Nikamonan 22 - ᐅᒋᐺ ᑭᒋᒪᓯᓇᐃᑲᓐᐃᓂᓂ ᐁᔑᔖᑯᐌᒡ ᒋᓈᑕᒪᐎᓐᒡ, ᒦᑴᒋᐎᓂᑲᒧᓐ ᑲᔦ ᐁᑕᔑᑌᒃ ᒦ ᐅᐌᓂ ᐯᔑᒃ ᑌᐱᑦ ᐅᓂᑲᒧᓐ 1 ᓂᑭᔐᒪᓂᑑᒻ, ᓂᑭᔐᒪᓂᑑᒻ ᐌᑯᓀᓐ ᑳᑮᐅᒋ ᓇᑲᔑᔭᓐ? ᓂᑖᓇᑮ ᔖᑯᐌ, ᓂᑖᓇᑮ ᒧᑯᓀ ᑲᔦ ᐁᑲᓅᓂᓈᓐ ᒋᐐᒋᐃᔭᓐ, ᔖᑰᒡ ᑕᔥ ᐙᓴ ᑭᑕᔮ᙮ 2 ᐆ ᓂᑭᔐᒪᓂᑑᒻ, ᐁᑕᓱ ᑮᔑᒃ ᓴ ᑭᑖᓇ ᑲᓅᓂᓐ, ᐁᑕᓱ ᑎᐱᒃ ᑲᔦ, ᑳᐐᓐ ᑕᔥ ᑭᓇᑴᑕᐎᓰ, ᒦᑕᔥ ᑳᐅᒋ ᓂᐹᓯᐙᓐ᙮ 3 ᑮᓐ ᐄᑐᒃ ᑳᑭᒋᐅᑭᒫᐗᐱᔭᓐ ᑳᑭᑌᑖᑯᓯᔭᓐ, ᐃᔅᕒᐃᔭᓬᐊᒃ Israel ᑳᓂᑖ ᒦᑴᒋᐌᓂᒫᐙᒡ᙮ 4 ᓂᑫᑌᔭᐋᒥᓈᐸᓃᒃ ᐄᑐᒃ ᑭᑮ ᑌᐺᔦᓂᒥᑰᒃ; ᐁᑮ ᑌᐺᔦᓂᒥᒀ ᒦᔥ ᑳᐃᔑ ᐱᒫᒋᐊᑣ᙮ 5 ᐁᑮ ᔖᑯᐙᓂᒀ ᓴ, ᒦ ᐃ ᑳᐃᔑ ᐱᒫᒋᐊᑣ; ᐁᑮ ᑌᐺᔦᓂᒥᒀ ᓴ ᑳᑮ ᐅᒋ ᒥᒌᓇᐌᓯᓯᒀ᙮ 6 ᓃᓐ ᐃᑕᔥ ᐐᓐ ᑳᐐᓐ ᐃᓂᓃᕽ ᓂᑎᓄᐎᓰ, ᐅᑕᒸᐸᑴᓰᕽ ᓴ ᓂᑎᓄᐤ᙮ ᑲᑭᓇ ᓴ ᐊᐎᔭᒃ ᓂᑖᓇᐌᓂᒥᑰᒃ, ᓂᔒᑫᓂᒥᑰᒃ ᑲᔦ᙮ 7 ᑲᑭᓇ ᓴ ᑳᐙᐸᒥᐙᒡ ᓂᐹᐱᓄᑖᑰᒃ! ᓂᓵᑭᑌᓇᓂᐌᑖᑰᒃ ᑲᔦ, ᒦᔥ ᑲᔦ ᐁᔑ ᐌᐌᐱᑴᐸᓂᐅᐙᒡ ᐁᐃᔑᐙᒡ, 8 ᐁᐊᐯᓂᒧᓄᑕᐗᒡ ᐃᑕᔥ ᑳᑎᐯᒋᑫᒡ, ᐌᑯᓀᓐ ᑕᔥ ᐌᒋ ᐱᒫᒋᐃᓯᓄᒃ? ᐌᑯᓀᓐ ᑕᔥ ᑲᔦ ᐌᒋ ᐐᒋᐃᓯᓄᒃ ᐁᓵᑭᐃᒃ ᐃᑕᔥ ᑳᑎᐯᒋᑫᒡ? 9 ᑮᓐ ᐄᑐᒃ ᐌᐌᓂ ᑳᑮ ᓈᑲᒋᐃᔭᓐ ᑮᓂᑖᐎᑭᔮᓐ, ᐁᑮ ᐃᔑᐃᔭᓐ ᒋᐊᐯᓂᒧᓄᑕᐎᓈᓐ ᒣᒀ ᑮᓅᓂᐃᒡ ᓂᒫᒫ᙮ 10 ᑳᔑ ᐊᔮᔭᓐ ᓴ ᓂᑮ ᐃᔑ ᐸᑭᑎᓂᑰ ᑮᓂᑖᐎᑭᔮᓐ, ᐊᐲ ᓴ ᓂᒫᒫ ᑮᓂᑖᐎᑭᐃᒡ ᐁᑮ ᐅᒋ ᒫᒌ ᐅᑭᔐᒪᓂᑑᒥᒥᓈᓐ᙮ 11 ᑫᑯ ᑕᔥ ᐐᓐ ᐙᓴ ᑕᓀᑖᑯᓯᑫᓐ! ᒫᔑᓭᐎᓐ ᐅᔕ ᐋᔕ ᐯᔓᓈᑾᓐ, ᑳᐐᓐ ᑲᔦ ᐊᐎᔭ ᐊᔮᓰ ᑫᐐᒋᐃᐸᓐ᙮ 12 ᑳᔒᑫᓂᒥᐙᒡ ᓴ ᐋᐯ ᐱᔑᑮᕽ ᐁᓀᑖᑯᓯᐙᒡ ᐹᑏᓄᐗᒃ ᐁᐙᑳᔥᑲᐎᐙᒡ, ᑖᐱᔥᑰ ᑳᓲᑫᑖᑯᓯᐙᒡ ᐋᐯ ᐱᔑᑭᐗᒃ ᐯᔕᓐ Bashan ᐊᑮᕽ ᑳᐅᒌᐙᒡ᙮ 13 ᒦ ᓴ ᐁᔑ ᑖᐗᓂᐙᒡ ᑖᐱᔥᑰ ᒥᔑᐱᔑᐗᒃ, ᐁᑭᒋ ᓅᑖᑯᓯᐙᒡ ᐁᓀᑭᒧᐙᒡ ᐁᐐ ᐲᓯᐱᔑᐙᒡ᙮ 14 ᒦ ᓴ ᐃ ᐁᔑᓈᑯᓯᔮᓐ ᑖᐱᔥᑰ ᓂᐱ ᑳᓰᑭᓂᑳᑌᒃ, ᓂᑲᓇᓐ ᑲᔦ ᑲᑭᓇ ᓇᓇᓯᓭᐗᓐ ᑳᔑ ᐊᔮᓂᑲᐎᓯᑭᓐ᙮ ᓂᑌᐞ ᓴ ᓂᑭᑌ ᑖᐱᔥᑰ ᐱᒥᑌ ᐙᓴᑯᓀᒋᑲᓐ ᑳᔑ ᓂᑭᑌᒃ᙮ 15 ᐐᑫ ᓴ ᓂᐹᑯᑾᑕᔥᑴ ᑖᐱᔥᑰ ᐙᐱᑲᓇᑭᒃ, ᓂᑌᓇᓂᐤ ᑲᔦ ᔕᑲᔥᑭᓭ ᓂᓇᑲᔅᑯᕽ᙮ ᑭᑎᔑ ᐱᒥᔑᒥᔥ ᓴ ᒋᑕᔑ ᓂᐳᔭᓐ ᑳᔑ ᐹᔥᑭᓀᓭᒃ᙮ 16 ᐃᓂᓂᐗᒃ ᓴ ᐁᐅᑸᓄᐙᒡ ᓂᐙᑳᔥᑳᑰᒃ ᑖᐱᔥᑰ ᐊᓂᒨᒃ ᑳᐐ ᒦᑳᓱᐙᒡ; ᒦᑕᔥ ᐁᔑ ᐸᑯᓀᐊᒧᐙᒡ ᓂᓂᒌᓐ, ᓂᓯᑕᓐ ᑲᔦ᙮ 17 ᑲᑭᓇ ᓴ ᓂᑲᓇᓐ ᐙᐸᒋᑳᑌᐗᓐ᙮ ᑳᔒᑫᓂᒥᐙᒡ ᓴ ᓂᑲᓇᐙᐸᒥᑰᒃ, ᑳᐐᓐ ᑲᓇᑫ ᒋᐴᓈᐸᒥᐙᒡ᙮ 18 ᒦ ᑲᔦ ᐁᔑ ᓀᓈᐎᓇᒫᑎᐙᒡ ᓂᑭᑭᔥᑭᑲᓇᓐ, ᒦᔥ ᑲᔦ ᐁᔑ ᐊᐸᑭᒋᑫᐙᒡ ᐁᐊᑕ ᐸᓇᐊᒧᐙᒡ ᐊᐌᓀᓐ ᑫᐊᔮᒡ ᑳᓈᐱᔥᑲᒫᓐ᙮ 19 ᐆ ᑌᐯᒋᑫᔭᓐ, ᑫᑯ ᑕᔥ ᑮᓐ ᐙᓴ ᑕᓀᑖᑯᓯᑫᓐ! ᑮᓐ ᐄᑐᒃ ᑳᒪᔥᑲᐎᓰᔭᓐ, ᑕᑲ ᐌᔩᑉ ᐱᓈᑕᒪᐎᔑᓐ! 20 ᐱᒫᒋᐃᔑᓐ ᐸᔑᐸᐃᑫᐎᑯᒫᓂᕽ ᒋᐅᒋ ᓂᓯᑰᓯᐙᓐ; ᐱᒫᒋᑑᓐ ᓂᐱᒫᑎᓯᐎᓐ ᒋᓂᔑᓯᒀ ᐃᑭ ᐊᓂᒨᒃ᙮ 21 ᓈᑕᒪᐎᔑᓐ ᒋᒫᑾᒥᓯᒀ ᐅᑯ ᒥᔑᐱᔑᐗᒃ; ᓈᑕᒪᐎᔑᓐ ᐅᑯ ᐅᒋ ᑳᐅᑌᔥᑲᓂᐙᒡ ᐱᑾᒋ ᐋᐯ ᐱᔑᑭᐗᒃ᙮ 22 ᓂᑲ ᐐᑕᒪᐙᒃ ᓴ ᓃᒋᐱᒫᑎᓰᒃ ᐋᓃᓐ ᑳᐱ ᐃᔑᒋᑫᔭᓐ, ᑳᔑ ᒫᒪᐎ ᐊᔮᐙᒡ ᓴ ᑭᑲ ᑕᔑ ᒦᑴᒋᐌᓂᒥᓐ᙮ 23 ᒦᑴᒋᐌᓂᒥᒃ, ᑮᓇᐙ ᑳᑯᑖᓀᓂᒣᒃ ᑳᑎᐯᒋᑫᒡ! ᑭᑌᓂᒥᒃ, ᑮᓇᐙ ᑲᑭᓇ ᒉᑲᐴᕽ Jacob ᑳᐅᑕᑳᓀᓯᔦᒃ! ᐊᓇᒥᐁᑕᐎᒃ, ᑲᑭᓇ ᐃᔅᕒᐃᔭᓬᐃᑳᕽ ᑳᐅᑕᑳᓀᓯᔦᒃ! 24 ᑳᐐᓐ ᐅᔕ ᐅᑖᓇᐌᓂᒫᓰᐞ, ᑳᐐᓐ ᑲᔦ ᐅᔒᑭᓇᐙᓰᐞ ᑳᑲᒀᑕᑭ ᐋᑯᓯᓂᒡ᙮ ᑳᐐᓐ ᑲᔦ ᓂᑯᒋ ᐃᓇᑫ ᑕᔑ ᑴᑭᑳᐸᐎᓰ ᐁᔑᐊᔮᓂᒡ; ᐅᓅᑕᐙᐞ ᐄᑐᒃ ᑮᔖᑯᐙᓂᑯᒡ ᒋᐐᒋᐋᒡ᙮ 25 ᐌᑎ ᓴ ᑳᔑ ᒫᒪᐎ ᐊᔮᐙᒡ ᐃᔅᕒᐃᔭᓬᐊᒃ ᑭᑲ ᑕᔑ ᒦᑴᒋᐌᓂᒥᓐ ᐃᐃ ᐅᒋ ᑳᑮ ᐱ ᐃᔑᒋᑫᔭᓐ᙮ ᐁᔑ ᐊᔮᐙᒡ ᓴ ᐃᑭ ᑳᑯᑖᓀᓂᒥᒀ, ᒦ ᓴ ᐌᑎ ᑫᔑ ᐸᑭᑎᓈᓱᔮᓐ ᒋᐃᔑᒋᑫᔮᓐ ᑳᑮ ᐃᔑ ᐊᔓᑕᒫᐹᓐ᙮ 26 ᐃᑭ ᓴ ᑳᑭᑎᒫᑭᓯᐙᒡ ᑕᐐᓯᓂᐗᒃ, ᐐᑫ ᒋᒥᓄᒪᒋᐅᐙᒡ ᑫᐊᐲᒋ ᑌᐐᓯᓂᐙᒡ᙮ ᐃᑭ ᓴ ᑫᐱ ᓈᓯᑲᐙᐙᒡ ᑳᑎᐯᒋᑫᓂᒡ ᐅᑲ ᒦᑴᒋᐌᓂᒫᐙᓐ᙮ ᑕᑲ ᓴ ᒨᔕᒃ ᐃᑯ ᑕᒥᓄᓭᐗᒃ! 27 ᑲᑭᓇ ᓴ ᐯᒫᑎᓯᐙᒡ ᐅᐅᒫ ᒥᓯᐌ ᐊᑮᕽ ᑳᐊᔮᐙᒡ ᑕᒫᒥᑲᐎᐗᒃ, ᒦᑕᔥ ᑫᔑ ᑴᑮᓄᑕᐙᐙᒡ ᑳᑎᐯᒋᑫᓂᒡ᙮ ᑲᑭᓇ ᓴ ᑳᑕᓶᐙᓇᑭᓯᐙᒡ ᐯᒫᑎᓯᐙᒡ ᐅᑲ ᐊᓇᒥᐁᑕᐙᐙᓐ᙮ 28 ᑳᑎᐯᒋᑫᒡ ᐄᑐᒃ ᑭᒋᐅᑭᒫᐎ, ᐐᓐ ᑲᔦ ᐅᑎᐯᓂᒫᐞ ᑲᑭᓇ ᐁᑕᓶᐙᓇᑭᓯᓂᒡ ᐯᒫᑎᓯᓂᒡ᙮ 29 ᑲᑭᓇ ᓴ ᐊᐎᔭᒃ ᑳᑭᒋ ᐃᓀᓂᑎᓱᐙᒡ ᑕᐐᓯᓂᐗᒃ ᒋᐊᓂᒥᑯᑕᐙᐙᒡ ᑳᑎᐯᒋᑫᓂᒡ; ᑲᔦ ᑲᑭᓇ ᐃᑭᐌᓂᐗᒃ ᑫᓂᑾᐃᑲᓂᐎᐙᒡ ᓂᑾᐊᑳᓂᕽ ᑳᑲᔥᑭᑑᓯᒀ ᒋᐱᒫᑎᓰᐃᑎᓱᐙᒡ ᐅᑲ ᐊᓂᒥᑯᑕᐙᐙᓐ᙮ 30 ᑫᓂ ᐋᓂᑫ ᓂᑖᐎᑭᐙᒡ ᐯᒫᑎᓯᐙᒡ ᓴ ᐅᑲᓂ ᐊᓄᑮᑕᐙᐙᓐ ᑳᑎᐯᒋᑫᓂᒡ; ᑫᓂ ᓂᑖᐎᑭᐙᒡ ᓴ ᑕᓂ ᑕᔑᑕᒪᐙᐗᒃ ᑳᑎᐯᒋᑫᓂᒡ᙮ 31 ᐃᑭ ᑕᔥ ᒪᔑ ᓀᑖᐎᑭᓯᒀ ᐊᓂ ᐊᔮᐙᒡ ᑕᓂ ᐐᑕᒪᐙᐗᒃ ᑌᐯᒋᑫᓂᒡ ᐁᑾᔭᒀᑎᓯᓂᒡ ᐋᓃᓐ ᑳᐱ ᐃᔑᒋᑫᓂᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society