ᑲᑮᑖᐎᑮᔗᐎᓇᓐ 10 - ᐅᒋᐺ ᑭᒋᒪᓯᓇᐃᑲᓐᔂᓬᐊᒪᓐ ᐁᔑᑲᑮᑖᐎᑮᔗᒡ 1 ᒦᐗᓐ ᐃᓴ ᐅᓄ ᔂᓬᐊᒪᓐ Solomon ᐅᑲᑮᑖᐎᑮᔗᐎᓇᓐ᙮ ᐅᑯᓯᓯᒫ ᑫᑮᑖᐌᑕᕽ ᐃᓴ ᐅᑭᒋ ᐃᓀᓂᒥᑰᓐ ᐅᑌᑌᓐ᙮ ᐊᐊ ᑕᔥ ᐐᓐ ᑫᑮᐹᑎᓯᒡ ᐅᒫᓀᑕᒥᐋᓐ ᐅᒫᒫᓐ᙮ 2 ᑲᑲᔦᓂᓯᐎᓂᕽ ᐊᐎᔭ ᑳᐅᒋ ᐌᓅᑎᓯᒡ, ᑳᐐᓐ ᑫᑰᓐ ᐅᑲ ᐃᓈᐸᒋᑑᓰᓐ᙮ ᐊᐎᔭ ᓴ ᑳᑾᔭᒀᑎᓯᒡ ᒦ ᐊᐌ ᑫᐱᒫᒋᐃᑎᓱᒡ᙮ 3 ᑳᑎᐯᒋᑫᒡ ᑳᐐᓐ ᐅᑲ ᐸᑭᑎᓈᓰᓐ ᐅᑾᔭᒀᑎᓰᓐ ᒋᓅᑌᔅᑲᑌᓂᒡ᙮ ᑳᐐᓐ ᐃᑕᔥ ᐅᑲ ᐸᑭᑎᓈᓰᓐ ᐅᒪᒑᑎᓰᓐ ᒋᑌᐱᓇᒥᓂᒡ ᐁᑕᐌᑕᒥᓂᒡ᙮ 4 ᐊᐎᔭ ᑳᑭᑎᒥᒡ ᑕᑭᑎᒫᑭᓯ᙮ ᐊᐊ ᑕᔥ ᑳᑭᒋ ᐊᓄᑮᒡ ᑕᐊᓂ ᐌᓅᑎᓯ᙮ 5 ᐊᐎᔭ ᓴ ᑳᒫᐗᒋᑑᒡ ᑭᑎᑫᐎᓐ ᐁᓃᐱᓂᓂᒃ ᒦ ᓴ ᐊᐌ ᐄᓴᓐ ᑫᑮᑖᐎ ᐃᔑᐊᔮᒡ᙮ ᐊᐊ ᑕᔥ ᑳᐅᑕᒦᒀᒥᒡ ᐊᐲ ᑮᒪᓂᔑᑫᕽ, ᒦ ᐄᓴᓐ ᐊᐊ ᑳᑲᑮᐹᒋ ᐃᔑᐊᔮᒡ᙮ 6 ᔕᐌᑖᑯᓯ ᓴ ᑾᔭᒃ ᐃᓂᓂ᙮ ᐊᐊ ᑕᔥ ᐅᒪᒑᑎᔅ ᐅᑎᑭᑐᐎᓂᕽ ᐅᑑᒋ ᑳᑑᓐ ᐅᒪᒋ ᐃᔑᐊᔮᐎᓐ᙮ 7 ᑮᒫᒥᑲᐎᓄᑕᐎᑣ ᐅᑾᔭᒀᑎᓰᒃ ᐄᑐᒃ ᐐᑫ ᑌᑕᑯ ᒥᓉᑖᑾᓐ, ᐃᑭ ᑕᔥ ᐅᒪᒑᑎᓰᒃ ᑕᒥᒋ ᐗᓃᑫᓄᑕᐙᐗᒃ᙮ 8 ᐃᑭ ᓴ ᑫᑮᑖᐎ ᐃᔑᐊᔮᐙᒡ ᐱᓯᑕᒧᒃ ᑮᒫᒦᓄᒥᑣ, ᐃᑭ ᑕᔥ ᐐᓐ ᑳᑲᑮᐹᒋ ᑮᔗᐙᒡ ᑕᓂᔑᐗᓈᑎᓯᐗᒃ᙮ 9 ᐊᐊ ᓴ ᑾᔭᒃ ᑳᐱᒧᓭᒡ ᐌᐌᓂ ᑕᐱᒫᑎᓯ, ᐊᐊ ᑕᔥ ᑾᔭᒃ ᑳᐃᔑᒋᑫᓯᒃ ᑕᓂ ᑭᑫᑖᑯᓯ᙮ 10 ᐊᐎᔭ ᓴ ᑳᓇᑳᓇᕽ ᑌᐺᐎᓐ ᐅᑑᔑᑑᓐ ᒫᔑᓭᐎᓐ᙮ ᐃᑭ ᑕᔥ ᐐᓐ ᑳᑲᑮᐹᒋ ᑮᔗᐙᒡ ᑕᓂᔑᐗᓈᑎᓯᐗᒃ᙮ 11 ᐁᔑ ᑲᑮᑐᒡ ᑾᔭᒃ ᐃᓂᓂ ᒦ ᐃᒫ ᐌᒌᒃ ᐅᐱᒫᑎᓯᐎᓐ ᑖᐱᔥᑰ ᓂᐱ ᑳᒨᑭᒋᐗᕽ᙮ ᐊᐊ ᑕᔥ ᐅᒪᒑᑎᔅ ᐅᑎᑭᑐᐎᓂᕽ ᐅᑑᒋ ᑳᑑᓐ ᐅᒪᒋ ᐃᔑᐊᔮᐎᓐ᙮ 12 ᐊᐎᔭᒃ ᑮᔒᑫᓂᑎᐙᒡ ᒦ ᐃᒫ ᐌᒋᓭᒃ ᒫᔑ ᐐᒌᑎᐎᓐ, ᐃᑭ ᑕᔥ ᐐᓐ ᑳᓵᑭᐃᑎᐙᒡ ᐴᓀᑕᒫᑎᐗᒃ ᐁᔑ ᒫᔑ ᐐᒌᑎᐙᒡ᙮ 13 ᐃᑭ ᓴ ᑫᑮᑖᐌᑕᒧᐙᒡ ᑲᑮᑖᐎᑮᔗᐗᒃ, ᐃᑭ ᑕᔥ ᑫᑮᐹᑎᓯᐙᒡ ᑌᐱᓇᒫᓱᐗᒃ ᒋᓇᓇᐊᓯᑣᐸᓐ᙮ 14 ᑫᑮᑖᐌᑕᒧᐙᒡ ᐃᓴ ᐊᐗᔑᒣ ᑲᑴ ᑭᑫᑖᓱᐗᒃ, ᑫᑮᐹᑎᓯᐙᒡ ᐃᑕᔥ ᑮᑮᑭᑐᐙᒡ ᐋᐱᒋ ᐯᔓ ᑕᓀᑖᑾᓐ ᒫᔑᓭᐎᓐ᙮ 15 ᐊᐎᔭ ᓴ ᑳᐌᓅᑎᓯᒡ, ᐅᐌᓅᑎᓯᐎᓐ ᐅᑲᓇᐌᓂᒥᑯᓐ, ᐊᐊ ᑕᔥ ᐐᓐ ᑫᑎᒫᑭᓯᒡ ᐅᑭᑎᒫᑭᓯᐎᓐ ᐅᑲ ᓂᔑᐗᓈᒋᐃᑯᓐ᙮ 16 ᐱᒫᑎᓯᐎᓐ ᓴ ᐊᐎᔭ ᑎᐸᐊᒪᐙ ᑾᔭᒃ ᑮᔑ ᐱᒫᑎᓯᒡ, ᐊᐎᔭ ᑕᔥ ᐐᓐ ᑮᒪᒋᑑᑕᕽ ᑲᔥᑭᑕᒫᓱ ᐋᒌᑫ ᑫᐅᒋ ᓇᓇᐊᓯᓐᒡ᙮ 17 ᐃᑭᐌᓂᐗᒃ ᐃᓴ ᑳᐱᓯᑕᒧᐙᒡ ᑮᒫᒦᓄᒥᑣ ᑕᐱᒫᑎᓯᐗᒃ᙮ ᐃᑭ ᑕᔥ ᐐᓐ ᑳᐸᐹᒥᑕᓯᒀ ᐁᒫᒦᓄᒥᑣ ᒦᐗᒃ ᐃᑭ ᑳᐗᓂᔑᓄᐙᒡ᙮ 18 ᐊᐎᔭ ᓴ ᑳᑳᑑᒡ ᐅᔒᑫᓂᒥᐌᐎᓐ, ᒦ ᐊᐌ ᑳᑲᑮᓇᐎᔥᑭᒡ᙮ ᐊᐊ ᑕᔥ ᑲᔦ ᒥᓯᐌ ᑳᐸᐹ ᑕᔑᒥᐌᒡ ᑲᑮᐹᑎᓯ᙮ 19 ᐊᐎᔭ ᓴ ᑮᑭᒋ ᑳᑮᑭᑐᒡ ᑫᒋᓈᒡ ᐃᑯ ᑕᒪᒋᑑᑕᒻ᙮ ᐊᐊ ᑕᔥ ᐐᓐ ᑫᑮᑖᐌᑕᕽ, ᑳᐐᓐ ᓅᑖᑎᓰ᙮ 20 ᑾᔭᒃ ᐃᓂᓂ ᐁᑭᑐᒡ ᐃᓀᑖᑾᓂᓂ ᑖᐱᔥᑰ ᐌᒋᑑ ᐱᑯ ᐙᐹᐱᑯ ᔔᓂᔮ ᐙᐱᒃ, ᐊᐊ ᑕᔥ ᐁᓀᑕᕽ ᐅᑲᑮᐹᑎᔅ ᑳᐐᓐ ᑫᑰᓐ ᐃᓀᑖᑾᓯᓂᓂ᙮ 21 ᑾᔭᒃ ᐃᓂᓂ ᐁᑭᑐᒡ ᐃᓴ ᓃᐱᐗᐞ ᐊᐎᔭᐞ ᐅᒋ ᒥᓄᓭᐗᐞ, ᐊᐎᔭ ᑕᔥ ᑳᑲᑮᐹᑎᓯᒡ ᑕᐅᑖᐱᓇᓂᑎᓱ ᑳᓂᓯᑕᐎᓇᓯᒃ᙮ 22 ᑳᑎᐯᒋᑫᒡ ᐅᔕᐌᒋᑫᐎᓂᕽ ᐅᔕ ᐊᐎᔭ ᑳᐅᒋ ᐌᓅᑎᓯᒡ᙮ ᑳᐐᓐ ᑕᑯ ᒦᑭᐌᓰ ᒫᔑᓭᐎᓐ᙮ 23 ᑫᑮᐹᑎᓯᒡ ᐃᓴ ᐅᒋ ᒥᓉᑕᒻ ᐁᒪᒋᑑᑕᕽ᙮ ᐊᐊ ᑕᔥ ᑫᑫᑕᒫᐎᓂᒡ ᐅᓵᑭᑑᓐ ᑲᑮᑖᐌᑕᒧᐎᓐ᙮ 24 ᐅᑾᔭᒀᑎᔅ ᐃᓴ ᑕᒦᓂᑰᐎᓯ ᐁᔑ ᐸᑯᓭᑕᕽ, ᐊᐊ ᑕᔥ ᐅᑲᑮᐹᑎᔅ ᐅᑲ ᐅᑎᓯᑯᓐ ᑳᑯᑖᓀᑕᕽ᙮ 25 ᐊᐲ ᑕᔥ ᑮᑭᒋ ᐸᑲᒫᓂᒪᒃ ᐅᒪᒑᑎᓰᒃ ᑕᒑᑭᐌᐹᔑᐗᒃ, ᐃᑭ ᑕᔥ ᐐᓐ ᐅᑾᔭᒀᑎᓰᒃ ᑕᑲᓇᐌᑖᑯᓯᐗᒃ᙮ 26 ᑫᑯ ᐐᑳ ᐊᓅᓈᑫᓐ ᑫᑎᒫᑎᓯᒡ ᑫᑰᓐ ᐃᔑ ᐊᓄᑮᑕᐎᒃ, ᒦ ᓴ ᐃ ᑫᐃᓀᑖᑯᓯᒡ ᑖᐱᔥᑰ ᑫᑰᓐ ᑳᐐᓴᑳᑲᒥᕽ, ᑖᐱᔥᑰ ᑲᔦ ᐹᔥᑭᓀ ᑳᐃᓈᐸᑌᒃ ᑭᔥᑮᔑᑯᕽ᙮ 27 ᑮᑯᑖᓀᓂᒥᓐᒡ ᑳᑎᐯᒋᑫᒡ ᐊᐎᔭ ᑭᓉᔥ ᐅᒋ ᐱᒫᑎᓯ, ᐅᒪᒑᑎᓰᒃ ᐃᑕᔥ ᐐᓐ ᑕᓅᑌ ᑮᔥᑭᓇᒪᐙᐗᒃ ᒥᓂᒃ ᑫᑮ ᐱᒫᑎᓯᐙᐸᓐ᙮ 28 ᐅᑾᔭᒀᑎᔅ ᐁᔑ ᐸᑯᓭᓂᒧᒡ ᒋᐃᔑᓭᒡ ᑕᐅᒋ ᒌᑫᑕᒻ᙮ ᐃᑭ ᑕᔥ ᐐᓐ ᐅᒪᒑᑎᓰᒃ ᐁᔑ ᐸᑯᓭᓂᒧᐙᒡ ᑳᐐᓐ ᑕᐃᔑᓭᓯᓂᓂ᙮ 29 ᑳᑎᐯᒋᑫᒡ ᐅᑎᔑᑣᐎᓐ ᐄᑐᒃ ᐅᓈᑕᒫᑯᓈᐙ ᐅᑾᔭᒀᑎᓰᒃ, ᐃᑭ ᑕᔥ ᐐᓐ ᐅᒪᒑᑎᓰᒃ ᑳᑑᑕᒧᐙᒡ ᒦ ᐃᐌᓂ ᑫᓂᔑᐗᓈᒋᐃᑯᐙᒡ᙮ 30 ᐅᑾᔭᒀᑎᓰᒃ ᐃᓴ ᑳᐐᓐ ᐐᑳ ᑭᑭᒌᐱᒃ ᑕᐸᑾᒋᐱᓈᓰᐗᒃ, ᐃᑭ ᑕᔥ ᐅᒪᒑᑎᓰᒃ ᑳᐐᓐ ᑫᔮᐱ ᑕᐃᔑᑖᓰᐗᒃ ᐃᐃᒫ ᐊᑮᕽ᙮ 31 ᐅᑾᔭᒀᑎᓰᒃ ᐁᑮᑭᑐᐙᒡ ᐋᐱᒋ ᑲᑮᑖᐎᑮᔗᐗᒃ, ᐃᐃ ᑕᔥ ᐐᓐ ᐅᑌᓇᓂᐤ ᐅᓵᒻ ᑳᒪᒋ ᐃᔑᑮᔗᒪᑲᒃ ᑕᑭᐱᑎᓂᑳᑌ᙮ 32 ᐅᑾᔭᒀᑎᓰᒃ ᐃᓴ ᐅᑭᑫᑖᓈᐙ ᑫᔑ ᒪᓈᓱᒫᐙᒡ ᐊᐎᔭᓐ᙮ ᐃᑭ ᑕᔥ ᐅᒪᒑᑎᓰᒃ ᓂᑖ ᐃᑭᑐᐗᒃ ᒨᔕᒃ ᐋᓃᓐ ᐊᐎᔭᓐ ᑫᐅᒋ ᒥᑯᔥᑳᑌᑕᒥᓂᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society