Nikamonan 19 - ᐅᒋᐺ ᑭᒋᒪᓯᓇᐃᑲᓐᑭᔐᒪᓂᑑ ᐅᑭᒋᐃᓀᑖᑯᓯᐎᓐ ᐁᓈᑾᓂᓂᒃ ᒦ ᐅᐌᓂ ᐯᔑᒃ ᑌᐱᑦ ᐅᓂᑲᒧᓐ 1 ᐌᑎ ᓴ ᑮᔑᑯᕽ ᐃᔑᓈᑾᓂᓂ ᑭᔐᒪᓂᑑ ᐅᑭᒋ ᐃᓀᑖᑯᓯᐎᓐ, ᐃᔥᐱᒥᕽ ᑭᑎᔑ ᐙᐸᑕᒧᐙᒥᓐ ᐋᓃᓐ ᑳᐃᔑ ᒫᒌᒡ᙮ 2 ᐁᔦᑕᓱ ᑮᔑᒃ ᓴ ᑭᐐᑕᒫᑯᒥᓐ, ᐁᔦᑕᓱ ᑎᐱᒃ ᑲᔦ ᑭᐙᐸᑕᐃᑰᒥᓐ ᒋᐅᒋ ᓂᓯᑕᐎᓇᒪᕽ᙮ 3 ᑳᐐᓐ ᐃᔑᑮᔗᐎᓐ, ᐃᑭᑐᐎᓇᓐ ᑲᔦ ᐋᐸᑕᓯᓅᓇᓐ, ᑳᐐᓐ ᑲᔦ ᒋᑭᔒᐌᒃ ᑫᑰᓐ ᓅᑖᑾᓯᓅᓐ᙮ 4 ᔖᑰᒡ ᐃᑕᔥ ᐅᑎᓈᒋᒧᐎᓂᐙ ᒥᓯᐌ ᐅᐅᒫ ᐊᑮᕽ ᐃᔖᒪᑲᓂᓂ, ᐁᑯᑭᔑᐹᓂᒃ ᐊᑮᕽ ᑲᔦ ᑌᐱᑖᑾᓂᓂ᙮ ᑭᔐᒪᓂᑑ ᓴ ᐅᑮ ᐅᔑᑕᒪᐙᓐ ᑮᓯᓲᓐ ᐃᔥᐱᒥᕽ ᑫᐃᔑᑖᓂᒡ᙮ 5 ᑮᓯᔅ ᓴ ᑮᐱ ᒨᑲᐊᕽ ᐁᑭᔐᐹᐗᑲᓂᓂᒃ, ᒦ ᓴ ᐁᔑᓈᑯᓯᒡ ᑖᐱᔥᑰ ᐃᓂᓂ ᑳᑭᒋ ᐐᑎᑫᒡ ᑳᒌᑫᑕᕽ, ᑖᐱᔥᑰ ᑲᔦ ᐅᑕᒥᓅᐎᓂᓂ ᑳᐐ ᓅᑌ ᑲᑴᒋᑲᔑᐌᒡ᙮ 6 ᐌᑎ ᓴ ᐃᓇᑫ ᓇᐸᓀ ᑮᔑᑯᕽ ᐅᒋ ᒨᑲᐊᒻ, ᐃᔥᐱᒥᕽ ᐁᐱᒥ ᐊᔮᒡ ᐲᓂᔥ ᐁᐊᓂ ᑕᑯᔑᕽ ᓇᐹᒋᓇᑫ ᑮᔑᑯᕽ ᐃᓇᑫ ᐁᐸᑭᔑᒧᒡ᙮ ᑲᑭᓇ ᑕᔥ ᑫᑰᓐ ᐊᓴᒫᑌᕽ ᐊᔮᒪᑲᓐ᙮ ᑳᑎᐯᒋᑫᒡ ᐅᑭᑭᓄᐃᑫᐎᓐ ᐁᑕᔑᑌᓂᒃ 7 ᑳᑎᐯᒋᑫᒡ ᐅᑎᓈᑯᓂᑫᐎᓇᓐ ᓴ ᐐᑫ ᑮᔑᓈᑾᓂᓂ, ᒦ ᓴ ᐃᐃᒫ ᐌᒋ ᒪᔥᑲᐙᑎᓯᒡ ᐊᒑᒃ᙮ ᐅᑎᑭᑐᐎᓇᓐ ᑲᔦ ᑌᐺᐌᑖᑾᓂᓂᐗᓐ, ᒦ ᐃᒫ ᐌᒋ ᒦᓂᑣ ᑲᑮᑖᐌᑕᒧᐎᓐ ᐃᑭ ᑳᓅᑌᓭᐙᒡ᙮ 