Nikamonan 50 - ᐅᒋᐺ ᑭᒋᒪᓯᓇᐃᑲᓐᑌᐺ ᑫᔑᐊᓇᒥᐋᑭᐸᓐ 1 ᒫᐗᒡ ᒣᔥᑲᐌᑖᑯᓯᒡ ᑭᔐᒪᓂᑑ ᑳᑎᐯᒋᑫᒡ ᑮᑮᑭᑐ; ᐁᑲᓅᑕᕽ ᐁᓂᑯᒀᓂᒃ ᐊᑭ ᐁᔑ ᒨᑲᐊᒥᓂᒡ ᑮᓯᓲᓐ, ᐲᓂᔥ ᐌᑎ ᐁᔑ ᐸᑭᔑᒧᓂᒡ᙮ 2 ᒦ ᓴ ᐃᐌ ᑭᔐᒪᓂᑑ ᐌᒋ ᐙᓭᓈᑯᓯᒡ ᓵᔭᓐ Zion ᐁᒋᑳᑌᓂᒃ, ᐆᑌᓈᕽ ᒫᐗᒡ ᑳᑮᔑ ᒥᓄᓈᑾᓂᓂᒃ᙮ 3 ᑭᑭᔐᒪᓂᑑᒥᓈᓐ ᓴ ᐲᔖ, ᑳᐐᓐ ᒋᒪᓈ ᓅᑖᑎᒡ; ᐃᔥᑯᑌᓂ ᓴ ᐊᓂ ᓃᑳᓃᒪᑲᓂᓂ, ᐙᑳᔭᐄ ᐃᑕᔥ ᐐᑫ ᑯᑖᓀᑖᑾᓂᓂ ᐁᑭᒋ ᓅᑎᓂᓂᒃ᙮ 4 ᐅᑲᓅᑖᓐ ᓴ ᑮᔑᒃ, ᐊᑮᓂ ᑲᔦ, ᒋᑲᓇᐙᐸᒥᑯᒡ ᐁᐐ ᑎᐹᑯᓈᒡ ᐅᐱᒫᑎᓰᒪᐞ᙮ 5 ᒦ ᓴ ᐁᑭᑐᒡ ᐊᐯᔪᒃ ᐅᑯ ᓈᓯᑲᐎᔑᒃ ᑮᓇᐙ ᑳᑎᐯᓂᒥᓇᑰᒃ, ᑮᓇᐙ ᑳᑮ ᐅᔑᑕᒪᐎᔦᒃ ᐊᔓᑕᒫᑎᐎᓐ ᑮᐸᑭᑎᓈᓱᔦᒃ᙮ 6 ᑮᔑᒃ ᓴ ᑎᐹᒋᒨᒪᑲᓂᓂ ᑭᔐᒪᓂᑑ ᐁᑾᔭᒀᑎᓯᒡ, ᐐᓐ ᐃᑯ ᐃᐃ ᐁᐃᔑ ᐅᓀᑕᕽ᙮ 7 ᓂᐱᒫᑎᓰᒪᒃ, ᓅᑕᐎᔑᒃ ᐅᐅ ᑳᐃᓂᓇᑰᒃ, ᑮᓇᐙ ᐃᔅᕒᐃᔭᓬᐊᒃ ᑳᐐ ᑭᔒ ᑲᓅᓂᓇᑰᒃ, ᓃᓐ ᐅᔕ ᑭᔐᒪᓂᑑ, ᑭᑭᔐᒪᓂᑑᒥᐙ᙮ 8 ᑳᐐᓐ ᐐᓐ ᑳᐅᒋ ᑭᒋ ᓅᒋᐃᓇᑰᒃ ᐁᔑ ᐸᑭᑎᓈᓲᑕᒪᐎᔦᒃ, ᑳᐸᑭᑎᓇᒪᐎᔦᒃ ᑲᔦ ᑳᐊᒀᑭᓯᑳᑌᑭᓐ ᑎᓄ ᐁᓈᓴᒦᔮᓐ᙮ 9 ᑳᐐᓐ ᓂᐐ ᐅᑖᐱᓈᓰᒃ ᑭᐱᔑᑮᒥᐙᒃ ᐁᔮᐙᒡ ᑭᑕᔭᐋᐎᔒᐎᑲᒥᑯᐙᕽ, ᒫᓇᑎᑾᒃ ᑲᔦ ᐁᔮᐙᒡ ᐁᔑ ᑭᐸᐌᒀ᙮ 10 ᑲᑭᓇ ᐅᔕ ᐁᑕᔑᐙᒡ ᐊᔭᐋᐎᔕᒃ ᓃᓐ ᓂᑎᐯᓂᒫᒃ, ᐱᔑᑭᐗᒃ ᑲᔦ ᐁᔮᐙᒡ ᒥᑖᔂᒃ ᐗᒌᑳᕽ᙮ 11 ᓂᑭᑫᓂᒫᒃ ᐅᔕ ᑲᑭᓇ ᐱᓀᔒᔕᒃ ᐁᔮᐙᒡ ᐗᒌᑳᕽ, ᑲᑭᓇ ᓴ ᑯ ᑫᑰᓐ ᐌᑲᐐᒪᑲᒃ ᒥᔕᐗᑲᒥᒃ ᓃᓐ ᓂᑎᐯᑖᓐ᙮ 12 ᑮᔥᐱᓐ ᓴ ᓅᑌᔅᑲᑌᔮᐹᓐ, ᑳᐐᓐ ᑭᑖ ᐐᑕᒪᐎᓯᓅᓂᓂᒻ; ᓃᓐ ᐄᑐᒃ ᓂᑎᐯᑖᓐ ᑲᑭᓇ ᐊᑭ, ᑲᑭᓇ ᑲᔦ ᑫᑰᓐ ᐃᐃᒫ ᐁᔮᒃ᙮ 13 ᓂᑖ ᒦᒋᐙᓐ ᐃᓇ ᐅᐐᔮᓯᐙ ᐋᐯ ᐱᔑᑭᐗᒃ, ᒋᒥᓂᑴᐗᑭᐸᓐ ᑲᔦ ᐋᐯ ᒫᓇᑎᑾᒃ ᐅᒥᔅᑸᒥᐙ? 