ᑲᑮᑖᐎᑮᔗᐎᓇᓐ 1 - ᐅᒋᐺ ᑭᒋᒪᓯᓇᐃᑲᓐᐁᐲᑌᑖᑾᑭᓐ ᑲᑮᑖᐎᑮᔗᐎᓇᓐ 1 ᒦᐗᓐ ᐃᓴ ᐅᓄ ᑳᑮ ᐃᔑ ᑲᑮᑖᐎᑮᔗᒡ ᔂᓬᐊᒪᓐ Solomon ᑳᑮ ᑭᒋᐅᑭᒫᐎᒡ ᐃᐃᒫ ᐃᔅᕒᐃᔭᓬ Israel ᐊᑮᕽ, ᑌᐱᑕᓐ David ᑳᑮ ᐅᑌᑌᒡ᙮ 2 ᒦᐗᓐ ᐃᑕᔥ ᐅᓄ ᑲᑮᑖᐎᑮᔗᐎᓇᓐ ᑫᐅᒋ ᑭᑫᑕᒪᓐ ᑲᑮᑖᐌᑕᒧᐎᓐ, ᐃᐃ ᑲᔦ ᑾᔭᒃ ᐐᑕᒫᑫᐎᓐ᙮ ᒦᔥ ᑲᔦ ᑫᐅᒋ ᓂᓯᑐᑕᒪᓐ ᐃᑭᑐᐎᓇᓐ ᑳᓴᓇᑲᑭᓐ ᒋᓂᓯᑑᒋᑳᑌᑭᓐ᙮ 3 ᑲᑮᑖᐎᑮᔗᐎᓂᕽ ᐃᓴ ᑭᑲ ᐅᒋ ᑭᑫᑖᓐ ᐌᐌᓂ ᑾᔭᒃ ᑫᐅᒋ ᐱᒫᑎᓯᔭᓐ᙮ ᒦᔥ ᑲᔦ ᐃᐃᒫ ᑫᐅᒋ ᑭᑫᑕᒪᓐ ᑾᔭᑯᒋᑫᐎᓐ, ᑳᐐᓐ ᑲᔦ ᑭᑲ ᐗᔦᔑᑫᓰ, ᑾᔭᒃ ᑲᔦ ᑭᑲ ᑑᑖᑫ᙮ 4 ᒦᔥ ᑲᔦ ᐃᐃᒫ ᐊᐎᔭ ᑫᑮᐹᑌᑖᑯᓯᒡ ᑫᐅᑎᓇᕽ ᑲᑮᑖᐌᑕᒧᐎᓐ, ᐋᓃᓐ ᑲᔦ ᑫᐅᒋ ᓂᓯᑕᐌᑕᕽ ᑫᑰᓐ ᑳᐅᔥᑳᑎᓯᒡ᙮ 5 ᒦᑕᔥ ᑲᔦ ᐃᐃᒫ ᑫᐅᒋ ᓇᑭ ᑭᑫᑖᓱᒡ ᐊᐊ ᑫᑮᑖᐌᑕᕽ, ᐊᐊ ᑲᔦ ᑳᓂᓯᑕᐌᑕᕽ ᑫᑰᓐ ᑫᐅᒋ ᑭᑫᑕᕽ ᐃᓇᑫ ᑫᐃᔖᒡ᙮ 6 ᒦᑕᔥ ᐃᐃᒫ ᑫᐅᒋ ᓂᓯᑐᑕᒧᐙᒡ ᐋᓃᓐ ᒪᔮ ᑫᐃᑭᑑᒪᑲᓂᓂᑭᓐ ᐃᓂ ᑲᑮᑖᐎᑮᔗᐎᓇᓐ, ᐋᓃᓐ ᑲᔦ ᐁᑭᑐᓂᒡ ᐃᓂᐌᓂᐗᐞ ᑫᑮᑖᐌᑕᒥᓂᒡ᙮ ᐁᔑᑲᓅᓂᑣ ᐅᔥᑭᓃᑭᐗᒃ 7 ᑮᑯᑖᓀᓂᒥᓐᒡ ᑳᑎᐯᒋᑫᒡ ᒦ ᐃᒫ ᐌᒋ ᒫᒋᓭᒃ ᑭᑫᑕᒫᐎᓐ, ᑫᑮᐹᑎᓯᐙᒡ ᐃᓴ ᐅᔒᑫᑖᓈᐙ ᑲᑮᑖᐌᑕᒧᐎᓐ, ᑳᐐᓐ ᑲᔦ ᐃᓀᑕᓰᐗᒃ ᒋᑭᑭᓄᐊᒪᐎᑣ᙮ 8 ᓂᑯᓯᔅ, ᐱᓯᑕᐤ ᑭᑌᑌ ᐋᓃᓐ ᐁᔑ ᑭᑭᓄᐊᒪᐎᒃ, ᑫᑯ ᑲᔦ ᓇᑲᑕᑫᓐ ᐋᓃᓐ ᑭᒫᒫ ᐁᔑ ᑭᑭᓄᐊᒪᐎᒃ᙮ 9 ᐁᔑ ᑭᑭᓄᐊᒪᐎᒀ ᓴ ᑭᑲ ᐅᒋ ᐌᐌᓂ ᐱᒫᑎᔅ ᑖᐱᔥᑰ ᑳᐅᒋ ᒥᓄᓈᑯᓯᔭᓐ ᑮᑭᑭᔥᑲᒪᓐ ᓈᐱᑴᐱᓱᓐ, ᓈᐱᑳᑲᓂᒥᓐ ᑲᔦ᙮ 10 ᓂᑯᓯᔅ, ᐊᐲ ᓴ ᒣᒑᑎᓯᐙᒡ ᑲᑴ ᑲᔥᑭᒥᒀ ᒋᒪᒋᑑᑕᒪᓐ, ᑫᑯ ᐸᑭᒌᑫᓐ᙮ 11 ᑮᔥᐱᓐ ᐃᑭᑐᐙᒡ, ᐊᐯ ᑕᑲ ᐐᒌᐎᔑᓈᒻ, ᒥᑲᐙᑖ ᐊᐎᔭ ᑫᓂᓴᕽ᙮ ᑕᑲ ᒦᑳᓈᑖ ᐊᐎᔭ ᑫᑰᓐ ᐁᔑ ᒪᒫᔒᓯᒃ ᐃᔑ ᐊᓂᔖ ᐱᑯ᙮ 12 ᐋᓇ ᓴ ᑕᐱᒫᑎᓯᐗᒃ ᐊᐲ ᒥᑲᐗᑭᑣ, ᑫᒋᓈᒡ ᐃᑕᔥ ᐃᑯ ᑕᓂᐳᐗᒃ ᐊᐲ ᑮᑮᔒᑲᑕᐗᑭᑣ᙮ 13 ᓃᐱᐗᐞ ᐃᓴ ᐌᓅᒋ ᑫᑰᓇᓐ ᑭᑲ ᒥᑳᒥᓐ ᒋᒨᔥᑭᓇᑑᔭᕽ ᑭᐙᑳᐃᑲᓂᓈᓂᓐ᙮ 14 ᐊᐯ ᑕᑲ ᐐᒌᐎᔑᓈᒻ᙮ ᑲᑭᓇ ᓴ ᑭᑲ ᒪᒫᑕᐅᓂᑎᒥᓐ ᑫᑰᓇᓐ ᑫᑮᒨᑎᔭᕽ᙮ 15 ᓂᑯᓯᔅ, ᑫᑯ ᐐᒌᐙᑫᓐ ᐃᑭ ᑎᓄ ᐊᐎᔭᒃ᙮ ᑫᑯ ᐃᔖᑫᓐ ᐃᓇᑫ ᐁᔑ ᐱᒧᓭᐙᒡ ᒦᑲᓈᕽ᙮ 16 ᑳᐐᓐ ᐃᓴ ᐊᓂᓵᐅᓰᐗᒃ ᐁᐐ ᒪᒋᐃᔑᒋᑫᐙᒡ᙮ ᐋᐱᒋ ᐌᔩᐱᓯᐗᒃ ᐁᐐ ᓂᔑᐌᐙᒡ᙮ 17 ᑳᐐᓐ ᐄᑐᒃ ᑫᑰᓐ ᐃᓈᐸᑕᓯᓅᓐ ᑮᑕᔗᑭᐱᓂᓐᒡ ᐊᓴᑉ ᒋᑳᒋᑎᓂᑣᐸᓐ ᐱᓀᔒᔕᒃ, ᑮᔥᐱᓐ ᑯᑕ ᐙᐸᒫᐙᒡ ᐃᓂ ᐊᓴᐲᓐ᙮ 18 ᐐᓇᐙ ᓴ ᐱᑯ ᐅᔑᑕᒫᓱᐗᒃ ᐋᑎ ᑫᐅᒋ ᓂᐳᐙᒡ, ᐐᓇᐙ ᐱᑯ ᐁᒪᒫᔒᑲᑖᓱᐙᒡ᙮ 19 ᒦ ᓴ ᐃ ᑲᑭᓇ ᑫᐃᔑᓭᐙᒡ ᐅᑭᒨᑎᐎᓂᐙᕽ ᑳᐅᑎᓇᒧᐙᒡ ᑫᑰᓐ᙮ ᐃᑭ ᓴ ᑳᑭᒨᑎᐙᒡ ᑕᐃᔥᒀᓭᓂᐗᓐ ᐅᐱᒫᑎᓯᐎᓂᐙᓐ᙮ ᑲᑮᑖᐌᑕᒧᐎᓐ ᐁᑮᑭᑑᒪᑲᒃ 20 ᑲᑮᑖᐌᑕᒧᐎᓐ ᐃᓴ ᐃᔑ ᑮᑭᑑᒪᑲᓐ ᐃᓇᑫ ᒦᑲᓈᕽ, ᐁᓂᑰᒃ ᐁᐃᔑ ᑮᑭᑑᒪᑲᒃ ᐁᔑ ᐊᔭᔮᓂᒡ ᐯᒫᑎᓯᓂᒡ᙮ 21 ᐁᓂᑰᒃ ᑮᑭᑑᒪᑲᓐ ᐁᔑ ᐊᔨᔥᒀᑌᒥᐗᕽ ᑭᒋ ᐆᑌᓇ, ᒦᑲᓈᑳᕽ ᐁᔑ ᐊᔪᑸᓄᓂᒡ ᐯᒫᑎᓯᓂᒡ᙮ 22 ᐋᓃᓐ ᒥᓂᒃ ᑮᓇᐙ ᑫᑮᐹᑎᓯᔦᒃ ᐙᓵᑭᑑᔦᒃ ᑭᑲᑮᐹᑎᓯᐎᓂᐙ? ᐋᓃᓐ ᒥᓂᒃ ᑮᓇᐙ ᑳᓂᑖ ᒦᑭᓱᑖᑯᓯᔦᒃ ᐙᓵᑭᑑᔦᒃ ᑭᒦᑭᓱᑖᑯᓯᐎᓂᐙ, ᐃᑭ ᑲᔦ ᑳᒪᒋ ᑲᑮᐹᑎᓯᐙᒡ ᐙᔒᑫᑕᒧᐙᒡ ᑭᑫᑕᒫᐎᓐ? 23 ᑮᔥᐱᓐ ᐱᓯᑕᒪᓐ ᐁᔑ ᑭᒋ ᑲᓅᓂᓈᓐ, ᑾᔭᒃ ᐃᓇᑫ ᑭᑲᐃᓂᓐ ᑫᐃᔑᒋᑫᔭᓐ᙮ ᑲᔦ ᑕᔥ ᑭᑲ ᑑᑕᐎᓐ ᒋᑭᑫᑕᒪᓐ ᐋᓃᓐ ᐁᓀᑕᒫᓐ᙮ 24 ᐋᓇ ᑕᔥ ᐁᑲᓅᓂᓈᓐ, ᐋᓇ ᑲᔦ ᐁᐊᑐᒥᓈᓐ, ᑳᐐᓐ ᑭᓅᑕᓰ᙮ ᑳᐐᓐ ᑲᔦ ᑭᐱᓯᑕᓰ᙮ 25 ᑳᐐᓐ ᑭᐸᐹᒥᑕᓰ ᐋᓇ ᑲᓅᓂᓈᓐ ᐋᓃᓐ ᑫᐃᔑᒋᑫᔭᓐ, ᑳᐐᓐ ᑲᔦ ᑭᑎᓀᑕᓰ ᒋᐱᓯᑕᒪᓐ ᐋᓇᑮᒫᒦᓄᒥᑰᔭᓐ᙮ 26 ᐊᐲ ᑕᔥ ᒫᔑᓭᐎᓐ ᐅᑎᓯᑯᔭᓐ, ᑭᑲ ᐹᐱᐃᓐ, ᑭᑲ ᒦᑭᓱᒥᓐ ᑲᔦ ᑭᒋ ᐗᓯᑖᐎᓭᐎᓐ ᐅᑎᓯᑯᔭᓐ᙮ 27 ᐊᐲ ᐅᑎᓯᑯᔭᓐ ᒫᔑᓭᐎᓐ ᑖᐱᔥᑰ ᑮᑭᒋ ᐸᑲᒫᓂᒪᒃ, ᑖᐱᔥᑰ ᑮᑭᔑᐹᔮᓂᒪᒃ ᑮᐃᓀᑖᑾᒃ, ᐊᐲ ᓴᑯ ᐐᓴᑫᑕᒪᓐ, ᑲᒀᑕᑫᑕᒪᓐ ᑲᔦ᙮ 28 ᒦᑕᔥ ᓇᓇᐹᐎᔥ ᑫᔑ ᑲᓅᔑᔭᓐ, ᑳᐐᓐ ᐃᑕᔥ ᑭᑲ ᓇᑴᑕᐎᓯᓅᓐ᙮ ᒥᓯᐌ ᓴ ᐱᑯ ᑭᑲ ᐃᔑ ᑲᑴ ᒥᑲᐎᔥ, ᑳᐐᓐ ᐃᑕᔥ ᑭᑲ ᒥᑲᐎᓰ᙮ 29 ᑭᔒᑫᑖᓐ ᐄᑐᒃ ᑲᑮᑖᐌᑕᒧᐎᓐ, ᑳᐐᓐ ᑲᔦ ᑭᑎᓀᑕᓰ ᒋᑯᑖᓀᓂᒪᒡ ᑳᑎᐯᒋᑫᒡ᙮ 30 ᑳᐐᓐ ᑲᔦ ᐐᑳ ᑭᓅᑕᓰ ᑮᑲᓅᓂᑰᔭᓐ ᑫᐃᔑᒋᑫᔭᓐ, ᑳᐐᓐ ᑲᔦ ᑭᐱᓯᑕᓰ ᑮᒫᒦᓄᒥᑰᔭᓐ᙮ 31 ᒦᑕᔥ ᒋᐅᑎᓯᑯᔭᓐ ᐋᓃᓐ ᐁᔑ ᑲᔥᑭᑕᒫᓱᔭᓐ, ᑮᓐ ᐱᑯ ᑭᑎᔑᒋᑫᐎᓂᕽ ᑭᑲᐅᒋ ᒫᔑᓭ᙮ 32 ᐃᐃ ᓴ ᐅᑎᔑᐌᐱᓯᐎᓂᐙᓐ ᑕᐅᒋ ᓂᐳᐗᒃ ᑫᑫᑕᓯᒀ ᑫᑰᓐ᙮ ᐃᑭ ᑲᔦ ᑳᒪᒋ ᑲᑮᐹᑎᓯᐙᒡ ᑕᐅᒋ ᓂᔑᐗᓈᑎᓯᐗᒃ ᐁᐸᐹᐱᓯᔅᑫᑕᓯᒀ ᑫᑰᓐ᙮ 33 ᐊᐌᑴᓐ ᐃᑕᔥ ᐃᑯ ᑫᐱᓯᑕᐎᒡ ᐌᐌᓂ ᐱᓵᓐ ᑕᐱᒫᑎᓯ᙮ ᑳᐐᓐ ᑫᑰᓐ ᐅᑲ ᐸᐹᒣᓂᒥᑰᓰᓐ, ᑳᐐᓐ ᑫᑰᓐ ᐅᑲ ᑯᑕᓰᓐ ᑫᐅᒋ ᐐᓴᑫᑕᕽ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society