8 ᐁᔑ ᑭᑭᓄᐊᒫᑫᒡ ᑲᔦ ᐐᑫ ᑾᔭᑴᑖᑾᓂᓂ, ᐃᑭ ᓴ ᑳᓇᐃᑕᒧᐙᒡ ᐐᑫ ᑕᒥᓉᑕᒨᒃ᙮ ᐅᑎᓈᑯᓂᑫᐎᓇᓐ ᑲᔦ ᐌᐌᓂ ᐃᔑᓯᓂᓂᐗᓐ, ᒦ ᐃᒫ ᐌᒌᒃ ᓂᓯᑐᑕᒧᐎᓐ᙮ 9 ᑳᔑ ᑯᑖᓀᓂᒥᓐᒡ ᑳᑎᐯᒋᑫᒡ ᐐᑫ ᐅᓂᔑᔑᓐ; ᑳᐐᓐ ᑲᔦ ᐐᑳ ᐃᐃ ᑕᐴᓂᓭᓯᓅᓐ᙮ ᐁᔑ ᑎᐹᑯᓂᐌᒡ ᑲᔦ ᐋᐱᒋ ᐌᐌᓂ ᐃᔑᓭᓂ; ᒨᔕᒃ ᑲᔦ ᑾᔭᒃ ᐃᔑᓭᓂ᙮ 10 ᒦᐗᓐ ᐄᑐᒃ ᐃᓂ ᓇᐗᒡ ᑳᒥᓴᐌᑖᑾᑭᓐ ᐊᐲᒡ ᐐᓐ ᒫᐗᒡ ᐃᑯ ᑳᐅᓂᔑᔑᒡ ᔔᓂᔮ ᐙᐱᒃ, ᒦᐗᓐ ᑲᔦ ᐃᓂ ᓇᐗᒡ ᑳᔒᐗᑭᓐ ᐊᐲᒡ ᐐᓐ ᑳᐃᔑ ᔒᐗᕽ ᐋᒨᐎ ᓰᓯᐹᑾᑦ᙮ 11 ᒦ ᓴ ᐃᒫ ᐌᑎᓇᒫᓐ ᑭᑫᑕᒫᐎᓐ, ᓃᓐ ᑭᑕᓄᑮᐋᑲᓐ, ᓂᑎᐸᐊᒫᑯ ᓴ ᐁᓇᐃᑕᒫᓐ ᐃᓂ ᐃᓈᑯᓂᑫᐎᓇᓐ᙮ 12 ᐊᐌᓀᓐ ᑫᑭᑫᑕᑭᐸᓐ ᐋᓃᓐ ᐁᔑ ᒪᒫᔒᒡ? ᑌᐯᒋᑫᔭᓐ, ᑕᑲ ᐯᑭᐃᔑᓐ ᑮᑭᑫᑕᓯᐙᓐ ᑮᒪᒋᑑᑕᒫᓐ᙮ 13 ᑲᓇᐌᓂᒥᔑᓐ ᑲᔦ ᑲᑳᒋᒡ ᒋᒪᒋᑑᑕᓯᐙᓐ ᑭᑕᓄᑮᐋᑲᓐ ᑳᑎᓄᐎᔮᓐ, ᒋᑎᐯᓂᒥᑯᓯᐙᓐ ᑲᔦ᙮ ᒦᑕᔥ ᐃᐃ ᒋᑮᔑᓈᑯᓯᔮᓐ ᒋᑎᐯᓂᒥᑯᓯᐙᓐ ᑲᑭᓇ ᒪᒋᑑᑕᒧᐎᓇᓐ᙮ 14 ᒦ ᓴ ᐁᔑ ᒥᓴᐌᓂᒥᓈᓐ ᒋᒥᓄ ᐅᑕᐱᓇᒪᓐ ᐅᐅ ᑳᐃᑭᑐᔮᓐ, ᐁᔑ ᓈᓈᑲᑕᐌᑕᒫᓐ ᑲᔦ ᓂᑌᐃᕽ ᑌᐯᒋᑫᔭᓐ, ᓂᒻᐱᒫᒋᐃᐌᒻ, ᐊᓯᓃᕽ ᐄᑐᒃ ᑭᑎᓀᓂᒥᓐ ᑮᓈᒋᐸᐃᐙᓂᓈᓐ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society