Oroot 1 - ᐅᒋᐺ ᑭᒋᒪᓯᓇᐃᑲᓐᐄᓬᐃᒣᓬᐁᒃ ᑮᐃᔑᑯᓯᒡ ᐌᑎ ᒨᐗᑉ ᐊᑮᕽ 1 ᐊᐲ ᑕᔥ ᐃᔅᕒᐃᔭᓬᐊᒃ Israel ᒋᑆ ᐊᔮᐙᐙᒡ ᑭᒋᐅᑭᒫᐞ ᑫᑎᐯᓂᒥᑯᐙᒡ, ᐃᐃᒫ ᓴ ᐊᑮᕽ ᑳᑮ ᐃᔑᐊᔮᐙᒡ ᑳᐐᓐ ᒦᒋᒻ ᑮᐊᔮᓯᓂᓂ ᐋᓃᔥ ᑮᐹᑌᓂ ᐃᐃ ᐊᑮᓂ᙮ ᐯᔑᒃ ᑕᔥ ᑮᐊᔮ ᐃᓂᓂ ᐯᑕᓬᐃᐁᒻ Bethlehem ᐆᑌᓈᕽ, ᒎᑕ Judah ᐊᑮᕽ ᑳᑮ ᐅᒋ ᑎᐯᑖᑾᓂᓂᒃ᙮ ᐊᐊ ᓴ ᐃᓂᓂ ᐅᑮ ᒫᒌᓈᓐ ᐐᐗᓐ, ᐃᐃ ᑲᔦ ᓃᔑᓐ ᐅᑯᓯᓴᐞ ᐁᑮ ᐃᔑᐎᓈᒡ ᐌᑎ ᐁᐐ ᐊᐎ ᐊᔨᑖᒡ ᒨᐗᑉ Moab ᐊᑮᕽ᙮ 2 ᐊᐊ ᓴ ᐃᓂᓂ ᐄᓬᐃᒣᓬᐁᒃ Elimelech ᑮᐃᔑᓂᑳᓱ, ᐐᐗᓐ ᓀᔫᒦ Naomi ᑮᐃᔑᓂᑳᓱᐗᓐ᙮ ᐃᓂ ᑕᔥ ᐯᔑᒃ ᐅᑯᓯᓴᓐ ᒣᓬᐊᓐ Mahlon ᑮᐃᔑᓂᑳᓱᐗᓐ, ᐃᓂ ᑕᔥ ᑯᑕᒃ ᑭᓬᐃᔭᓐ Chilion ᑮᐃᔑᓂᑳᓱᐗᓐ᙮ ᐃᐃᒫ ᓴ ᑳᑮ ᐃᔑ ᐃᓇᐌᑎᓂᒡ ᐁᐸᕒᐊᑦ Ephrath ᑮᐃᔑ ᑎᐯᑖᑯᓯᐗᒃ᙮ ᒣᒀ ᓴ ᑕᔥ ᐌᑎ ᒨᐗᑉ ᐊᑮᕽ ᐁᐊᔮᐙᒡ, 3 ᐄᓬᐃᒣᓬᐁᒃ ᑮᐃᔥᒀᐱᒫᑎᓯ, ᓀᔫᒦᐗᓐ ᑳᑮ ᐐᐎᒡ᙮ ᒦᔥ ᐊᐊ ᐃᑴ ᓀᔫᒦ ᓃᔑᓐ ᐁᑕ ᐅᑯᓯᓴᐞ ᐅᑮ ᐐᒋ ᐊᔮᒥᑰᐞ᙮ 4 ᐃᑭ ᑕᔥ ᐅᑯᓯᓯᒫᒃ ᐅᑮ ᐐᑎᑫᒫᐙᐞ ᐃᑴᐗᐞ ᒨᐗᑉ ᐊᑮᕽ ᐌᒌᓂᒡ᙮ ᐃᓂ ᑕᔥ ᐯᔑᒃ ᐃᑴᐗᓐ ᐅᕒᐸ Orpah ᑮᐃᔑᓂᑳᓱᐗᓐ, ᐃᓂ ᑕᔥ ᑯᑕᒃ ᐃᑴᐗᓐ ᐅᕒᐆᑦ Ruth ᑮᐃᔑᓂᑳᓱᐗᓐ᙮ ᓂᑯᒋ ᑯ ᒥᑖᓱ ᐱᐴᓐ ᐁᐊᓂ ᐃᔑᓭᓂᒃ ᐌᑎ ᑳᑮ ᐃᔑᐊᔮᐙᒡ᙮ 5 ᒥᒋᓃᔥ ᒣᓬᐊᓐ, ᐊᐊ ᑲᔦ ᑭᓬᐃᔭᓐ ᑮᐃᔥᒀ ᐱᒫᑎᓯᐗᒃ᙮ ᒦ ᓴ ᑕᔥ ᐊᐊ ᓀᔫᒦ ᐁᑮ ᒥᒋ ᐯᔑᑯᒡ, ᐋᓃᔥ ᐅᓈᐯᒪᓐ, ᐃᐃ ᑲᔦ ᓃᔑᓐ ᐅᑯᓯᓴᐞ ᑳᐐᓐ ᑮᐱᒫᑎᓯᓰᐗᐞ᙮ ᓀᔫᒦ ᑮᑮᐌᐃᔖᒡ ᐯᑕᓬᐃᐁᒥᕽ 6 ᒣᒀ ᑕᔥ ᓀᔫᒦ Naomi ᒨᐗᑉ Moab ᐊᑮᕽ ᐁᐊᔮᒡ ᑮᓅᑕᒻ ᑳᑎᐯᒋᑫᓂᒡ ᐁᑮ ᒥᓄᓭᐋᓂᒡ ᐅᐱᒫᑎᓰᒥᓂ ᐁᑮ ᒦᓈᓂᒡ ᒦᒋᒻ᙮ ᒦᑕᔥ ᔐᒫᒃ ᑳᑮ ᐅᔒᑖᒡ ᐁᐐ ᑮᐌᒡ, ᐁᐐ ᓇᑲᑕᕽ ᒨᐗᑉ ᐊᑭ᙮ ᐅᔑᒥᓴᐞ ᑲᔦ ᐅᑮ ᐐᒌᐎᑰᐞ᙮ 7 ᒦᑕᔥ ᑳᑮ ᓇᑲᑕᕽ ᐃᐃᒫ ᑳᑮ ᐃᔑ ᐊᔮᒡ, ᓃᔑᓐ ᐅᔑᒥᓴᐞ ᐁᑮ ᐐᒌᐎᑯᒡ, ᐁᑮ ᐃᔖᐙᒡ ᐃᓇᑫ ᐁᔑᐊᔮᓂᒃ ᒎᑕ Judah ᐊᑭ᙮ 8 ᒦᔥ ᓀᔫᒦ ᑳᐃᓈᒡ ᒥᒋᓃᔥ ᐅᔑᒥᓴᐞ, ᑕᑲ ᐊᓂ ᑮᐌᒃ, ᒋᐃᔖᔦᒃ ᐁᔑᐊᔮᐙᒡ ᑭᒫᒫᐙᒃ᙮ ᑕᑲ ᑳᑎᐯᒋᑫᒡ ᑭᑲ ᐃᔑ ᒥᓄᓭᐃᑯᐙ ᑖᐱᔥᑰ ᑳᐱᔑ ᒥᓄᑑᑕᐎᔦᒃ, ᐃᑭ ᑲᔦ ᑳᑮ ᐃᔑ ᒥᓄᑑᑕᐌᒀ ᑳᑮ ᐃᔥᒀ ᐱᒫᑎᓯᐙᒡ᙮ 9 ᑕᑲ ᑲᔦ ᑳᑎᐯᒋᑫᒡ ᑭᑲ ᐃᓀᓂᒥᑯᐙ ᒦᓇᐙ ᒋᐅᓈᐯᒥᔦᒃ, ᒋᐊᔮᔦᒃ ᐋᑎ ᑫᐃᔑᑖᔦᒃ, ᐅᑮ ᐃᓈᐞ᙮ ᒦᔥ ᓀᔫᒦ ᑳᑮ ᐅᒌᒫᒡ ᐅᔑᒥᓴᐞ, ᒦᔥ ᑳᐃᔑ ᑭᒋ ᒪᐎᓂᒡ ᐁᑮ ᑭᔒᐌᓂᒡ᙮ 10 ᒦᑕᔥ ᐅᐅ ᑳᐃᑯᒡ, ᑳᐐᓐ ᓴ ᐃ ᓂᐐ ᐃᔑᒋᑫᓰᒥᓐ᙮ ᑫᒋᓈᒡ ᓴ ᑯ ᑭᐐ ᐐᒌᐎᑰ ᑳᐐ ᑮᐌᓄᑕᐗᑣ ᐃᑭ ᑮᒋᐱᒫᑎᓰᒃ, ᐅᑮᐃᑰᐞ᙮ 11 ᒦᔥ ᐅᐅ ᓀᔫᒦ ᑳᐃᔑ ᓇᑴᑕᐙᒡ ᐅᔑᒥᓴᐞ, ᒫᒑᒃ ᑮᐌᒃ᙮ ᐌᑯᓀᓐ ᑕᔥ ᐙᐅᒋ ᑮᐌ ᐐᒌᐎᔦᒃ? ᓂᑖ ᑲᔥᑭᑑᓐ ᐃᓇ ᒦᓇᐙ ᒋᑮ ᐅᑯᓯᓯᔮᐹᓐ ᐃᐃᒫ ᓂᒥᓴᑖᕽ ᑮᓇᐙ ᑫᑮ ᐅᓈᐯᒥᔦᑭᐸᓐ? 