁᐐ ᑎᐸᐃᑫᑕᒪᐙᒡ ᐲᐎᑌᓐ, ᑫᒋᓈᒡ ᑕᒥᒌᓇᐌᓰ᙮ ᓇᐗᒡ ᐄᑐᒃ ᑕᐅᓂᔑᔑᓂᓂ ᑫᑰᓐ ᐃᐃᒫ ᐃᔑ ᐅᐸᐹᒥᓯᐎᓂᓯᒃ᙮ 16 ᐊᐊ ᓴ ᐃᑴ ᑳᓅᑳᑎᓯᒡ ᑕᑭᑌᒋᑲᓂᐎ, ᐊᐊ ᑕᔥ ᐃᓂᓂ ᐊᐎᔭᓐ ᑳᐸᐹ ᐱᓯᔅᑫᓂᒫᓯᒃ, ᑕᒥᒋ ᑭᒋ ᐌᓅᑎᓯ᙮ 17 ᐃᓂᓂ ᓴ ᑮᑰᐹᑌᓂᒥᐌᒡ ᐐᓐ ᐃᑯ ᑕᒥᓄᑑᑖᓱ, ᐊᐊ ᑕᔥ ᐐᓐ ᑫᒀᓂᓴᑭᓯᒡ ᐐᓐ ᐃᑯ ᒫᔑ ᑑᑖᓱ᙮ 18 ᒣᒑᑎᓯᐙᒡ ᐃᓴ ᑳᐐᓐ ᑫᑰᓐ ᑫᒋᓇᒡ ᑲᔥᑭᑕᒫᓱᓰᐗᒃ, ᑮᔥᐱᓐ ᑾᔭᒃ ᐃᔑᒋᑫᔭᓐ ᑫᒋᓈᒡ ᐄᑐᒃ ᑭᑲ ᑎᐸᐊᒫᑰᐎᔅ᙮ 19 ᐊᐎᔭ ᓴ ᑳᐃᓀᑕᕽ ᑌᐺ ᑯ ᑾᔭᒃ ᑳᐐ ᑲᑴ ᐃᔑ ᐱᒫᑎᓯᒡ ᑕᐱᒫᑎᓯ᙮ ᐊᐊ ᑕᔥ ᐐᓐ ᐊᐎᔭ ᐋᒋᑯ ᓅᒋᑯ ᑳᐐ ᐃᔑᒋᑫᒡ ᑕᓂᐳ᙮ 20 ᑳᑎᐯᒋᑫᒡ ᐃᓴ ᐅᔒᑫᓂᒫᐞ ᐯᒫᑎᓯᓂᒡ ᓅᒋᑯ ᐁᓀᑕᒥᓂᒡ ᐅᑌᐃᓃᕽ, ᐅᒥᓍᐸᒫᐞ ᐃᑕᔥ ᐃᐃ ᑾᔭᒃ ᑳᐃᔑᒋᑫᓂᒡ᙮ 21 ᑫᒋᓈᐅᓐ ᐃᑕᔥ ᒣᒑᑎᓯᐙᒡ ᑕᓇᓇᐊᒋᑳᓱᐗᒃ, ᐃᐃ ᑕᔥ ᑴᔭᒀᑎᓯᐙᒡ ᑕᑕᐸᓰᐋᐗᒃ᙮ 22 ᐃᑴ ᓴ ᑳᒥᓄᓈᑯᓯᒡ ᑳᓈᓈᑲᑕᐌᑕᓯᒃ ᒦ ᐃ ᐁᔑᓈᑯᓯᒡ ᑖᐱᔥᑰ ᐅᓵᐎ ᔔᓂᔮ ᐙᐱᒃ ᑳᐐᐹᑲᒃ ᑳᐊᑰᑌᓂᒃ ᑰᑰᔥ ᐅᒑᔑᕽ᙮ 23 ᐁᔑ ᒥᓴᐌᑕᒧᐙᒡ ᐃᓴ ᐃᑭ ᑴᔭᒀᑎᓯᐙᒡ ᐋᐱᒋ ᑕᒥᓄᓭᓂ, ᐃᑭ ᑕᔥ ᐐᓐ ᐅᒪᒑᑎᓰᒃ ᐋᓇ ᐊᐯᓂᒧᐙᒡ, ᓂᔥᑳᑎᓯᐎᓐ ᐁᑕ ᐅᑲ ᓈᓯᑳᑯᓈᐙ᙮ 24 ᐊᐎᔭ ᓴ ᐋᓇᑮᒥᒋ ᒫᒦᑭᐌᒡ, ᒦ ᐃ ᐋᒋᑯ ᐊᓂᔑ ᐌᓅᑎᓯᒡ᙮ ᐊᐎᔭ ᑕᔥ ᑮᒪᓈ ᐗᓂᒋᑫᒡ, ᒦ ᐃ ᐋᒋᑯ ᐁᓂᔑ ᑭᑎᒫᑭᓯᒡ᙮ 25 ᐊᐎᔭ ᑳᒥᓄᑑᑖᑫᒡ ᐃᓴ ᑕᐌᓅᒋᓭ, ᐊᐎᔭ ᑳᐐᒋᐃᐌᒡ ᓴ ᐐᓐ ᑳᐐᒋᐃᑎᓱᒡ᙮ 26 ᐯᒫᑎᓯᐙᒡ ᐃᓴ ᐅᒪᒐᑭᒫᐙᓐ ᐊᐎᔭᓐ ᑳᒥᒋ ᒫᐗᒋᑑᓂᒡ ᐸᑴᔑᑲᓂ ᑭᑎᑳᓀᓴᓐ, ᐊᐊ ᑕᔥ ᐐᓐ ᑳᐊᑖᐙᑫᒡ ᑕᔕᐌᑖᑯᓯ᙮ 27 ᐊᐎᔭ ᓴ ᑳᑲᑴ ᒥᑲᕽ ᐌᓂᔑᔑᓂᓂᒃ ᑕᒥᓍᐸᒋᑳᓱ, ᐊᐊ ᑕᔥ ᐐᓐ ᑳᑲᑴ ᒥᑲᕽ ᒪᒋᑫᑰᓐ, ᑫᒋᓈᒡ ᐃᑯ ᐅᑲ ᑌᐱᓈᓐ᙮ 28 ᐊᐌᓀᓐ ᐃᓴ ᑯ ᐁᐯᓂᒧᓄᑕᕽ ᐅᐌᓅᑎᓯᐎᓐ ᑕᐸᑭᔑᓐ, ᐊᐊ ᑕᔥ ᑴᔭᒀᑎᓯᒡ ᑕᒪᔥᑲᐎᑭ ᑖᐱᔥᑰ ᓃᐱᓂ ᐊᓃᐲᔥ᙮ 29 ᐊᐎᔭ ᓴ ᑳᒫᔑᐱᓈᒡ ᐁᔮᓂᒡ ᐅᑖᐎᓂᕽ, ᑳᐐᓐ ᐌᑎ ᐃᔥᒀᒡ ᑫᑰᓐ ᐅᑲ ᐅᑎᓇᓰᓐ᙮ ᐅᑲᑮᐹᑎᔅ ᐃᓴ ᐅᑲᐊᓄᑮᑕᐙᓐ ᑫᑮᑖᐌᑕᒥᓂᒡ᙮ 30 ᐱᒫᑎᓯᐎᓐ ᓴ ᐃᐃᒫ ᐅᒌᒪᑲᓐ ᐊᐎᔭ ᑮᑾᔭᒀᑎᓯᒡ ᑖᐱᔥᑰ ᒦᓈᑎᒃ ᑳᔑ ᓂᑖᐎᑭᒋᑫᒡ᙮ ᐊᐊ ᑳᑲᑮᑖᐌᑕᕽ ᐅᑲᔥᑭᐋᐞ ᓃᐱᐗᐞ ᐊᐎᔭᐞ ᒋᐅᒋ ᐱᒫᑎᓯᓂᒡ᙮ 31 ᐃᑭ ᓴ ᑳᒥᓄᑑᑕᒧᐙᒡ ᐅᐅᒫ ᐊᑮᕽ ᑕᒥᓄ ᑎᐸᐊᒫᑰᐎᓯᐗᒃ, ᐃᑭ ᑕᔥ ᐊᐎᔭᒃ ᒣᒋ ᐃᔑᒋᑫᐙᒡ, ᓀᑖ ᒪᒋᑑᑕᒧᐙᒡ ᑲᔦ, ᐁᔑ ᑲᔥᑭᑕᒫᓱᐙᒡ ᑕᔑ ᑎᐸᐊᒪᐙᐗᒃ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society