Nikamonan 51 - ᐅᒋᐺ ᑭᒋᒪᓯᓇᐃᑲᓐᑫᔑᐊᓇᒥᐋᔭᑭᐸᓐ ᒋᐴᓀᑕᒫᑰᔭᕽ ᒦ ᐅᐌᓂ ᐯᔑᒃ ᑌᐱᑦ ᐅᓂᑲᒧᓐ 1 ᐆ ᑭᔐᒪᓂᑑ, ᑕᑲ ᑰᐹᑌᓂᒥᔑᓐ, ᒨᔕᒃ ᐃᓇᑫ ᑳᔑ ᓵᑭᐃᐌᔭᓐ᙮ ᐐᑫ ᐄᑐᒃ ᐌᓅᑕᓐ ᑭᑰᐹᑌᓂᒥᐌᐎᓐ ᒋᑳᓰᐊᒪᓐ ᓂᒪᒋᑑᑕᒧᐎᓇᓐ᙮ 2 ᐐᑫ ᓴ ᐯᑳᐹᐗᔑᔑᓐ ᓂᒪᒋᑑᑕᒧᐎᓂᕽ ᐅᒋ, ᐐᑫ ᓴ ᑯ ᐯᑭᐃᔑᓐ ᒋᐊᔮᓯᐙᓐ ᒪᒋᑑᑕᒧᐎᓐ᙮ 3 ᓂᒫᒥᑲᐤ ᓴ ᓂᒪᒋᐃᔑᒋᑫᐎᓐ, ᒨᔕᒃ ᓂᑭᑫᑖᓐ ᐁᑭᑭᓯᔮᓐ ᓂᒪᒋᑑᑕᒧᐎᓐ᙮ 4 ᑮᓐ ᓴ ᐁᑕ ᑯ ᑳᑮ ᒪᒋᑑᑕᐎᓈᓐ, ᐁᑮ ᐃᔑᒋᑫᔮᓐ ᒪᒋᑫᑰᓐ ᐁᓈᓴᒦᔭᓐ᙮ ᐃᐃ ᑕᔥ ᑳᐃᓈᑯᓂᔭᓐ ᐁᒪᒋᑑᑕᒫᓐ, ᒦ ᓴ ᐃ ᑾᔭᒃ ᐁᐃᔑᔭᓐ, ᑳᐐᓐ ᑲᔦ ᑫᑰᓐ ᑭᑎᔑ ᐊᓈᒣᑖᑯᓯᓰ ᐃᐃ ᑳᐃᓈᑯᓂᔭᓐ᙮ 5 ᐃᓇᔥᑫ, ᒪᒋᑑᑕᒧᐎᓂᕽ ᐅᔕ ᓂᑮ ᐃᔑ ᓂᑖᐎᒃ, ᓂᒫᒫ ᑲᔦ ᑮᑭᑭᔥᑲᐙᐙᓱᒥᒡ ᐋᔕ ᐅᒪᒋᑑᑕᒨ ᓂᑮ ᐅᒋ ᐃᓇᑭᒥᑰ᙮ 6 ᑌᐺ ᓴ ᑭᒥᓴᐌᑖᓐ ᑳᑌᐺᔦᑖᑾᒃ ᐲᒐᔭᐄ ᒋᐊᔮᒃ ᓂᐱᒫᑎᓯᐎᓂᕽ; ᑭᑭᓄᐊᒪᐎᔑᓐ ᑕᔥ ᒋᑲᑮᑖᐌᑕᒫᓐ ᐲᒐᔭᐄ ᓂᑌᐃᕽ᙮ 7 ᐴᓀᑕᒪᐎᔑᓐ ᓂᒪᒋᑑᑕᒧᐎᓐ, ᒦᑕᔥ ᐃᐃ ᒋᐯᑭᓯᔮᓐ; ᑭᓰᔮᐹᐗᓂᔑᓐ, ᒦᑕᔥ ᓇᐗᒡ ᒋᐙᐱᔥᑭᓯᔮᓐ ᐊᐲᒡ ᐐᓐ ᑰᓐ᙮ 8 ᑕᑲ ᐃᔑᐃᔑᓐ ᒋᓅᑕᒫᓐ ᒥᓉᑕᒧᐎᓐ, ᒌᑫᑕᒧᐎᓐ ᑲᔦ; ᐋᓇᐐᓐ ᐁᑮ ᐲᑯᓂᔭᓐ ᑖᐱᔥᑰ ᐅᑲᓇᓐ ᑳᐴᑯᔥᑳᑭᓐ, ᒦᓇᐙ ᒋᒥᓉᑕᒫᓐ᙮ 9 ᑫᑯ ᑕᔥ ᐐᓐ ᑲᓇᐙᐸᑕᑫᓐ ᓂᒪᒋᑑᑕᒧᐎᓇᓐ, ᑳᓰᐊᓐ ᓴ ᑲᑭᓇ ᓂᒪᒑᑎᓯᐎᓇᓐ᙮ 10 ᐆ ᑭᔐᒪᓂᑑ, ᐅᔑᑑᓐ ᑳᐯᑲᒃ ᐅᑌᐃᒫ ᓂᐱᒫᑎᓯᐎᓂᕽ, ᐸᑭᑎᓐ ᑲᔦ ᑴᔭᑴᑖᑯᓯᒡ ᐅᔥᑭ ᐊᒑᒃ ᓂᐱᒫᑎᓯᐎᓂᕽ᙮ 11 ᑫᑯ ᓂᑯᒋ ᐃᔑ ᐌᐱᓂᔑᑫᓐ ᑳᔑ ᐊᔮᔭᓐ; ᑫᑯ ᐅᑖᐱᓇᒪᐎᔑᑫᓐ ᑳᑎᐱᓇᐌᐎᓯᔭᓐ ᑭᑕᒑᒃ᙮ 12 ᑮᐌ ᒦᔑᔑᓐ ᓴ ᒥᓉᑕᒧᐎᓐ ᑳᐅᒌᒃ ᑭᐱᒫᒋᐃᐌᐎᓂᕽ, ᐃᔑᐃᔑᓐ ᓴ ᓂᐱᒫᑎᓯᐎᓂᕽ ᒋᐃᓀᑕᒫᓐ ᒋᓇᐃᑕᐎᓈᓐ᙮ 13 ᒦᑕᔥ ᐃᐃ ᒋᑭᑭᓄᐊᒪᐗᒀ ᑳᒪᒋᑑᑕᒧᐙᒡ ᐁᑎᓄᐎᔭᓐ, ᒦᑕᔥ ᐃᐃ ᒋᑮᐌ ᓈᓯᑲᐎᒀ᙮ 14 ᐆ ᑭᔐᒪᓂᑑ ᑕᑲ ᑲᓇᐌᑕᓐ ᓂᐱᒫᑎᓯᐎᓐ, ᑲᓇᐌᓂᒥᔑᓐ ᒋᓂᔑᐌᓯᐙᓐ, ᒦᑕᔥ ᐃᐃ ᒋᒌᑫᑕᒫᓐ ᒋᑕᔑᑕᒫᓐ ᑭᑾᔭᒀᑎᓯᐎᓐ᙮ 15 ᑌᐯᒋᑫᔭᓐ, ᐐᒋᐃᔑᓐ ᒋᑮᑭᑐᔮᓐ, ᓂᑑᓂᕽ ᐃᑕᔥ ᓂᑲ ᐅᒋ ᐃᑭᑦ ᐁᒦᑴᒋᐌᓂᒥᓈᓐ᙮ 16 ᑳᐐᓐ ᑭᓇᑕᐌᑕᓰᓇᓐ ᐸᑭᑎᓈᓱᐎᓇᓐ, ᓂᑖᑮ ᐲᑑᓇᓐ ᐄᑐᒃ; ᑳᐐᓐ ᑲᔦ ᑭᒥᓍᐸᑕᓰᓇᓐ ᑳᒑᑭᓯᑳᑌᑭᓐ ᑎᓄ ᐸᑭᑎᓈᓱᐎᓇᓐ᙮ 17 ᐊᐎᔭᓐ ᑳᑕᐸᓭᓂᒧᓂᒡ ᐅᑕᒑᑯᓃᕽ, ᒦ ᓴ ᐁᑕ ᐃᐃᐌᓂ ᑎᓄ ᐸᑭᑎᓈᓱᐎᓐ ᑭᔐᒪᓂᑑ ᑳᐊᑕᐌᑕᕽ᙮ ᐆ ᑭᔐᒪᓂᑑ, ᑳᐐᓐ ᓴ ᑭᑖᓇᐌᓂᒫᓰ ᐊᐎᔭ ᑳᑕᐸᓭᓂᒧᒡ, ᑳᑴᑫᑕᕽ ᑲᔦ ᐅᑌᐃᕽ᙮ 18 ᐆ ᑭᔐᒪᓂᑑ, ᑕᑲ ᒥᓄᑑᑕᓐ ᐃᐃ ᓵᔭᓐ Zion ᒋᒥᓄᓭᒃ; ᑮᐌ ᐅᔑᑑᓐ ᑳᔑ ᐙᑳᔮᐱᑭᓂᑳᑌᒃ ᒉᕒᐆᓴᓬᐊᒻ Jerusalem᙮ 19 ᒦᑕᔥ ᐃᐃ ᐸᔦᔥ ᒋᒥᓍᐸᑕᒪᓐ ᑾᔭᒃ ᐸᑭᑎᓈᓱᐎᓇᓐ, ᑳᒑᑭᓯᑳᑌᑭᓐ ᑲᔦ ᑎᓄ, ᐐᑫ ᑲᔦ ᑳᐊᒀᑭᓯᑳᑌᑭᓐ ᑎᓄ ᐸᑭᑎᓈᓱᐎᓇᓐ; ᐋᐯ ᐱᔑᑭᐗᒃ ᐃᑕᔥ ᑕᐸᑭᑎᓈᓱᐙᑲᓂᐎᐗᒃ ᐃᐃᒫ ᑳᔑ ᐸᑭᑎᓈᓲᕽ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society