12 ᓂᔑᒥᓴᒃ, ᒫᒑᒃ ᐊᓂ ᑮᐌᒃ, ᐅᓵᒻ ᐄᑐᒃ ᐋᔕ ᓂᑭᒋ ᐊᔭᐋᐤ ᒋᐅᓈᐯᒥᔮᐹᓐ᙮ ᑮᔥᐱᓐ ᐃᑭᑐᔮᓐ ᐁᑕᓀᓂᒧᔮᓐ ᒋᐅᓈᐯᒥᔮᐹᓐ ᐅᓈᑯᔑᒃ, ᒋᐅᑯᓯᓯᔮᓐ ᑲᔦ, 13 ᑭᑖ ᐲᐋᐙᒃ ᐃᓇ ᒋᑮᔑᑭᐙᐸᓐ? ᑳᐐᓐ ᐃᓇ ᑭᑖ ᐅᓈᐯᒥᓰᒻ ᒋᐅᑕᒦ ᐲᐁᒀᐸᓐ ᓂᑯᓯᓴᒃ? ᓂᔑᒥᓴᒃ ᑳᐐᓐ ᐃᐃ ᑕᐃᔑᓈᑾᓯᓅᓐ᙮ ᓇᐗᒡ ᓃᓐ ᓂᑲᒀᑕᑭᓭ ᐊᐲᒡ ᐐᓐ ᑮᓇᐙ, ᑳᑎᐯᒋᑫᒡ ᐄᑐᒃ ᑳᐐᓐ ᓂᒥᓄ ᐐᒌᐎᑯᓰ, ᑮᐃᑭᑐ᙮ 14 ᒦᔥ ᒦᓇᐙ ᐃᑭ ᐅᔑᒥᓯᒫᒃ ᑮᑭᔒᐌᐗᒃ ᐁᑮ ᑭᒋ ᒪᐎᐙᒡ᙮ ᐊᐊ ᑕᔥ ᐅᕒᐸ Orpah ᐅᑮ ᐅᒌᒫᓐ ᐁᑮ ᐴᔔᐋᒡ᙮ ᐊᐊ ᑕᔥ ᐐᓐ ᐅᕒᐆᑦ Ruth ᐅᑮ ᒥᒋᒥᓈᓐ ᐅᓯᑯᓴᓐ᙮ 15 ᒦᑕᔥ ᓀᔫᒦ ᑳᐃᓈᒡ ᐃᓂ ᐅᔑᒥᓴᓐ, ᑭᐙᐸᒫ ᐄᑐᒃ ᐊᐊ ᑮᒋᑴ ᐁᑮᐌ ᓈᓯᑲᐙᒡ ᐅᐐᒋ ᐅᒌᒫᑲᓇᐞ, ᐅᒪᓂᑑᒪᐞ ᑲᔦ᙮ ᑫᑮᓐ ᑕᔥ ᒫᒑᓐ ᒋᐐᒌᐗᒡ ᑮᒋᑴ, ᑮᐃᑭᑐ᙮ 16 ᒦᔥ ᐅᕒᐆᑕᓐ ᑳᐃᔑ ᓇᑴᑖᑯᒡ, ᑫᑯ ᑲᑳᓱᒥᔑᑫᓐ ᒋᓇᑲᓂᓈᓐ, ᒫᓄ ᑲᔦ ᒋᐱᒥᓂᔕᐅᓯᓄᐎᓈᓐ, ᐋᑎ ᓴ ᑯ ᐁᔖᔭᓐ ᓂᑲ ᐃᔖ᙮ ᐋᑎ ᓴ ᑯ ᑫᔑ ᑲᐯᔑᔭᓐ ᑫᓃᓐ ᓂᑲᔑ ᑲᐯᔥ, ᑮᒋᐱᒫᑎᓰᒃ ᓴ ᑫᓃᓐ ᓂᑲ ᐅᐐᒋ ᐱᒫᑎᓰᒫᒃ, ᑭᒪᓂᑑᒻ ᓴ ᑲᔦ ᑫᓃᓐ ᓂᑲ ᐅᒪᓂᑑᒻ᙮ 17 ᐋᑎ ᓴ ᐱᑯ ᑫᔑ ᓂᐳᔭᓐ ᑫᓃᓐ ᓂᑲᔑ ᓂᑉ, ᒦ ᓴ ᑲᔦ ᑫᓃᓐ ᐌᑎ ᑫᔑ ᓂᑾᐅᑰᔮᓐ᙮ ᐱᓵᓐ ᐃᓴ ᑯ ᑳᑎᐯᒋᑫᒡ ᑫᑰᓂᓂ ᓂᑲ ᑑᑖᒃ ᐊᐗᔑᒣ ᑮᔥᐱᓐ ᐸᑭᑎᓇᒫᓐ ᑫᑰᓐ ᒋᐸᑫᐎᓂᑯᔭᕽ᙮ ᓂᐳᐎᓐ ᐃᓴ ᐁᑕ ᑮᓇᐎᓐᑦ ᑭᑲ ᐸᑫᐎᓂᑯᒥᓐ! ᐅᑮᐃᑰᓐ᙮ 18 ᐊᐲ ᑕᔥ ᓀᔫᒦ ᐁᑭᑫᑕᕽ ᐅᕒᐆᑕᓐ ᐁᒪᔥᑲᐌᑕᒥᓂᒡ ᐁᐐ ᐐᒌᐎᑯᒡ, ᒦ ᓴ ᐃ ᐃᑕᐙ ᑳᐐᓐ ᐊᐗᔑᒣ ᑫᑰᓂᓂ ᐅᑮ ᐃᓈᓰᓐ᙮ 19 ᒦᑕᔥ ᑳᐃᔑ ᒫᒑᐙᒡ ᐲᓂᔥ ᐁᑮ ᑕᑯᔑᓄᐙᒡ ᐯᑕᓬᐃᐁᒻ Bethlehem ᐆᑌᓈᕽ᙮ ᐊᐲ ᑕᔥ ᑳᐱᑕᑯᔑᓄᐙᒡ, ᑲᑭᓇ ᐃᐃᒫ ᐆᑌᓈᕽ ᑳᑮᑖᓂᒡ, ᒣᒥᑕᑫ ᑯ ᐃᑴᐗᐞ ᐅᑮ ᐱᓈᓯᑳᑯᐙᐞ ᐁᑮ ᐃᑭᑐᓂᒡ, ᒦᓇ ᐗᐊ ᑌᐺ ᓀᔫᒦ? ᑮᐃᑭᑐᐗᐞ᙮ 20 ᒦᑕᔥ ᓀᔫᒦ ᑳᐃᑭᑐᒡ, ᑫᑯ ᓀᔫᒦ ᐃᔑᓂᑳᓂᔑᑫᒃ᙮ ᒫᕒᐊ Mara ᐃᔑᓂᑳᔑᔑᒃ᙮ ᐅᓵᒻ ᐄᑐᒃ ᑳᒫᐗᒋ ᒪᔥᑲᐎᓰᒡ ᑭᔐᒪᓂᑑ ᓂᒫᔑᐐᒌᐎᒃ᙮ 21 ᓂᑮ ᐌᓅᑎᓯᓈᐸᓐ ᐅᐅᒫ ᑮᐅᒋ ᒫᒑᔮᐹᓐ᙮ ᐅᐅ ᑕᔥ ᑳᑎᐯᒋᑫᒡ ᑳᐱᑮᐌᐎᔑᒡ ᑳᐐᓐ ᑫᑰᓐ ᓂᑕᔮᓰᓐ᙮ ᐌᑯᓀᓐ ᑕᔥ ᓀᔫᒦ ᐌᒋ ᐃᔑᓂᑳᔑᔦᒃ, ᑳᑎᐯᒋᑫᒡ ᑳᒫᐗᒋ ᒪᔥᑲᐎᓰᒡ ᐁᑮ ᓂᐴᐗᑭᒥᒡ, ᐁᑮ ᒦᔑᒡ ᑲᔦ ᒫᔑᓭᐎᓐ, ᑮᐃᑭᑐ᙮ 22 ᒦ ᓴ ᐃ ᑳᐃᔑᓭᒡ ᓀᔫᒦ ᐊᐲ ᒨᐗᑉ ᐊᑮᕽ ᑮᐱᐅᒋ ᑕᑯᔑᕽ, ᑮᐱ ᐐᒌᐙᒡ ᐅᔑᒥᓴᓐ ᐅᕒᐆᑦ ᐁᔑᓂᑳᓱᓂᒡ ᒨᐗᑉ ᐊᑮᕽ ᐌᒌᓂᒡ᙮ ᐃᐃ ᓴ ᑕᔥ ᐊᐲ ᑮᐱ ᑕᑯᔑᓄᐙᒡ ᐯᑕᓬᐃᐁᒥᕽ, ᒦ ᓴ ᐃ ᐋᔕ ᑮᒫᒋᓭᓂᒃ ᒋᒪᓂᔑᑲᓂᐎᓂᒡ ᐸᕒᓬᐄ barley ᑎᓄ ᒪᓅᒥᓇᓐ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society