14 ᑕᑲ ᐸᑭᑎᓈᓲᑕᒪᐎᒃ ᑭᔐᒪᓂᑑ ᒦᑴᒡ ᒋᐃᓀᒃ, ᐃᔑᒋᑫᐙᒃ ᑲᔦ ᑳᑮ ᐊᐱᒧᓄᑕᐌᑭᐸᓐ ᒫᐗᒡ ᐁᔥᐯᑖᑯᓯᒡ᙮ 15 ᑲᓅᔑᔒᑫᒃ ᐃᑕᔥ ᐊᐲ ᑮᔑᑲᒃ ᐅᑎᓯᑯᔦᒃ ᒫᔑᓭᐎᓐ, ᑭᑲ ᓈᑕᒪᐎᓂᓂᒻ ᐃᑕᔥ ᐊᐲ, ᒦᔥ ᒋᑭᑌᓂᒥᔦᒃ, ᐃᑭᑐ ᑭᔐᒪᓂᑑ᙮ 16 ᐅᐅ ᑕᔥ ᐐᓐ ᑳᑎᐯᒋᑫᒡ ᐅᑎᓈᐞ ᒣᒑᑎᓯᓂᒡ, ᑭᑑᐸᐹᒥᓯᐎᓂᐤ ᐃᓇ ᒋᐐᑕᒪᐸᓐ ᓂᑑᓇᔓᐌᐎᓇᓐ, ᒋᑕᔑᑕᒪᐸᓐ ᑲᔦ ᐊᔓᑕᒫᑫᐎᓐ ᑳᑮ ᐅᔑᑑᔮᐹᓐ? 17 ᑭᔒᑫᑖᓐ ᐄᑐᒃ ᑮᑭᑭᓄᐊᒪᐎᓈᓐ ᑫᐃᔑᒋᑫᔭᐸᓐ, ᑭᑑᑖᓈᒥᕽ ᐃᓇᑫ ᐁᐃᔑᐌᐱᓇᒪᓐ ᓂᑎᑭᑐᐎᓇᓐ! 18 ᑮᐙᐸᒪᒡ ᑲᔦ ᑫᒨᒋᔥᑭᒡ ᑭᐐᒌᐙᒃ, ᑭᓇᓇᒫᔦᓂᒫᒃ ᑲᔦ ᐯᔑᒀᑎᓯᐙᒡ᙮ 19 ᓅᒋᑯ ᑲᔦ ᑭᑎᓈᐸᒋᑑᓐ ᑭᑑᓐ ᐁᑮᐗᓂᒧᐙᑫᔭᓐ, ᐁᓇᓂᒌᓯᐗᓐ ᒋᑮᐗᓂᒧᔭᓐ᙮ 20 ᒨᔕᒃ ᐃᑯ ᑲᔦ ᐁᒪᒋ ᑕᔑᒪᒡ ᑎᐱᓇᐌ ᑮᒋᑭᐌᓯ, ᓅᒋᑯ ᐁᐃᓈᒋᒪᒡ᙮ 21 ᒦ ᓴ ᐅᐌ ᐁᔑᒋᑫᔭᓐ, ᑳᐐᓐ ᐃᑕᔥ ᑭᐸᐹᒥᒥᓯᓅᓐ, ᒦᔥ ᐁᓀᓂᒥᔭᓐ ᐄᓴᓐ ᑳᐃᓈᑎᓯᔭᓐ ᐁᐃᔑᐊᔮᔮᓐ᙮ ᑭᐐ ᑭᒋ ᓅᒋᐃᓐ ᐃᑕᔥ ᐌᐌᓂ ᐱᑯ ᐁᓈᓴᒦᔭᓐ ᐁᐐ ᐊᓈᒥᒥᓈᓐ᙮ 22 ᓈᓈᑲᑕᐌᑕᓐ ᐃᑕᔥ ᐅᐅ ᑮᓐ ᐌᓃᑫᓄᑕᐗᒡ ᑭᔐᒪᓂᑑ, ᑯᒫᔥ ᐃᑯ ᑲᔦ ᑭᑲ ᐲᓯᐱᓂᓐ, ᑳᐐᓐ ᐃᑕᔥ ᐊᐎᔭ ᑕᐊᔮᓰ ᑫᓈᑕᒪᐎᒃ᙮ 23 ᐊᐎᔭ ᓴ ᑳᐸᑭᑎᓈᓱᒡ ᐅᒋ ᐁᒦᑴᒋᐌᓂᒥᒡ, ᒦ ᓴ ᐊᐌ ᑳᑭᑌᓂᒥᒡ, ᒦᔥ ᐁᔑ ᓈᑯᒋᑫᒡ ᐁᑾᔮᒋᑑᒡ ᑫᐅᒋ ᐙᐸᑕᐊᒃ ᐁᔑ ᐱᒫᒋᐃᐌᓂᒡ ᑭᔐᒪᓂᑑᓐ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society