Oroot 2 - ᐅᒋᐺ ᑭᒋᒪᓯᓇᐃᑲᓐᐅᕒᐆᑦ ᑮᒨᔕᑭᓂᑫᒡ ᐅᑭᑎᑫᐗᑲᒥᑯᓃᕽ ᐴᐙᓴᓐ 1 ᓀᔫᒦ Naomi ᑕᔥ ᑮᐊᔮᐙᓐ ᐅᑎᓇᐌᒫᑲᓇᓐ, ᐅᓈᐯᒥᐸᓃᕽ ᐁᑮ ᐅᒋ ᐃᓇᐌᒫᒡ, ᐴᐙᔅ Boaz ᐁᑮ ᐃᔑᓂᑳᓱᓂᒡ᙮ ᐊᐊ ᑕᔥ ᐃᓂᓂ ᐐᑫ ᑮᐌᓅᑎᓯ, ᐐᑫ ᑲᔦ ᑮᒪᔥᑲᐌᑖᑯᓯ᙮ ᑮᐅᑕᑳᓀᓯ ᑲᔦ ᑳᑮ ᐅᑕᑳᓀᓯᓂᒡ ᐄᓬᐃᒣᓬᐁᑯᐸᓀᓐ Elimelech᙮ 2 ᐋᐱᑎᕽ ᑕᔥ ᐁᑮᔑᑲᓂᓂᒃ ᐅᕒᐆᑦ Ruth ᒨᐗᑉ ᐃᑴ Moabitess ᐅᑮᐃᓈᓐ ᓀᔫᒦᐗᓐ, ᑕᑲ ᐸᑭᑎᓂᔑᓐ ᒌᔖᔮᓐ ᑭᑎᑫᐗᑲᒥᑯᕽ ᒋᓂ ᒨᔕᑭᓇᒫᓐ ᐸᕒᓬᐄ ᑎᓄ ᒪᓅᒥᓇᓐ ᑳᐸᓂᓈᐙᒡ ᐃᑭ ᑳᒨᔕᑭᓂᑫᐙᒡ᙮ ᐊᐎᔭ ᒫᐐᓐ ᓂᑲ ᒥᑲᐙ ᑫᒥᓍᐸᒥᒡ ᒋᐱᒥᓂᔕᐗᒃ, ᐅᑮᐃᓈᓐ᙮ ᒦᔥ ᓀᔫᒦᐗᓐ ᑳᐃᔑ ᓇᑴᑖᑯᒡ, ᓂᔑᒥᔅ, ᐱᓵᓐ ᐃᔖᓐ᙮ 3 ᒦᑕᔥ ᐅᕒᐆᑦ ᑳᐃᔑ ᒫᒑᒡ ᐁᑮ ᐃᔖᒡ ᑭᑎᑫᐗᑲᒥᑯᕽ᙮ ᐅᑮ ᐱᒥᓂᔕᐙᐞ ᐃᑕᔥ ᑳᑮ ᒨᔕᑭᓂᑫᓂᒡ ᐁᑮ ᐊᓂ ᒨᔕᑭᓇᕽ ᑳᑮ ᐱᓂᓇᒥᓂᒡ᙮ ᓇᐃᑖᒃ ᐄᑐᒃ ᑮᐃᔖ ᑭᑎᑫᐗᑲᒥᑯᕽ ᑳᑮ ᑎᐯᑕᒥᓂᒡ ᐴᐙᓴᓐ ᑳᑮ ᐐᒋ ᐅᑕᑳᓀᓯᒫᓂᒡ ᐄᓬᐃᒣᓬᐁᑯᐸᓀᓐ᙮ 4 ᓈᓈᑫ ᑕᔥ ᐴᐙᔅ ᐯᑕᓬᐃᐁᒥᕽ Bethlehem ᑮᐱᐅᒋ ᑕᑯᔑᓐ, ᒦᔥ ᑳᐃᓈᒡ ᐅᒨᔕᑭᓂᑫᐞ, ᑕᑲ ᑳᑎᐯᒋᑫᒡ ᑭᑲ ᐐᒌᐎᑯᐙ᙮ ᒦᑕᔥ ᑳᐃᔑ ᓇᑴᑖᑯᒡ, ᑕᑲ ᑳᑎᐯᒋᑫᒡ ᑭᑲ ᔕᐌᓂᒥᒃ᙮ 5 ᒦᑕᔥ ᐴᐙᔅ ᑳᑮ ᑲᑴᒋᒫᒡ ᐅᑕᓄᑮᐋᑲᓇᓐ ᑳᑮ ᓃᑳᓃᑕᒪᐙᓂᒡ ᐅᒪᓂᔑᑫᐞ, ᐊᐌᓀᓐ ᐊᐊ ᑎᓄ ᐅᔥᑭᓃᑭᑴ, ᐅᑮᐃᓈᓐ᙮ 6 ᒦᑕᔥ ᑳᐃᔑ ᓇᑴᑖᑯᒡ, ᒦᐄᑐᒃ ᐊᐊ ᐅᔥᑭᓃᑭᑴ ᒨᐗᑉ ᐊᑮᕽ ᑳᑮ ᐸᑲᒥ ᐐᒌᐙᒡ ᓀᔫᒦᐗᓐ, ᒨᐗᑉ ᐊᑮᕽ ᑮᐱᐅᒋ ᑕᑯᔑᓂᓂᒡ, ᐅᑮᐃᑰᓐ᙮ 7 ᓂᑮ ᑲᑴᒋᒥᒃ ᐅᔕ ᐊᐊ ᐃᑴ ᒋᐸᑭᑎᓇᒃ ᒋᓂ ᒫᒨᔕᑭᓇᕽ ᑳᐱᓂᓇᒥᓂᒡ ᐅᒨᔕᑭᓂᑫᐞ᙮ ᐋᐱᒋ ᐐᐸ ᔐᐹ ᑮᒫᑕᓄᑮ, ᒦᑕᔥ ᐸᔦᔥ ᐁᐊᓉᐱᒡ, ᐊᑲᐙᑌᕽ ᓴ ᓇᓇᒪᑕᐱ, ᐅᑮᐃᑰᓐ᙮ 8 ᐴᐙᔅ ᑕᔥ ᐅᑮᐃᓈᓐ ᐅᕒᐆᑕᓐ, ᐅᔥᑭᓃᑭᑴ, ᐌᐌᓂ ᐱᓯᑕᐎᔑᓐ᙮ ᑫᑯ ᐸᑳᓐ ᑭᑎᑫᐗᑲᒥᑯᕽ ᐃᔖᑫᓐ ᒋᐊᐎ ᒨᔕᑭᓂᑫᔭᓐ, ᒦ ᑲᔦ ᐁᓂᓈᓐ, ᒦ ᐅᒫ ᐊᔮᓐ ᒋᐐᑕᓄᑮᒪᑣ ᐅᑯ ᐃᑴᐗᒃ᙮ 9 ᑲᓇᐙᐸᒻ ᐃᑕᔥ ᐋᓃᑎ ᐁᔑ ᒪᓂᔑᑫᐙᒡ ᒋᐊᓂ ᐱᒥᓂᔕᐗᑣ᙮ ᐌᐌᓂ ᑲᔦ ᓂᑮ ᑲᓅᓈᒃ ᐊᓄᑮᐋᑲᓇᒃ ᑳᐃᓂᓃᐎᐙᒡ ᒋᐸᐹᒣᓂᒥᓯᓄᐎᒀ, ᐐᒥᓂᑴᔭᓐ ᑲᔦ ᐱᓵᓐ ᐃᑯ ᐅᒋ ᒥᓂᑴᓐ ᐃᐃᒫ ᐊᑑᐹᓂᕽ ᐊᓄᑮᐋᑲᓇᒃ ᑳᒨᔥᑭᓀᐸᑑᐙᒡ, ᐅᑮᐃᓈᓐ᙮ 10 ᒦᑕᔥ ᐅᕒᐆᑕᓐ ᑳᑮ ᐊᓂᒥᑯᑖᓂᒡ ᒥᑕᑲᒥᒃ ᐁᓈᓴᒦᒡ ᐴᐙᔅ ᐁᑮᐃᑯᒡ, ᐌᑯᓀᓐ ᑕᔥ ᐌᒋ ᒥᓍᐸᒥᔭᓐ, ᐌᑯᓀᓐ ᑲᔦ ᐌᒋ ᒥᓄᑑᑕᐎᔭᓐ ᐁᒪᔭᑭᓯᔮᓐ? ᐅᑮᐃᑰᓐ᙮ 11 ᒦᔥ ᐅᐅ ᐴᐙᔅ ᑳᐃᓈᒡ, ᑲᑭᓇ ᓴ ᑫᑰᓐ ᓂᐐᑕᒫᑰ ᐋᓃᓐ ᑳᑮ ᐱᑑᑕᐗᒡ ᑭᓯᑯᔅ ᐊᐲ ᑮᐃᔥᒀ ᐱᒫᑎᓯᒡ ᑳᑮ ᐅᓈᐯᒥᔭᓐ᙮ ᐁᑮ ᓇᑲᓇᒡ ᑭᑌᑌ, ᑭᒫᒫ ᑲᔦ ᐁᑮ ᓇᑲᑕᒪᓐ ᑲᔦ ᑭᑕᑮᒻ, ᐅᐅᒫ ᐁᑮ ᐲᔖᔭᓐ ᐁᐐ ᐐᒋ ᐱᒫᑎᓰᒪᑣ ᐐᑳ ᐅᑖᓇᕽ ᑳᑮᐱ ᑭᑫᓂᒫᓯᐗᑣ᙮ 12 ᑕᑲ ᑳᑎᐯᒋᑫᒡ ᑭᑲ ᑎᐸᐊᒫᒃ ᐃᐃ ᑳᐱ ᐃᔑᒋᑫᔭᓐ᙮ ᑕᑲ ᑲᔦ ᑭᑲ ᒨᔥᑭᓀ ᑎᐸᐊᒫᒃ ᐊᐊ ᑳᑎᐯᒋᑫᒡ ᐃᔅᕒᐃᔭᓬᐊᒃ Israel ᑳᐅᑭᔐᒪᓂᑑᒥᐙᒡ, ᐁᐱ ᓈᒋᐸᐃᐙᓇᒡ ᐅᓂᑸᑲᓂᕽ ᒋᐅᒋ ᓈᑕᒪᐎᒃ, ᐅᑮᐃᓈᓐ᙮ 13 ᒦᔥ ᐅᕒᐆᑕᓐ ᑳᐃᔑ ᓇᑴᑖᑯᒡ, ᓂᑑᑭᒫᒻ, ᐁᑕᑕᐌ ᓴ ᐌᐌᓂ ᑭᒥᓄᑑᑕᐎᔥ᙮ ᓂᑑᒋ ᒥᓄᒪᒋᐞ ᑲᔦ ᓅᑳᒡ ᐁᑲᓅᔑᔭᓐ, ᐋᓇᐐᓐ ᓅᑕᐞ ᐁᐋᐲᑌᑖᑯᓯᔮᓐ ᑳᐊᐲᑌᑖᑯᓯᐙᒡ ᑳᐃᑴᐎᐙᒡ ᑭᑕᓄᑮᐋᑲᓇᒃ, ᐅᑮᐃᑰᓐ᙮ 14 ᐊᐲ ᑕᔥ ᐁᐐᓯᓂᓈᓂᐗᓂᓂᒃ ᐴᐙᔅ ᐅᑮᐃᓈᓐ ᐅᕒᐆᑕᓐ, ᐊᐯ ᐅᒫ ᒋᐊᒶᒡ ᐸᑴᔑᑲᓐ, ᒋᐅᒋ ᒉᑭᐲᓇᒡ ᑲᔦ ᑭᐸᑴᔑᑲᓂᒻ ᐅᐅᒫ ᐊᐸᒋᑲᓂᕽ᙮ ᐅᑮ ᐊᔕᒫᓐ ᑕᔥ ᑲᔦ ᒋᒦᒋᓂᒡ ᑳᐅᓵᐙᑭᑌᓂᑭᓐ ᐸᑴᔑᑲᓂᒥᓇᓐ᙮ ᐅᕒᐆᑦ ᑕᔥ ᐅᑮ ᐐᑕᐱᒫᐞ ᐅᒪᓂᔑᑫᐞ, ᐁᑮ ᐐᓯᓂᒡ ᐐᑫ ᐁᑮ ᒥᓄᒪᒋᐅᒡ, ᑮᐃᔥᑯᓭᓂ ᑲᔦ ᒦᒋᒻ ᑳᑮ ᐊᔕᒥᓐᒡ᙮ 15 ᑳᐃᔥᒀ ᐸᓯᑸᓂᒡ ᑕᔥ ᐁᑮ ᐊᐎ ᐊᑕ ᒪᓂᔑᑫᓂᒡ, ᐴᐙᔅ ᐅᑮ ᐃᓈᐞ ᐅᑕᓄᑮᐋᑲᓇᐞ, ᒫᓄ ᐸᑭᑎᓂᒃ ᒋᔑ ᒨᔕᑭᓂᑫᒡ ᐃᐃᒫ ᑳᔑ ᐊᔪᑯᓯᓂᓂᑭᓐ ᑭᑎᑳᓇᓐ᙮ ᑫᑯ ᑲᔦ ᓂᔥᑭ ᑲᓅᓈᑫᒃ᙮ 16 ᐅᒋᑕ ᑲᔦ ᐱᓂᓇᒧᒃ ᐋᓂᑕ ᑭᑎᑳᓇᓐ ᑳᐅᑯᒌᓇᒣᒃ ᑫᐱ ᒨᔕᑭᓇᕽ, ᑫᑯ ᑲᔦ ᑭᔒ ᑲᓅᓈᑫᒃ, ᐅᑮ ᐃᓈᐞ᙮ 17 ᒦᑕᔥ ᐃᐃ ᐅᕒᐆᑦ ᑳᑮ ᒨᔕᑭᓂᑫᒡ ᐃᐃᒫ ᑭᑎᑫᐗᑲᒥᑯᕽ ᐲᓂᔥ ᐁᑮ ᐊᓂ ᐅᓈᑯᔑᓂᓂᒃ᙮ ᒦᑕᔥ ᑳᐃᔑ ᐸᐗᑲᓈᑕᕽ ᑳᑮ ᒨᔕᑭᓇᕽ᙮ ᓃᔥᑕᓇᔑᓈᓇᓐ 25 ᑕᓱ ᑎᐹᐲᔥᑰᒋᑲᓐ ᑮᐅᒌᓂᐗᓐ ᐸᕒᓬᐄ ᑎᓄ ᒪᓅᒥᓇᓐ᙮ 18 ᒦᑕᔥ ᑳᑮ ᑮᐌᐎᑑᒡ ᑳᑮ ᒨᔕᑭᓇᕽ ᐁᑮ ᐃᔖᒡ ᐆᑌᓈᕽ, ᐁᑮ ᐙᐸᑕᐋᒡ ᐅᓯᑯᓴᓐ ᐋᓃᓐ ᒥᓂᒃ ᑳᒨᔕᑭᓂᑫᒡ᙮ ᐁᑮ ᐊᔕᒫᒡ ᑲᔦ ᐃᐃ ᒦᒋᒻ ᑳᑮ ᐃᔥᑯᓭᓂᒃ ᑮᓈᐗᑴ ᐐᓯᓂᐙᒡ᙮ 19 ᒦᔥ ᓀᔫᒦᐗᓐ ᐅᓯᑯᓴᓐ ᐅᑮ ᑲᑴᒋᒥᑰᓐ, ᐋᑎ ᑳᑕᔑ ᒫᒨᔕᑭᓂᑫᔭᓐ ᓅᑯᒻ ᑳᑮᔑᑲᒃ? ᐊᐌᓀᓐ ᑳᑎᐯᑕᕽ ᑭᑎᑳᓇᑲᒥᒃ ᑳᑮ ᑕᓇᓄᑮᔭᓐ? ᑕᑲ, ᐊᐊ ᑳᑮ ᒥᓄᑑᑕᐎᒃ ᑕᔕᐌᑖᑯᓯ, ᐅᑮᐃᑰᓐ᙮ ᒦᔥ ᐅᕒᐆᑦ ᑳᑮ ᐐᑕᒪᐙᒡ ᐅᓯᑯᓴᓐ ᐊᐌᓀᓇᓐ ᑌᐯᑕᒥᓂᒡ ᑳᑮ ᑕᓇᓄᑮᒡ ᐁᑮ ᐃᑭᑐᒡ, ᐊᐊ ᓴ ᐃᓂᓂ ᑳᑎᐯᑕᕽ ᑳᑮ ᑕᓇᓄᑮᔮᓐ ᓅᑯᒻ ᑳᑮᔑᑲᓂᓂᒃ ᐴᐙᔅ ᐃᔑᓂᑳᓱ, ᑮᐃᑭᑐ᙮ 20 ᒦᑕᔥ ᐅᐅ ᓀᔫᒦᐗᓐ ᑳᐃᑭᑐᓂᒡ, ᑕᑲ ᑳᑎᐯᒋᑫᓂᒡ ᐅᑲ ᔕᐌᓂᒥᑰᓐ, ᒨᔕᒃ ᑳᒥᓄᑑᑕᐙᓂᒡ ᐁᔑ ᐊᔓᑕᒪᐙᓂᒡ ᑳᐱᒫᑎᓯᓂᒡ, ᐃᐃ ᑲᔦ ᑳᐱᒫᑎᓯᓯᓂᒃ᙮ ᒦᔥ ᑮᐊᓂ ᐃᑭᑐᓂᒡ, ᐊᐊ ᓴ ᐃᓂᓂ ᐯᔓ ᑭᑎᓇᐌᒫᓈᓐ, ᒦᐞ ᐄᑐᒃ ᐊᐊ ᐯᔑᒃ ᑳᐃᔑᓈᑾᓂᓂᒃ ᒋᓈᓈᑲᒋᐃᓇᑭᐸᓐ, ᑮᐃᑭᑐᐗᓐ᙮ 21 ᒦᑕᔥ ᐅᕒᐆᑦ ᑳᐃᑭᑐᒡ, ᐋᒋᑯ ᑕᔥ ᑲᔦ ᓂᑮᐃᒃ, ᒋᐅᓂᔑᔑᓂᓂᑭᐸᓐ ᐯᔓ ᒋᐐᑕᓄᑮᒥᒪᒃ ᐅᑕᓄᑮᐋᑲᓇᐞ ᐲᓂᔥ ᒋᐊᓂ ᐃᔥᒀᓭᓂᒃ ᐅᐅ ᑳᒪᓂᔑᑫᓈᓂᐗᓂᓂᒃ᙮ 22 ᒦᔥ ᓀᔫᒦᐗᓐ ᐅᓯᑯᓴᓐ ᑳᐃᑯᒡ, ᓂᔑᒥᔅ, ᑖᐅᓂᔑᔑᓐ ᐄᑐᒃ ᒋᐐᑕᓄᑮᒥᒪᑎᐸᓐ ᐃᓂ ᑳᐃᑴᐎᓂᒡ ᐅᑕᓄᑮᐋᑲᓇᐞ᙮ ᒫᑭᔖ ᐸᑳᓐ ᑭᑎᑫᐗᑲᒥᑯᕽ ᐃᔖᔭᓐ ᑭᑕ ᐱᒣᓂᒥᑰ, ᐅᑮᐃᑰᓐ᙮ 23 ᒦᑕᔥ ᐅᕒᐆᑦ ᐯᔓ ᑳᐃᔑ ᐐᑕᓄᑮᒫᒡ ᐃᐃ ᐃᑴᐗᐞ ᐁᑮ ᒨᔕᑭᓂᑫᒡ ᐲᓂᔥ ᐁᑮ ᐊᓂ ᐃᔥᒀᓭᓂᒃ ᑳᑮ ᒪᓂᔑᑲᓂᐎᓂᒡ ᐸᕒᓬᐄ ᑎᓄ ᒪᓅᒥᓇᓐ, ᐸᑴᔑᑲᓂᒥᓇᓐ ᑲᔦ᙮ ᐅᓯᑯᓴᓐ ᓴ ᐅᑮ ᐐᒋ ᐊᔮᒫᓐ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society