Nikamonan 27 - ᐅᒋᐺ ᑭᒋᒪᓯᓇᐃᑲᓐᒦᑴᒋᐎᐊᓇᒥᐋᐎᓐ ᒦ ᐅᐌᓂ ᐯᔑᒃ ᑌᐱᑦ ᐅᓂᑲᒧᓐ 1 ᑳᑎᐯᒋᑫᒡ ᐄᑐᒃ ᑳᐙᓭᔥᑲᒪᐎᒡ, ᑳᐱᒫᒋᐃᒡ ᑲᔦ, ᐊᐌᓀᓐ ᐃᑕᔥ ᑫᑯᓴᑭᐸᓐ? ᐐᓐ ᓴ ᑳᑲᓇᐌᑕᕽ ᓂᐱᒫᑎᓯᐎᓐ; ᑳᐐᓐ ᐃᑕᔥ ᓂᑲ ᑯᑖᒋᓰ᙮ 2 ᐊᐲ ᓴ ᒣᒑᑎᓯᐙᒡ, ᓀᑳᔥᑲᐎᐙᒡ ᑲᔦ, ᑳᔒᑫᓂᒥᐙᒡ ᑲᔦ, ᐁᐱ ᓈᓯᑲᐎᐙᒡ ᐁᐐ ᓂᔑᐙᒡ, ᑕᐱᓱᑫᔑᓅᒃ ᓴ ᒋᐸᑭᔑᓄᐙᒡ᙮ 3 ᒥᓴᐙ ᓴ ᑯ ᔑᒫᑲᓂᔕᒃ ᐙᑳᔥᑲᐎᐙᒡ, ᑳᐐᓐ ᓂᑌᐃᕽ ᓂᑲ ᐃᔑ ᓭᑭᓯᓰ; ᒥᓴᐙ ᑯ ᐱᒦᑳᔑᐙᒡ, ᒦ ᓴ ᐱᑯ ᐃ ᑫᔮᐱ ᑫᔑ ᑫᒋᓈᐅᐌᑕᒫᓐ᙮ 4 ᐯᔑᑾᔦᒃ ᓴ ᑫᑰᓐ ᓂᑮ ᑲᑴᒋᒫ ᑳᑎᐯᒋᑫᒡ ᐁᐊᑐᓀᐊᒧᐗᒃ; ᒋᐃᔑᑖᐗᒃ ᑳᑎᐯᒋᑫᒡ ᐅᐙᑳᐃᑲᓂᕽ ᒥᓂᒃ ᐃᑯ ᑫᐱᒫᑎᓯᐗᒃ, ᒋᐙᐸᑕᒧᐗᒃ ᑳᑎᐯᒋᑫᒡ ᐅᒥᓄ ᐃᔑᐊᔮᐎᓐ, ᒋᐊᓇᒥᐁ ᓈᓈᑲᑕᐌᑕᒧᐗᒃ ᑲᔦ ᐅᑭᒋ ᐊᓇᒥᐁᐎᑲᒥᑯᕽ᙮ 5 ᐊᐲ ᓴ ᑮᔑᑲᓂᓂᒃ ᐗᓯᑖᐎᓭᓂᒃ; ᐅᑭᒋ ᐊᓇᒥᐁᐎᑲᒥᑯᕽ ᓴ ᓂᑲᔑ ᑲᓇᐌᓂᒥᒃ; ᓂᑲ ᑳᓂᒃ ᓴ ᒋᐋᑲᐎᔑᒥᒡ ᐃᐃᒫ ᐅᑭᒋ ᐊᓇᒥᐁᐎᑲᒥᑯᕽ, ᐁᔑ ᐃᔥᐹᐱᑳᓂᒃ ᓂᑲᔑ ᐸᑭᑎᓂᒃ᙮ 6 ᒦᑕᔥ ᐃᐃ ᒋᔖᑰᒋᐊᒀ ᑳᔒᑫᓂᒥᐙᒡ ᑳᐙᑳᔥᑲᐎᐙᒡ; ᒦᔥ ᐅᐅ ᓇᑫ ᑫᔑ ᐸᑭᑎᓇᒪᐗᒃ ᐅᑭᒋ ᐊᓇᒥᐁᐎᑲᒥᑯᕽ ᒋᔖᔖᑯᐌᐗᒃ ᐁᒥᓉᑕᒧᐗᒃ; ᓂᑲ ᓂᑲᒻ, ᒋᐃᓇᐊᒫᓐ ᐁᒦᑴᒋᐌᓂᒪᒃ ᑳᑎᐯᒋᑫᒡ᙮ 7 ᐆ ᑌᐯᒋᑫᔭᓐ ᓅᑕᐎᔑᓐ ᑮᔖᑯᐙᓂᓈᓐ, ᑰᐹᓯᓇᐎᔑᓐ, ᓇᑴᑕᐎᔑᓐ ᑲᔦ᙮ 8 ᐊᐲ ᐅᐅ ᐁᐃᔑᔭᓐ, ᐊᑐᓀᐅᔑᓐ ᒋᐊᓇᒥᐁᑕᐎᔭᓐ, ᒦᔥ ᑳᐃᑭᑐᔮᓐ, ᐊᐤ ᑭᑲ ᐊᑐᓀᐅᓐ! 9 ᑫᑯ ᑳᓲᑕᐎᔑᑫᓐ! ᑫᑯ ᓂᑯᒋ ᐃᔑᓂᔕᐙᑫᓐ ᓃᓐ ᑭᑕᓄᑮᐋᑲᓐ ᐁᓂᔥᑳᑎᓯᔭᓐ; ᑮᓐ ᐄᑐᒃ ᑳᐱ ᐐᒋᐃᔭᓐ᙮ ᑫᑯ ᐋᓇᐌᓂᒥᔑᑫᓐ, ᑫᑯ ᑲᔦ ᐌᐱᓂᔑᑫᓐ, ᑭᔐᒪᓂᑑ ᓂᒻᐱᒫᒋᐃᐌᒻ! 10 ᐋᓇ ᓴ ᐐᓐ ᓂᑌᑌ, ᓂᒫᒫ ᑲᔦ ᐌᐱᓂᐙᒡ, ᑳᑎᐯᒋᑫᒡ ᐐᓐ ᓂᑲ ᐅᑖᐱᓂᒃ᙮ 11 ᐆ ᑌᐯᒋᑫᔭᓐ, ᑭᑭᓄᐊᒪᐎᔑᓐ ᑭᑎᔑᑣᐎᓐ, ᐃᔑ ᑭᑭᓄᐎᓂᔑᓐ ᐁᔑ ᑕᑕᒀᒃ ᒦᑲᓇ, ᐋᓃᔥ ᐅᓵᒻ ᐊᔮᐗᒃ ᑳᔒᑫᓂᒥᐙᒡ᙮ 12 ᑫᑯ ᐃᔑ ᐸᑭᑎᓂᔑᑫᓐ ᐁᔑ ᒥᓴᐌᑕᒧᐙᒡ ᑳᔒᑫᓂᒥᐙᒡ, ᓅᒋᑯ ᐙᐃᓈᒋᒥᐙᒡ ᐅᔕ ᓂᐐ ᐱ ᓈᓯᑳᑰᒃ, ᐁᐐᐃᔑᐙᒡ ᒋᓂᔑᐙᒡ᙮ 13 ᔖᑰᒡ ᐃᑕᔥ ᐅᐅ ᓂᑫᒋᓈᐞ ᒋᐅᑎᓵᐸᑕᒧᐗᒃ ᑳᑎᐯᒋᑫᒡ ᐅᑑᓂᔑᔐᑖᑯᓯᐎᓐ ᐅᐅᒫ ᐊᑮᕽ᙮ 14 ᐊᐯᓂᒧᓄᑕᐎᒃ ᑳᑎᐯᒋᑫᒡ, ᒪᔥᑲᐎᓰᒃ, ᒪᔥᑲᐌᑕᒨᒃ ᑭᑌᐃᐙᕽ; ᑌᐺ ᐊᐯᓂᒧᓄᑕᐎᒃ ᑳᑎᐯᒋᑫᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society