Nikamonan 42 - ᐅᒋᐺ ᑭᒋᒪᓯᓇᐃᑲᓐᐃᓂᓂ ᐁᔑᐊᓇᒥᐋᒡ ᐙᓴ ᑳᑮᐃᓈᒧᑳᓈᑲᓂᐎᒡ 1 ᑖᐱᔥᑰ ᓴ ᐙᐙᔥᑫᔑ ᑳᔑ ᓅᑕᔮᐹᑴᓄᑕᕽ ᑳᐱᒥᒋᐗᓂᓂᒃ ᓂᐱ, ᑭᔐᒪᓂᑑ, ᒦ ᑫᓃᓐ ᐯᔑᑾᓐ ᓂᑕᒑᑯᕽ ᐁᔑ ᐊᑕᐌᓂᒥᓈᓐ᙮ 2 ᓂᑕᒑᑯᕽ ᓴ ᐐᑫ ᑭᑎᔑ ᐊᑕᐌᓂᒥᓐ, ᑳᐱᒫᑎᓯᔭᓐ ᑭᔐᒪᓂᑑ! ᐋᓇᐲ ᓴ ᑫᐃᔖᔮᓐ ᒋᐊᐎ ᐊᓇᒥᐁᑕᐎᓈᓐ ᑳᔑ ᐊᔮᔭᓐ? 3 ᐁᑕᓱ ᑮᔑᒃ, ᐁᑕᓱ ᑎᐱᒃ ᓴ ᓂᒪᐤ ᐁᐃᓀᑖᑾᒃ ᓂᑑᒋᑲᐙᐱᐎᓇᓐ ᐁᐅᒦᒋᒥᒥᔮᓐ᙮ ᒨᔕᒃ ᓴ ᑳᔒᑫᓂᒥᐙᒡ ᓂᑎᔑ ᑲᑴᒋᒥᑰᒃ, ᐋᓃᑎ ᑕᔥ ᐁᔮᒡ ᑭᑭᔐᒪᓂᑑᒻ, ᐁᐃᔑᐙᒡ᙮ 4 ᐐᑫ ᑕᔥ ᓂᒫᓀᑕᒻ ᓂᑌᐃᕽ ᐅᑖᓈᕽ ᐁᐃᔑ ᒫᒥᑲᐎᔮᓐ, ᐁᑮ ᓂᑖ ᐐᒌᐗᒀᐸᓐ ᑳᑮ ᐹᑏᓄᐙᐸᓐ ᐯᒫᑎᓯᐙᒡ, ᐁᐃᔖᐙᐸᓐ ᐅᐙᑳᐃᑲᓂᓃᕽ ᑭᔐᒪᓂᑑᓐ᙮ ᐁᐱᒧᓭᐙᒡ ᐁᑮ ᒌᑫᑕᒧᐙᐸᓐ, ᐁᑮ ᓂᑲᒧᐙᒡ, ᐁᑮ ᔖᔖᑯᐌᐙᒡ ᑲᔦ ᐁᒦᑴᒋᐌᓂᒫᐙᒡ ᑭᔐᒪᓂᑑᓐ᙮ 5 ᐌᑯᓀᓐ ᑕᔥ ᐌᒋ ᒫᓀᑕᒫᓐ ᓂᑕᒑᑯᕽ? ᐌᑯᓀᓐ ᑲᔦ ᐌᒋ ᒫᔑᓭᔮᓐ? ᑭᔐᒪᓂᑑ ᓴ ᓂᑲ ᐊᐯᓂᒧᓄᑕᐙ ᑫᔮᐱ ᒋᒦᑴᒋᐌᓂᒪᒃ, ᓂᒻᐱᒫᒋᐃᐌᒻ, ᓂᑭᔐᒪᓂᑑᒻ᙮ 6-7 ᐅᐅᒫ ᑳᐃᔑ ᐸᑲᒫᒥᑳᐎᔮᓐ ᓂᐲᑴᑕᒻ ᓂᑌᐃᕽ, ᔑᒀᔥ ᑭᔐᒪᓂᑑ ᓂᑮᐌ ᓇᓈᑲᑕᐌᓂᒫ᙮ ᐅᑮ ᐃᔑᑑᓐ ᒫᓀᑕᒧᐎᓐ ᑖᐱᔥᑰ ᑳᑭᒋ ᒫᒪᑳᔥᑳᒃ ᒥᓯᐌ ᐃᐃᒫ ᓂᑕᒑᑯᕽ᙮ ᐱᔑᔑᒃ ᒫᔑᓭᐎᓐ ᒋᓇᑭᔥᑲᒫᓐ ᑖᐱᔥᑰ ᑳᐃᓉᐌᑲᒫᔥᑳᒃ ᑳᓂᑭᐲᒃ, ᑖᐱᔥᑰ ᐹᐎᑎᒃ ᐱᓀᓰᕽ ᑳᐃᓂᑖᑾᒃ ᐌᑎᓇᑫ ᒞᕒᑕᓐ ᑳᐃᔑᑕᑴᔮᒃ ᐌᑎ ᐅᒋ ᐗᒌᕽ ᐋᕒᒪᓐ Hermon ᔑᑾ ᐗᒌᕽ ᒥᓴᕒ Mizar᙮ 8 ᑳᑎᐯᒋᑫᒡ ᓴ ᓂᓈᑯᑕᒫᒃ ᒨᔕᒃ ᑳᔑ ᓵᑭᐃᐌᒡ ᒣᒀ ᑮᔑᑲᓂᓂᒃ, ᒋᐊᔮᐗᒃ ᑫᐃᓇᐊᒧᐗᒃ ᑎᐱᑲᓂᓂᒃ, ᒋᐊᔮᐗᒃ ᑲᔦ ᐋᓃᓐ ᑫᔑ ᐊᓇᒥᐁᑕᐗᒃ ᑭᔐᒪᓂᑑ ᑳᑎᐯᑕᕽ ᓂᐱᒫᑎᓯᐎᓐ᙮ 9 ᒦ ᑫᐃᓇᒃ ᑭᔐᒪᓂᑑ ᑳᓈᑕᒪᐎᒡ ᐊᓯᓃᕽ ᑳᐃᓀᑖᑯᓯᒡ, ᐌᑯᓀᓐ ᑕᔥ ᑳᐅᒋ ᐗᓃᑫᓄᑕᐎᔭᓐ? ᐌᑯᓀᓐ ᑕᔥ ᐌᒋ ᐴᓂᓭᓯᓄᒃ ᐃᐃ ᑳᔑ ᑲᒀᑕᑭᐃᐙᒡ ᑳᔒᑫᓂᒥᐙᒡ? 10 ᑖᐱᔥᑰ ᐁᒫᑭᐃᐙᒡ ᓂᐐᔭᐎᕽ ᐃᓀᑖᑾᓂᓂ ᐃᑭ ᑳᔒᑫᓂᒥᐙᒡ ᒨᔕᒃ ᐁᐃᔑ ᐹᐱᓄᑕᐎᐙᒡ, ᐋᓃᑎ ᑕᔥ ᐁᔮᒡ ᑭᑭᔐᒪᓂᑑᒻ? ᐁᐃᔑᐙᒡ᙮ 11 ᐌᑯᓀᓐ ᑕᔥ ᐌᒋ ᒫᓀᑕᒫᓐ ᓂᑕᒑᑯᕽ? ᐌᑯᓀᓐ ᑕᔥ ᐌᒋ ᒫᔑᓭᔮᓐ? ᑭᔐᒪᓂᑑ ᓴ ᓂᑲ ᐊᐯᓂᒧᓄᑕᐙ ᑫᔮᐱ ᒋᒦᑴᒋᐌᓂᒪᒃ, ᓂᒻᐱᒫᒋᐃᐌᒻ, ᓂᑭᔐᒪᓂᑑᒻ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society