Nikamonan 37 - ᐅᒋᐺ ᑭᒋᒪᓯᓇᐃᑲᓐᑫᐃᔑᓭᐙᒡ ᒣᒋᐃᔑᐌᐱᓯᐙᒡ, ᑲᔦ ᒣᓍᑎᓯᐙᒡ ᒦ ᐅᐌᓂ ᐯᔑᒃ ᑌᐱᑦ ᐅᓂᑲᒧᓐ 1 ᑫᑯ ᐅᒋ ᒥᑯᔥᑳᑌᑕᑫᓐ ᐃᐃ ᒣᒋᐃᔑᐌᐱᓯᐙᒡ, ᑫᑯ ᐊᔦᔐᓂᒫᑫᒀᓂᒃ ᐊᓅᒋᑯ ᐁᔑᒋᑫᐙᒡ᙮ 2 ᑖᐱᔥᑰ ᐅᔕ ᑳᔑ ᐹᑌᒃ ᒪᔥᑯᓯ, ᐐᐸ ᑕᐃᔑᓈᑯᓯᐗᒃ, ᑕᓂᐳᐗᒃ ᑖᐱᔥᑰ ᑳᔑ ᓂᐴᒪᑲᑭᓐ ᓀᑖᐎᑭᑭᓐ᙮ 3 ᑌᐺᔦᓂᒻ ᑳᑎᐯᒋᑫᒡ, ᒥᓄᑑᑕᓐ ᑲᔦ, ᐃᔑᑖᓐ ᐃᐃᒫ ᐊᑮᕽ ᐌᐌᓂ ᐱᓵᓐ ᒋᒪᒥᓄᑖᔭᓐ᙮ 4 ᓇᓈᑐᓀᐊᓐ ᒋᐅᒋ ᒧᒋᑫᑕᒪᓐ ᐃᐃᒫ ᑳᑎᐯᒋᑫᒡ ᐁᔑᐊᔮᒡ, ᑭᑲ ᒦᓂᒃ ᐃᑕᔥ ᐁᔑ ᒥᓴᐌᑕᒧᐗᒡ ᑭᑌᐃᕽ᙮ 5 ᐃᔑ ᐸᑭᑎᓇᒪᐤ ᑭᑎᔑᑣᐎᓐ ᑳᑎᐯᒋᑫᒡ; ᑌᐺᔦᓂᒻ ᒦᑕᔥ ᐅᐅ ᑫᐃᓯᒋᑫᒡ, 6 ᐅᑲ ᐃᔑᑑᓐ ᓴ ᑭᑾᔭᒀᑎᓯᐎᓐ ᑖᐱᔥᑰ ᑮᐲᑖᐸᒃ ᔑᑾ ᑾᔭᒃ ᑭᑑᑖᑫᐎᓐ ᒋᔑ ᓵᑳᑌᓈᑾᓂᓂᒃ ᑖᐱᔥᑰ ᑳᐃᔑᓈᑯᓯᒡ ᑮᓯᔅ ᑮᓈᐗᑴᒃ᙮ 7 ᑯᔥᒀᐙᒋᐊᔮᓐ ᐁᓈᓴᒦᒡ ᑳᑎᐯᒋᑫᒡ, ᔕᔒᐯᑕᓐ ᒋᐲᐊᒡ; ᑫᑯ ᐅᒋ ᒥᑯᔥᑳᑌᑕᑫᓐ ᑮᒥᓄᓭᒡ ᒪᒑᑎᓯᒡ, ᐊᐲ ᑮᐃᔑᒋᑫᐙᒡ ᐁᔑ ᒪᒋᐃᓀᑕᒧᐙᒡ᙮ 8 ᑫᑯ ᓂᔥᑳᑎᓯᑫᓐ, ᑫᑯ ᑲᔦ ᒥᑯᔥᑳᑌᑕᑫᓐ, ᒣᒋ ᑫᑰᓂᕽ ᐄᑐᒃ ᐃᐃ ᐃᔑᐎᔑᐌᒪᑲᓐ᙮ 9 ᒣᒑᑎᓯᐙᒡ ᓴ ᑕᐴᓂ ᐊᔮᐗᒃ, ᐃᑭ ᑕᔥ ᐐᓐ ᐁᐯᓂᒧᓄᑕᐙᐙᒡ ᑳᑎᐯᒋᑫᓂᒡ ᑕᑎᐱᓇᐌᐎᓯᐗᒃ ᐃᐃ ᐊᑭ᙮ 10 ᐋᐱᒋ ᓴ ᐐᐸ ᑕᐃᔑᓭᓂ ᒋᑭᑫᑖᑯᓯᓯᒀ ᒣᒑᑎᓯᐙᒡ, ᐋᓇ ᐌᐌᓂ ᓇᓈᑐᓀᐗᑣ ᑳᐐᓐ ᑭᑲ ᒥᑲᐙᓰᒃ᙮ 11 ᐊᐊ ᓴ ᐐᓐ ᑌᐸᓭᓂᒧᒡ ᑕᑎᐱᓇᐌᐎᓯ ᐊᑮᓂ, ᒋᑭᒋ ᒐᒌᑫᑕᕽ ᐱᓵᓐ ᒋᐊᔨᑖᒡ᙮ 12 ᒣᒑᑎᓯᒡ ᓴ ᐃᓀᑕᒻ ᑫᑰᓐ ᐁᐐ ᑑᑕᐙᒡ ᑴᔭᒀᑎᓯᓂᒡ, ᐁᒪᑗᑕᕽ ᐐᐱᑕᓐ ᐁᓂᔥᑫᓂᒫᒡ᙮ 13 ᑳᑎᐯᒋᑫᓂᒡ ᐃᑕᔥ ᐅᒥᒋ ᐹᐱᐃᑰᓐ, ᐋᓃᔥ ᐅᑭᑫᑕᒥᓂ ᐋᔕ ᑫᑳ ᐁᐅᒋᒋᓭᓂᒃ ᒋᓇᓇᐊᓯᑯᒡ᙮ 14 ᒣᒑᑎᓯᐙᒡ ᐃᑕᔥ ᐅᑭᑎᓈᓈᐙᓐ ᐅᐸᔑᐸᐃᑫᐎᑯᒫᓂᐙᓐ, ᐅᑑᓂᓈᐙᐞ ᑲᔦ ᐅᒥᑎᒀᐲᐙᐞ ᐁᐐ ᐱᒧᒋᑫᐙᒡ ᐁᐐ ᓂᓵᐙᒡ ᑳᑰᐹᑎᓯᓂᒡ, ᑫᑎᒫᑭᓯᓂᒡ ᑲᔦ, ᐁᐐ ᓂᓵᐙᒡ ᐃᐃ ᑾᔭᒃ ᐁᓈᑎᓯᓂᒡ᙮ 15 ᐐᓇᐙ ᐱᑯ ᐅᐸᔑᐸᐃᑫᐎᑯᒫᓂᐙᓐ ᒋᔕᐳᓭᓂᑭᓐ ᐅᑌᐃᐙᕽ᙮ ᑕᐴᑯᓭᐗᐞ ᑲᔦ ᐅᒥᑎᒀᐲᐙᐞ᙮ 16 ᓇᐗᒡ ᓴ ᓃᐱᐗᐞ ᐃᓀᑖᑾᓂᓂ ᐸᑮ ᑫᑰᓐ ᑳᐊᔮᒡ ᑴᔭᒀᑎᓯᒡ, ᐊᐲᒡ ᐐᓐ ᐁᔑ ᑭᒋ ᐌᓅᑎᓯᒡ ᒣᒑᑎᓯᒡ; 17 ᑕᐲᑯᓂᑳᑌᓂ ᓴ ᐁᔑ ᒪᔥᑲᐎᓰᐙᒡ ᒣᒑᑎᓯᐙᒡ; ᑳᑎᐯᒋᑫᒡ ᐃᑕᔥ ᐐᓐ ᐅᑲ ᑲᓇᐌᓂᒫᓐ ᑴᔭᒀᑎᓯᓂᒡ᙮ 18 ᑳᑎᐯᒋᑫᒡ ᓴ ᐅᑭᑫᑖᓐ ᐁᔑ ᑮᔑᑲᓂᔑᓂᒡ ᑫᑰᓐ ᐁᔑ ᐊᓈᒣᑖᑯᓯᓯᓂᒃ, ᑫᑎᐱᓇᐌᐎᓯᓂᒡ ᑲᔦ ᒋᓀᐱᒋ ᐊᔮᓂᒃ᙮ 19 ᑳᐐᓐ ᓴ ᑕᒫᔑᓭᓰᐗᒃ ᐊᐲ ᑭᒋ ᐃᔑᐌᐸᓂᓂᒃ; ᑕᐌᓅᒋᓭᐗᒃ ᑲᔦ ᐊᐲ ᓅᑌᓭᓂᒃ ᒦᒋᒻ᙮ 20 ᒣᒋᐃᔑᐌᐱᓯᐙᒡ ᐃᑕᔥ ᐐᓐ ᑕᓂᔑᐗᓈᑎᓯᐗᒃ; ᑳᑎᐯᒋᑫᒡ ᑳᔒᑫᓂᒥᑯᒡ ᓴ ᒦ ᐃ ᐁᔑ ᒥᓄᓈᑯᓯᓂᒡ ᑖᐱᔥᑰ ᐙᐱᑾᓃᓐ, ᒦᔥ ᐁᔑ ᐊᑯᓈᑾᓂᓂᑭᓐ ᑖᐱᔥᑰ ᑳᐹᔥᑭᓀᒃ᙮ 21 ᒪᒑᑎᓯᒡ ᓴ ᑮᒪᓯᓇᐊᒫᑫᒡ ᑳᐐᓐ ᑮᐌ ᑎᐸᐃᑫᓰ, ᑴᔭᒀᑎᓯᒡ ᐃᑕᔥ ᐐᓐ ᑳᐐᓐ ᒪᓈᒋ ᒦᑭᐌᓰ᙮ 22 ᐃᐃ ᓴ ᑳᑎᐯᒋᑫᒡ ᔐᐌᓂᒫᒡ ᑕᑎᐱᓇᐌᐎᓯᐗᐞ ᐊᑮᓂ, ᐃᐃ ᑕᔥ ᒣᒐᑭᒫᒡ ᑕᐴᓂ ᐊᔮᐗᐞ᙮ 23 ᑳᑎᐯᒋᑫᒡ ᓴ ᐅᑭᑭᓄᐎᓈᓐ ᐃᓂᓂᐗᓐ ᐋᑎ ᓇᑫ ᑫᐃᔖᓂᒡ, ᐅᑲᓇᐌᓂᒫᐞ ᑲᔦ ᐃᐃ ᒣᓍᐸᒫᒡ᙮ 24 ᒥᓴᐙ ᑯ ᐱᓱᑫᔑᓂᓂᒡ, ᑳᐐᓐ ᑕᐸᑭᔑᓯᐗᓐ, ᐋᓃᔥ ᑳᑎᐯᒋᑫᒡ ᐅᑖᓱᓈᓐ᙮ 25 ᓂᑮ ᐅᔥᑳᑎᔅ ᐃᓴ ᑫᓃᓐ, ᓅᑯᒻ ᐃᑕᔥ ᐋᔕ ᓂᑕᑭᐌᓰᐤ; ᔖᑰᒡ ᐃᑕᔥ ᑳᐐᓐ ᓂᐱᒥ ᐙᐸᒫᓰᒃ ᑴᔭᒀᑎᓯᒡ ᐃᓂᓂ ᒋᐌᐱᓂᓐᒡ, ᐅᓃᒑᓂᓴᐞ ᑲᔦ ᒋᐸᑯᔑᐃᐌᓂᒡ ᐸᑴᔑᑲᓐ᙮ 26 ᒦᐗᒃ ᐃᓴ ᐅᑯ ᑎᓄ ᐯᒫᑎᓯᐙᒡ ᐱᓵᓐ ᑳᒥᒋ ᐊᐎᐃᐌᐙᒡ ᑫᑰᓐ; ᐅᓃᒑᓂᓯᐙᐞ ᑲᔦ ᑕᔕᐌᑖᑯᓯᐗᐞ᙮ 27 ᓇᑲᑕᓐ ᒪᒋᑫᑰᓐ, ᐌᓂᔑᔑᒃ ᒋᓅᒋᑑᔭᓐ; ᒦᑕᔥ ᑭᐲᐌᓰᒪᒃ ᒨᔕᒃ ᐃᑯ ᑕᐃᔑᑖᐗᒃ ᐃᐃᒫ ᐊᑮᕽ᙮ 28 ᑳᑎᐯᒋᑫᒡ ᓴ ᐅᓵᑭᑑᓐ ᑴᔭᑴᑖᑾᓂᓂᒃ, ᑳᐐᓐ ᑲᔦ ᐅᐌᐱᓈᓰᐞ ᐯᒫᑎᓯᓂᒡ ᑌᐱᓇᐌᐎᓯᒡ; ᓀᐱᒡ ᓴ ᑯ ᐅᑲᓇᐌᓂᒫᐞ᙮ ᐅᓃᒑᓂᓯᓂ ᐃᑕᔥ ᐃᐃ ᒣᒑᑎᓯᓂᒡ ᑕᐴᓂ ᐊᔮᐗᐞ᙮ 29 ᑴᔭᒀᑎᓯᐙᒡ ᓴ ᑕᑎᐱᓇᐌᐎᓯᐗᒃ ᐊᑮᓂ, ᓀᐱᒡ ᐃᑯ ᒋᑖᓄᑕᒧᐙᒡ᙮ 30 ᑴᔭᒀᑎᓯᒡ ᓴ ᐐᑫ ᑲᑮᑖᐎᑮᔗ ᑮᑮᑭᑐᒡ, ᐌᐌᓂ ᑲᔦ ᐃᔑᑮᔗ᙮ 31 ᐅᑌᐃᕽ ᓴ ᐊᔮᓂ ᑭᔐᒪᓂᑑᓐ ᐅᑎᓈᑯᓂᑫᐎᓂᓂ; ᑳᐐᓐ ᑕᐱᔑᑸᓰ᙮ 32 ᐊᐊ ᑕᔥ ᑴᔭᒀᑎᓯᒡ ᐅᑕᑲᒫᑰᓐ ᒣᒑᑎᓯᓂᒡ ᐁᐐ ᑲᑴ ᓂᓯᑯᒡ᙮ 33 ᑳᐐᓐ ᐃᑕᔥ ᐅᑲ ᐸᑭᑎᓂᑯᓰᓐ ᑳᑎᐯᒋᑫᓂᒡ ᒋᑌᐱᓂᑯᒡ ᐃᓂ ᒣᔥᑲᐎᓰᓂᒡ ᑳᔒᑫᓂᒥᑯᒡ, ᑳᐐᓐ ᑲᔦ ᐅᑲ ᐸᑭᑎᓂᑯᓰᓐ ᒋᔖᑰᑖᑯᓂᓐᒡ ᐊᐲ ᑎᐹᑯᓂᓐᒡ᙮ 34 ᐲᐞ ᑳᑎᐯᒋᑫᒡ, ᑲᓇᐌᑕᒧᐤ ᐅᑎᔑᑣᐎᓐ; ᑭᑲ ᒦᓂᒃ ᓴ ᒋᑎᐱᓇᐌᐎᓯᐗᒡ ᐊᑮᓂ ᒋᓈᑯᑑᒡ ᐁᑭᑌᓂᒥᒃ, ᑭᑲ ᐙᐸᒫᒃ ᐃᑕᔥ ᒣᒋᐃᔑᐌᐱᓯᐙᒡ ᓂᑯᒋ ᒋᐃᓈᒧᑳᓂᑣ᙮ 35 ᓂᑮ ᐱᒥ ᐙᐸᒫ ᓴ ᒣᒋ ᐊᔮᒡ ᑫᒀᓂᓴᑭᓯᒡ ᑲᔦ ᐃᓂᓂ ᐁᐊᓂ ᒥᓯᑌᑭᒡ ᑖᐱᔥᑰ ᒥᑎᒃ ᐅᑕᑮᒥᕽ ᑳᔑ ᒥᓄᑭᒡ᙮ 36 ᐐᐸ ᑕᔥ ᑕᓂ ᐴᓂᓭ, ᑳᐐᓐ ᑕᑭᑫᑖᑯᓯᓰ; ᐋᓇᑮ ᓇᓈᑕᐙᐸᒪᒃ, ᑳᐐᓐ ᓂᑮ ᒥᑲᐙᓰ᙮ 37 ᐃᓇᔥᑫ ᑭᑭᓇᐙᓵᐸᒥᒃ ᐃᓂᓂ ᑫᑰᓐ ᐁᔑ ᐊᓈᒣᑖᑯᓯᓯᒃ, ᐊᐊ ᑲᔦ ᑴᔭᒀᑎᓯᒡ; ᐱᓵᓐ ᓴ ᐊᐊ ᑎᓄ ᐃᓂᓂ ᑕᓂ ᐱᒫᑎᓯ᙮ 38 ᒣᒑᑎᓯᐙᒡ ᐃᑕᔥ ᐐᓐ ᑲᑭᓇ ᑕᓂᔑᐗᓈᒋᒋᑲᓂᐎᐗᒃ; ᑕᐴᓂᓭᒋᑳᑌᓂ ᓴ ᑫᑮ ᐊᓂ ᐃᔑ ᐱᒫᑎᓯᐙᐸᓐ᙮ 39 ᑳᑎᐯᒋᑫᒡ ᓴ ᑳᐱᒫᒋᐋᒡ ᑴᔭᒀᑎᓯᓂᒡ, ᐐᓐ ᑲᔦ ᑳᓈᑕᒪᐙᒡ ᐊᐲ ᑮᐅᑎᓯᑯᓂᒡ ᒫᔑᓭᐎᓐ᙮ 40 ᑳᑎᐯᒋᑫᒡ ᑳᐐᒋᐋᒡ, ᐐᓐ ᑲᔦ ᑳᓈᑕᒪᐙᒡ; ᐋᓃᔥ ᐅᓈᒋᐸᐃᐙᓂᑰᐞ, ᒦᔥ ᑳᐅᒋ ᓈᑕᒪᐙᒡ, ᐌᒋ ᔖᐾᐋᒡ ᑲᔦ ᒋᐸᐹᒣᓂᒥᑯᓯᓂᒃ ᒣᒑᑎᓯᓂᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society