Oroot 3 - ᐅᒋᐺ ᑭᒋᒪᓯᓇᐃᑲᓐᐅᕒᐆᑦ ᑮᒥᑲᐙᒡ ᑫᐅᓈᐯᒥᒡ 1 ᓀᔫᒦ Naomi ᑕᔥ ᐅᑮᐃᓈᓐ ᐅᔑᒥᓴᓐ, ᒦ ᓴ ᐃ ᐁᔑᓈᑾᒃ ᒋᒥᑲᐗᑭᐸᓐ ᑫᐅᓈᐯᒥᔭᓐ, ᑮᓐ ᓴ ᐱᑯ ᒋᐊᔮᔭᓐ ᑫᐃᔑᑖᔭᓐ᙮ 2 ᐊᐊ ᐅᔕ ᐴᐙᔅ Boaz ᑳᐃᓇᐌᒪᕽ ᑳᑮ ᐐᑕᓄᑮᒥᒪᒡ ᑳᐃᑴᐎᓂᒡ ᐅᑕᓄᑮᐋᑲᓇᐞ, ᐅᓈᑯᔑᓂᓂᒃ ᐄᑐᒃ ᐅᐐ ᑭᓰᔮᔑᒫᓐ ᐸᕒᓬᐄ ᑎᓄ ᒪᓅᒥᓇᓐ ᐌᑎ ᑳᑕᔑ ᐸᐗᑲᓈᓱᓂᒡ ᐸᕒᓬᐄ ᑎᓄ ᒪᓅᒥᓇᓐ᙮ 3 ᑕᑲ ᓴ ᑭᓰᓯᐸᓂᑎᓱᓐ, ᒥᓈᑯᐅᑎᓱᓐ ᑲᔦ᙮ ᒫᐗᒡ ᐃᑯ ᐌᓂᔑᔑᑭᓐ ᑭᑭᑭᔥᑭᑲᓇᓐ ᐱᓯᑲᒨᑲᓐ, ᒋᐃᔖᔭᓐ ᐋᓃᑎ ᐙᑕᔑ ᐸᐗᑲᓈᒋᑫᓈᓂᐗᕽ᙮ ᑭᑲ ᒪᓈ ᑭᑫᓂᒥᒃ ᐌᑎ ᐁᐊᔮᐗᒡ ᐲᓂᔥ ᒋᐃᔥᒀ ᐐᓯᓂᒡ, ᐲᓂᔥ ᑲᔦ ᒋᐃᔥᒀ ᒥᓂᑴᒡ᙮ 4 ᑲᑴ ᑭᑫᓂᒫᑲᓐ ᐃᑕᔥ ᐋᑎ ᑫᔑ ᑲᐎᔑᒧᒡ, ᑮᐃᔥᒀ ᑲᐎᔑᒧᒡ ᐃᑕᔥ, ᑭᑲ ᓈᓯᑲᐙ ᐁᔑ ᐱᒥᔑᕽ᙮ ᐹᑮᑭᐱᓈᑲᓐ ᐁᔑ ᓯᑌᔑᕽ, ᒦ ᓴ ᑕᔥ ᐃᐃᒫ ᑫᔑ ᐱᒥᔑᓇᓐ᙮ ᒦᑕᔥ ᐃᐃ ᐊᐲ ᑫᐐᑕᒪᐎᒃ ᐋᓃᓐ ᑫᐃᔑᒋᑫᐗᒡ, ᒦ ᐃ ᑳᑮᐃᓈᒡ᙮ 5 ᒦᔥ ᐅᕒᐆᑦ Ruth ᑳᐃᓈᒡ ᐅᓯᑯᓴᓐ, ᑲᑭᓇ ᓴ ᑳᐃᔑᔭᓐ ᓂᑲ ᐃᔑᒋᑫ, ᐅᑮᐃᓈᓐ᙮ 6 ᒦᔥ ᐅᕒᐆᑦ ᑳᑮ ᐃᔖᒡ ᑳᑮ ᑕᔑ ᐸᐗᑲᓈᓱᓂᒡ ᐸᕒᓬᐄ ᑎᓄ ᒪᓅᒥᓇᓐ, ᐁᑮ ᐃᔑᒋᑫᒡ ᑲᑭᓇ ᑳᑮ ᐃᔑ ᐊᓅᓂᑯᒡ ᐅᓯᑯᓴᓐ᙮ 7 ᐊᐲ ᑕᔥ ᐴᐙᓴᓐ ᐁᑮ ᐃᔥᒀ ᐐᓯᓂᓂᒡ, ᐁᑮ ᐃᔥᒀ ᒥᓂᑴᓂᒡ ᑲᔦ ᐋᐱᒋ ᑮᒌᑲᒪᒋᐅᐗᓐ᙮ ᒦᑕᔥ ᑳᑮ ᐃᔖᓂᒡ ᐁᑮ ᐊᑕ ᓂᐹᓂᒡ ᐁᔑ ᐅᑯᓯᓂᓂᑭᓐ ᐸᕒᓬᐄ ᑎᓄ ᒪᓅᒥᓇᓐ᙮ ᒦ ᓴ ᑕᔥ ᐃᐃ ᐊᐲ ᐅᕒᐆᑦ ᑳᑮ ᑮᒨᒋ ᓈᓯᑲᐙᒡ ᐁᔑ ᐱᒥᔑᓂᓂᒡ᙮ ᒦᑕᔥ ᑳᐃᔑ ᐹᑮᑭᐱᓈᒡ ᐁᔑ ᓯᑌᔑᓂᓂᒡ, ᒦᔥ ᐃᐃᒫ ᑳᐃᔑ ᐱᒥᔑᕽ᙮ 8 ᐁᐋᐱᑖ ᑎᐱᑲᓂᓂᒃ ᑕᔥ ᐴᐙᔅ ᑮᑯᔥᑯᓯ ᐁᑮ ᑴᑭᔑᕽ, ᑮᑯᔥᑴᑕᒻ ᑕᔥ ᐐᑫ ᐁᑮ ᒥᑲᐙᒡ ᐃᑴᐗᓐ ᐁᐱᒥᔑᓂᓂᒡ ᐁᔑ ᓯᑌᔑᕽ᙮ 9 ᒦᔥ ᑳᐃᑭᑐᒡ, ᐊᐌᓀᓐ ᑮᓐ, ᑮᐃᑭᑐ᙮ ᐊᐊ ᑕᔥ ᐃᑴ ᑮᐃᔑ ᓇᑴᑕᒻ, ᓃᓐ ᐅᕒᐆᑦ ᑳᑮ ᐊᓄᑮᑕᐎᓈᓐ᙮ ᑕᑲ ᐊᑾᓇᐅᔑᓐ ᐃᐃ ᑳᐊᑾᓃᔭᓐ, ᑮᓐ ᐄᑐᒃ ᐯᔓ ᑭᑎᓇᐌᒥᓐ, ᑮᐃᑭᑐ᙮ 10 ᒦᔥ ᐅᐅ ᐴᐙᔅ ᑳᐃᓈᒡ, ᑳᑎᐯᒋᑫᒡ ᓴ ᑭᔕᐌᓂᒥᒃ, ᒦᑕᔥ ᐅᐅᒫ ᐁᔑ ᓈᑯᑑᔭᓐ ᐅᐅ ᓅᑯᒻ ᐃᔥᒀᒡ ᑳᐃᔑᒋᑫᔭᓐ ᓇᐗᒡ ᐁᑭᒋ ᐃᓀᑖᑾᒃ ᐊᐲᒡ ᐐᓐ ᐃᐃ ᓂᑕᒻ ᑳᑮ ᐃᔑᒋᑫᔭᓐ᙮ ᐁᑮ ᑲᑴ ᑲᔥᑭᐋᓯᐗᑣ ᐅᔥᑭᓃᑭᐗᒃ ᑳᐌᓅᑎᓯᐙᒡ, ᐃᑭ ᑲᔦ ᑳᑭᑎᒫᑭᓯᐙᒡ᙮ 11 ᐅᕒᐆᑦ ᑫᑯ ᑕᔥ ᓭᑭᓯᑫᓐ, ᓂᑲ ᐃᔑᒋᑫ ᓴ ᐋᓃᓐ ᑳᔑ ᑲᑴᒋᒥᔭᓐ᙮ ᑲᑭᓇ ᑲᔦ ᐯᒫᑎᓯᐙᒡ ᐅᐅᒫ ᐆᑌᓈᕽ ᑭᑭᑫᓂᒥᑰᒃ ᐐᑫ ᐁᓴᓭᑳ ᐃᑴᐎᔭᓐ᙮ 12 ᑌᐺ ᓴ ᐯᔓ ᑭᑎᓇᐌᒥᓐ, ᔖᑰᒡ ᐃᑕᔥ ᐊᔮ ᐯᔑᒃ ᐃᓂᓂ ᓇᐗᒡ ᐯᔓ ᐁᓇᐌᒥᒃ᙮ 13 ᒦᑕᔥ ᐅᐅᒫ ᐊᔮᓐ ᑲᐯᑎᐱᒃ᙮ ᑭᔐᐹᐗᑲᒃ ᐃᑕᔥ ᑭᑲ ᑭᑫᑖᒥᓐ ᑕᑲ ᒋᐐ ᐅᑖᐱᓂᓄᑴᓐ ᒋᓈᓈᑲᒋᐃᒃ᙮ ᑮᔥᐱᓐ ᑕᔥ ᐃᓀᑕᕽ ᒋᓈᓈᑲᒋᐃᒃ, ᒦ ᐃᐌ ᑾᔭᒃ, ᒫᓄ ᓴ ᑭᑲ ᓈᓈᑲᒋᐃᒃ᙮ ᑮᔥᐱᓐ ᐃᑕᔥ ᐐᓐ ᐃᓀᑕᓯᒃ ᒋᐅᑖᐱᓂᒃ, ᑫᒋᓈᒡ ᐃᑯ ᐁᑫᒋᓈᐅᔮᓐ ᑳᑎᐯᒋᑫᒡ ᐐᓐ ᒥᓯᐌ ᐁᑎᐯᒋᑫᒡ, ᑭᑕᔓᑕᒪᐎᓐ ᓃᓐ ᓴ ᐱᑯ ᑭᑲ ᐅᑖᐱᓂᓐ ᒋᓈᓈᑲᒋᐃᓈᓐ᙮ ᒦᑕᔥ ᐃᐃᒫ ᐃᔑ ᐱᒥᔑᓂᓐ ᐲᓂᔥ ᒋᐙᐸᕽ, ᑮᐃᑭᑐ᙮ 14 ᒦᑕᔥ ᐃᐃᒫ ᐅᕒᐆᑕᓐ ᑳᐃᔑ ᐱᒥᔑᓂᓂᒡ ᐁᔑ ᓯᑌᔑᕽ᙮ ᐐᐸ ᑕᔥ ᒋᑆ ᐲᑖᐸᓂᓂᒃ ᑮᐗᓂᔥᑳᐗᓐ ᒋᑆ ᓂᓯᑕᐎᓇᐎᒥᓐᒡ᙮ ᒦᔥ ᐴᐙᔅ ᑳᐃᓈᒡ, ᑕᑲ ᑕᒪᓈ ᑭᑫᑖᑾᓐ ᐃᑴ ᐁᑮ ᐲᔖᒡ ᐅᐅᒫ ᑳᑕᔑ ᐸᐗᑲᓈᒋᑫᕽ, ᑮᐃᑭᑐ᙮ 15 ᒦᔥ ᐴᐙᔅ ᑳᐊᓂᐃᓈᒡ ᐅᕒᐆᑕᓐ, ᒦᔑᔑᓐ ᐃᐃ ᑳᑲᔥᑮᑮᔭᓐ, ᒋᑕᔗᑭᓇᒪᓐ, ᐅᑮᐃᓈᓐ᙮ ᒦᔥ ᑳᐃᔑᒋᑫᓂᒡ᙮ ᒦᔥ ᐃᐃᒫ ᑳᔑ ᑲᔥᑮᑭᓇᕽ ᓈᓂᒥᑕᓇ ᑕᓱ ᑎᐹᐲᔥᑰᒋᑲᓐ ᐸᕒᓬᐄ ᑎᓄ ᒪᓅᒥᓇᓐ ᒋᑮᐌᐎᓈᓂᒡ, ᒦᔥ ᑳᐃᔑ ᐱᒋᐗᓀᐋᒡ᙮ ᒦᑕᔥ ᐅᕒᐆᑦ ᐆᑌᓈᕽ ᑳᑮ ᐃᔑ ᑮᐌᒡ᙮ 16 ᐊᐲ ᑕᔥ ᑳᐱ ᑕᑯᔑᕽ ᐅᑖᐎᓂᕽ ᐅᓯᑯᓴᓐ ᐅᑮᐃᑰᓐ, ᐋᓃᓐ ᑕᔥ ᑳᐊᔨᔒᔭᓐ? ᐅᑮᐃᑰᓐ᙮ ᒦᔥ ᐅᕒᐆᑦ ᑳᑮ ᐐᑕᒪᐙᒡ ᐋᓃᓐ ᑳᐃᔑ ᐐᑑᑳᑯᒡ ᐃᓂ ᐴᐙᓴᓐ᙮ 17 ᒦᑕᔥ ᑲᔦ ᑳᐊᓂ ᐃᑭᑐᒡ, ᐃᓇᔥᑫ ᑲᔦ ᓈᓂᒥᑕᓇ ᑕᓱ ᑎᐹᐲᔥᑰᒋᑲᓐ ᐸᕒᓬᐄ ᑎᓄ ᒪᓅᒥᓇᓐ ᓂᑮ ᒦᓂᒃ᙮ ᐋᓃᔥ ᑮᐃᑭᑐ, ᑳᐐᓐ ᑕᐅᓂᔑᔑᓯᓅᓐ ᒋᐸᑲᒥᓇᓇᐎᓯᔭᐸᓐ, ᐅᑮᐃᓈᓐ᙮ 18 ᒦᔥ ᓀᔫᒦᐗᓐ ᑳᐃᑯᒡ, ᓂᔑᒥᔅ, ᐱᓇᒫ ᐊᑲᐙᐅᓐ ᑕᑲ ᑫᐃᔑᓭᑴᓐ ᑫᑰᓐ᙮ ᑳᐐᓐ ᐅᔕ ᐴᐙᔅ ᑕᐊᓉᐱᓰ ᐹᓂᒫ ᑮᓇᓇᐊᑑᒡ ᑲᑭᓇ ᑫᑰᓐ, ᐅᑮᐃᑰᓐ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society