Nikamonan 71 - ᐅᒋᐺ ᑭᒋᒪᓯᓇᐃᑲᓐᐊᑭᐌᓯ ᑫᔑᐊᓇᒥᐋᐸᓐ 1 ᐆ ᑌᐯᒋᑫᔭᓐ ᑮᓐ ᓴ ᑳᓈᒋᐸᐃᐙᓂᓈᓐ; ᑫᑯ ᐸᑭᑎᓂᔑᑫᓐ ᒋᐊᑲᒋ ᔖᑰᒋᐃᑯᔮᓐ᙮ 2 ᑭᑾᔭᒀᑎᓯᐎᓂᕽ ᓴ ᓇᑫ ᐃᔑ ᓈᑕᒪᐎᔑᓐ, ᐃᔑ ᔖᐾᐃᔑᓐ ᑲᔦ; ᓅᑕᐎᔑᓐ ᒋᐱᒫᒋᐃᔭᓐ᙮ 3 ᑮᓐ ᓴ ᑭᑎᓀᑖᑯᔅ ᐊᓯᓃᕽ ᒨᔕᒃ ᑫᓈᒋᐸᐃᐙᓇᒃ; ᐃᔑ ᐊᓅᑮᓐ ᓴ ᒋᐱᒫᒋᐃᑰᔮᓐ, ᑮᓐ ᐄᑐᒃ ᓂᑕᓯᓃᒻ ᑳᓈᒋᐸᐃᐙᓂᓈᓐ, ᓂᑕᐸᐃᐌᐎᑲᒥᒃ ᑲᔦ᙮ 4 ᐆ ᓂᑭᔐᒪᓂᑑᒻ, ᓈᑕᒪᐎᔑᓐ ᐅᒋ ᐁᔑ ᒪᔥᑲᐎᓰᐙᒡ ᒣᒑᑎᓯᐙᒡ, ᒋᑌᐱᓂᓯᒀ ᒣᒑᑎᓯᐙᒡ, ᑳᐋᒀᑎᓯᐙᒡ ᑲᔦ᙮ 5 ᑳᒫᐗᒋ ᑎᐯᒋᑫᔭᓐ, ᑮᓐ ᐅᔕ ᑳᐱ ᐊᐯᓂᒧᓄᑕᐎᓈᓐ; ᑮᐅᔥᑳᑎᓯᔮᓐ ᐃᑯ ᐁᑮ ᐱᐅᒋ ᑌᐺᔦᓂᒥᓈᓐ᙮ 6 ᐊᐸᓀ ᑯ ᐊᐲ ᑳᑮ ᓂᑖᐎᑭᔮᓐ ᑭᑮ ᐱᐅᒋ ᐊᐯᓂᒧᓄᑕᐎᓐ᙮ ᓂᒫᒫ ᑮᑭᑭᔥᑲᐎᒡ ᐁᑮ ᓵᑭᓯᐃᔭᓐ᙮ ᒨᔕᒃ ᐃᑕᔥ ᐃᑯ ᑭᑲ ᒦᑴᒋᐌᓂᒥᓐ᙮ 7 ᓃᐱᐗᐞ ᓴ ᐊᐎᔭᒃ ᓂᒫᒪᑳᑌᓂᒥᑰᒃ, ᑮᓐ ᐃᑕᔥ ᐐᓐ ᒣᔥᑲᐎᓰᒡ ᑳᓈᒋᐸᐃᐙᓇᒃ᙮ 8 ᑳᐐᓐ ᐐᑳ ᑭᑲ ᐴᓂ ᒦᑴᒋᐌᓂᒥᓯᓅᓐ, ᒋᑕᔑᑕᒫᓐ ᑲᐯᑮᔑᒃ ᑭᑭᒋ ᐃᓀᑖᑯᓯᐎᓐ᙮ 9 ᑫᑯ ᑕᔥ ᐌᐱᓂᔑᑫᓐ ᐅᐅ ᑳᐊᑭᐌᓰᐎᔮᓐ; ᑫᑯ ᓇᑲᔑᔑᑫᓐ ᐋᔕ ᐁᐊᓂ ᓃᓇᒫᑎᓯᔮᓐ᙮ 10 ᑳᔒᑫᓂᒥᐙᒡ ᐅᔕ ᓂᒪᒋ ᑕᔑᒥᑰᒃ, ᐁᒫᒪᐎ ᐃᓀᑕᒧᐙᒡ ᐄᓴᓐ ᐁᐐ ᓂᔑᐙᒡ, 11 ᐁᐃᑭᑐᐙᒡ, ᒦ ᓴ ᐃ ᑭᔐᒪᓂᑑᓐ ᑮᓇᑲᓂᑯᒡ, ᑕᑲ ᐱᒥᓂᔕᐙᑖ ᒋᐅᑎᑎᓇᕽ, ᑳᐐᓐ ᐄᑐᒃ ᐃᓈ ᐊᐎᔭᓐ ᐅᑲ ᓈᑕᒫᑯᓰᓐ᙮ 12 ᐆ ᓂᑭᔐᒪᓂᑑᒻ ᑫᑯ ᐙᓴ ᐊᔮᑫᓐ, ᔐᒫᒃ ᐃᑯ ᐱᐐᒋᐃᔑᓐ᙮ 13 ᑕᑲ ᓴ ᐃᑭ ᐁᓈᒥᒥᐙᒡ ᑕᓂᔑᐗᓈᑎᓯᐗᒃ ᒋᐊᑲᒋ ᔖᑰᒋᐃᑣ; ᐃᑭ ᑯᑕ ᐁᑕᐌᑕᒧᐙᒡ ᒋᐗᓯᑖᐎᓭᐗᒃ ᒋᐹᐱᓄᑕᐎᑣ ᒋᑭᒋ ᐃᓀᓂᒫᓯᐎᑣ ᑲᔦ᙮ 14 ᓃᓐ ᐃᑕᔥ ᐐᓐ ᒨᔕᒃ ᓂᑕᔮᓐ ᐊᐯᓂᒧᐎᓐ, ᐋᒌᑫ ᓴ ᑯ ᑭᑲ ᑭᒋ ᒦᑴᒋᐌᓂᒥᓐ᙮ 15 ᓂᑲ ᐙᐐᑕᒫᑫ ᓴ ᑭᑾᔭᒀᑎᓯᐎᓐ, ᑭᐱᒫᒋᐃᐌᐎᓐ ᑲᔦ ᑲᐯᑮᔑᒃ; ᐋᓇᐐᓐ ᑳᐐᓐ ᓂᑌᓂᓯᑐᑕᓰᓇᓐ᙮ 16 ᐆ ᑌᐯᒋᑫᔭᓐ ᑳᒫᐗᒋ ᑎᐯᒋᑫᔭᓐ, ᓂᑲ ᐲᔖ ᓴ ᒋᐱ ᑕᔑᑕᒫᓐ ᑭᓲᑭᒋᑫᐎᓇᓐ, ᓂᑲ ᑕᔑᑖᓐ ᑲᔦ ᑮᓐ ᐁᑕᑯ ᑭᑾᔭᒀᑎᓯᐎᓐ᙮ 17 ᐆ ᑭᔐᒪᓂᑑ, ᑮᐅᔥᑳᑎᓯᔮᓐ ᑭᑮ ᐱᐅᒋ ᑭᑭᓄᐊᒪᐎᔥ; ᐅᐅ ᑕᔥ ᐃᔑ ᐊᐲ ᑫᔮᐱ ᓂᑕᔑᑖᓇᓐ ᑭᒫᒪᑳᒋᒋᑫᐎᓇᓐ᙮ 18 ᐆ ᑭᔐᒪᓂᑑ, ᒥᓴᐙ ᓴ ᑯ ᐊᐲ ᐊᑭᐌᓰᐎᔮᓐ, ᐙᐱᑴᔮᓐ ᑲᔦ, ᑫᑯ ᓇᑲᓂᔑᑫᓐ᙮ ᐐᒌᐎᔑᓐ ᓴ ᒣᒀ ᐁᑕᔑᑕᒫᓐ ᑭᒪᔥᑲᐎᓰᐎᓐ, ᐁᔑ ᒪᔥᑲᐌᑖᑯᓯᔭᓐ ᑲᔦ ᒋᒑᑭ ᐐᑕᒪᐗᒀ ᑲᑭᓇ ᐯᒫᑎᓯᐙᒡ ᑫᓂ ᐊᔮᐙᒡ᙮ 19 ᐆ ᑭᔐᒪᓂᑑ, ᑭᑾᔭᒀᑎᓯᐎᓐ ᓴ ᐅᒋᒋᔥᑳᒪᑲᓐ ᑮᔑᑯᕽ, ᑮᓐ ᑭᒋ ᑫᑰᓐ ᑭᑎᔑᒋᑫ; ᑳᐐᓐ ᓴ ᐊᐎᔭ ᑯᑕᒃ ᑮᓐ ᑎᓄ ᐊᔮᓰ᙮ 20 ᑭᐱ ᑑᑕᐎᔥ ᐃᓴ ᐁᐃᔑᓂᔕᐊᒪᐎᔭᓐ ᓃᐱᐗᐞ ᒫᔑᓭᐎᓇᓐ, ᐗᓯᑖᐌᑕᒧᐎᓇᓐ ᑲᔦ, ᔖᑰᒡ ᐃᑕᔥ ᑭᑮᐌ ᒪᔥᑲᐎᓰᑑᓐ ᓂᐱᒫᑎᓯᐎᓐ᙮ ᐊᓈᒥᕽ ᐊᑮᕽ ᑭᑲ ᐱᐅᒋ ᒪᔮᐎᓐ ᒦᓇᐙ᙮ 21 ᒦᑕᔥ ᒋᑑᑕᐎᔭᓐ ᒋᑳᒋ ᑭᑌᑖᑯᓯᔮᓐ, ᒋᒥᓉᑕᒥᐃᔭᓐ ᑲᔦ᙮ 22 ᐆ ᓂᑭᔐᒪᓂᑑᒻ, ᒪᑗᔮᐲᑭᐱᒋᑲᓐ ᓴ ᓂᑲ ᐋᐸᒋᐋ ᒋᒦᑴᒋᐌᓂᒥᓈᓐ ᑳᔑ ᑌᐺᔦᑖᑯᓯᔭᓐ, ᑭᑲ ᓂᑲᒨᑕᐎᓐ ᒋᒦᑴᒋᐌᓂᒥᓈᓐ ᒋᐋᐸᒋᐊᒃ ᒪᑗᔮᐲᑭᐱᒋᑲᓀᔅ, ᑫᑌᑖᑯᓯᔭᓐ ᑌᐯᓂᒪᑣ ᐃᔅᕒᐃᔭᓬᐊᒃ Israel᙮ 23 ᐊᐲ ᓴ ᓂᑲᒧᔮᓐ ᒦᑴᒋᐌᓂᒥᓈᓐ ᓂᑲ ᔖᑯᐌ ᓴ ᑫᐊᐲᒋ ᒥᓉᑕᒫᓐ, ᓃᓐ ᐄᑐᒃ ᑳᑮ ᐱᒫᒋᐃᔭᓐ᙮ 24 ᓂᑲ ᑕᔑᑖᓐ ᓴ ᐁᔑ ᑾᔭᒀᑎᓯᔭᓐ ᑫᑲᐯᑮᔑᒃ, ᐋᓃᔥ ᐃᑭ ᐁᑕᐌᑕᒧᐙᐸᓐ ᒋᐗᓯᑖᐎᓭᐗᒃ ᐋᔕ ᑮᐊᑲᒋ ᔖᑰᒋᐋᐗᒃ, ᑮᐗᐙᓀᑕᒥᐋᐗᒃ ᑲᔦ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society