ᐊᑭᑖᓱᓇᓐ 6 - ᐅᒋᐺ ᑭᒋᒪᓯᓇᐃᑲᓐᑫᐃᔑᒋᑫᐙᒡ ᓈᓰᕒ ᑌᓄᐎᐙᒡ 1 ᒦᑕᔥ ᐅᐅ ᒨᓯᔅ Moses ᑳᐃᑯᒡ ᑳᑎᐯᒋᑫᓂᒡ, 2 ᐅᐅ ᓴ ᑭᑲᐃᓈᒃ ᐃᔅᕒᐃᔭᓬᐊᒃ Israel᙮ ᐊᐲ ᓴ ᑯ ᐃᓂᓂ, ᑯᒫ ᑲᔦ ᐃᑴ ᒣᒥᑕᑫᐎ ᐊᐱᒧᒡ, ᐃᔑ ᐊᐱᒧᒡ ᓈᓰᕒ Nazirite ᒋᑎᓄᐎᒡ, ᑫᐸᑳᓀᑖᑯᓯᐃᑎᓱᒡ ᑳᑎᐯᒋᑫᓂᒡ ᒋᑎᐱᓇᐌᐎᓰᒥᑯᒡ, 3 ᑕᒪᓈ ᒥᓂᑴ ᓴ ᔔᒥᓈᐴᓂ᙮ ᑳᐐᓐ ᑲᔦ ᒣᔥᑲᐙᑲᒥᓂᓂᒃ ᒥᓂᑴᐎᓐ ᑕᒥᓂᑴᓰ᙮ ᑳᐐᓐ ᑕᒥᓂᑴᓰ ᔒᐙᐴᔅ ᐌᒌᓂᒃ ᔔᒥᓂᕽ, ᐅᑲ ᒪᓈ ᐊᒸᐞ ᑲᔦ ᐅᔥᑭ ᔔᒥᓇᐞ, ᑳᐹᓱᓂᒡ ᑲᔦ᙮ 4 ᒥᓂᒃ ᐃᑕᔥ ᐃᑯ ᑫᐸᑳᓀᑖᑯᓯᐃᑎᓱᒡ ᓈᓰᕒ ᒋᑎᓄᐎᐃᑎᓱᒡ ᐅᑲ ᒪᓈ ᒦᒋᓐ ᓴ ᑫᑰᓐ ᐃᑯ ᐌᒋ ᐅᔑᒋᑳᑌᓂᒃ ᔔᒥᓂᕽ, ᑯᒫ ᑲᔦ ᐊᑲᑖᒥᓂᕽ, ᑯᒫ ᑲᔦ ᐱᔕᑭᐱᒋᑲᓂᕽ᙮ 5 ᒥᓂᒃ ᐃᑕᔥ ᐃᑯ ᑫᐸᑳᓀᑖᑯᓯᐃᑎᓱᒡ ᐐᑳ ᒋᐸᔥᒀᑯᑎᒀᓀᓯᒃ ᒋᑳᔥᑭᐹᓱᓯᒃ ᑲᔦ᙮ ᒦ ᓴ ᐃ ᐁᔑᓈᑾᓂᓂᒃ ᒥᓂᒃ ᐃᑯ ᒋᑎᐯᓂᒥᑯᒡ ᑳᑎᐯᒋᑫᓂᒡ ᐱᓵᓐ ᑲᔦ ᑕᑭᓍᓂᑴ᙮ ᐹᓂᒫ ᑕᔥ ᐅᒋᒋᓭᓂᒃ ᒥᓂᒃ ᑳᑮ ᐃᑭᑐᒡ ᒋᐸᑳᓀᑖᑯᓯᐃᑎᓱᒡ, ᒦᔥ ᐃᐃ ᐸᔦᔥ ᐃᐃ ᒋᐴᓂᓭᓂᒃ ᐅᑎᔑᑣᐎᓐ᙮ 6 ᒥᓂᒃ ᐃᑕᔥ ᐃᑯ ᓈᓰᕒ ᑫᑎᓄᐎᒡ ᐅᑲ ᒪᓈ ᓈᓯᑲᐙᓐ ᐊᐎᔭᓐ ᑳᓂᐳᓂᒡ᙮ 7 ᒥᓴᐙ ᓴ ᑯ ᐅᑌᑌᓐ, ᐅᒫᒫᓐ, ᐐᒋᑭᐌᔭᓐ, ᐅᑕᐌᒫᓐ ᑲᔦ ᓂᐳᓂᒡ ᑕᒪᓈ ᐃᔖ ᑫᐅᒋ ᐐᓀᑖᑯᓯᐃᑎᓱᒡ᙮ ᐐᓂᓯᓴᓐ ᐄᑐᒃ ᐅᒋ ᑭᑭᓇᐙᓯᓈᑯᓯ ᑭᔐᒪᓂᑑᓐ ᐁᐸᑳᓀᓂᒥᑯᒡ᙮ 8 ᒥᓂᒃ ᓴ ᑯ ᑫᐸᑳᓀᑖᑯᓯᐃᑎᓱᒡ, ᑳᑎᐯᒋᑫᓂᒡ ᓴ ᐅᑎᐯᓂᒥᑰᓐ᙮ 9 ᑮᔥᐱᓐ ᐃᑕᔥ ᐊᐎᔭᓐ ᑴᑕᑐ ᓂᐳᓂᒡ ᐁᔑᐊᔮᒡ, ᒦ ᓴ ᐃ ᒋᐐᓀᑖᑯᒋᑳᑌᓂᑭᓐ ᐐᓂᓯᓴᓐ ᑳᑮ ᐸᑳᓀᑖᑯᑑᒡ᙮ ᒦᑕᔥ ᐁᔑᓈᑾᓂᓂᒃ ᒋᑳᔥᑭᐹᑑᒡ ᐅᑎᒀᓐ ᐊᐲ ᐯᑫᑖᑯᓯᐃᑎᓱᒡ ᓃᔣᓱᑮᔑᑲᓂᓂᒃ᙮ 10 ᓂᔣᓱᑮᔑᒃ 8 ᐃᑕᔥ ᐁᔑᓭᓂᒃ, ᐅᑲ ᐲᓈᐞ ᓃᔑᓐ ᒪᔭᑭ ᐅᒦᒦᓴᐞ, ᓃᔑᓐ ᑲᔦ ᐅᒦᒦᓴᐞ ᒋᐲᑕᒪᐙᒡ ᐊᓇᒥᐁᐎᑭᒫᓐ ᐃᐃᒫ ᐁᔑ ᐃᔥᒀᑌᒥᐗᓂᓂᒃ ᐃᐃ ᒫᐗᒋᐃᑎᐎ ᐸᒀᓀᑲᒥᒃ᙮ 11 ᒦᑕᔥ ᐃᓂ ᐊᓇᒥᐁᐎᑭᒫᓐ ᒋᐸᑭᑎᓇᒥᓂᒡ ᐃᐃ ᐸᑭᑎᓈᓱᐎᓐ ᒪᒋᑑᑕᒧᐎᓐ ᐌᒋ ᐴᓀᒋᑳᑌᓂᒃ, ᐃᐃ ᑲᔦ ᑯᑕᒃ ᑎᓄ ᑳᐊᒀᑭᓯᑳᑌᓂᒃ ᐸᑭᑎᓈᓱᐎᓐ, ᑫᐅᒋ ᐴᓀᑕᒪᐎᓐᒡ ᐃᐃ ᑳᑮ ᐃᔑ ᒪᒋᐃᔑᒋᑫᒡ ᐁᑮ ᐯᔣᐸᒫᒡ ᓀᐳᓂᒡ᙮ ᒦᑕᔥ ᐯᔑᑾᓐ ᐃᐃ ᑮᔑᑲᓂᓂᒃ ᑫᐯᑫᑖᑯᑑᒡ ᐐᓂᓯᓴᓐ᙮ 12 ᒦᑕᔥ ᒦᓇᐙ ᒋᐃᔑᒋᑫᒡ ᒋᐸᑳᓀᑖᑯᓯᐃᑎᓱᒡ ᑳᑎᐯᒋᑫᓂᒡ ᐅᒋ, ᓈᓰᕒ ᒋᑎᓄᐎᒡ᙮ ᐅᑲ ᐲᓈᓐ ᐃᑕᔥ ᒫᓇᒑᓂᔐᓴᓐ ᒋᐯᔑᑯᐱᐴᓉᓂᒡ ᒋᐸᑭᑎᓈᔂᓈᒡ ᑫᑰᓐ ᑫᐅᒋ ᐊᓈᒣᑖᑯᓯᓯᒃ᙮ ᐃᐃ ᑕᔥ ᐐᓐ ᐅᑖᓈᕽ ᑳᑮ ᐃᔑᑣᒡ ᑳᐐᓐ ᑕᑕᑾᑭᑌᓯᓂᓂ ᐋᓃᔥ ᑮᓅᑌ ᐐᓀᑖᑯᓯ ᒣᒀ ᑮᐸᑳᓀᑖᑯᓯᐃᑎᓱᒡ᙮ 13 ᒦᑕᔥ ᐅᐅ ᐁᓈᑯᓂᓐᒡ ᒋᐃᔑᒋᑫᒡ ᓈᓰᕒ ᑌᓄᐎᐃᑎᓱᒡ ᐊᐲ ᐃᔥᒀᓭᓂᒃ ᑳᑮ ᐃᑭᑐᐸᓐ ᒥᓂᒃ ᐁᐐ ᐸᑳᓀᑖᑯᓯᐃᑎᓱᒡ᙮ ᐅᑲ ᐲᑑᓐ ᓴ ᐃᐃᒫ ᑫᐸᑭᑎᓂᑳᑌᓂᒃ ᐁᔑ ᐃᔥᒀᑌᒥᐗᓂᓂᒃ ᐃᐃ ᒫᐗᒋᐃᑎᐎ ᐸᒀᓀᑲᒥᒃ᙮ 14 ᒦᔥ ᒋᐸᑭᑎᓇᒪᐙᒡ ᑳᑎᐯᒋᑫᓂᒡ ᐃᐃ ᑳᐐ ᐸᑭᑎᓇᕽ: ᐊᔮᐯ ᒫᓇᒑᓂᔐᓴᓐ ᑳᐯᔑᑯᐱᐴᓉᓂᒡ ᓴ ᑫᑰᓐ ᐁᔑ ᒫᑭᓯᓯᓂᒃ ᐅᑲ ᐊᒀᑭᔂᓐ ᒋᐸᑭᑎᓈᓱᐙᑫᒡ᙮ ᑳᐯᔑᑯᐱᐴᓉᓂᒡ ᑲᔦ ᓅᔐ ᒫᓇᒑᓂᔐᓴᓐ ᑫᑰᓐ ᑳᔑ ᒫᑭᓯᓯᓂᒃ ᐅᑲᑮ ᐸᑭᑎᓈᓱᐙᑫᓇᓐ ᑫᐅᒋ ᐴᓀᑕᒪᐎᓐᒡ ᐅᒪᒋᑑᑕᒧᐎᓇᓐ ᐅᒋ᙮ ᐯᔑᒃ ᑲᔦ ᐊᔮᐯ ᒫᓇᒑᓂᔕᓐ ᑫᑰᓐ ᐁᔑ ᒫᑭᓯᓯᓂᒃ ᒋᐸᑭᑎᓈᔂᑕᕽ ᒥᓄ ᐐᒌᑎᐎ ᐸᑭᑎᓈᓱᐎᓐ᙮ 15 ᑕᑯ ᑲᔦ ᐯᔑᑯ ᐗᑕᐲᐗᔥ ᐸᑴᔑᑲᓇᓐ ᐌᐱᓯᑲᓂᐎᓯᓂᒃ, ᐸᑴᔑᑲᓇᓐ ᑲᔦ ᐱᒥᑌᓂ ᑳᑕᑯᓯᑳᑌᓂᒃ, ᑕᑯ ᑲᔦ ᐸᑴᔑᑲᓂᑳᓇᓐ ᑳᐱᐸᑭᓯᓂᒡ ᐱᒥᑌᓂ ᑳᔑᔓᐃᑳᑌᓂᒃ᙮ ᑕᑯᔥ ᑲᔦ ᐸᑴᔑᑲᓂᒥᓂᐎ ᐸᑭᑎᓈᓱᐎᓐ ᔑᑾ ᒥᓂᑴᐎ ᐸᑭᑎᓈᓱᐎᓐ᙮ 16 ᐃᓂ ᑕᔥ ᐊᓇᒥᐁᐎᑭᒫᓐ ᐅᑲ ᐲᑑᓂ ᐁᔑᐊᔮᓂᒡ ᑳᑎᐯᒋᑫᓂᒡ, ᒋᐸᑭᑎᓇᒥᓂᒡ ᐃᐃ ᑫᐅᒋ ᐴᓀᑕᒪᐎᓐᒡ ᐅᒪᒋᑑᑕᒧᐎᓇᓐ, ᒋᐸᑭᑎᓇᒥᓂᒡ ᑲᔦ ᑳᐊᒀᑭᑌᓂᒃ ᑎᓄ ᐸᑭᑎᓈᓱᐎᓐ᙮ 17 ᐅᑲ ᐸᑭᑎᓈᓂ ᑕᔥ ᑲᔦ ᐃᓂ ᒫᓇᒑᓂᔕᓐ ᐁᑮ ᐸᑭᑎᓈᓲᑕᒪᐙᓂᒡ ᑳᑎᐯᒋᑫᓂᒡ ᐃᐃ ᑎᓄ ᒥᓄ ᐐᒌᑎᐎ ᐸᑭᑎᓈᓱᐎᓐ ᐁᑮ ᑕᑯᓈᓂᒡ ᑫᑾᐞ ᐌᐱᓯᑲᓂᐎᓯᓂᒃ; ᒦᑕᔥ ᑲᔦ ᐊᓇᒥᐁᐎᑭᒫᓐ ᑳᐃᔑ ᐸᑭᑎᓇᒥᓂᒡ ᐃᐃ ᐸᑴᔑᑲᓂᒥᓂᐎ ᐸᑭᑎᓈᓱᐎᓐ ᐁᑮ ᑕᑯᓇᒥᓂᒡ ᒥᓂᑴᐎᓐ᙮ 18 ᐊᐊ ᑕᔥ ᓈᓰᕒ ᑳᑎᓄᐎᐃᑎᓱᒡ, ᒦ ᐃᒫ ᐁᔑ ᐃᔥᒀᑌᒥᐗᓂᓂᒃ ᒫᐗᒋᐃᑎᐎ ᐸᒀᓀᑲᒥᒃ ᑫᔑ ᑳᔥᑭᐹᑑᒡ ᐅᑎᒀᓐ ᑳᑮ ᐸᑳᓀᑖᑯᑑᒡ ᒋᒪᓂᔕᕽ ᐐᓂᓯᓴᓐ᙮ ᒦᑕᔥ ᑫᔑ ᒪᒍᑌᐊᕽ ᐃᐃᒫ ᑳᑕᔑ ᐸᑭᑎᓂᑳᑌᓂᒃ ᐃᐃ ᒥᓄ ᐐᒌᑎᐎ ᐸᑭᑎᓈᓱᐎᓐ᙮ 19 ᐊᐊ ᑕᔥ ᐊᓇᒥᐁᐎᑭᒫ ᐅᑲ ᐅᑖᐱᓈᓐ ᐃᐃ ᐊᔮᐯ ᒫᓇᒑᓂᔑᐎ ᐅᑎᓂᒫᑲᓂᓂ ᐊᐲ ᑮᐅᑌᓂᒃ, ᐅᑲ ᐅᒋ ᐅᑖᐱᓈᓐ ᑕᔥ ᑲᔦ ᐃᐃᒫ ᐗᑕᐲᐗᔑᕽ ᐯᔑᒃ ᐃᓂ ᐌᐱᓯᑲᓂᐎᓯᓂᒃ ᑫᑾᓐ, ᐃᓂ ᑲᔦ ᐯᔑᒃ ᐌᐱᓯᑲᓂᐎᓯᓂᒃ ᑳᐱᐸᑭᓯᓂᒡ ᐸᑴᔑᑲᓇᓐ᙮ ᐅᑲ ᒦᓈᓐ ᐃᑕᔥ ᐃᓂ ᓈᓰᕒᐊᓐ ᑌᓄᐎᓂᒡ ᑮᐃᔥᒀ ᑳᔥᑭᐹᑑᓂᒡ ᑳᑮ ᐸᑳᓀᑖᑯᑑᓂᒡ ᐐᓂᓯᓯᓂ᙮ 20 ᐊᐊ ᑕᔥ ᐊᓇᒥᐁᐎᑭᒫ ᐅᑲ ᐅᑖᐱᓈᓇᓐ ᐅᑎᓂᒫᑲᓂᓂ ᑲᔦᔥ ᐸᑴᔑᑲᓇᓐ ᒋᐗᐗᑌᐃᑳᑫᒡ ᐁᓈᓴᒦᓂᒡ ᑳᑎᐯᒋᑫᓂᒡ ᐃᐃ ᑎᓄ ᐸᑭᑎᓈᓱᐎᓂᓂ᙮ ᑭᑌᑖᑾᓂᓂ, ᐐᓐ ᑕᔥ ᐊᓇᒥᐁᐎᑭᒫ ᐅᑎᐯᑖᓇᓐ ᑕᑯ ᑲᔦ ᐅᑲᑮᑲᓂᓂ ᑳᑮ ᐗᐗᑌᐃᑳᑫᒡ ᑕᑯᔥ ᐊᔮᐯ ᒫᓇᒑᓂᔥ ᐅᑆᒥᓂ ᑳᑮ ᐸᑭᑎᓂᑳᑌᓂᒃ᙮ ᒦᑕᔥ ᑳᐸᑳᓀᑖᑯᓯᐃᑎᓱᒡ ᓈᓰᕒ ᑳᑎᓄᐎᒡ ᐸᔦᔥ ᒋᒥᓂᑴᒡ ᔔᒥᓈᐳ᙮ 21 ᒦ ᓴ ᐅᐌ ᐁᓈᑯᓂᓐᒡ ᑫᐃᔑᑣᒡ ᑳᐸᑳᓀᑖᑯᓯᐃᑎᓱᒡ ᓈᓰᕒ ᑳᐊᐱᒧᒡ ᐁᐊᔓᑕᒪᐙᒡ ᑳᑎᐯᒋᑫᓂᒡ ᐁᔑᓯᓂᓂᒃ ᑳᔑ ᐸᑳᓀᑖᑯᓯᐃᑎᓱᒡ, ᐊᐗᔑᒣ ᑕᔥ ᑕᐃᔑᒋᑫ ᑫᐊᑯ ᑲᔥᑭᑑᒡ᙮ ᐅᑲ ᑎᐱᑑᑖᓐ ᓴ ᐃ ᑳᑮ ᐃᔑ ᐊᐱᒧᒡ, ᒋᐃᔑᒋᑫᒡ ᐁᔑᓯᓂᓂᒃ ᐁᓈᑯᓂᒥᓐᒡ ᓈᓰᕒ ᑌᓄᐎᐃᑎᓱᒡ ᒋᐃᔑᑣᓂᒡ, ᐅᑮᐃᑰᓐ ᒋᐃᑭᑐᒡ᙮ ᐊᓇᒥᐁᐎᑭᒫᒃ ᑮᑮᑭᓄᐊᒪᐎᑣ ᑫᐃᑭᑐᐙᒡ 22 ᑳᑎᐯᒋᑫᓂᒡ ᐃᑕᔥ ᒨᓯᔅ Moses ᐅᑮᐃᑰᓐ, 23 ᑲᓅᔥ ᐁᕒᐊᓐ Aaron ᐃᐃ ᑲᔦ ᐅᑯᓯᓴᐞ ᐅᐅ ᒋᐃᓂᒪᒡ᙮ ᒦ ᓴ ᐅ ᑫᐃᑭᑐᔦᒃ ᐊᐲ ᒥᓴᐌᓂᒣᒀ ᐃᔅᕒᐃᔭᓬᐊᒃ Israel ᒋᔕᐌᑖᑯᓯᐙᒡ: 24 ᑕᑲ ᑳᑎᐯᒋᑫᒡ ᑭᑲ ᔕᐌᓂᒥᑯᐙ, ᑭᑲ ᓈᓈᑲᒋᐃᑯᐙ ᑲᔦ; 25 ᑕᑲ ᑲᔦ ᑳᑎᐯᒋᑫᒡ ᑭᑲ ᒥᓄᑑᑖᑯᐙ, ᑭᑲ ᔕᐌᓂᒥᑯᐙ ᑲᔦ; 26 ᑕᑲ ᑲᔦ ᑳᑎᐯᒋᑫᒡ ᑭᑲ ᒥᓍᐸᒥᑯᐙ, ᑭᑲ ᒦᓂᑯᐙ ᑲᔦ ᐱᓵᓂᓯᐎᓐ᙮ 27 ᒦ ᓴ ᑕᔥ ᑕᑯ ᐐᑕᒧᐙᒡ ᓂᐐᓱᐎᓐ ᐊᐲ ᒥᓴᐌᓂᒫᐙᒡ ᐃᔅᕒᐃᔭᓬᐊᐞ ᒋᔕᐌᑖᑯᓯᓂᒡ, ᒦᑕᔥ ᐃᐃ ᒋᔕᐌᓂᒥᒪᒃ, ᐅᑮᐃᑰᓐ ᑳᑎᐯᒋᑫᓂᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society