Nikamonan 84 - ᐅᒋᐺ ᑭᒋᒪᓯᓇᐃᑲᓐᐁᒥᓴᐌᒋᑳᑌᓂᒃ ᑭᔐᒪᓂᑑ ᐅᐙᑳᐃᑲᓐ 1 ᑌᐯᒋᑫᔭᓐ ᑳᒫᐗᒋ ᒪᔥᑲᐎᓰᔮᓐ, ᐁᑕᑕᐌ ᓴ ᑭᒋ ᒥᓄᓈᑾᓐ ᑳᐃᔑᑖᔭᓐ᙮ 2 ᒫᐗᒡ ᐃᑯ ᐁᐊᑕᐌᑕᒫᓐ ᒋᐊᔮᔮᓐ ᐌᑎ! ᓂᒥᓴᐌᑖᓐ ᒋᑮ ᐊᔮᔮᐹᓐ ᑳᔑ ᐙᑳᔮᑯᓂᑳᑌᓂᒃ ᑳᑎᐯᒋᑫᒡ ᐅᑕᓇᒥᐁᐎᑲᒥᒃ; ᐁᓂᑯᑯᑌᐁᐗᒃ ᓴ ᓂᑲ ᓂᑲᒨᑕᒪᐙ ᑳᐱᒫᑎᓯᒡ ᑭᔐᒪᓂᑑ ᐁᐲᒋ ᒌᑫᑕᒧᐗᒃ᙮ 3 ᑌᐯᒋᑫᔭᓐ ᑳᒫᐗᒋ ᒪᔥᑲᐎᓰᔭᓐ, ᓂᑑᑭᒫᒻ, ᑳᐅᑭᔐᒪᓂᑑᒥᒥᓈᓐ, ᐃᓇᔥᑫ ᓴ ᐐᓐ ᐊᐊ ᐅᓵᐎᐱᓀᔒᓐᔥ ᐅᑑᔑᑑᓐ ᑫᐅᐗᓯᓱᓂᒡ; ᔖᔖᐗᓂᐲᓯ ᑲᔦ ᐅᔑᑕᒫᓱ ᐅᐗᓯᓱᓐ ᑫᔑ ᑲᓇᐌᓂᒫᒡ ᐅᐱᓀᔒᔐᓯᒪᐞ ᒌᑲᔭᐄ ᑭᐸᑭᑎᓈᓱᐎᓈᐱᑯᕽ᙮ 4 ᐋᐱᒋ ᓴ ᔕᐌᑖᑯᓯᐗᒃ ᐃᑭ ᑳᐃᔑᑖᐙᒡ ᑭᐙᑳᐃᑲᓂᕽ; ᒨᔕᒃ ᐃᑯ ᑳᐃᓇᐊᒧᐙᒡ ᐁᒦᑴᒋᐌᓂᒥᒀ᙮ 5 ᐋᐱᒋ ᓴ ᔕᐌᑖᑯᓯᐗᒃ ᑳᒪᔥᑲᐎᓰᐊᑣ, ᐅᑌᐃᐙᕽ ᑳᐅᒋ ᐃᓀᑕᒧᐙᒡ ᐁᐐ ᐃᔖᐙᒡ ᐗᒌᕽ ᓵᔭᓐ Zion ᑳᐃᒋᑳᑌᓂᒃ᙮ 6 ᐁᐊᓂ ᐱᒥ ᐊᔮᐙᒡ ᐃᑕᔥ ᑳᔑ ᐸᓴᑎᓈᓂᒃ ᐱᑾᑕᑲᒥᒃ ᐸᑲ Baca ᑳᐃᒋᑳᑌᓂᒃ, ᒦ ᓴ ᐃ ᐁᓂ ᐃᔑ ᒨᑭᒋᐗᓂᓂᒃ ᓂᐱ; ᑳᑭᒥᐗᓂᓂᒃ ᑲᔦ ᒦ ᐃᒫ ᐁᓂ ᐅᒋ ᒨᔥᑭᓀᐲᓂᑭᓐ ᑳᐗᐗᓇᑲᒥᑳᓂᑭᓐ᙮ 7 ᐁᐊᓂ ᐱᒥ ᐊᔮᐙᒡ ᑕᔥ ᒦ ᐃ ᐁᓂ ᐃᔑ ᒪᔥᑲᐙᑎᓯᐙᒡ; ᐲᓂᔥ ᑲᑭᓇ ᒋᓂ ᓈᑯᓯᐙᒡ ᐁᓈᓴᒦᓂᒡ ᑭᔐᒪᓂᑑᓐ ᐁᔮᓂᒡ ᓵᔭᓂᕽ᙮ 8 ᐆ ᑌᐯᒋᑫᔭᓐ ᑭᔐᒪᓂᑑ ᑳᒫᐗᒋ ᒪᔥᑲᐎᓰᔭᓐ, ᒉᑲᑉ Jacob ᑳᐅᑭᔐᒪᓂᑑᒥᒥᒃ, ᓅᑕᐎᔑᓐ ᑳᔑ ᐊᓇᒥᐁᑕᐎᓈᓐ᙮ 9 ᐆ ᑭᔐᒪᓂᑑ, ᑕᑲ ᔕᐌᓂᒻ ᑳᓈᑕᒪᐎᓇᑭᒡ, ᒥᓄ ᑲᓇᐙᐸᒻ ᑲᔦ ᑳᑮ ᐅᓈᐸᒪᒡ᙮ 10 ᐯᔑᑯ ᑮᔑᒃ ᓴ ᑮᐊᔮᕽ ᑭᑕᓇᒥᐁᐎᑲᒥᑯᕽ ᓇᐗᒡ ᐅᓂᔑᔑᓐ ᐊᐲᒡ ᐐᓐ ᑮᐊᔮᕽ ᒥᑖᔂᒃ ᑕᓱ ᑮᔑᒃ ᐸᑳᓐ ᓂᑯᒋ᙮ ᒦᑕᔥ ᓃᓐ ᐁᔑ ᒥᓴᐌᑕᒫᓐ ᓇᐗᒡ ᒋᑲᓇᐌᑕᒫᐹᓐ ᐃᔥᒀᑌᒻ ᐅᐙᑳᐃᑲᓂᕽ ᓂᑭᔐᒪᓂᑑᒻ, ᐊᐲᒡ ᐐᓐ ᒋᐃᔑᑖᐗᑭᐸᓐ ᐅᑖᐎᓂᐙᕽ ᑳᒪᒋᐃᔑᐌᐱᓯᐙᒡ᙮ 11 ᑳᑎᐯᒋᑫᒡ ᑭᔐᒪᓂᑑ ᐄᑐᒃ ᑳᓈᑕᒪᐎᓇᕽ, ᑳᑭᒋ ᐃᓀᑖᑯᓯᒡ ᑲᔦ ᑭᑭᒋᐅᑭᒫᒥᓈᓐ, ᐐᓐ ᐄᑐᒃ ᑳᒥᓍᐸᒥᐌᒡ, ᑳᑭᑌᓂᒥᐌᒡ ᑲᔦ᙮ ᑳᐐᓐ ᓴ ᐅᑭᒋᐎᓇᒪᐙᓰᐞ ᐌᓂᔑᔑᓂᓂᒃ ᐃᐃ ᑾᔭᒃ ᑳᐃᔑᒋᑫᓂᒡ᙮ 12 ᑌᐯᒋᑫᔭᓐ ᑳᒫᐗᒋ ᒪᔥᑲᐌᑖᑯᓯᔭᓐ, ᐋᐱᒋ ᓴ ᔕᐌᑖᑯᓯᐗᒃ ᐃᑭ ᑳᑌᐺᔦᓂᒥᒀ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society