Nikamonan 57 - ᐅᒋᐺ ᑭᒋᒪᓯᓇᐃᑲᓐᑫᔑᐊᓇᒥᐋᑭᐸᓐ ᒋᐐᒋᐃᑰᔭᕽ ᒦ ᐅᐌᓂ ᐯᔑᒃ ᑌᐱᑦ ᐅᓂᑲᒧᓐ 1 ᑕᑲ ᑰᐹᑌᓂᒥᔑᓐ ᑭᔐᒪᓂᑑ, ᑕᑲ ᑰᐹᓯᓇᐎᔑᓐ, ᑮᓐ ᐄᑐᒃ ᑳᓈᒋᐸᐃᐙᓂᓈᓐ᙮ ᐊᓈᒪᔭᐄ ᓴ ᑭᓂᑸᑲᓂᕽ ᓂᑲᔑ ᐋᑲᐎᔑᒨᓐ, ᐲᓂᔥ ᒋᐃᔥᒀ ᐱᒥ ᐊᔮᒃ ᑳᑭᒋ ᐃᔑᐌᐸᒃ᙮ 2 ᓂᔖᑯᐙᓈ ᓴ ᑭᔐᒪᓂᑑ ᒫᐗᒡ ᐁᔥᐯᑖᑯᓯᒡ, ᑳᒦᔑᒡ ᐋᓃᓐ ᐁᔑ ᓅᑌᓭᐗᒃ᙮ 3 ᑭᒋᑮᔑᑯᕽ ᓴ ᓂᑲ ᐅᒋ ᓇᑴᑖᒃ ᒋᔖᐾᐃᒡ, ᐅᑲ ᐸᐹᐱᓀᓂᒫᓐ ᓴ ᐃᓂ ᑳᐌᓵᓂᐃᒥᒡ᙮ ᑭᔐᒪᓂᑑ ᓴ ᓂᓈᑯᑕᒫᒃ ᐅᓵᑭᐃᐌᐎᓐ, ᐅᑌᐺᔦᑖᑯᓯᐎᓐ ᑲᔦ᙮ 4 ᒦ ᓴ ᐃ ᐁᓀᑖᑾᒃ ᑖᐱᔥᑰ ᐁᔮᔮᓐ ᒣᑴᔭᐄ ᐁᔑᐊᔮᐙᒡ ᒥᔑᐱᔑᐗᒃ, ᐁᐃᔑ ᐱᒥᔑᓈᓐ ᐁᔑᐊᔮᐙᒡ ᐱᑾᒋ ᐊᔭᐋᐎᔕᒃ, ᐃᓂᓂᐗᒃ ᐁᓈᐱᑌᐙᒡ ᑖᐱᔥᑰ ᒌᐳᐌᐱᓂᑲᓂᕽ, ᐱᑾᑯᕽ ᑲᔦ; ᐅᑌᓇᓂᐎᐙᓐ ᐁᐃᓀᑖᑾᓂᓂᑭᓐ ᑖᐱᔥᑰ ᐸᔑᐸᐃᑫᐎᑯᒫᓂᕽ᙮ 5 ᐆ ᑭᔐᒪᓂᑑ, ᓈᑯᑑᓐ ᑭᑎᔥᐯᑖᑯᓯᐎᓐ ᑮᔑᑯᕽ, ᑭᑭᒋ ᐃᓀᑖᑯᓯᐎᓐ ᑲᔦ ᒥᓯᐌ ᐊᑮᕽ᙮ 6 ᑳᔒᑫᓂᒥᐙᒡ ᓴ ᐅᑕᔗᑭᔑᒫᐙᓐ ᐊᓴᐲᑳᓇᓐ ᐁᐐ ᑳᒋᑎᓂᐙᒡ; ᐐᑫ ᑕᔥ ᓂᔖᑰᒋᐃᑰᓐ ᐗᓯᑖᐌᑕᒧᐎᓐ᙮ ᐙᓂᑫᐗᒃ ᐗᐊᓂ ᐃᔖᐗᒃ, ᐐᓇᐙ ᑕᔥ ᐃᑯ ᑮᐲᒋᓭᐗᒃ᙮ 7 ᑭᔐᒪᓂᑑ ᓂᑌᐃᕽ ᓴ ᑭᑎᔑ ᑭᒋᐌᓂᒥᓐ, ᓂᑲ ᓂᑲᒻ ᓴ, ᒋᐃᓇᐊᒫᓐ ᐁᒦᑴᒋᐌᑕᒫᓐ! 8 ᑕᑲ ᓂᑲ ᑯᔥᑯᔅ ᓂᑕᒑᑯᕽ! ᓂᑲ ᐊᒪᒋᐋ ᑲᔦ ᓂᑭᒋ ᒪᑗᔮᐲᑭᐱᒋᑲᓐ, ᓂᒪᑗᔮᐲᑭᐱᒋᑲᓀᔅ ᑲᔦ! ᓂᑲ ᑯᔥᑯᔅ ᐲᑖᐸᕽ᙮ 9 ᑌᐯᒋᑫᔭᓐ, ᑭᑲ ᒦᑴᒋᐌᓂᒥᓐ ᐃᑕᔥ ᒣᑴᔭᐄ ᐁᔑᐊᔮᐙᒡ ᑯᑕᒃ ᐯᒫᑎᓯᐙᒡ; ᑭᑲ ᓂᑲᒨᑕᐎᓐ ᑲᔦ ᒣᑴᔭᐄ ᐁᔑᐊᔮᐙᒡ ᑳᐯᐸᑳᓉᐙᓇᑭᓯᐙᒡ᙮ 10 ᑭᓵᑭᐃᐌᐎᓐ ᓴ ᐁᑕᑕᐌ ᐹᑏᓇᑎᓐ ᐁᐅᒋᒋᔥᑳᒪᑲᒃ ᑮᔑᑯᕽ, ᑭᑌᐺᔦᑖᑯᓯᐎᓐ ᑲᔦ ᐁᐅᒋᒋᔥᑳᒪᑲᒃ ᑮᔑᑯᕽ᙮ 11 ᐆ ᑭᔐᒪᓂᑑ, ᓈᑯᑑᓐ ᑭᑎᔥᐯᑖᑯᓯᐎᓐ ᑮᔑᑯᕽ, ᑭᑭᒋ ᐃᓀᑖᑯᓯᐎᓐ ᑲᔦ ᒥᓯᐌ ᐊᑮᕽ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society